Faʼ Ghaŋántɔ́b 22
22
1«Pɔ́ŋmɛ́ páá pé mbzíŋi pwɛ tɛd páá, puŋ zóʼ ŋkhoʼyɔŋ njʉ́ mə nɔ́ ya gbéé nɛ́.» 2Ŋkhoʼyɛ́ pɔ́b zóʼ njʉ́ Pɔ́lə kɛ ntsɔ̌ ne nsó pɛ Yúda nɛ́, pɔ́b zhírí ŋgâ kyéd. 3Pɔ́lə nsó ŋgâ: «Mə ŋɔŋ Yúda, pe pfé ya pé mbɛ́lʉ́ŋ Taasə ndzó pɛ́rɛ́ ŋgɔŋ Silisya. Ntsʉʼmbé, mə ŋgóʼó ndzó mbɛ́lʉ́ŋ yɔ̂ŋ. A ne kpee Gamalyɛlə, a kɛ zhyɛ́ yé mə cʉyǐ ndzé kpaʼ yɔ́b yɛ́ a ndzó Kaŋ tɛd tɛd piŋi nɛ́. Mə kɛ kʉyě no Mboʼmvé kaʼatɛ, njʉ́ ŋkɔŋɔ wuŋ náá ke ŋkʉye yúŋ ndzebé kɛ́ʼɛ́ nɛ́. 4Mə kɛ záá pɔŋ pɛ́ pɔ́b kɛ yɔ́ɔ́ Mɛndɔ́b wéré nɛ́ né ŋgəʼo kaʼatɛ, mbó nɔ́ʼɔ́ wɔ́b. Mə ŋgyɛ́ pé ncʉ̂ mbzíŋi pwɛ pěŋgyé mbó máʼá wɔ́b ndátsáŋ. 5Tɛɛmbɛ Tɛdshʉ́ kəkwéʼe pwɛ ŋkɔŋɔ pɛ ghəkód náá kpee ntáŋ ya. Ŋweʼe yɛ́ a kɛ fɛ́ tʉ̌ŋ ne mo ŋgâ mə ŋgú Damáásə máʼ tsáŋ ndzó mbwó pǔkristo, ŋkhú ne wɔ́b Yerʉ́salɛm mbó nzáá wɔ́b ne ŋgəʼo nɛ́, kɛ twɔ́ ne pɔ́b.
6Mə kɛ ghǔ kaʼatɛ tsé mbáŋ Damáásə. Ŋgɛ́ mvuwɛ, ne ywɔ̌ tʉ̌ŋménab, taʼ ŋkaʼmɔ́ɔ́ kəkwéʼe twɔ́ pépéé, ndzyɛ̂ ya ne ndáŋne mé. 7Mə mvɔ́ syé, ndzóʼ taʼ ndzəb ntsɔ́ ne mo ŋgâ: “Sɔlə, Sɔlə, wo twɔ́ ndzəb ya káʼa ŋkyé kɔ́?” 8Mə mbod ŋgâ: “Ntsɛɛpɔŋ, wo wɔ̂ ?” Ndzəb pód ŋgâ: “A mo Yěsô, ŋɔŋ Nǎzarɛd! Mo wɛ́ wo twɔ́ ndzəb yé kɛ́ʼɛ́ nɛ́.” 9Pɛkpee páá kɛ cʉ̌yi njʉ́ káʼmɔ́ɔ́, ntsʉʼmbé tsé mbé zóʼó ndzəb yɛ́ a kɛ ntsɔ́ no ne mo nɛ́ pó. 10Mə mbzirí ŋgâ: “Mə ŋgyɛ́ɛ́ kɔ́ Ntsɛɛpɔŋ?” Ntsɛɛpɔŋ pɔ́rɔ́ ne mo ŋgâ: “Ŋǎ syé, ŋgú Damáásə. Wo páŋa yóʼó, pe sɔ́ŋɔ́ wo ne ŋkɔŋɔ no yɛ́ wo ŋgyɛ́ nɛ́ náá.” 11Njʉ́ mə kɛ tsé mbé zhʉ́ ywoʼ pó ŋkyé ŋkaʼmɔ́ɔ́ wɛ́ a kɛ fʉ̂ míí máá nɛ́, a gbâ pɛkpee páá gbáá pwó ya, tsyáŋa ya, mə mbáŋa Damáásə.
