Faʼ Ghaŋántɔ́b 21
21
Pɔ́lə kɔ́ʼɔ́ Yerʉ́salɛm
1Ŋkhoʼyɛ́ psi pɔ́b kɛ ke fâ nɛ́, psi kɔ́ʼ páŋ ŋgú ŋgerɛ́ŋged Kosə. Keemvé, psi ghú Roodə, ndzáʼa yóʼó, ŋgú Patara. 2Psi zhʉ́ páŋ yɛ́ a kɛ ghú Fenisya nɛ́, ŋkɔ́ʼɔ́ zhí ndzó, ŋgú. 3Njʉ́ psi kɛ nyí kaʼatɛ tsé njʉ́ ŋkə́ŋnse yɛ́ pe fú ne Shiiprə nɛ́, psi tee ŋkə́ŋnsene ndzáʼapwó ŋkʉbi, ndɔ́ɔ́ mɛndɔ́b Sirya. Ntsebɛ́ Tii ndzó ywoʼ yɛ́ a kɛ ghɛmbɛ pe ghɛ̌ shʉʼɛ́ m wɔ̂ táŋ nɛ́. 4Njʉ́ psi kɛ páŋ yóʼó njʉ́ pǔkristo nɛ́, psi zhyɛ́ zhyémve pesambáá yóʼó. Zhʉye Yáŋme tiŋɛ́ wɔ́b, pɔ́b ntsɔ́ pwó Pɔ́lə ŋgâ a ndɛ mbó ŋkɔ́ʼɔ́ Yerʉ́salɛm. 5Njʉ́ psi kɛ tsó yóʼó kaʼatɛ a kuʼu nɛ́, psi ŋáá syé ne ŋgúne, ŋkɔŋɔ pɔŋ náá, pěŋgyé pwɛ pɛ mɔ́ŋ tyáŋa ywí kaʼatɛ ntwɔ́ mbɛ́lʉ́ŋ. Psi féd tókuʼé myi yóʼó ne ghə́nse ntsɛ́ʼɛ́ Mboʼmvé. 6Ŋkhoʼyɛ́ psi kɛ fɛ́ yáŋmvé nɛ́, psi kɔ́ʼɔ́ ndzó páŋ, pɔ́b pód yɔ́b ndzəb yóʼó pɔ́b. 7Ŋgɛ ŋkhú ne psi, psi ŋáá Tii siʼá mbáŋa Tolémayisə. Ŋkhoʼyɛ́ psyɛ́ pǔkristo kɛ tséʼe nɛ́, psi pɔ́b tsó taʼ zhyémve.
8Keemvé, psi ghú Sezare, ŋkuŋɔ ndáb Filipo ŋgaŋancʉrɛ́ ŋkəŋ sʉ́ʼʉ wɛ́ a kɛ pɛ́ ndzɔ́ʼɔ́ ghaŋághebe pesambáá pɛ pe kɛ ntsɔ́ʼ nɛ́, ndáʼá ywoʼ yé. 9A kɛ ntséʼé pɔ́ŋdɛmɛ́ pékwa pɛ, pɔ́b kɛ ntsɔ́ kpaŋató Mboʼmvé nɛ́. 10Psi kɛ tsó yóʼó ne zhyémve zááme. Taʼ ŋgaŋatsɔ́kpaŋató Mboʼmvé twɔ́ Zhʉde ŋkʉ́yó, tíí ye pé Agabʉsə. 11A yɔ́ɔ́ ŋkadáá Pɔ́lə ŋkʉ́yó njʉ́ ywí núŋ. Ŋkwód kpee mé pwɛ mbwó mé, ntsó ŋgâ: «Yɔŋ no yɛ́ Zhʉye Yáŋme nsó nɛ́. Ŋgaŋa ŋkandáá wɔŋ, yɔŋ njʉ́ pɛ Yúda náʼá ŋkwórɔ́ wé Yerʉ́salɛm fí wé pwó pɛ kiizɛ́mboʼmvé nɛ́!» 12Ŋkhoʼyɛ́ psi kɛ zóʼ yéré no nɛ́, psyɛ́ pǔkristo póʼmbwó pwó Pɔ́lə ŋgâ a ndɛ ŋkɔ́ʼɔ́ Yerʉ́salɛm. 13Ntsʉʼmbé, a pɔ́rɔ́ ne psi ŋgâ: «Puŋ ŋkhɔ mbó mbubɔ ndzɔʼ ya ŋkyé kɔ́? Ŋgɛ ŋkhú ne mo, kii mə ŋkɔ́ʼɔ́ Yerʉ́salɛm kɛ́ʼɛ́ pɔ́b kwód ya kwód, kii pɔ́b nɔ́ʼ ya nɔ́ʼɔ́ ne tíí Ntsɛɛpɔŋ Yěsô, mbǒ mə kɛ psyɛ́.» 14Njʉ́ a kɛ tsé mbé zɔŋɔ ndzóʼó cyó no nɛ́ pó, psi pó mbé tʉ̌ŋ ntswee ŋkʉ́rʉ́ pó. Syɛ́ ntsɔ́ zhí pé ŋgâ, Ntsɛɛpɔŋ zhyɛ́ njʉ́ a kʉ́yé nɛ́!
