Roma 2

Sabafiʼ yɛ́ Mboʼmvé náʼá saba nɛ́

1Wo wɛ́ wo fiʼɛ pɔŋ nɛ́, kii wo pɛɛ ghɛmbɛ́ wɔ, tɛɛmbɛ́ wo naʼ mbé sǒ ndáŋ pó. Ŋkye ŋgâ wo ghɛ́ fiʼɛ cyó ŋɔŋ kɛ́ʼɛ́, fuŋɔ́ tómbəb wo, ŋkyé ŋgâ wo wɛ́ wo fiʼɛ ŋɔŋ nɛ́, puŋ yé kaa náá ke ŋgyɛ̌ taʼ no. 2Ntsʉʼŋgɛmbɛ́, piŋi zé ŋgâ Mboʼmvé ndɛ sabafiʼ pe ne ŋgerɛ́ŋged, ŋkyé pɔŋ pɛ́ pɔ́b faʼa yéré mbziʼe faʼ nɛ́. 3Wo wɛ́ wo fiʼɛ pɔŋ pɛ́ pɔ́b zhyɛ́ ŋkɔ́rɔ meno péré, ŋgɛ́mbɛ́ ke mbó ŋgyɛ́ yo pe néré nɛ́, wo kpaŋ ŋgâ wo náʼá ndzú pwó sabafiʼ Mboʼmvé? 4Kii wo coʼo yo pe pǔpfob Mboʼmvé yɛ́ a záá kaʼatɛ nɛ́? Kii gbâ ndzɔʼ yé, yɛ́ á záá kaʼatɛ nɛ́? Kii mbziʼe njʉ́ a fɛ́ pwó pɔŋ zááme kaʼatɛ kii tɔʼ nɛ́? Wo zhyɛ́ kɛ́ʼɛ́, ŋgɛmbɛ́ ŋgíí ŋgâ pǔpfob ye yéré, pɛ́ɛ́ ŋgâ mbziʼe yo séd? 5Mbziʼe njʉ́ wo tsé mbé psyɛ́ ndzoʼo nɛ́ pó, ke mbó mbé psyɛ́ sɛrɛ ndzɔʼ wo nɛ́ pó, wo súú pʉ̌ŋgye Mboʼmvé yé kəkwéʼe nɛ́, fɛ́ mbəb wo, yɛ́ a náʼá mbɛ zhyémve yɛ́ Mboʼmvé náʼá nyoʼo pʉ̌ŋgye yé nɛ́, mbó sabafiʼ né ŋgerɛ́ŋged nɛ́, 6zhyémve yéré yɛ́ Mboʼmvé náʼá nuʼɔ pwó ŋɔŋ, mbziʼe njʉ́ pwófaʼ yé kɛ ke mbé nɛ́. 7A pé nɛ́ njʉ́ á náʼá fɛ́ tsómvé ŋeŋáŋ pwó pɔŋ pɛ́ pɔ́b kɛ tséʼé shʉ̌ndzɔʼ ne ŋgyɛne no sʉ́ʼʉ, néré ne ntaʼne ghɛ́ɛ́, ŋgúʼune, ne yɔ́b yɛ́ á naʼ pfó nɛ́ pó. 8Ntsʉ́ʼmbé, á náʼá nyóʼó ndáá pʉ̌ŋgye yé, yé zááme mbəb pɔ́ŋ pɛ́, pɔ́b mǐtó, ŋkirɛ no ŋgerɛ́ŋged, a pó sáʼá mbwɔ̂ sáʼá wɔ́b nɛ́. 