Matʉyo 8
8
Yěsô pɛ́d ŋgaŋakəkóó
(Máá 1:40-44; Lúk 5:12-14)
1Njʉ́ Yěsô kɛ tsé shʉyí ndúŋú ŋkə́ŋ yéré nɛ́, pɔŋ zááme zɔŋɔ wé. 2Taʼ ŋgaŋakəkóó nyí mbɛ́rɛ́ wé, mvɔ́ ne kpee mé, ntsɔ́ pwó yé ŋgâ: «Ntsɛɛpɔŋ, a pɛ́ɛ́ yɛ́ wo kʉ́yé nɛ́, mbǒ tɛɛmbɛ wo zhyɛ́ mə fwó.» 3Yěsô sí pwó yé kébɛ́ wé, ntsó ŋgâ: «Mə mbzyɛ́, fwó!» Kpaʼ ŋkhoʼyéré kəkóó myé mbəb yé. 4Yěsô sû ntəŋé yé, ntsɔ́ pwó yé ŋgâ: «Zhyáŋá nɛ́ njʉ́ wo mwɔ́ ntsɔ́ cyó no pwó ŋɔŋ nɛ́. Ntsʉʼmbé, ghú nyoʼ mbəb wo pwó ŋgaŋashʉ́, mbó fɛ́ shʉ́ njʉ́ kaŋ Mǔsê tsɔ́ nɛ́, ne kiŋi fwóne mo pwó ye.»
Psyɛ́ndzɔʼ ntsɛ́ssó kpíí káŋató pɛ Roma
(Lúk 7:1-10; Zhâ 4:46-54)
5Ŋkhoʼyɛ́ Yěsô kɛ kúŋɔ́ ndzó mbɛ́lʉ́ŋ Kapɛɛnawum nɛ́, taʼ ntsɛ́ssó mkpǐ káŋató pɛ Roma suʼú mbəb yé fɛ́ pfuŋ yé, mbóʼmbwó pwó yé 6ŋgâ: «Ntsɛɛpɔŋ, mkpaŋ ya nú nɛ́ ndáb, ywoʼɔ́mbəb yé pfó, a tsé njʉ́ ŋgəʼo kaʼatɛ.» 7Yěsô pɔ́rɔ́ pwó yé ŋgâ: «Mə ŋgú ŋgyɛ́ mbəb ye fwó.» 8Ntsʉʼmbé, ntsɛ́ssó mkpǐ káŋató wɛ́ pód ŋgâ: «Ntsɛɛpɔŋ, mə ŋkúʼú ŋɔŋ wɛ́ tɛɛmbɛ wo kúŋɔ́ ndáb yé nɛ́ pó. Ke ntsɔ́ɔ́ ndaʼ taʼ ndíí nsó, mkpaŋ ya fwó. 9Wo zé! Ŋɔŋ yóʼó wɛ́ a sáʼá ya nɛ́. Mə mbó ntséʼé pɛ káŋató pɛ mə sáʼá nɛ́. Mə mbé tɛ ntsɔ́ pwó taʼ yé ŋgâ: “Ghǔ!” A ké ŋgú néré. Ntsɔ́ɔ́ cyó ŋgâ: “Kʉ́yó!” A ké ŋkʉ́yó néré. Mbó ntsɔ́ɔ́ mkpaŋ ya ŋgâ: “Zhyɛ́ yɔŋ!” A ké ŋgyɛ́ néré.» 10Ŋkhoʼyɛ́ Yěsô kɛ zóʼ ntsó wéré nɛ́, a ghóʼ ntsɛ́ssó pɛ káŋató wéré. Séd mbəb yé, ntsɔ́ pwó pɔŋ pɛ pɔ́b kɛ zɔŋɔ wé nɛ́, ŋgâ: «Mə sə́ŋɛ wúŋ kpaʼ sísíŋ, mbɛ ndzɔ́ʼɔ́ ŋkɔŋɔ pɔŋ Issayɛ náá, mə kâ kɛ zhʉ́ psyɛ́ndzɔʼ njʉ́ yɔŋ nɛ́ pó. 11Ŋkʉ́rʉ́, mə ké mbó ŋgɛ̌ ntsɔ́ ne puŋ, pɔŋ zááme náʼá ntwɔ́ ne sáʼáménab, ntwɔ́ ne ntswɛɛ ménab, ŋgɔ́rɔ́ ywoʼɔ́ndína pwɛ Ábraham, pwɛ Izaʼ, pwɛ Yakɔb ndzó Nofɔŋ Mboʼmve pépéé. 12Ŋgɛmbɛ, pɔŋ pɛ́ Nofɔŋ Mboʼmve kɛ pe yɔ́b nɛ́, pé máʼá wɔ́b mvé ndzɔ́ʼɔ́ ndzə́ndzə́b, ywoʼ yɛ́ pe ŋkʉ́yó ntsɛ́ yóʼó ŋkhɔ́, pfɔrɔ sɔŋ nɛ́.» 13Yěsô pó ntsɔ́ pwó ntsɛ́ssó mkpǐ káŋató pɛ Roma wɛ́ ŋgâ: «Ghú ntswěndáb wo! Mboʼmve ŋgyɛ́ pwó wo njʉ́ psyɛ́ndzɔʼ yo ghú nɛ́.» Mkpaŋ yé wéré ké fwó kpaʼ ŋkhoʼyéré.