15Pɔ́ŋ zhyémve péré záʼ, psi mee tsúŋɔ́ mbəb zhí, ŋkɔ́ʼɔ́ Yerʉ́salɛm. 16Psi yɛ́ pǔkristo Sezare pɛ́ psi pɔ́b kɛ tə̌b kpee nɛ́, ghú. Pɔ́b yɔ́ɔ́ ywí ŋgú yóʼó Mənasɔŋ, ŋɔŋ Shiiprə wɛ́ a kɛ pɛ́ ndzɔ́ʼɔ́ pɛ sɔ́ pǔkristo nɛ́, ŋgâ psi pɔ́b yáʼ.
Pɔ́lə ghú njʉ́ Zhakə
17Psi kɛ ke ŋgɛ́ mbáŋa Yerʉ́salɛm, pǔkristo ghəyɛ́ ywí ne ndebéne. 18Keemvé, Pɔ́lə yɔ́ɔ́ ywí, psi pɔ́b ghú ndáb Zhakə, ywoʼ yɛ́ ŋkɔŋɔ pɛ ghəkód ndáméted náá kɛ tɛrɛ́ nɛ́. 19Pú pɔ́b tséʼé, a tebé ŋkɔŋɔ meno pɛ́ Mboʼmvé kɛ záʼá ndzɔ́ʼɔ́ faʼ ye, ŋgyɛ́ mbəb pɔŋ pɛ́ pɔ́b kɛ pé pɛ Yúda nɛ́ po, kii tě yɔ́b. 20Pɔŋ pɛ́ pɔ́b kɛ zóʼó Pɔ́lə nɛ́, ŋgúʼɔ Mboʼmvé mbó ntsɔ́ pwó yé ŋgâ: «Mɔ́ŋmɛ́, tɛɛmbɛ ŋkɔʼɔtómbəb wo zhʉ́! Pǔkristo pɛ́ pɔ́b pɛ Yúda nɛ́, záʼ ŋkáb yé. Ntsʉʼmbé, ŋkɔŋɔ wɔ́b náá kɛ ntíí ndzɔʼ yɔ́b ndúŋú Kaŋ Mǔsê. 21Ŋgɛmbɛ pɔ́b zé meno pɛ́ pé tsɔ́ ne tíí wo nɛ́. Pe tsɔ́ ŋgâ, ntʉ́ʉ́ yɛ́ wo fɛ́ nɛ́ tsiŋɛ ŋkɔŋɔ pɛ Yúda pɛ́ pɔ́b tsó ndzɔ́ʼɔ́ pɔŋ pɛ́ pɔ́b pɛ Yúda nɛ́, ŋgâ pɔ́b tě Kaŋ Mǔsê. Pe tsɔ́ ŋkʉ́rʉ́ ŋgâ, wo tsɔ́ ne pɔ́b ŋgâ kii pɔ́b ndɛ́ mbó psirɛ́ pɔ́ŋ pɔ́b, kii pó tsé nyí njʉ́ kaŋ miŋi tsɔ́ nɛ́. 22Pe ŋgyɛ́ɛ́ níŋ nɛ́? Pɔ́b mboʼ ndzóʼ ŋgâ wo ghaŋ. 23Zhyɛ́ nɛ́ no yɛ́ psi ntsɔ́ pwó wo nɛ́. Pɔŋ pékwa tsetsɛrɛ psi pɛ́ pɔ́b kaʼ no síŋ Mboʼmvé nɛ́. 24Péé yɔ́b yɛ́ a zɔŋɔ ŋgâ pɔ́b péé nɛ́, ndɔ́ɔ́ wɔ́b puŋ pɔ́b kaa náá sǒ mbəb yúŋ pɔ́b, njʉ́ kaŋ miŋi tsɔ́ nɛ́. Néré, pe k wɔ̂ tó yɔ́b. Kɛ́ʼɛ́, ŋkɔŋɔ pɔŋ zé náá ŋgâ meno pɛ́ pé ntsɔ́ ne tíí wo nɛ́, mbwɔ̂. Ŋkyé ŋgâ wo ke tsé nyí njʉ́ Kaŋ Mǔsê zɔŋɔ nɛ́. 