Matʉyo 6
6
Yěsô fɛ́ ntʉ́ʉ́ ne ghebe pǔndzɔʼ
1Yěsô ké mbó ntsó ŋkʉ́rʉ́ ŋgâ: «Puŋ zhyaŋa ne ŋgyɛ́ne no psyɛ́ndzɔʼ yúŋ síŋ pumésɔŋ, kɛ́ʼɛ́ ŋgâ pɔ́b zhʉ́ wúŋ. Mbǒ puŋ náʼá ntséʼé tsɔʼɔfaʼ yúŋ síŋ Tɛd wúŋ, yé wɛ́ á pépéé nɛ́, pó. 2Ŋkhoʼyɛ́ wo tsé fɛ́ yɔ́b pwó mbɔ́ŋ nɛ́, wo ndɛ tú ntaŋ njʉ́ pɛ ŋkʉyémíí zhyɛ́ ndzó pɛ ndántéré pɛ Yúda pwɛ pɛ záŋ, kɛ́ʼɛ́ ŋgâ pɔŋ ghóʼó wɔ́b nɛ́. Kpaʼ sísíŋ, mə səŋɛ wúŋ ŋgâ, pɔ́b kɛ tséʼé tsɔʼɔfaʼ yɔ́b. 3Ŋgɛmbɛ ne wo, ŋkhoʼyɛ́ wo tsé fɛ́ yɔ́b pwó mbɔ́ŋ nɛ́, wo ndɛ ŋgyɛ́ njʉ́ ŋɔŋ ndzɛ́ yɔ́b yɛ́ wo fɛ́ nɛ́, a pɛ́ɛ́ mbɛ wɔ́! 4Yânéré ŋgâ ghebe pǔndzɔʼ yo pe ywʉ̂me. Kɛ́ʼɛ́ ŋgâ, Mboʼmve, Tɛd wo wɛ́, a zhʉ́ mbɛ meno pɛ́ pé ywʉ ywʉ́ nɛ́, náʼá nuʼɔ́ pwó wo.»
Mbziʼe njʉ́ tɛɛmbɛ wo tsɛ́ʼɛ́ Mboʼmve nɛ́
5Yěsô ké mbó ntsó ŋgâ: «Ŋkhoʼyɛ́ puŋ tsé ntsɛ́ʼɛ́mboʼmvé nɛ́, puŋ ndɛ ŋgyɛ́ njʉ́ pɛ ŋkʉyémíí pɛ pɔ́b kʉ́yé nséne ntsó ndzó pɛ ndántéré pwɛ ntʉʼé mɛndɔ́b ntsɛ́ʼɛ́mboʼmvé, kɛ́ʼɛ́ ŋgâ pɔŋ zhʉ́ wɔ́b nɛ́. Kpaʼ sísíŋ, mə səŋɛ wúŋ ŋgâ pɔ́b kɛ tséʼé tsɔʼɔfaʼ yɔ́b. 6Ŋgɛ ŋkhú ne wo, ŋkhoʼyɛ́ wo zɔŋɔ ntsɛ́ʼɛ́mboʼmvé nɛ́, ŋkúŋɔ́ ndzaʼandáb wo yé sə̌me, fûŋ ntswee yé, ntsɛ́ʼɛ́mboʼmvé, Tɛd wo wɛ́ a yóʼó ndzó ywoʼɔ́zhibɛ́ nɛ́. Tɛd wo wɛ́, a zhʉ́ ndzó ywoʼɔ́zhibɛ́ nɛ́, náʼá núʼɔ́ pwó wo. 7Ŋkhoʼyɛ́ puŋ tsé ntsɛ́ʼɛ́mboʼmvé nɛ́, puŋ ndɛ mbziʼɛ́ ntsó psíʼí njʉ́ pɛ kiizɛ́mboʼmvé nɛ́. Pɔ́b kpáŋa ŋgâ pɔ́b mbziʼɛ́ ntsó kɛ́ʼɛ́ ŋkɔŋ, Mboʼmve pɔrɔ́ ndzóʼó wɔ́b. 8Puŋ ndɛ fúʼɔ wɔ́b nɛ́, ŋkyé ŋgâ yɔ́b yɛ́ puŋ zɔŋɔ nɛ́, Mboʼmve Tɛd wuŋ, pě ndzé yɔ́b yɛ́ a kǎ wúŋ nɛ́ ŋkɔ́ŋ, puŋ pɔ́rɔ́ ndɔ́ŋɔ́ pwó ye.»