Yěsô pɛ́d mvɔ́b Pětro
(Máá 1:29-31; Lúk 4:38-39)
14Njʉ́ Yěsô kɛ ŋkúŋɔ́ ndáb Pětro nɛ́, a zhʉ́ mvɔ́b Pětro a nú, ghɔŋɔfóó pɛ mbəb yé. 15A kébé pwó yé, fóó twɔ́ mbəb yé. A ŋǎ syé ndzyě ne fǎʼne pwó yé.
Yěsô pɛ́d pɛ mbziʼe mbziʼe ghɔŋ
(Máá 1:32-34; Lúk 4:40-41)
16A pe ne ŋkhoʼfwɔ́nab, pe yɔ́ɔ́ pɔŋ zááme pɛ́ zhʉye kəpɔŋ kɛ pɛ́ mbəb pɔ́b nɛ́, ŋkʉ́yó ne wɔ́b pfúŋɔ́ Yěsô. A kɛ ke ntsɔ́ɔ́ taʼ ndíí ntsó, ndzú pɛ zhʉye kəpɔŋ péré núŋ, mbó mbɛ́rɛ́ ŋkɔŋɔ ghaŋághɔŋ náá, 17kɛ́ʼɛ́ ŋgâ tó no yɛ́ ŋgaŋatsɔ́kpaŋató Mboʼmvé Ezaya kɛ ntsó nɛ́, yúŋú. No yéré kɛ pɛ́ɛ́ ŋgâ: «A kpéé yé kpéé yɔ́ʼɔ́ piŋi pwɛ ghɔŋ piŋi, ŋkyɛ́.»
Mbziʼe njʉ́ pé ndzɔŋɔ Yěsô nɛ́
(Lúk 9:57-60)
18Ŋkhoʼyɛ́ Yěsô kɛ zhʉ́ pɔŋ zááme tɛ́rɛ́ pfúŋú yé nɛ́, a ntsó ŋgâ pe siʼá ne yiŋ ndzáʼ nse. 19Taʼ ŋgaŋákeʼekaŋ suʼú mbəb yé fɛ́ pfúŋɔ́ Yěsô, ntsɔ́ pwó ye ŋgâ: «Kéʼeyáŋ, mə ndzɔŋɔ wo ndzó ŋkɔŋɔ ywoʼ pɛ́ wo náʼá ŋgú náá nɛ́.» 20Yěsô tsɔ́ pwó ye ŋgâ: «Pɛ səb tséʼé mbéé mɔ́b, mbɛ péshʉŋ pépéé tséʼé yáʼ mɔ́b. Ntsʉʼmbé, zé nɛ́ ŋgâ Mɔ́ŋ ŋɔŋ tséʼé ywoʼɔ núŋɔ́ tó yé pó.» 21Cyó taʼ meŋkho yé ntsɔ́ pwó ye ŋgâ: «Ntsɛɛpɔŋ, psyɛ́ ŋgâ mə mbéé ŋgú ntsʉ́ tɛd ya ŋkɔ́ŋ.» 22Ntsʉʼmbé Yěsô tsɔ́ pwó yé ŋgâ: «Cʉ́ʼɔ́ ndzəb mo, tee pfɔ̂pɔŋ, tsʉ́ pfɔ̂pɔŋ pɔ́b!»