25Ŋgɛmbɛ ne pɔŋ pɛ́ pɔ́b pɛ Yúda nɛ́ po, ntsʉʼmbé mbó tsʉ́ʼ pǔkristo nɛ́, psi kɛ ŋweʼé no yɛ́ psi kɛ tíí nɛ́, ntwɔ́ né pɔ́b. No yéré pɛ́ɛ́ ŋgâ, pɔ́b zhyáŋa ndzab yɛ́ pɛ kiizɛ́mboʼmvé fɛ́ shʉ́ núŋ nɛ́, mbɛ nsə, mbɛ ndzab yɛ́ pe fúbú fúbú nɛ́. Kii pɔ́b ndɛ ŋgyɛ́ pɛ́ menoghóʼotó.» 26Keemvé, Pɔ́lə yɔ́ɔ́ pɔŋ péré, pú pɔ́b ghú ndzyě mbǒdne mbəb yɔ́b njʉ́ kaŋ Mǔsê tsɔ́ nɛ́. A ŋkúŋɔ́ Ndámboʼmvé, ne ntsóne zhyémve yɛ́, pe fɛ́ shʉ́ ne tíí Mbɛwɔ̂ ndzɔ́ʼɔ́ pɔ́b ŋkhoʼyɛ́ sǒne mbəb yéré mye nɛ́.
Pe gbáá Pɔ́lə Ndábmboʼmvé
27Zhyémve pesambáá péré kɛ ghɛ́ ndzáʼa, pɛ Yúda pɛ pɔ́b kɛ twɔ́ ndzó pɛ́rɛ́ ŋgɔŋ Azi nɛ́, zǐ Pɔ́lə Ndámboʼmvé. Ŋkʉ́yɛ̌ pɔŋ pe gbáá wé. 28Pɔ́b kɛ ghéʼe ntsɔ́ ŋgâ: «Pɔ́ŋ Issayɛ, fɛ́ne ya ne ŋɔŋ! Ŋɔŋ wɛ́ a maʼa wíŋi, mbó maʼ kaŋ miŋi pú ywoʼ yɔŋ, ne ntʉ́ʉ́ yɛ́ a fɛ́ pwó ŋkɔŋɔ pɔŋ ndzó ŋkɔŋɔ ywoʼ náá nɛ́, pé níŋ! A zhyɛ́ kaʼatɛ ndɔ́ɔ́ mbé Gerɛʼ ŋkúŋ ne wɔ́b Ndámboʼmvé. A zhyɛ́ kɛ́ʼɛ́, siŋɛ́ Ywoʼ Yáŋme yɔ̂ŋ.» 29A kɛ zhyɛ́ no yɛ́, pɔ́b kɛ zhʉ́ wú Trofimə ŋɔŋ Éfɛ̂zə ndzó mbɛ́lʉ́ŋ Yerʉ́salɛm nɛ́, Mkpáŋ kɛ́ʼɛ́ ŋgâ Pɔ́lə kɛ zhyɛ́ a ŋkuŋɔ́ ndáb Ndámboʼmvé. 30Kɛ́ʼɛ́, no yéré gbáʼ, pɔŋ tô. Pé gbáá Pɔ́lə, ntwɔ́ ne yé Ndámboʼmvé. Kpaʼ ŋkhoʼyéré, pe fûŋ pɛ ntswěndáb. 31Pe kɛ táʼá ne nɔ̌ʼne Pɔ́lə, ŋkhoʼyɛ́ yéré no kɛ páŋa ndzó ntə́ŋé ntsɛ́ssó ŋkáb káŋató pɛ Roma nɛ́. Pé kɛ tsɔ́ pwó ye ŋgâ: «Vaʼ gháʼmbwó nɛ́ Yerʉ́salɛm!» 32A téré pɛ káŋató pwɛ pɛ ntsɛ́ssó mkpǐ káŋató zǎŋazâŋa, ntwɔ́ wɔ́b ŋgâ pɔ́b ghú shʉbɛ wɔ́b. Pɔŋ péré ke ŋgɛ́ njʉ́ ntsɛ́ssó ŋkáb káŋató pwɛ pɛ káŋató, ntéé gbîne Pɔ́lə. 33Ŋkhoʼyɛ́ ntsɛ́ssó ŋkáb káŋató kɛ páŋ nɛ́, a mgbáá Pɔ́lə, ŋgyɛ́ ŋgâ pe ŋkwód wé ne tsáŋ yípáá. A kɛ táʼá ne ndzéne ŋɔŋ wɛ́ a yé nɛ́, ne yɔ́b yɛ́ a kɛ zhyɛ́ nɛ́. 