Tséʼé yɛ́ Yěsô kɛ nyoʼ nɛ́
(Lúk 11:2-4)
9«Ŋgɛ ŋkhu ne puŋ, puŋ ntsɛ́ʼɛ́ Mboʼmvé pe kaʼa:
Tɛd ywí, wo wɛ́ wo pépéé nɛ́,
Zhyɛ́ ŋkɔŋɔ pɔŋ náá ghúʼú tíí wo.
10Zhyɛ́ ŋgâ Nofɔŋ wo kʉ́yó,
Zhyɛ̂ ŋkɔŋɔ ndúŋú tsetsáʼ náá zhyɛ́ no yɛ́ wo zɔŋɔ nɛ́
Syé ghaŋ, njʉ́ a pépéé nɛ́.
11Fɛ́ mwɔ̌zó ne psi ndzebe njʉ́ a ŋkhúʼɔ́ mbəb psi nɛ́,
12Máʼ vɔ̌no pɛ́ psi vɔ mbəb wo nɛ́,
Njʉ́ kpaʼ psi, psi ke máʼa yé pɔŋ pɛ́ pɔ́b mvɔ́no mbəb psi nɛ́.
13Kii pó mbzyɛ́ ŋgâ kəpɔŋ kpɛ́ʼɛ́ ywí!
Ntsʉʼmbé, kpéé ywí pwó ŋgaŋakpeʼe.
14Ŋkyé ŋgâ, a pɛ́ɛ́ yɛ́ puŋ máʼ kəpɔŋ pɔŋ nɛ́, mbǒ Mboʼmve Tɛd wuŋ wɛ́ a pépéé nɛ́, ke ŋkʉ́yó máʼ vɔ̌no púŋ. 15Ntsʉʼmbé, a pɛ́ɛ́ yɛ́ pǔŋ máʼ vɔ̌no pɔŋ nɛ́ pó, mbǒ Mboʼmve Tɛd wuŋ ke mbé máʼ yúŋ vɔ̌no ndɔ́ɔ́ wúŋ pó.»
Mbziʼe njʉ́ puŋ ndzɛ́ nse nɛ́
16«Ŋkhoʼyɛ́ puŋ tsé ndzɛ́ nse nɛ́, kii puŋ ndɛ tsé ŋɛbɛ záŋ yúŋ, njʉ́ pɛ pépwɔmíí zhyɛ́ nɛ́: pɔ́b ŋuʼɔ záŋ yɔ́b ne nyǒʼne pwó pɔŋ ŋgâ pɔ́b tsé ndzɛ nse. Kpaʼ sísíŋ, mə səŋɛ wúŋ ŋgâ, pɔ́b kɛ tséʼé ntsɔ́ʼɔ́faʼ yɔ́b. 17Ŋgɛmbɛ ne wo, ŋkhoʼyɛ́ wo tsé ndzɛ́ nse nɛ́, sǒ záŋ yo, nǔʼ tó wo ne vód tswɔtwɔ́, 18yânéré ŋgâ pɔŋ ndɛ ndzé ŋgâ wo tsé ndzɛ́ nse. Ntsʉʼmbé, ndaʼ Mboʼmve Tɛd wo, wɛ́ a ndzó ywoʼɔ́zhibɛ́ nɛ́, ze. Tɛd wo wɛ́, a zhʉ́ ndzó ywoʼɔ́zhibɛ́ nɛ́, náʼá núʼɔ́ pwó wo.»