Yěsô mǐ fəfod pú nse
(Máá 4:31-41; Lúk 8:23-25)
23Yěsô kɔ́ʼɔ́ ndzó páŋ, ŋgíŋgye pé ke kɔ́ʼɔ́ yɔ́b ndzəb yé. 24Fǐme nɛ́, taʼ fəfod ntʉ̌ŋme tsé ndzáʼá ndúŋú kɔbɔnse nse, kaʼatɛ a kaa mɔ́ŋtiʼe metswəʼé fǐ páŋ. A kɛ ghɛmbɛ néré, Yěsô tsé ŋgyé. 25Pɔ́b suʼú mbəb yɔ́b fɛ́ pfuŋ yé, njʉ́ wé, ntsɔ́ ŋgâ: «Ntsɛɛpɔŋ! Ghebɛ ywí, piŋi kɛ pfó nɛ́ náá!» 26A ntsɔ́ ne pɔ́b ŋgâ: «Psyɛ́ndzɔʼ yúŋ khóó kaʼatɛ, a zhyɛ́ kɔ́ puŋ pɔ́ɔ́ kɛ́ʼɛ́?» Néré, a ŋǎ syé, mǐ fəfod pú nse, ywoʼ zhírí kaʼatɛ. 27Njʉ́ no kɛ ntsɛ́ɛ́ wɔ́b nɛ́, pɔ́b ntsó ŋgâ: «Yɔŋ wɛ́rɛ́ zhi ŋɔŋ kaʼatɛ mbɛ pɛ fəfod pwɛ nse zóʼó ntswee ye kaʼa!»
No pɔŋ pépáá pɛ zhʉye kəpɔŋ kɛ pɛ mbəb pɔ́b Gadareniya nɛ́
(Máá 5:1-20; Lúk 8:26-39)
28Njʉ́ Yěsô kɛ nyi kaʼatɛ mbáŋá ne yiŋ ndzáʼa, ndzó ŋgɔŋ Gadareniya nɛ́, pɔŋ pépáá pɛ́ zhʉye kəpɔŋ kɛ pɛ́ mbəb pɔ́b nɛ́, twɔ́ ndzó pɛ sye ŋkʉ́yó pfuŋ yé. Pɔ́b kɛ ncʉyó kaʼatɛ, tɛɛmbɛ ŋɔŋ po mbé záʼ mɛndɔ́b wéré ŋkʉ́rʉ́ pó. 29Pɔ́b nsé ntsé ŋgeʼe ŋgâ: «Mɔ́ŋ Mboʼmvé, wo zɔŋɔ kɔ́ ne psi? Wo kʉ́yó ne niŋine ywí ndzɔ́ʼɔ́ ŋgəʼo kii ŋkhoʼ zyé ŋkúʼɔ́?» 30A kɛ ghɛmbɛ tǎkpee ntíí ndii, kɛrɛ ŋkhúnab pɛ́ yóʼó, zó. 31Pɛ zhʉye kəpɔŋ péré póʼmbwó pwó Yěsô ntsɔ́ ŋgâ: «A pɛ́ɛ́ yɛ́ wo ndzú ywí nɛ́, wo zhyɛ́ psi kúŋɔ́ ndzɔ́ʼɔ́ kɛrɛ ŋkhúnab pɔŋ!» 32Yěsô tsɔ́ ne pɔ́b ŋgâ: «Puŋ ghú.» Pɔ́b twɔ́, ŋgú ŋkuŋɔ́ mbəb pɛ ŋkhúnab. Pɛ ŋkhúnab péré yɔ́ɔ́ ndéé ntwɔ́ ne gháá pɛrɛ paŋ vɔ́ nse, pfó. 33Pɛ mvyébkɛd yɔ́ɔ́ ndéé, ŋgú mbɛ́lʉ́ŋ, ndáʼ ŋkɔŋɔ meno péré náá, mbɛ no pɔŋ pɛ zhʉye kəpɔŋ kɛ pɛ mbəb pɔ́b nɛ́. 34Néré, ŋkɔŋɔ mbɛ́lʉ́ŋ náá twɔ́ ŋkʉ́yó ntserɛ Yěsô. Ŋkhoʼyɛ́ pɔ́b kɛ páŋá pfuŋ yé nɛ́, pɔ́b póʼmbwó pwó yé ŋgâ a ŋǎ ŋgɔŋ pɔ́b.
