Galato 5
5
Pǔŋ ndɛ mbó mbódndzəb ndámkpaŋ
1Kristo kɛ túbɔ́ wíŋi ndzɔ́ʼɔ́ mkpaŋ kɛ́ʼɛ́ ŋgâ, kpaʼ sísíŋ, piŋi ndɛ mbó mbé pɛ mkpaŋ ŋkʉ́rʉ́. Puŋ sáʼ ŋkɔŋɔ tʉ̌ŋ náá! Kii puŋ ndɛ ntee, pe yɔ̌ wúŋ mbó mbódndzəb núŋ ndámkpaŋ. 2Mo, Pɔ́lə, mə ntsɔ́ nɛ́ ne puŋ ŋgâ, a pɛ́ɛ́ yɛ́ puŋ zhyɛ́ pé psirɛ́ wúŋ nɛ́, mbǒ Kristo mbó mbé tséʼé cyó ghebe ne puŋ ŋkʉ́rʉ́ pó. 3Mə ké mbó nɛ́ sə́ŋɛ ntsye ŋɔŋ wɛ́ a zɔŋɔ ŋgyɛ́ ŋgâ pé psirɛ́ wé nɛ́ ŋgâ, a tsɛʼɛ ne mvyébne ŋkɔŋɔ kaŋ náá kii tee yɔ́b. 4A pɛ́ɛ́ yɛ́ puŋ taʼa ŋgâ a zhyɛ́ kaŋ, Mboʼmvé tiŋɛ́ wuŋ njʉ́ puŋgerɛ́ŋged nɛ́, mbǒ puŋɛ Kristo fǎ nɛ́, mbǒ puŋ twɔ́ ndzɔ́ʼɔ́ pǔpfob Mboʼmvé nɛ́. 5Ŋgɛ́ ŋkhú ne piŋi, piŋi shʉ́rɛ yiŋi pé Mboʼmvé, ŋkyé ŋgâ a ŋkʉ́yó ndiŋɛ́ wíŋi njʉ́ puŋgerɛ́ŋged nɛ́. A no yɛ́ piŋi tsé ndzwəʼɛ ne psyɛ́ndzɔʼ nɛ́, ŋgɛmbɛ néré a fɛ́ Zhʉye yáŋme fɛ́ tʉ̌ŋ. 6Ŋkyé ŋgâ, a ŋgɛ ŋkhú ne ŋɔŋ wɛ́, pú Yěsô Kristo təb ŋkhú taʼ ye nɛ́, mbzírine wé kii mbé psirɛ wé pó, tséʼé ghebe pó. Ntsʉʼmbé yɔ́b yɛ́ a tséʼé ghebe nɛ́, a psyɛ́ndzɔʼ yɛ́ a zhyɛ́ kəŋe, pe zhʉ́ wé nɛ́.
7Puŋ kɛ zyě kpaʼ sʉ́ʼʉ. A kɛ pó náŋa wɔ̂ náŋ mɛndɔ́b ne puŋ, ŋgâ ŋgerɛ́ŋged ndɛ mbó tsé tyáŋa wúŋ? 8Yekénɛ́ yɔ́b yɛ́ a kɛ naŋa wuŋ kɛ́ʼɛ́ nɛ́, a kɛ pé twɔ̌ pwó ŋɔŋ wɛ́, a kɛ́ fú wúŋ nɛ́ pó. 9A ke ndzɔŋɔ ndaʼ mɔ́ŋtii mvuʼ kaʼa ndzɔ́ʼɔ́ ŋgəŋ pəbe, ŋkɔŋɔ ŋgəŋ pəbe yéré náá kɔ́ʼ! 10A ne mo, mə tsé mbé zɛ̌ ndúŋú no yɛ́ Ntsɛɛpɔŋ ŋgyɛ́ mbəb puŋ nɛ́ pó. Puŋ ndɔ̂ cyó mɛndɔ́b pó. Ntsʉʼmbé, ntsye ŋɔŋ wɛ́ a máʼá vaʼ tsetsɛrɛ puŋ nɛ́, a pɛ́ɛ́ mbɛ wɔ̂, mbǒ Mboʼmvé náʼá ke mbɔ́rɔsé yé. 11Pɔ́ŋmɛ́ páá, ŋgɛ ŋkhú ne mo, a pɛ́ɛ́ yɛ́ mə kɛ́ fɛ́ ntʉ́ʉ́ ndúŋú mbzírine ŋɔŋ nɛ́, pé pó ndzáá yá ŋkʉ́rʉ́ ne ŋgəʼo ŋkyé kɔ́? Néré kɛ́ʼɛ́, ncʉríne ŋgâ pe kɛ kpǐ Yěsô ndúŋú ŋgʉŋʉ, tɛɛmbɛ a pó mbé pé, no ghoʼótó ŋkʉ́rʉ́ pó. 12Pɔŋ pɛ́ pɔ́b maʼa vaʼ ndzɔ́ʼɔ́ puŋ nɛ́, pɔ́b yɔ̌ faʼ yɔ́b ŋgú núŋ ssó, a pɛɛ yɛ́ pɔ́b kʉyě nɛ́, pɔ́b sə́ə́ mbəb yɔ́b!