Foʼ yɛ́ a pépéé nɛ́
(Lúk 12:33-34)
19«Puŋ ndɛ ndɛrɛ́ yuŋ foʼ pe ndúŋú tsetsáʼ, ywoʼ yɛ́ ŋgɔ́ʼ pwɛ fuʼ shʉbɛ mɔ́b nɛ́. Ywoʼ yɛ́ gháŋagháŋ ntsú tsindáb, ndzwə́ə́ nɛ́. 20Ntsʉʼmbé puŋ yɛ́rɛ yuŋ foʼ pe pépéé. Ywoʼ yɛ́ ŋgɔ́ʼ kii fuʼ tsé mbé shʉbɛ mɔ́b nɛ́ pó. Ywoʼ yɛ́ gháŋagháŋ tsé mbé tsú tsindáb kii pó tsé ndzwə́ə́ nɛ́. 21Ŋkyé ŋgâ ywoʼ yɛ́ foʼ wo yóʼó nɛ́, ndzɔʼ yo ke mbɛ́ɛ́ yóʼó.»
Mbəb wo pɛ ndzɔ́ʼɔ́ ndáŋne
(Lúk 11:34-36)
22Yěsô ké mbó ntsó ŋkʉ́rʉ́ ŋgâ: «Mbzítíí wo lámbo mbəb wo. A pɛ́ɛ́ yɛ́ mbzítíí wo sʉ́ʼʉ nɛ́, mbǒ ŋkɔŋɔ mbəb wo náá ke mbɛ́ ndzɔ́ʼɔ́ ndáŋne. 23Ntsʉʼmbé, a pɛ́ɛ́ yɛ́ mbzítíí wo tsé ndzuʼú wo nɛ́, mbǒ ŋkɔŋɔ mbəb wo náá ke mbɛ́ɛ́ ndzɔ́ʼɔ́ ndzə́ndzə́b. A pɛ́ɛ́ yɛ́ ndáŋne mɛ́ a mbəb yé nɛ́ ntsʉ́ʼ ndzə́ndzə́b nɛ́, mbǒ yéré ndzə́ndzə́b mbɛ́ɛ́ níŋ!»
Fǎʼne pwó Mboʼmve kii fǎʼne pwó mbób
(Lúk 16:13)
24«Tɛɛmbɛ ŋɔŋ pe fáʼa pwó Ntsɛɛpɔŋ pépáá taʼ kɛɛ pó. Mbǒ a mbáŋá taʼ ye kʉ́yé cyó, kii ŋgâ a ndɛ́rɛ́ mbəb taʼ ye gbáŋá cyó. Tɛɛmbɛ puŋ pe fáʼa pwó Mboʼmvé pú mbób taʼ kɛɛ pó.»
Pɛ kpaŋató
(Lúk 12:22-31)
25«A zhyɛ́ yéré mə ntsɔ́ ne puŋ ŋgâ puŋ ndɛ tse ntsuŋɛ ŋkyé tsómvé yúŋ, ŋgâ puŋ ndzɔ́ɔ́ kɔ́, kii ŋkyé mbəb yuŋ ŋgâ puŋ gbéé kɔ́? ŋkyé ŋgâ, tsómvé tséʼé ghebe kaʼatɛ tsɛ́ɛ́ mwɔ̌zó, mbəb pó tséʼé ghebe kaʼatɛ tsɛ́ɛ́ ndzwé. 26Puŋ tiŋí pɛ péshʉŋ pépéé njʉ́! Pɔ́b tsé mbé pfɛ́ mɔ́b pó, kii pó tsé ŋkaba! Pɔ́b tsé mbé yɛ́rɛ́ mɔ́b ndzó pɛ ntaŋ pó! Tɛd wúŋ pépéé ntsʉ́ʼ ntsé njʉyí wɔ́b! Puŋ tséʼé ghebe kaʼatɛ ntsɛ́ɛ́ péshʉŋ pɔɔ? 27A wɔ́ tsetsɛrɛ puŋ wɛ́ tɛɛmbɛ ntsúŋine mé pfǐ tsómvé yé mbɛ ne mɔ́ŋtiʼa ŋkhoʼ nɛ́? 