Currently Selected:
Matʉyo 8: XMG
Highlight
Share
Copy
Want to have your highlights saved across all your devices? Sign up or sign in
Matʉyo 8
8
Yěsô pɛ́d ŋgaŋakəkóó
(Máá 1:40-44; Lúk 5:12-14)
1Njʉ́ Yěsô kɛ tsé shʉyí ndúŋú ŋkə́ŋ yéré nɛ́, pɔŋ zááme zɔŋɔ wé. 2Taʼ ŋgaŋakəkóó nyí mbɛ́rɛ́ wé, mvɔ́ ne kpee mé, ntsɔ́ pwó yé ŋgâ: «Ntsɛɛpɔŋ, a pɛ́ɛ́ yɛ́ wo kʉ́yé nɛ́, mbǒ tɛɛmbɛ wo zhyɛ́ mə fwó.» 3Yěsô sí pwó yé kébɛ́ wé, ntsó ŋgâ: «Mə mbzyɛ́, fwó!» Kpaʼ ŋkhoʼyéré kəkóó myé mbəb yé. 4Yěsô sû ntəŋé yé, ntsɔ́ pwó yé ŋgâ: «Zhyáŋá nɛ́ njʉ́ wo mwɔ́ ntsɔ́ cyó no pwó ŋɔŋ nɛ́. Ntsʉʼmbé, ghú nyoʼ mbəb wo pwó ŋgaŋashʉ́, mbó fɛ́ shʉ́ njʉ́ kaŋ Mǔsê tsɔ́ nɛ́, ne kiŋi fwóne mo pwó ye.»
Psyɛ́ndzɔʼ ntsɛ́ssó kpíí káŋató pɛ Roma
(Lúk 7:1-10; Zhâ 4:46-54)
5Ŋkhoʼyɛ́ Yěsô kɛ kúŋɔ́ ndzó mbɛ́lʉ́ŋ Kapɛɛnawum nɛ́, taʼ ntsɛ́ssó mkpǐ káŋató pɛ Roma suʼú mbəb yé fɛ́ pfuŋ yé, mbóʼmbwó pwó yé 6ŋgâ: «Ntsɛɛpɔŋ, mkpaŋ ya nú nɛ́ ndáb, ywoʼɔ́mbəb yé pfó, a tsé njʉ́ ŋgəʼo kaʼatɛ.» 7Yěsô pɔ́rɔ́ pwó yé ŋgâ: «Mə ŋgú ŋgyɛ́ mbəb ye fwó.» 8Ntsʉʼmbé, ntsɛ́ssó mkpǐ káŋató wɛ́ pód ŋgâ: «Ntsɛɛpɔŋ, mə ŋkúʼú ŋɔŋ wɛ́ tɛɛmbɛ wo kúŋɔ́ ndáb yé nɛ́ pó. Ke ntsɔ́ɔ́ ndaʼ taʼ ndíí nsó, mkpaŋ ya fwó. 9Wo zé! Ŋɔŋ yóʼó wɛ́ a sáʼá ya nɛ́. Mə mbó ntséʼé pɛ káŋató pɛ mə sáʼá nɛ́. Mə mbé tɛ ntsɔ́ pwó taʼ yé ŋgâ: “Ghǔ!” A ké ŋgú néré. Ntsɔ́ɔ́ cyó ŋgâ: “Kʉ́yó!” A ké ŋkʉ́yó néré. Mbó ntsɔ́ɔ́ mkpaŋ ya ŋgâ: “Zhyɛ́ yɔŋ!” A ké ŋgyɛ́ néré.» 10Ŋkhoʼyɛ́ Yěsô kɛ zóʼ ntsó wéré nɛ́, a ghóʼ ntsɛ́ssó pɛ káŋató wéré. Séd mbəb yé, ntsɔ́ pwó pɔŋ pɛ pɔ́b kɛ zɔŋɔ wé nɛ́, ŋgâ: «Mə sə́ŋɛ wúŋ kpaʼ sísíŋ, mbɛ ndzɔ́ʼɔ́ ŋkɔŋɔ pɔŋ Issayɛ náá, mə kâ kɛ zhʉ́ psyɛ́ndzɔʼ njʉ́ yɔŋ nɛ́ pó. 11Ŋkʉ́rʉ́, mə ké mbó ŋgɛ̌ ntsɔ́ ne puŋ, pɔŋ zááme náʼá ntwɔ́ ne sáʼáménab, ntwɔ́ ne ntswɛɛ ménab, ŋgɔ́rɔ́ ywoʼɔ́ndína pwɛ Ábraham, pwɛ Izaʼ, pwɛ Yakɔb ndzó Nofɔŋ Mboʼmve pépéé. 12Ŋgɛmbɛ, pɔŋ pɛ́ Nofɔŋ Mboʼmve kɛ pe yɔ́b nɛ́, pé máʼá wɔ́b mvé ndzɔ́ʼɔ́ ndzə́ndzə́b, ywoʼ yɛ́ pe ŋkʉ́yó ntsɛ́ yóʼó ŋkhɔ́, pfɔrɔ sɔŋ nɛ́.» 13Yěsô pó ntsɔ́ pwó ntsɛ́ssó mkpǐ káŋató pɛ Roma wɛ́ ŋgâ: «Ghú ntswěndáb wo! Mboʼmve ŋgyɛ́ pwó wo njʉ́ psyɛ́ndzɔʼ yo ghú nɛ́.» Mkpaŋ yé wéré ké fwó kpaʼ ŋkhoʼyéré.