34Ntsʉʼmbé, Mbɛwɔ̂ ke ŋgeʼe, ntsɔ́ɔ́ yé no. Mbziʼe njʉ́ zɔd kɛ gháʼmbwó nɛ́, ntsɛ́ssó ŋkáb káŋató pe kúʼɔ́ ne ndzóʼne cyó no pó. A nyáŋá ŋgâ pe kúŋ ne ye ndzó ywoʼ yɛ́ pɛ káŋató tsó nɛ́. 35Ŋkhoʼyɛ́ Pɔ́lə kɛ páŋá ndzó ywoʼ yɛ́ pe kɔ́ʼɔ́ ŋkhúŋɔ ndáb nɛ́, pɛ káŋató kyɛ́ wé kyɛ́, ŋkyé ndʉʼ yɛ́ a kɛ ghɛmbɛ pɔŋ tséʼé nɛ́. 36Ŋkyé ŋgâ ŋkɔŋɔ pɔŋ náá kɛ zɔŋɔ wé, ŋgeʼe ŋgâ: «A ke pfó pfó!»
Pɔ́lə kpéé mbəb yé síŋ pɛ Yúda
37Ŋkhoʼyɛ́ pe kɛ zɔŋɔ ŋkúŋɔ ne yé ndáb yéré nɛ́, Pɔ́lə tsɔ́ pwó ntsɛ́ssó ŋkáb káŋató wéré ŋgâ: «Tɛɛmbɛ mə ntsɔ́ no pwó wo?» A pɔ́rɔ́ pwó yé ŋgâ: «Wo táŋ ndzɛ́ nsó Gerɛʼ? 38A wo mbé ŋǔ Egibto wɛ́ wo máʼá vaʼ, mbó ndɔ́ɔ́ ŋkáb səbntswee pékwa puŋ pɔ́b ghú ghúŋkwéʼé kpee kpee nǐmwɔ̂ nɛ́ pɔɔ?» 39Pɔ́lə pód ŋgâ: «Mo yɔ́ɔ́! Mə ŋɔŋ Yúda, ŋɔŋ Taasə ndzó mbɛ́lʉ́ŋ kəkwéʼe yɛ́ tíí Silisya nɛ́. Mə mbóʼmbwó pwó wo ŋgâ wo tee, mə ntsɔ́ no pwó pɔŋ pɔ́ŋ.» 40A fɛ́ nsó pwó Pɔ́lə. A tsɛ́ ndzó ywoʼ kʉrʉ́me, ŋkʉ́rʉ pwó ye fɛ́ nsó ŋgâ pɔ́b naʼ ndzwə́ʼé. Ywoʼ zhírí ŋgâ kyéd. A ntsɔ́ ne pɔ́b ne nsó pɛ Yúda ŋgâ:
Currently Selected:
Faʼ Ghaŋántɔ́b 21: XMG
Highlight
Share
Copy
Want to have your highlights saved across all your devices? Sign up or sign in
Faʼ Ghaŋántɔ́b 21
21
Pɔ́lə kɔ́ʼɔ́ Yerʉ́salɛm
1Ŋkhoʼyɛ́ psi pɔ́b kɛ ke fâ nɛ́, psi kɔ́ʼ páŋ ŋgú ŋgerɛ́ŋged Kosə. Keemvé, psi ghú Roodə, ndzáʼa yóʼó, ŋgú Patara. 2Psi zhʉ́ páŋ yɛ́ a kɛ ghú Fenisya nɛ́, ŋkɔ́ʼɔ́ zhí ndzó, ŋgú. 3Njʉ́ psi kɛ nyí kaʼatɛ tsé njʉ́ ŋkə́ŋnse yɛ́ pe fú ne Shiiprə nɛ́, psi tee ŋkə́ŋnsene ndzáʼapwó ŋkʉbi, ndɔ́ɔ́ mɛndɔ́b Sirya. Ntsebɛ́ Tii ndzó ywoʼ yɛ́ a kɛ ghɛmbɛ pe ghɛ̌ shʉʼɛ́ m wɔ̂ táŋ nɛ́. 