28Ŋgɛmbɛ ne no ndzwé, puŋ ntsuŋɛ ŋkyé kɔ́? Puŋ náá pɛ fɛlɛwa ndzó pɛ mvíínab njʉ́ pɔ́b ghóʼó nɛ́, pɔ́b tsé mbé fáʼa kii pó tsé ntsuwɔ ndzwé pó! 29Mə ntsʉ́ʼ ntsɔ́ ne puŋ ŋgâ: tómbəb fɔŋ Salomɔŋ, ndzɔ́ʼɔ́ ŋkɔŋɔ ghɛ́ɛ́ yé náá, kɛ pé gbéé ndzwé njʉ́ taʼ fɛlɛwa yéré nɛ́ pó. 30A pɛ́ɛ́ yɛ́ Mboʼmvé gbéé mkpeegháŋ mpfuŋ kɛ́ʼɛ́, mkpeegháŋ yɛ́ a mpfuŋ ndzebé, nǐmwɔ pé ghɛ́ ntɔ́ŋɔ́ ne mɔ́ɔ́ nɛ́, tɛ ŋkɛ́ɛ́ yíkɔ́ ne puŋ? Psyɛ́ndzɔʼ yúŋ khóó kaʼatɛ! 31Kii puŋ ndɛ ntsé gbíí mbəb yúŋ nɛ́, ntsɔ́ ŋgâ: “Psi ndzɔ́ɔ́ kɔ́? Psi nɔ́ɔ́ kɔ́? Psi gbéé kɔ́?” 32Ŋkɔŋɔ mɔ́b péré náá, a taʼa kiizɛ́mboʼmvé kii káŋ. Tɛd wúŋ wɛ́ a pépéé nɛ́, tsʉ́ʼ zé ŋkɔŋɔ mɔ́b péré pɛ́ a tsé ŋkǎ wuŋ nɛ́. 33Puŋ pě ntáʼ Nofɔŋ Mboʼmvé pwɛ meno pɛ́ a ŋgerɛ́ŋged siŋ ye nɛ́ ŋkɔŋ, kɛ́ʼɛ́ ŋgâ a záʼá ndúŋú fɛ́ ŋkɔŋɔ ye náá ne puŋ. 34Puŋ ndɛ tsé gbíí mbəb yuŋ ŋkyé nǐmwɔ́. Nǐmwɔ́ tséʼé ye no ne tómbəb yé, ŋkyé ŋgâ no ke mbɛ ne yé zhyémve.»
Currently Selected:
Matʉyo 6: XMG
Highlight
Share
Copy
Want to have your highlights saved across all your devices? Sign up or sign in
Matʉyo 6
6
Yěsô fɛ́ ntʉ́ʉ́ ne ghebe pǔndzɔʼ
1Yěsô ké mbó ntsó ŋkʉ́rʉ́ ŋgâ: «Puŋ zhyaŋa ne ŋgyɛ́ne no psyɛ́ndzɔʼ yúŋ síŋ pumésɔŋ, kɛ́ʼɛ́ ŋgâ pɔ́b zhʉ́ wúŋ. Mbǒ puŋ náʼá ntséʼé tsɔʼɔfaʼ yúŋ síŋ Tɛd wúŋ, yé wɛ́ á pépéé nɛ́, pó. 2Ŋkhoʼyɛ́ wo tsé fɛ́ yɔ́b pwó mbɔ́ŋ nɛ́, wo ndɛ tú ntaŋ njʉ́ pɛ ŋkʉyémíí zhyɛ́ ndzó pɛ ndántéré pɛ Yúda pwɛ pɛ záŋ, kɛ́ʼɛ́ ŋgâ pɔŋ ghóʼó wɔ́b nɛ́. Kpaʼ sísíŋ, mə səŋɛ wúŋ ŋgâ, pɔ́b kɛ tséʼé tsɔʼɔfaʼ yɔ́b. 3Ŋgɛmbɛ ne wo, ŋkhoʼyɛ́ wo tsé fɛ́ yɔ́b pwó mbɔ́ŋ nɛ́, wo ndɛ ŋgyɛ́ njʉ́ ŋɔŋ ndzɛ́ yɔ́b yɛ́ wo fɛ́ nɛ́, a pɛ́ɛ́ mbɛ wɔ́! 4Yânéré ŋgâ ghebe pǔndzɔʼ yo pe ywʉ̂me. Kɛ́ʼɛ́ ŋgâ, Mboʼmve, Tɛd wo wɛ́, a zhʉ́ mbɛ meno pɛ́ pé ywʉ ywʉ́ nɛ́, náʼá nuʼɔ́ pwó wo.»