Yěsô pɛ́d mvɔ́b Pětro
(Máá 1:29-31; Lúk 4:38-39)
14Njʉ́ Yěsô kɛ ŋkúŋɔ́ ndáb Pětro nɛ́, a zhʉ́ mvɔ́b Pětro a nú, ghɔŋɔfóó pɛ mbəb yé. 15A kébé pwó yé, fóó twɔ́ mbəb yé. A ŋǎ syé ndzyě ne fǎʼne pwó yé.
Yěsô pɛ́d pɛ mbziʼe mbziʼe ghɔŋ
(Máá 1:32-34; Lúk 4:40-41)
16A pe ne ŋkhoʼfwɔ́nab, pe yɔ́ɔ́ pɔŋ zááme pɛ́ zhʉye kəpɔŋ kɛ pɛ́ mbəb pɔ́b nɛ́, ŋkʉ́yó ne wɔ́b pfúŋɔ́ Yěsô. A kɛ ke ntsɔ́ɔ́ taʼ ndíí ntsó, ndzú pɛ zhʉye kəpɔŋ péré núŋ, mbó mbɛ́rɛ́ ŋkɔŋɔ ghaŋághɔŋ náá, 17kɛ́ʼɛ́ ŋgâ tó no yɛ́ ŋgaŋatsɔ́kpaŋató Mboʼmvé Ezaya kɛ ntsó nɛ́, yúŋú. No yéré kɛ pɛ́ɛ́ ŋgâ: «A kpéé yé kpéé yɔ́ʼɔ́ piŋi pwɛ ghɔŋ piŋi, ŋkyɛ́.»
Mbziʼe njʉ́ pé ndzɔŋɔ Yěsô nɛ́
(Lúk 9:57-60)
18Ŋkhoʼyɛ́ Yěsô kɛ zhʉ́ pɔŋ zááme tɛ́rɛ́ pfúŋú yé nɛ́, a ntsó ŋgâ pe siʼá ne yiŋ ndzáʼ nse. 19Taʼ ŋgaŋákeʼekaŋ suʼú mbəb yé fɛ́ pfúŋɔ́ Yěsô, ntsɔ́ pwó ye ŋgâ: «Kéʼeyáŋ, mə ndzɔŋɔ wo ndzó ŋkɔŋɔ ywoʼ pɛ́ wo náʼá ŋgú náá nɛ́.» 20Yěsô tsɔ́ pwó ye ŋgâ: «Pɛ səb tséʼé mbéé mɔ́b, mbɛ péshʉŋ pépéé tséʼé yáʼ mɔ́b. Ntsʉʼmbé, zé nɛ́ ŋgâ Mɔ́ŋ ŋɔŋ tséʼé ywoʼɔ núŋɔ́ tó yé pó.» 21Cyó taʼ meŋkho yé ntsɔ́ pwó ye ŋgâ: «Ntsɛɛpɔŋ, psyɛ́ ŋgâ mə mbéé ŋgú ntsʉ́ tɛd ya ŋkɔ́ŋ.» 22Ntsʉʼmbé Yěsô tsɔ́ pwó yé ŋgâ: «Cʉ́ʼɔ́ ndzəb mo, tee pfɔ̂pɔŋ, tsʉ́ pfɔ̂pɔŋ pɔ́b!»