12Cyó taʼ ŋɔŋ kɛ pɛ́ yóʼó, tíí pé Ananiyasə. A kɛ pé taʼ ŋɔŋ wɛ́ a kɛ ntséʼé pɔ́ɔ́ Mboʼmvé, mbó ntii kpee yé ndúŋú kaŋ nɛ́. Ŋkɔŋɔ pɛ Yúda pɛ́ pɔ́b kɛ tsó yóʼó náá nɛ́, kɛ tsɔ́ no sʉ́ʼʉ ŋkyé wé. 13A kɛ kʉ́yó tsɛ́rɛ ya, ntsɔ́ ne mo ŋgâ: “Sɔlə, mɔ́ŋmɛ́ ya, pó njʉ́ ywoʼ!” Kpaʼ ŋkhoʼyéré, mə mbó njʉ́ ywoʼ, njʉ́ wé. 14A ntsɔ́ ne mo ŋgâ: “Mboʼmvé tɛd tɛd piŋi ntsɔʼ wo ŋgâ wo zé ŋkɔŋɔ meno pɛ́ a kʉyě náá nɛ́, ŋgâ wo zhʉ́ Ŋɔŋ ŋgerɛ́ŋged, mbó ndzóʼ kpaʼ ndzəb ye. 15Wo ntsʉ́ʼɔ ŋgaŋakpêtaŋ ye síŋ ŋkɔŋɔ pɔŋ náá, ndúŋú meno pɛ́ wo zhʉ́ mbó ndzóʼ nɛ́. 16Wo pó ndzɛ̌ kɔ́? Ntě! Khó fú tíí yé, kpênse, a sǒ kəpɔŋ wo.”
17Mə mbód ndzəb Yerʉ́salɛm. Taʼ zhyémve, mə tsé ntsɛ́ʼɛ́ Mboʼmvé Ndámboʼmvé, mə ŋgə́yí. 18Mə njʉ́ Ntsɛɛpɔŋ, a ntsɔ́ ne mo ŋgâ: “Ŋǎ zaŋa, ŋgú Yerʉ́salɛm kii shʉrʉ, ŋkyé ŋgâ pɔ́b náʼ mbzyɛ́ no yɛ́ wo ntsɔ́ ŋkyé ya nɛ́ pó.” 19Mə mbód ŋgâ: “Ntsɛɛpɔŋ, pɔ́b zé kpaʼ sísíŋ ŋgâ a kɛ ghú mo ndzó pɛ ndántéré, ŋgyɛ̌ pé gbâ pɔŋ pɛ́ pɔ́b kɛ ntséʼé psyɛ́ndzɔʼ ŋkyé wo nɛ́, máʼa ndátsáŋ mbó gbíí wɔ́b. 20Ŋkhoʼyɛ́ pé kɛ nɔ́ʼ Etyɛŋ, ghaŋákpééntáŋ wo nɛ́, ŋkɔʼɔtombəb ya, mə kɛ pɛ yóʼó, ke mbzyɛ́ ya ŋgúú ndzəb pɔ́b. A ywʉ́ʼʉ́ mo ŋgʉʼʉ́ ndzwé pɔŋ pɛ́ pɔ́b kɛ nɔʼ wé nɛ́.” 21Ntsʉʼmbé a ntsɔ́ ne mo ŋgâ: “Ghú, mə ntwɔ́ wo pé taŋa sesɛ, pfúŋɔ́ mvémvé pɛ́ pɔ́b pɛ́ Yúda nɛ́ pó.”»
