Galato 6
6
Ntʉ́ʉ́ pɛ́ Kristo pó fɛ́ nɛ́
1Pɔ́ŋmɛ́ páá, a pɛ́ɛ́ yɛ́ pe mvwɛ̂ ŋɔŋ ndzɔ́ʼɔ́ puŋ ndúŋú no kəpɔŋ nɛ́, a tséʼé puŋ pɛ́, puŋ tséʼé Zhʉye Yáŋme nɛ́, ne ntʉ́ʉ́ne wé ne mbúru. Wo yo, wo zhyáŋá! ŋkyé ŋgâ, ŋkɔʼɔtómbəb wo, tɛɛmbɛ kpeʼe ke mwɔ̌ yo ywoʼ mwɔ̂. 2Puŋ ghebe mbəb yúŋ, ŋkyɛ́ péʼ púŋ tsetsɛrɛ puŋ, néré kɛ́ʼɛ́ ne ndûŋne kaŋ yɛ́ Kristo kɛ fɛ́ nɛ́. 3Ŋkyé ŋgâ, a pɛ́ɛ́ yɛ́ ŋɔŋ kpaŋa ŋgâ a cyó yɔ́b nɛ́, ye wɛ́ a zyé mbé pé cyó yɔ́b nɛ́ pó, mbǒ a shʉyɛ́ tómbəb ye. 4Ntsʉʼmbé a pǔ nɛ́ pe ŋgâ mbɛ wɔ̂ kpɛʼɛ pwófaʼ ye. A pɛ́ɛ́ yɛ́ mɔ́ŋ yɔ́b ndúŋú yɛ́ tɛɛmbɛ a tsiʼé núŋ nɛ́, mbǒ yéré tiŋɛ́ pee ye, kii pó mbɛ̌ ŋgâ a yɔ̌ fuʼ pe ndúŋú ye ŋɔŋ. 5Ŋkyé ŋgâ mbɛwɔ̂ náʼá ŋkʉ́yó ké ŋkyɛ̌ yé peʼ. 6Á ŋɔŋ wɛ́ pe fɛ́ ntʉ́ʉ́ pǔkristo pwó ye nɛ́, a ghób ŋkɔŋɔ mɔ́b pe náá, fɛ́ ye ŋɔŋ wɛ́ a zéʼé wé núŋ nɛ́. 7Kii puŋ ndɛ shʉyɛ́ mbəb yuŋ: Mboʼmvé tsé mbé tee ŋgâ pe tuŋɔ́ wé pó. Ŋkyé ŋgâ yɔ́b yɛ́ ŋɔŋ fɛ́ɛ́ nɛ́, a ke mbé yɔ́b yɛ́ ŋɔŋ ŋkʉ́yo ŋkábá nɛ́. 8Ŋɔŋ wɛ́ a fɛ́ɛ́ pɛ ndzyê kəpɔŋ pɛ ndzɔʼ ye zɔŋɔ nɛ́, a náʼá ke ŋkábá yɔ́b yɛ́ ndzyê péré fɛ́ nɛ́. Yɔ́b yéré, a vó. Ŋɔŋ wɛ́ a fɛ́ɛ́ ne Zhʉye Yáŋme nɛ́, naʼ ke ŋkábá mɔ́b pɛ́, Zhʉye Yáŋme ndɛ fɛ̂ nɛ́. Mɔ́b péré pe tsómvé ŋeŋáŋ. 9Piŋi zhyɛ́ no sʉ́ʼʉ kii káŋ, ŋkyé ŋgâ ŋkhoʼ ŋkʉ́yó kúʼɔ́, piŋi tséʼé tsɔʼɔfaʼ, mbéyɛ́ mbwó miŋi pɔ́d nɛ́ pó. 10Néré kɛ́ʼɛ́, mbziʼe njʉ́ ŋkhóʼmvé naʼ kɛ kɛrɛ ne piŋi nɛ́, piŋi zhyɛ́ no sʉ́ʼʉ njʉ́ a ghɛbɛ ŋkɔŋɔ pɔŋ náá nɛ́, yéré náá kɛ́ʼɛ́ pe ndzɔ́ʼɔ́ psyɛ́ndzɔʼ kɛ pɔ́ŋmɛ́.