4Njʉ́ psi kɛ páŋ yóʼó njʉ́ pǔkristo nɛ́, psi zhyɛ́ zhyémve pesambáá yóʼó. Zhʉye Yáŋme tiŋɛ́ wɔ́b, pɔ́b ntsɔ́ pwó Pɔ́lə ŋgâ a ndɛ mbó ŋkɔ́ʼɔ́ Yerʉ́salɛm. 5Njʉ́ psi kɛ tsó yóʼó kaʼatɛ a kuʼu nɛ́, psi ŋáá syé ne ŋgúne, ŋkɔŋɔ pɔŋ náá, pěŋgyé pwɛ pɛ mɔ́ŋ tyáŋa ywí kaʼatɛ ntwɔ́ mbɛ́lʉ́ŋ. Psi féd tókuʼé myi yóʼó ne ghə́nse ntsɛ́ʼɛ́ Mboʼmvé. 6Ŋkhoʼyɛ́ psi kɛ fɛ́ yáŋmvé nɛ́, psi kɔ́ʼɔ́ ndzó páŋ, pɔ́b pód yɔ́b ndzəb yóʼó pɔ́b. 7Ŋgɛ ŋkhú ne psi, psi ŋáá Tii siʼá mbáŋa Tolémayisə. Ŋkhoʼyɛ́ psyɛ́ pǔkristo kɛ tséʼe nɛ́, psi pɔ́b tsó taʼ zhyémve.
8Keemvé, psi ghú Sezare, ŋkuŋɔ ndáb Filipo ŋgaŋancʉrɛ́ ŋkəŋ sʉ́ʼʉ wɛ́ a kɛ pɛ́ ndzɔ́ʼɔ́ ghaŋághebe pesambáá pɛ pe kɛ ntsɔ́ʼ nɛ́, ndáʼá ywoʼ yé. 9A kɛ ntséʼé pɔ́ŋdɛmɛ́ pékwa pɛ, pɔ́b kɛ ntsɔ́ kpaŋató Mboʼmvé nɛ́. 10Psi kɛ tsó yóʼó ne zhyémve zááme. Taʼ ŋgaŋatsɔ́kpaŋató Mboʼmvé twɔ́ Zhʉde ŋkʉ́yó, tíí ye pé Agabʉsə. 11A yɔ́ɔ́ ŋkadáá Pɔ́lə ŋkʉ́yó njʉ́ ywí núŋ. Ŋkwód kpee mé pwɛ mbwó mé, ntsó ŋgâ: «Yɔŋ no yɛ́ Zhʉye Yáŋme nsó nɛ́. Ŋgaŋa ŋkandáá wɔŋ, yɔŋ njʉ́ pɛ Yúda náʼá ŋkwórɔ́ wé Yerʉ́salɛm fí wé pwó pɛ kiizɛ́mboʼmvé nɛ́!» 12Ŋkhoʼyɛ́ psi kɛ zóʼ yéré no nɛ́, psyɛ́ pǔkristo póʼmbwó pwó Pɔ́lə ŋgâ a ndɛ ŋkɔ́ʼɔ́ Yerʉ́salɛm. 13Ntsʉʼmbé, a pɔ́rɔ́ ne psi ŋgâ: «Puŋ ŋkhɔ mbó mbubɔ ndzɔʼ ya ŋkyé kɔ́? Ŋgɛ ŋkhú ne mo, kii mə ŋkɔ́ʼɔ́ Yerʉ́salɛm kɛ́ʼɛ́ pɔ́b kwód ya kwód, kii pɔ́b nɔ́ʼ ya nɔ́ʼɔ́ ne tíí Ntsɛɛpɔŋ Yěsô, mbǒ mə kɛ psyɛ́.» 14Njʉ́ a kɛ tsé mbé zɔŋɔ ndzóʼó cyó no nɛ́ pó, psi pó mbé tʉ̌ŋ ntswee ŋkʉ́rʉ́ pó. Syɛ́ ntsɔ́ zhí pé ŋgâ, Ntsɛɛpɔŋ zhyɛ́ njʉ́ a kʉ́yé nɛ́!