22Pɛ Yúda pɛ́ pɔ́b kɛ zóʼ nsó Pɔ́lə wéré nɛ́, zyé ŋgěʼne, ntsɔ́ ŋgâ: «Pe pó ŋkɔrɔ́ ŋɔŋ wɔŋ ndúŋú tsetsáʼ. A tsé mbé zɔŋɔ ŋgâ a tsó mvé pó!» 23Njʉ́ pɔ́b kɛ ghéʼe néré, máʼa ndzwé fóó pɔ́b nsó mbó tóʼó pfúbɔ́ nɛ́, 24ntsɛ́ssó ŋkáb káŋató nsó ŋgâ pe kúŋ ne Pɔ́lə ndáb, pe gbíí wé ne gbaa, kɛ́ʼɛ́ ŋgâ pe yaa ndúŋú ndzé no yɛ́ pe kɛ ghéʼe ŋkyé wé nɛ́. 25Ŋkhoʼyɛ́ pe kɛ núŋu Pɔ́lə syé ne gbîne nɛ́, a tsɔ́ pwó ntsɛ́ssó mkpǐ káŋató ŋgâ: «Taʼ ŋɔŋ Roma wɛ́ pé zyé mbé fiʼɛ́ wé nɛ́ pó, puŋ tsɛ́ʼɛ́ ne gbîne wé?» 26Njʉ́ ntsɛ́ssó mkpǐ káŋató kɛ zóʼ wéré nsó nɛ́, a ghú ntsɔ́ pwó ntsɛ́ssó ŋkáb káŋató ŋgâ: «A ghɛmbɛ wo zɔŋɔ ŋgyɛ́ɛ́ kɔ́ kɛ́ʼɛ́? Ŋɔŋ wɔŋ, ŋɔŋ Roma!» 27Ntsɛ́ssó ŋkáb káŋató kʉ́yó mbzírɛ́ Pɔ́lə ŋgâ: «Sɔ́ŋɔ́ ya! Wo ŋɔŋ Roma sísíŋ?» A pód ŋgâ: «Ɔ́ŋɔ́!» 28Ntsɛ́ssó ŋkáb káŋató pó nsó ŋgâ: «Mo wɔŋ wɛ́ wo zhʉ́ nɛ́, mə kɛ péé ndáá mbób nɛ́ ŋkɔ́ŋ, mbɔ́rɔ́ mbɛ́ ŋɔŋ Roma.» Pɔ́lə pód ŋgâ: «Ŋgɛ mbɛ ne mo, mə twɔ́ pfɔ̂ nɛ́ pé núŋ.» 29Pɔŋ pɛ́ pɔ́b kɛ ghú ne yé ŋgâ pe gbíí wé nɛ́, tee wé kpaʼ zǎŋazâŋa. Ŋgɛmbɛ ne ntsɛ́ssó ŋkáb káŋató, a pɔ́ɔ́ yé kaʼatɛ ŋkhoʼyɛ́ a kɛ zé ŋgâ a ncʉ̌ ŋɔŋ Roma kɛ́ʼɛ́ ne tsáŋ nɛ́.
Ntsɛ́ssó ŋkáb káŋató fú Pɔ́lə ŋgâ pe zóʼó wé
30Keemvé, ntsɛ́ssó ŋkáb káŋató sɛ́ɛ́ ne ndzêne kpaʼ no yɛ́, pɛ Yúda kɛ gháŋá sɔ́bɔ́ Pɔ́lə ndúŋú nɛ́. A zhyɛ́ pe ŋkee tsáŋ mbəb yé. A téré pɛ ntsɛ́ssó ghaŋáshʉ́ pwɛ ŋkɔŋɔ pɛ ghaŋasábáfiʼ kəkweʼé náá, mbó ŋgyɛ́ pe kʉ́yó ne Pɔ́lə ne ntsúne tsí no yéré.