Mbziʼe njʉ́ tɛɛmbɛ wo tsɛ́ʼɛ́ Mboʼmve nɛ́
5Yěsô ké mbó ntsó ŋgâ: «Ŋkhoʼyɛ́ puŋ tsé ntsɛ́ʼɛ́mboʼmvé nɛ́, puŋ ndɛ ŋgyɛ́ njʉ́ pɛ ŋkʉyémíí pɛ pɔ́b kʉ́yé nséne ntsó ndzó pɛ ndántéré pwɛ ntʉʼé mɛndɔ́b ntsɛ́ʼɛ́mboʼmvé, kɛ́ʼɛ́ ŋgâ pɔŋ zhʉ́ wɔ́b nɛ́. Kpaʼ sísíŋ, mə səŋɛ wúŋ ŋgâ pɔ́b kɛ tséʼé tsɔʼɔfaʼ yɔ́b. 6Ŋgɛ ŋkhú ne wo, ŋkhoʼyɛ́ wo zɔŋɔ ntsɛ́ʼɛ́mboʼmvé nɛ́, ŋkúŋɔ́ ndzaʼandáb wo yé sə̌me, fûŋ ntswee yé, ntsɛ́ʼɛ́mboʼmvé, Tɛd wo wɛ́ a yóʼó ndzó ywoʼɔ́zhibɛ́ nɛ́. Tɛd wo wɛ́, a zhʉ́ ndzó ywoʼɔ́zhibɛ́ nɛ́, náʼá núʼɔ́ pwó wo. 7Ŋkhoʼyɛ́ puŋ tsé ntsɛ́ʼɛ́mboʼmvé nɛ́, puŋ ndɛ mbziʼɛ́ ntsó psíʼí njʉ́ pɛ kiizɛ́mboʼmvé nɛ́. Pɔ́b kpáŋa ŋgâ pɔ́b mbziʼɛ́ ntsó kɛ́ʼɛ́ ŋkɔŋ, Mboʼmve pɔrɔ́ ndzóʼó wɔ́b. 8Puŋ ndɛ fúʼɔ wɔ́b nɛ́, ŋkyé ŋgâ yɔ́b yɛ́ puŋ zɔŋɔ nɛ́, Mboʼmve Tɛd wuŋ, pě ndzé yɔ́b yɛ́ a kǎ wúŋ nɛ́ ŋkɔ́ŋ, puŋ pɔ́rɔ́ ndɔ́ŋɔ́ pwó ye.»
Tséʼé yɛ́ Yěsô kɛ nyoʼ nɛ́
(Lúk 11:2-4)
9«Ŋgɛ ŋkhu ne puŋ, puŋ ntsɛ́ʼɛ́ Mboʼmvé pe kaʼa:
Tɛd ywí, wo wɛ́ wo pépéé nɛ́,
Zhyɛ́ ŋkɔŋɔ pɔŋ náá ghúʼú tíí wo.
10Zhyɛ́ ŋgâ Nofɔŋ wo kʉ́yó,
Zhyɛ̂ ŋkɔŋɔ ndúŋú tsetsáʼ náá zhyɛ́ no yɛ́ wo zɔŋɔ nɛ́
Syé ghaŋ, njʉ́ a pépéé nɛ́.
11Fɛ́ mwɔ̌zó ne psi ndzebe njʉ́ a ŋkhúʼɔ́ mbəb psi nɛ́,
12Máʼ vɔ̌no pɛ́ psi vɔ mbəb wo nɛ́,
Njʉ́ kpaʼ psi, psi ke máʼa yé pɔŋ pɛ́ pɔ́b mvɔ́no mbəb psi nɛ́.
13Kii pó mbzyɛ́ ŋgâ kəpɔŋ kpɛ́ʼɛ́ ywí!
Ntsʉʼmbé, kpéé ywí pwó ŋgaŋakpeʼe.
14Ŋkyé ŋgâ, a pɛ́ɛ́ yɛ́ puŋ máʼ kəpɔŋ pɔŋ nɛ́, mbǒ Mboʼmve Tɛd wuŋ wɛ́ a pépéé nɛ́, ke ŋkʉ́yó máʼ vɔ̌no púŋ. 15Ntsʉʼmbé, a pɛ́ɛ́ yɛ́ pǔŋ máʼ vɔ̌no pɔŋ nɛ́ pó, mbǒ Mboʼmve Tɛd wuŋ ke mbé máʼ yúŋ vɔ̌no ndɔ́ɔ́ wúŋ pó.»