Tsómvé ffé yɛ́ Kristo fɛ́ nɛ́
11Pǔŋ zhʉ́ míí ŋweʼe kəkwéʼe pɔŋɔ? A ŋwéʼé kpaʼ mo ne pwó ya! 12Pɔŋ pɛ́ pɔ́b ziʼɛ ŋgâ pe psírɛ́ wúŋ nɛ́, a ŋkɔrɔ́ pɔŋ pɛ́ pɔ́b zɔŋɔ nyóʼó mbəb yɔ́b ŋgâ pumésɔŋ zhʉ́ wɔ́b nɛ́. Pɔ́b zhyɛ́ néré kɛ́ʼɛ́, mbɔɔ ŋgâ pe ndɛ tsé ndzaa wɔ́b ne ŋgəʼo, ke ŋkyé ndaʼ ntʉ́ʉ́ ndúŋú no Kristo wɛ́, pe kɛ kpǐ wé ndúŋú ŋgʉŋʉ nɛ́. 13Pɔŋ péré pɛ́ pɔ́b zhyɛ́ pé psirɛ wɔ́b nɛ́, tsé mbé nyí njʉ́ kaŋ tsɔ́ nɛ́ pó. Ntsʉʼmbé, pɔ́b zɔŋɔ ŋgâ pe psirɛ́ wuŋ kɛ́ʼɛ́, ne ŋéʼéne njʉ́ pɔ́b zhyɛ́ pe psirɛ́ wuŋ nɛ́. 14Ŋgɛ́ ŋkhú ne mo, cyó no nyoʼmbəb yóʼó ne mo, fǎ ŋkəŋ Ntsɛɛpɔŋ wíŋi Yěsô Kristo wɛ́ pe kɛ kpǐ wé ndúŋú ŋgʉŋʉ nɛ́, pó. Ŋkyé ŋgâ a zhyɛ́ ŋgʉŋʉ yéré, pe kpǐ mvémvé ndúŋú ŋgʉŋʉ ne máá njʉ́ne, ntsʉ́ŋntsʉ́ŋ njʉ́ mə mbɛ́ɛ́ pfɔ́ yɔ́b ndúŋú ŋgʉŋʉ pwó mvémvé nɛ́. 15Ŋkyé ŋgâ, ndǎ yɔ́b yɛ́ a tséʼé ghebe nɛ́, a pɛ́ɛ́ psírɛ ŋɔŋ kii těne wé kɛ́ʼɛ́ pó. Ntsʉʼmbé, a pɛ́ɛ́ ŋgâ Mboʼmvé zhyɛ́ piŋi tsʉʼ pɔŋ ffé. 16Mbúru pwɛ tsaaghəghəŋ pɛ́ mbəb pɔŋ pɛ́ pɔ́b nyi njʉ́ ntʉ́ʉ́ yɔŋ zɔŋɔ nɛ́, ghɛmbɛ́ mbəb Issayɛ yɛ́, a pɔŋ Mboʼmvé nɛ́.
17Néré kɛ́ʼɛ́, kii ŋɔŋ ndɛ ŋgyɛ́ to ya tsé ntɔ́ŋɔ ŋkʉ́rʉ́. Ŋkyé ŋgâ máŋ yɛ́ a mbəb mo nɛ́, nyoʼ ŋgâ mə mbɛɛ pwó Yěsô. 18Pɔ́ŋmɛ́ páá, a foʼndzəndzoʼ Ntsɛɛpɔŋ wíŋi Yěsô Kristo pɛ́ ne puŋ. A pe néré!
Currently Selected:
Galato 6: XMG
Highlight
Share
Copy
Want to have your highlights saved across all your devices? Sign up or sign in