Currently Selected:
Faʼ Ghaŋántɔ́b 22: XMG
Highlight
Share
Copy
Want to have your highlights saved across all your devices? Sign up or sign in
Faʼ Ghaŋántɔ́b 22
22
1«Pɔ́ŋmɛ́ páá pé mbzíŋi pwɛ tɛd páá, puŋ zóʼ ŋkhoʼyɔŋ njʉ́ mə nɔ́ ya gbéé nɛ́.» 2Ŋkhoʼyɛ́ pɔ́b zóʼ njʉ́ Pɔ́lə kɛ ntsɔ̌ ne nsó pɛ Yúda nɛ́, pɔ́b zhírí ŋgâ kyéd. 3Pɔ́lə nsó ŋgâ: «Mə ŋɔŋ Yúda, pe pfé ya pé mbɛ́lʉ́ŋ Taasə ndzó pɛ́rɛ́ ŋgɔŋ Silisya. Ntsʉʼmbé, mə ŋgóʼó ndzó mbɛ́lʉ́ŋ yɔ̂ŋ. A ne kpee Gamalyɛlə, a kɛ zhyɛ́ yé mə cʉyǐ ndzé kpaʼ yɔ́b yɛ́ a ndzó Kaŋ tɛd tɛd piŋi nɛ́. Mə kɛ kʉyě no Mboʼmvé kaʼatɛ, njʉ́ ŋkɔŋɔ wuŋ náá ke ŋkʉye yúŋ ndzebé kɛ́ʼɛ́ nɛ́. 4Mə kɛ záá pɔŋ pɛ́ pɔ́b kɛ yɔ́ɔ́ Mɛndɔ́b wéré nɛ́ né ŋgəʼo kaʼatɛ, mbó nɔ́ʼɔ́ wɔ́b. Mə ŋgyɛ́ pé ncʉ̂ mbzíŋi pwɛ pěŋgyé mbó máʼá wɔ́b ndátsáŋ. 5Tɛɛmbɛ Tɛdshʉ́ kəkwéʼe pwɛ ŋkɔŋɔ pɛ ghəkód náá kpee ntáŋ ya. Ŋweʼe yɛ́ a kɛ fɛ́ tʉ̌ŋ ne mo ŋgâ mə ŋgú Damáásə máʼ tsáŋ ndzó mbwó pǔkristo, ŋkhú ne wɔ́b Yerʉ́salɛm mbó nzáá wɔ́b ne ŋgəʼo nɛ́, kɛ twɔ́ ne pɔ́b.
6Mə kɛ ghǔ kaʼatɛ tsé mbáŋ Damáásə. Ŋgɛ́ mvuwɛ, ne ywɔ̌ tʉ̌ŋménab, taʼ ŋkaʼmɔ́ɔ́ kəkwéʼe twɔ́ pépéé, ndzyɛ̂ ya ne ndáŋne mé. 7Mə mvɔ́ syé, ndzóʼ taʼ ndzəb ntsɔ́ ne mo ŋgâ: “Sɔlə, Sɔlə, wo twɔ́ ndzəb ya káʼa ŋkyé kɔ́?” 8Mə mbod ŋgâ: “Ntsɛɛpɔŋ, wo wɔ̂ ?” Ndzəb pód ŋgâ: “A mo Yěsô, ŋɔŋ Nǎzarɛd! Mo wɛ́ wo twɔ́ ndzəb yé kɛ́ʼɛ́ nɛ́.” 9Pɛkpee páá kɛ cʉ̌yi njʉ́ káʼmɔ́ɔ́, ntsʉʼmbé tsé mbé zóʼó ndzəb yɛ́ a kɛ ntsɔ́ no ne mo nɛ́ pó. 10Mə mbzirí ŋgâ: “Mə ŋgyɛ́ɛ́ kɔ́ Ntsɛɛpɔŋ?” Ntsɛɛpɔŋ pɔ́rɔ́ ne mo ŋgâ: “Ŋǎ syé, ŋgú Damáásə. Wo páŋa yóʼó, pe sɔ́ŋɔ́ wo ne ŋkɔŋɔ no yɛ́ wo ŋgyɛ́ nɛ́ náá.” 11Njʉ́ mə kɛ tsé mbé zhʉ́ ywoʼ pó ŋkyé ŋkaʼmɔ́ɔ́ wɛ́ a kɛ fʉ̂ míí máá nɛ́, a gbâ pɛkpee páá gbáá pwó ya, tsyáŋa ya, mə mbáŋa Damáásə.