Mbziʼe njʉ́ puŋ ndzɛ́ nse nɛ́
16«Ŋkhoʼyɛ́ puŋ tsé ndzɛ́ nse nɛ́, kii puŋ ndɛ tsé ŋɛbɛ záŋ yúŋ, njʉ́ pɛ pépwɔmíí zhyɛ́ nɛ́: pɔ́b ŋuʼɔ záŋ yɔ́b ne nyǒʼne pwó pɔŋ ŋgâ pɔ́b tsé ndzɛ nse. Kpaʼ sísíŋ, mə səŋɛ wúŋ ŋgâ, pɔ́b kɛ tséʼé ntsɔ́ʼɔ́faʼ yɔ́b. 17Ŋgɛmbɛ ne wo, ŋkhoʼyɛ́ wo tsé ndzɛ́ nse nɛ́, sǒ záŋ yo, nǔʼ tó wo ne vód tswɔtwɔ́, 18yânéré ŋgâ pɔŋ ndɛ ndzé ŋgâ wo tsé ndzɛ́ nse. Ntsʉʼmbé, ndaʼ Mboʼmve Tɛd wo, wɛ́ a ndzó ywoʼɔ́zhibɛ́ nɛ́, ze. Tɛd wo wɛ́, a zhʉ́ ndzó ywoʼɔ́zhibɛ́ nɛ́, náʼá núʼɔ́ pwó wo.»
Foʼ yɛ́ a pépéé nɛ́
(Lúk 12:33-34)
19«Puŋ ndɛ ndɛrɛ́ yuŋ foʼ pe ndúŋú tsetsáʼ, ywoʼ yɛ́ ŋgɔ́ʼ pwɛ fuʼ shʉbɛ mɔ́b nɛ́. Ywoʼ yɛ́ gháŋagháŋ ntsú tsindáb, ndzwə́ə́ nɛ́. 20Ntsʉʼmbé puŋ yɛ́rɛ yuŋ foʼ pe pépéé. Ywoʼ yɛ́ ŋgɔ́ʼ kii fuʼ tsé mbé shʉbɛ mɔ́b nɛ́ pó. Ywoʼ yɛ́ gháŋagháŋ tsé mbé tsú tsindáb kii pó tsé ndzwə́ə́ nɛ́. 21Ŋkyé ŋgâ ywoʼ yɛ́ foʼ wo yóʼó nɛ́, ndzɔʼ yo ke mbɛ́ɛ́ yóʼó.»
Mbəb wo pɛ ndzɔ́ʼɔ́ ndáŋne
(Lúk 11:34-36)
22Yěsô ké mbó ntsó ŋkʉ́rʉ́ ŋgâ: «Mbzítíí wo lámbo mbəb wo. A pɛ́ɛ́ yɛ́ mbzítíí wo sʉ́ʼʉ nɛ́, mbǒ ŋkɔŋɔ mbəb wo náá ke mbɛ́ ndzɔ́ʼɔ́ ndáŋne. 23Ntsʉʼmbé, a pɛ́ɛ́ yɛ́ mbzítíí wo tsé ndzuʼú wo nɛ́, mbǒ ŋkɔŋɔ mbəb wo náá ke mbɛ́ɛ́ ndzɔ́ʼɔ́ ndzə́ndzə́b. A pɛ́ɛ́ yɛ́ ndáŋne mɛ́ a mbəb yé nɛ́ ntsʉ́ʼ ndzə́ndzə́b nɛ́, mbǒ yéré ndzə́ndzə́b mbɛ́ɛ́ níŋ!»
Fǎʼne pwó Mboʼmve kii fǎʼne pwó mbób
(Lúk 16:13)
24«Tɛɛmbɛ ŋɔŋ pe fáʼa pwó Ntsɛɛpɔŋ pépáá taʼ kɛɛ pó. Mbǒ a mbáŋá taʼ ye kʉ́yé cyó, kii ŋgâ a ndɛ́rɛ́ mbəb taʼ ye gbáŋá cyó. Tɛɛmbɛ puŋ pe fáʼa pwó Mboʼmvé pú mbób taʼ kɛɛ pó.»