Yěsô mǐ fəfod pú nse
(Máá 4:31-41; Lúk 8:23-25)
23Yěsô kɔ́ʼɔ́ ndzó páŋ, ŋgíŋgye pé ke kɔ́ʼɔ́ yɔ́b ndzəb yé. 24Fǐme nɛ́, taʼ fəfod ntʉ̌ŋme tsé ndzáʼá ndúŋú kɔbɔnse nse, kaʼatɛ a kaa mɔ́ŋtiʼe metswəʼé fǐ páŋ. A kɛ ghɛmbɛ néré, Yěsô tsé ŋgyé. 25Pɔ́b suʼú mbəb yɔ́b fɛ́ pfuŋ yé, njʉ́ wé, ntsɔ́ ŋgâ: «Ntsɛɛpɔŋ! Ghebɛ ywí, piŋi kɛ pfó nɛ́ náá!» 26A ntsɔ́ ne pɔ́b ŋgâ: «Psyɛ́ndzɔʼ yúŋ khóó kaʼatɛ, a zhyɛ́ kɔ́ puŋ pɔ́ɔ́ kɛ́ʼɛ́?» Néré, a ŋǎ syé, mǐ fəfod pú nse, ywoʼ zhírí kaʼatɛ. 27Njʉ́ no kɛ ntsɛ́ɛ́ wɔ́b nɛ́, pɔ́b ntsó ŋgâ: «Yɔŋ wɛ́rɛ́ zhi ŋɔŋ kaʼatɛ mbɛ pɛ fəfod pwɛ nse zóʼó ntswee ye kaʼa!»
No pɔŋ pépáá pɛ zhʉye kəpɔŋ kɛ pɛ mbəb pɔ́b Gadareniya nɛ́
(Máá 5:1-20; Lúk 8:26-39)
28Njʉ́ Yěsô kɛ nyi kaʼatɛ mbáŋá ne yiŋ ndzáʼa, ndzó ŋgɔŋ Gadareniya nɛ́, pɔŋ pépáá pɛ́ zhʉye kəpɔŋ kɛ pɛ́ mbəb pɔ́b nɛ́, twɔ́ ndzó pɛ sye ŋkʉ́yó pfuŋ yé. Pɔ́b kɛ ncʉyó kaʼatɛ, tɛɛmbɛ ŋɔŋ po mbé záʼ mɛndɔ́b wéré ŋkʉ́rʉ́ pó. 29Pɔ́b nsé ntsé ŋgeʼe ŋgâ: «Mɔ́ŋ Mboʼmvé, wo zɔŋɔ kɔ́ ne psi? Wo kʉ́yó ne niŋine ywí ndzɔ́ʼɔ́ ŋgəʼo kii ŋkhoʼ zyé ŋkúʼɔ́?» 30A kɛ ghɛmbɛ tǎkpee ntíí ndii, kɛrɛ ŋkhúnab pɛ́ yóʼó, zó. 31Pɛ zhʉye kəpɔŋ péré póʼmbwó pwó Yěsô ntsɔ́ ŋgâ: «A pɛ́ɛ́ yɛ́ wo ndzú ywí nɛ́, wo zhyɛ́ psi kúŋɔ́ ndzɔ́ʼɔ́ kɛrɛ ŋkhúnab pɔŋ!» 32Yěsô tsɔ́ ne pɔ́b ŋgâ: «Puŋ ghú.» Pɔ́b twɔ́, ŋgú ŋkuŋɔ́ mbəb pɛ ŋkhúnab. Pɛ ŋkhúnab péré yɔ́ɔ́ ndéé ntwɔ́ ne gháá pɛrɛ paŋ vɔ́ nse, pfó. 33Pɛ mvyébkɛd yɔ́ɔ́ ndéé, ŋgú mbɛ́lʉ́ŋ, ndáʼ ŋkɔŋɔ meno péré náá, mbɛ no pɔŋ pɛ zhʉye kəpɔŋ kɛ pɛ mbəb pɔ́b nɛ́. 34Néré, ŋkɔŋɔ mbɛ́lʉ́ŋ náá twɔ́ ŋkʉ́yó ntserɛ Yěsô. Ŋkhoʼyɛ́ pɔ́b kɛ páŋá pfuŋ yé nɛ́, pɔ́b póʼmbwó pwó yé ŋgâ a ŋǎ ŋgɔŋ pɔ́b.
Currently Selected:
:
Highlight
Share
Copy
Want to have your highlights saved across all your devices? Sign up or sign in