12Cyó taʼ ŋɔŋ kɛ pɛ́ yóʼó, tíí pé Ananiyasə. A kɛ pé taʼ ŋɔŋ wɛ́ a kɛ ntséʼé pɔ́ɔ́ Mboʼmvé, mbó ntii kpee yé ndúŋú kaŋ nɛ́. Ŋkɔŋɔ pɛ Yúda pɛ́ pɔ́b kɛ tsó yóʼó náá nɛ́, kɛ tsɔ́ no sʉ́ʼʉ ŋkyé wé. 13A kɛ kʉ́yó tsɛ́rɛ ya, ntsɔ́ ne mo ŋgâ: “Sɔlə, mɔ́ŋmɛ́ ya, pó njʉ́ ywoʼ!” Kpaʼ ŋkhoʼyéré, mə mbó njʉ́ ywoʼ, njʉ́ wé. 14A ntsɔ́ ne mo ŋgâ: “Mboʼmvé tɛd tɛd piŋi ntsɔʼ wo ŋgâ wo zé ŋkɔŋɔ meno pɛ́ a kʉyě náá nɛ́, ŋgâ wo zhʉ́ Ŋɔŋ ŋgerɛ́ŋged, mbó ndzóʼ kpaʼ ndzəb ye. 15Wo ntsʉ́ʼɔ ŋgaŋakpêtaŋ ye síŋ ŋkɔŋɔ pɔŋ náá, ndúŋú meno pɛ́ wo zhʉ́ mbó ndzóʼ nɛ́. 16Wo pó ndzɛ̌ kɔ́? Ntě! Khó fú tíí yé, kpênse, a sǒ kəpɔŋ wo.”
17Mə mbód ndzəb Yerʉ́salɛm. Taʼ zhyémve, mə tsé ntsɛ́ʼɛ́ Mboʼmvé Ndámboʼmvé, mə ŋgə́yí. 18Mə njʉ́ Ntsɛɛpɔŋ, a ntsɔ́ ne mo ŋgâ: “Ŋǎ zaŋa, ŋgú Yerʉ́salɛm kii shʉrʉ, ŋkyé ŋgâ pɔ́b náʼ mbzyɛ́ no yɛ́ wo ntsɔ́ ŋkyé ya nɛ́ pó.” 19Mə mbód ŋgâ: “Ntsɛɛpɔŋ, pɔ́b zé kpaʼ sísíŋ ŋgâ a kɛ ghú mo ndzó pɛ ndántéré, ŋgyɛ̌ pé gbâ pɔŋ pɛ́ pɔ́b kɛ ntséʼé psyɛ́ndzɔʼ ŋkyé wo nɛ́, máʼa ndátsáŋ mbó gbíí wɔ́b. 20Ŋkhoʼyɛ́ pé kɛ nɔ́ʼ Etyɛŋ, ghaŋákpééntáŋ wo nɛ́, ŋkɔʼɔtombəb ya, mə kɛ pɛ yóʼó, ke mbzyɛ́ ya ŋgúú ndzəb pɔ́b. A ywʉ́ʼʉ́ mo ŋgʉʼʉ́ ndzwé pɔŋ pɛ́ pɔ́b kɛ nɔʼ wé nɛ́.” 21Ntsʉʼmbé a ntsɔ́ ne mo ŋgâ: “Ghú, mə ntwɔ́ wo pé taŋa sesɛ, pfúŋɔ́ mvémvé pɛ́ pɔ́b pɛ́ Yúda nɛ́ pó.”»