Pɛ kpaŋató
(Lúk 12:22-31)
25«A zhyɛ́ yéré mə ntsɔ́ ne puŋ ŋgâ puŋ ndɛ tse ntsuŋɛ ŋkyé tsómvé yúŋ, ŋgâ puŋ ndzɔ́ɔ́ kɔ́, kii ŋkyé mbəb yuŋ ŋgâ puŋ gbéé kɔ́? ŋkyé ŋgâ, tsómvé tséʼé ghebe kaʼatɛ tsɛ́ɛ́ mwɔ̌zó, mbəb pó tséʼé ghebe kaʼatɛ tsɛ́ɛ́ ndzwé. 26Puŋ tiŋí pɛ péshʉŋ pépéé njʉ́! Pɔ́b tsé mbé pfɛ́ mɔ́b pó, kii pó tsé ŋkaba! Pɔ́b tsé mbé yɛ́rɛ́ mɔ́b ndzó pɛ ntaŋ pó! Tɛd wúŋ pépéé ntsʉ́ʼ ntsé njʉyí wɔ́b! Puŋ tséʼé ghebe kaʼatɛ ntsɛ́ɛ́ péshʉŋ pɔɔ? 27A wɔ́ tsetsɛrɛ puŋ wɛ́ tɛɛmbɛ ntsúŋine mé pfǐ tsómvé yé mbɛ ne mɔ́ŋtiʼa ŋkhoʼ nɛ́? 28Ŋgɛmbɛ ne no ndzwé, puŋ ntsuŋɛ ŋkyé kɔ́? Puŋ náá pɛ fɛlɛwa ndzó pɛ mvíínab njʉ́ pɔ́b ghóʼó nɛ́, pɔ́b tsé mbé fáʼa kii pó tsé ntsuwɔ ndzwé pó! 29Mə ntsʉ́ʼ ntsɔ́ ne puŋ ŋgâ: tómbəb fɔŋ Salomɔŋ, ndzɔ́ʼɔ́ ŋkɔŋɔ ghɛ́ɛ́ yé náá, kɛ pé gbéé ndzwé njʉ́ taʼ fɛlɛwa yéré nɛ́ pó. 30A pɛ́ɛ́ yɛ́ Mboʼmvé gbéé mkpeegháŋ mpfuŋ kɛ́ʼɛ́, mkpeegháŋ yɛ́ a mpfuŋ ndzebé, nǐmwɔ pé ghɛ́ ntɔ́ŋɔ́ ne mɔ́ɔ́ nɛ́, tɛ ŋkɛ́ɛ́ yíkɔ́ ne puŋ? Psyɛ́ndzɔʼ yúŋ khóó kaʼatɛ! 31Kii puŋ ndɛ ntsé gbíí mbəb yúŋ nɛ́, ntsɔ́ ŋgâ: “Psi ndzɔ́ɔ́ kɔ́? Psi nɔ́ɔ́ kɔ́? Psi gbéé kɔ́?” 32Ŋkɔŋɔ mɔ́b péré náá, a taʼa kiizɛ́mboʼmvé kii káŋ. Tɛd wúŋ wɛ́ a pépéé nɛ́, tsʉ́ʼ zé ŋkɔŋɔ mɔ́b péré pɛ́ a tsé ŋkǎ wuŋ nɛ́. 33Puŋ pě ntáʼ Nofɔŋ Mboʼmvé pwɛ meno pɛ́ a ŋgerɛ́ŋged siŋ ye nɛ́ ŋkɔŋ, kɛ́ʼɛ́ ŋgâ a záʼá ndúŋú fɛ́ ŋkɔŋɔ ye náá ne puŋ. 34Puŋ ndɛ tsé gbíí mbəb yuŋ ŋkyé nǐmwɔ́. Nǐmwɔ́ tséʼé ye no ne tómbəb yé, ŋkyé ŋgâ no ke mbɛ ne yé zhyémve.»
Currently Selected:
:
Highlight
Share
Copy
Want to have your highlights saved across all your devices? Sign up or sign in