9Ŋgəʼo pú vəvod náʼá mbɛ pwó ntsyé ŋɔŋ wɛ́ a zhyɛ́ no kəpɔŋ nɛ́, ndzye mbəb ŋɔŋ Yúda ŋkɔŋ njʉbɛ mbəb ŋɔŋ Gerɛʼ. 10Ghɛ́ɛ́, ŋgúʼune ne mbúru náʼá mbɛ pwó ntsyé ŋɔŋ wɛ́ a zhyɛ́ no sʉ́ʼʉ nɛ́, ndzye mbəb ŋɔŋ Yúda ŋkɔŋ njʉbɛ mbəb ŋɔŋ Gerɛʼ. 11Ŋkyé ŋgâ Mboʼmvé ndɛ mbé tɔʼɔ ŋɔŋ pó. 12Ŋkɔŋɔ pɔŋ pɛ́ pɔ́b kɛ ghɛ́ ŋgyɛ́ no kəpɔŋ, mbé zɛ́ kaŋ Mǔsê nɛ́ pó, pɔ́b ŋkʉyo ke pfɔ́ kii kaŋ yéré fiʼɛ wɔ́b. Ntsʉʼ mbé, ŋkɔŋɔ pɔŋ pɛ́ pɔ́b ghɛ́ ŋgyɛ́ no kəpɔŋ, ndzɛ́ kaŋ Mǔsê nɛ́, a ŋkʉyo ke fiʼɛ kaŋ yéré fiʼɛ wɔ́b. 13Ŋkye ŋgâ, a pɔŋ pɛ́ pɔ́b zoʼo kaŋ nɛ́, mbé puŋgerɛ́ŋged siŋ Mboʼmvé pó. Ntsʉʼ mbé, a pɔŋ pɛ́ pɔ́b nyí njʉ́ kaŋ tsɔ́ nɛ́. 14Ŋkhoʼyɛ́ pɔŋ pɛ́ pɔ́b pɛ́ Yúda nɛ́ pó, pɔ́b pɛ́ pɔ́b zé kaŋ nɛ́ pó, zhyɛ́ meno pɛ kaŋ tsɔ́ nɛ́, pé ne tó yɔ́b, tsʉ́ʼŋgɛmbɛ njʉ́ pɔ́b zɛ kaŋ nɛ́ pó, a pe nɛ́ pe njʉ́ kaŋ yéré pɛɛ ndzó ndzɔʼ yɔ́b nɛ́. 15Yéré nyoʼo nɛ́ ŋgâ, yɔ́b yɛ́ kaŋ zɔŋɔ ŋgâ ŋɔŋ faʼa nɛ́, á ŋweʼemé ndzó ndzɔʼ yɔ́b. A zhyɛ́ yéré, sísíŋ yɔ́b, ntsʉ́ŋtsʉ́ŋ njʉ́ kpaŋató yɔ́b nɛ́, sáʼá wɔ́b pecyó ŋkhoʼ, kii ŋgâ ntsyɛnəŋ yɔ́b pecyó ŋkhoʼ. 16Ŋkəŋ sʉ́ʼʉ yɛ́ mə cʉ́rɛ nɛ́ tsɔ́ ŋgâ, ye ke nɛ́ no yɛ́ nɛ́, pe náʼá njʉ́ zhyémve yɛ́, Mboʼmvé náʼá ndǎ mbəb Yěsô Kristo, fiʼɛ meno ywʉ̂me pɛ, a ndzɔʼɔ tsómvé pumésɔŋ nɛ́.