22Pɛ Yúda pɛ́ pɔ́b kɛ zóʼ nsó Pɔ́lə wéré nɛ́, zyé ŋgěʼne, ntsɔ́ ŋgâ: «Pe pó ŋkɔrɔ́ ŋɔŋ wɔŋ ndúŋú tsetsáʼ. A tsé mbé zɔŋɔ ŋgâ a tsó mvé pó!» 23Njʉ́ pɔ́b kɛ ghéʼe néré, máʼa ndzwé fóó pɔ́b nsó mbó tóʼó pfúbɔ́ nɛ́, 24ntsɛ́ssó ŋkáb káŋató nsó ŋgâ pe kúŋ ne Pɔ́lə ndáb, pe gbíí wé ne gbaa, kɛ́ʼɛ́ ŋgâ pe yaa ndúŋú ndzé no yɛ́ pe kɛ ghéʼe ŋkyé wé nɛ́. 25Ŋkhoʼyɛ́ pe kɛ núŋu Pɔ́lə syé ne gbîne nɛ́, a tsɔ́ pwó ntsɛ́ssó mkpǐ káŋató ŋgâ: «Taʼ ŋɔŋ Roma wɛ́ pé zyé mbé fiʼɛ́ wé nɛ́ pó, puŋ tsɛ́ʼɛ́ ne gbîne wé?» 26Njʉ́ ntsɛ́ssó mkpǐ káŋató kɛ zóʼ wéré nsó nɛ́, a ghú ntsɔ́ pwó ntsɛ́ssó ŋkáb káŋató ŋgâ: «A ghɛmbɛ wo zɔŋɔ ŋgyɛ́ɛ́ kɔ́ kɛ́ʼɛ́? Ŋɔŋ wɔŋ, ŋɔŋ Roma!» 27Ntsɛ́ssó ŋkáb káŋató kʉ́yó mbzírɛ́ Pɔ́lə ŋgâ: «Sɔ́ŋɔ́ ya! Wo ŋɔŋ Roma sísíŋ?» A pód ŋgâ: «Ɔ́ŋɔ́!» 28Ntsɛ́ssó ŋkáb káŋató pó nsó ŋgâ: «Mo wɔŋ wɛ́ wo zhʉ́ nɛ́, mə kɛ péé ndáá mbób nɛ́ ŋkɔ́ŋ, mbɔ́rɔ́ mbɛ́ ŋɔŋ Roma.» Pɔ́lə pód ŋgâ: «Ŋgɛ mbɛ ne mo, mə twɔ́ pfɔ̂ nɛ́ pé núŋ.» 29Pɔŋ pɛ́ pɔ́b kɛ ghú ne yé ŋgâ pe gbíí wé nɛ́, tee wé kpaʼ zǎŋazâŋa. Ŋgɛmbɛ ne ntsɛ́ssó ŋkáb káŋató, a pɔ́ɔ́ yé kaʼatɛ ŋkhoʼyɛ́ a kɛ zé ŋgâ a ncʉ̌ ŋɔŋ Roma kɛ́ʼɛ́ ne tsáŋ nɛ́.
Ntsɛ́ssó ŋkáb káŋató fú Pɔ́lə ŋgâ pe zóʼó wé
30Keemvé, ntsɛ́ssó ŋkáb káŋató sɛ́ɛ́ ne ndzêne kpaʼ no yɛ́, pɛ Yúda kɛ gháŋá sɔ́bɔ́ Pɔ́lə ndúŋú nɛ́. A zhyɛ́ pe ŋkee tsáŋ mbəb yé. A téré pɛ ntsɛ́ssó ghaŋáshʉ́ pwɛ ŋkɔŋɔ pɛ ghaŋasábáfiʼ kəkweʼé náá, mbó ŋgyɛ́ pe kʉ́yó ne Pɔ́lə ne ntsúne tsí no yéré.
Currently Selected:
:
Highlight
Share
Copy
Want to have your highlights saved across all your devices? Sign up or sign in