Pɛ ndzyê kəpɔŋ pú Zhʉye Yáŋme
13Ŋgɛ khú ne puŋ kɛ pɔ́ŋmɛ́, Mboʼmvé kɛ pe fú wúŋ pe ŋgâ puŋ pɛ́ɛ́ pɛ mkpaŋ ŋkʉ́rʉ́ pó. Ntsʉʼmbé puŋ ndɛ ndɔ́ɔ́ no núŋ njʉ́ ŋkɔʼyɛɛ nɛ́, tsʉʼ ŋgyɛ̌ meno kəpɔŋ pɛ ndzɔʼ yuŋ kʉyě nɛ́, ndaʼ ŋgâ puŋ yɔ́ɔ́ kəŋe yɛ́ puŋ tséʼé nɛ́, ŋgébɛ mbəb yúŋ núŋ tsetsɛrɛ puŋ. 14Ŋkyé ŋgâ kúrɔtó ŋkɔŋɔ kaŋ náá pɛ́ɛ́ ne ndaʼ taʼ ndii nsó yɔŋ ŋgâ: kʉye mɔ́ŋmɛ́ wo njʉ́ wo kʉyě tómbəb wo nɛ́. 15Ntsʉʼmbé a pɛ́ɛ́ yɛ́ puŋ zhyɛ́ njʉ́ pɛ nǎkaʼ nɛ́, ntaʼa ne nwɔ́ne mbəb yúŋ mpfɔ́rɔ́ tsetsɛrɛ puŋ, puŋ zhyáŋá! Mbǒ puŋ sáŋá mbəb yuŋ nɛ́. 16Puŋ zóʼó no yɔŋ yɛ́ mə ntsɔ́ ne puŋ nɛ́: puŋ tee a tsyáŋa Zhʉye Yaŋmé tsyáŋa wúŋ. Néré, puŋ pó mbé zhyɛ́ meno kəpɔŋ pɛ́ ndzɔʼ yuŋ kʉyě ŋgâ puŋ zhyɛ́ nɛ́ pó. 17Ŋkyé ŋgâ meno kəpɔŋ pɛ́ ndzɔʼ ŋumesɔŋ kʉyě nɛ́, tɛɛmbɛ pwɛ pe Zhʉye Yáŋme pé tə́b kpěnsenyi pó. Tɛɛmbɛ yé Zhʉye Yáŋme ke mbé tə́b kpěnsenyi pwɛ ndzyê kəpɔŋ pɛ́ a ndzó ndzɔʼ ŋumesɔŋ nɛ́ pó. Néré kɛ́ʼɛ́ ŋgâ yɔ́b yɛ́ pǔŋ zɔŋɔ ŋgyɛ́ nɛ́, puŋ ndɛ mbó ŋgyɛ. Kɛ́ʼɛ́, tɛɛmbɛ pɔ́b pé tə́b kpee kpěnsenyi pó. 18Ntsʉʼmbé a pɛ́ɛ́ yɛ́ a tyáŋa Zhʉye Yáŋme tyáŋa wúŋ nɛ́, mbǒ a pó nɛ́ mbé sáʼá kaŋ Mǔsê sáʼá wúŋ ŋkʉ́rʉ́ pó.
19Pé zé zhǐ ntswěfaʼ kəpɔŋ yɛ́ ndzɔʼ ŋɔŋ kʉ́yé ne fǎʼne nɛ́. A ntǎʼne mbzíŋi kii ŋgâ ntaʼne pěŋgyé zááme, a ŋgyɛ̌ne meno siŋɛ́ mbəb, mǎʼne sakhə. 20Á ghuʼɔ́ záʼá, á gbɛ́rɛ́ fwo, a ntséʼéne ŋgaŋakəpeŋé, a tǎʼne meyaʼ, a ntséʼéne sháŋá, a pʉ̌ŋgye zááme, a tebé, a saŋáywoʼ, mǎʼne saŋ tsetsɛrɛ pɔŋ. 21A míí səsɛ, a pɛ̂yoʼ, a mɛ̂ne pwɛ ŋgyɛ̌ne pecyó pɛ́ meno pfɔ́shʉ́ŋ. Njʉ́ mə kɛ pě ntsó nɛ́, mə fú tó pɔŋ pɛ́ pɔ́b zhyɛ́ kɔrɔ péré meno nɛ́ ŋgâ, pɔ́b náʼ ŋkúŋɔ́ ndzó Nofɔŋ Mboʼmvé pó.
22Ntsʉʼmbé, no sʉ́ʼʉ yɛ́ Zhʉye Yáŋme zhyɛ́ ŋɔŋ zhyɛ́ nɛ́ pe nɔŋ: a ntséʼéne kəŋe, ndebéne, mbúru, gbǎndzɔʼ, pǔpfob, ghɛ́bɛ́mvé, psyɛ́ndzɔʼ. 23A ké mbó mbé mburúne, gbǎmbəb. Kaŋ kirí ŋkɔrɔ́ meno pékénɛ́ pó. 24Pɔŋ pɛ́ pwɛ Kristo khú taʼ yé nɛ́, kpǐ meno kəpɔŋ pɛ́ a twɔ́ ndzó ndzɔʼ yɔ́b, pɔ́b kʉye ne ŋgyɛ̌ne nɛ́, ndúŋú ŋgʉŋʉ. 25Njʉ́ yɛ́ a zhyɛ́ Zhʉye Yáŋme, piŋi tsómvé nɛ́, a zɔŋɔ nɛ́ ŋgâ piŋi ké mbó nyí njʉ́ Zhʉye Yáŋme nzɔŋɔ nɛ́.
26Piŋi ndɛ mbé ghaŋántətoʼ: piŋi ndɛ tsé ntaʼa fiʼ tsetsɛrɛ piŋi, mbó mbé tséʼé mbzítíí səsɛ tsetsɛrɛ piŋi pó.
Currently Selected:
Galato 5: XMG
Highlight
Share
Copy
Want to have your highlights saved across all your devices? Sign up or sign in