A wɔ̂ mbé ndáá ŋúyúda

17Ntsʉʼmbé, a pɛɛ yɛ́ wo psyɛtíí ŋuyúda, ntɔʼɔ kpéé wo ndúŋú kaŋ, mbó tiʼe yo pe ne Mboʼmvé yo nɛ́, 18wo wɛ́ wo zé no yɛ́ Mboʼmvé zɔŋɔ nɛ́, wo wɛ́ wo kɛ zéʼ kaŋ, ndzɛ́ no sʉ́ʼʉ yɛ́ ŋɔŋ ntsɛʼɛ ne ŋgyɛ́ne nɛ́, 19wo wɛ́ wo cʉ̌yi ndzɛ́ ndzó ndzɔʼ yo ŋgâ, wo gbáá pwó pɛ ffǒme nɛ́, wo wɛ́ wo ŋkaʼmɔ́ɔ́ pɔ́ŋ pɛ́ pɔ́b ndzɔ́ʼɔ́ ndzə́ndzéb nɛ́, 20wo wɛ́ wo tʉ́ʉ́ pɔŋ pɛ́ pɔ́b fwɔ́ nɛ́, wo wɛ́ wo keʼeyáŋ pɔŋ pɛ́ pɔ́b zɛ́ cyó no nɛ́ pó, ŋkyé ŋgâ kaŋ zhyɛ́, wo tsuyi ntséʼe ndâ zé, mbó ndzɛ́ no sísíŋ. 21Ɔ́ŋɔ́! Wo wɛ́ wo tʉ́ʉ́ pecyó pɔŋ, kii tɛɛmbɛ wo pó tʉ́ʉ́ mbəb wo ne tómbəb wo nɛ́! Wo cʉ́rɛ ŋgâ kii pe ndɛ ndzwə́ə́, tsʉʼmbó ndzwə́ə́ yo ŋkyé kɔ́? 22Wo kirɛ pubɔndáá mbó púbɔndáá ŋkyé kɔ́? Wo paŋa pɛ ywoʼɔ́syé, mbó ndzwə́ə́ mɔ́b pɛ́ a twɔ́ yoʼo nɛ́ ŋkyé kɔ́? 23Wo tiʼe yo pe ne kaŋ, mbó mvɔ́ kaŋ niŋɛ pfɔshʉŋ tó Mboʼmvé ŋkyé kɔ́? 24ŋkyé ŋgâ, a ŋweʼéme ŋgâ: «A zhyɛ́ puŋ, pɔŋ pɛ́ pɔ́b pɛ Yúda nɛ́ pó, tó tíí Mboʼmvé.» 25A sísíŋ ŋgâ, mbzírine ŋɔŋ tséʼé ghebe, ŋkhoʼyɛ́ wo tsé nyí njʉ́ kaŋ tsɔ́ nɛ́ pó. Ntsʉʼmbé a pɛɛ yɛ́ wo psírime, mbé tsé nyí njʉ́ kaŋ tsɔ́ nɛ́ pó, mbǒ wo pe nɛ́ pe njʉ́, ŋɔŋ wɛ́ pe psirɛ wé nɛ́ pó. 26A pɛɛ yɛ́ ŋɔŋ wɛ́ pe psírɛ wé nɛ́ pó, nyí njʉ́ kaŋ tsɔ́ nɛ́, mbǒ tɛɛmbɛ́ Mboʼmvé pó sí wé ndzɔʼɔ pú psírime pɔɔ? 27Yé wɛ́ pé náá wé kaʼa, njʉ́ ŋgâ, a ŋɔŋ psírime nɛ́ pó, ntsʉʼŋgɛmbɛ́ nyí njʉ́ kaŋ tsɔ́ nɛ́, náʼá fiʼ wo, wo wɛ́, wo zɛ́ kaŋ yɛ́ pe ŋwéʼe nɛ́, pé pó mbzirɛ́ wo, ntsʉʼmbé wo vɔ kaŋ, nɛ́. 28Néré, a yɔ́b yɛ́ pe zhʉ́ ne mii nɛ́, ŋgyɛ́ ŋgâ ŋɔŋ pé ndǎ ŋuyúda pó, kii ŋgâ ŋkiŋi no yɛ́, pe zhʉ́ ndúŋú ndzǎbmbəb nɛ́, mbé psírɛ ŋɔŋ pó. 29Ntsʉʼmbé a yɔ́b yɛ́ a ywʉ̂me ndzó ndzɔʼ ŋɔŋ nɛ́, ŋgyɛ́ ŋɔŋ pɛ ŋuyúda, mbzírine ŋɔŋ pɛɛ ndzó zyé ndzɔʼ ŋɔŋ, yéré yɛ́ a twɔ́ pwó Zhʉyɛ́ Yáŋme mbé twɔ̌ pwó kaŋ yɛ́ pe ŋweʼe nɛ́ pó. Ye ke nɛ́ ŋɔŋ wɛ́ nɛ́ a kpéé wé ghɛ́ɛ́ pe pwó Mboʼmvé, mbé kpéé pwó pumésɔŋ nɛ́ pó.

Currently Selected:

Roma 2: XMG

Highlight

Copy