15Pɔ́ŋ zhyémve péré záʼ, psi mee tsúŋɔ́ mbəb zhí, ŋkɔ́ʼɔ́ Yerʉ́salɛm. 16Psi yɛ́ pǔkristo Sezare pɛ́ psi pɔ́b kɛ tə̌b kpee nɛ́, ghú. Pɔ́b yɔ́ɔ́ ywí ŋgú yóʼó Mənasɔŋ, ŋɔŋ Shiiprə wɛ́ a kɛ pɛ́ ndzɔ́ʼɔ́ pɛ sɔ́ pǔkristo nɛ́, ŋgâ psi pɔ́b yáʼ.
Pɔ́lə ghú njʉ́ Zhakə
17Psi kɛ ke ŋgɛ́ mbáŋa Yerʉ́salɛm, pǔkristo ghəyɛ́ ywí ne ndebéne. 18Keemvé, Pɔ́lə yɔ́ɔ́ ywí, psi pɔ́b ghú ndáb Zhakə, ywoʼ yɛ́ ŋkɔŋɔ pɛ ghəkód ndáméted náá kɛ tɛrɛ́ nɛ́. 19Pú pɔ́b tséʼé, a tebé ŋkɔŋɔ meno pɛ́ Mboʼmvé kɛ záʼá ndzɔ́ʼɔ́ faʼ ye, ŋgyɛ́ mbəb pɔŋ pɛ́ pɔ́b kɛ pé pɛ Yúda nɛ́ po, kii tě yɔ́b. 20Pɔŋ pɛ́ pɔ́b kɛ zóʼó Pɔ́lə nɛ́, ŋgúʼɔ Mboʼmvé mbó ntsɔ́ pwó yé ŋgâ: «Mɔ́ŋmɛ́, tɛɛmbɛ ŋkɔʼɔtómbəb wo zhʉ́! Pǔkristo pɛ́ pɔ́b pɛ Yúda nɛ́, záʼ ŋkáb yé. Ntsʉʼmbé, ŋkɔŋɔ wɔ́b náá kɛ ntíí ndzɔʼ yɔ́b ndúŋú Kaŋ Mǔsê. 21Ŋgɛmbɛ pɔ́b zé meno pɛ́ pé tsɔ́ ne tíí wo nɛ́. Pe tsɔ́ ŋgâ, ntʉ́ʉ́ yɛ́ wo fɛ́ nɛ́ tsiŋɛ ŋkɔŋɔ pɛ Yúda pɛ́ pɔ́b tsó ndzɔ́ʼɔ́ pɔŋ pɛ́ pɔ́b pɛ Yúda nɛ́, ŋgâ pɔ́b tě Kaŋ Mǔsê. Pe tsɔ́ ŋkʉ́rʉ́ ŋgâ, wo tsɔ́ ne pɔ́b ŋgâ kii pɔ́b ndɛ́ mbó psirɛ́ pɔ́ŋ pɔ́b, kii pó tsé nyí njʉ́ kaŋ miŋi tsɔ́ nɛ́. 22Pe ŋgyɛ́ɛ́ níŋ nɛ́? Pɔ́b mboʼ ndzóʼ ŋgâ wo ghaŋ. 23Zhyɛ́ nɛ́ no yɛ́ psi ntsɔ́ pwó wo nɛ́. Pɔŋ pékwa tsetsɛrɛ psi pɛ́ pɔ́b kaʼ no síŋ Mboʼmvé nɛ́. 24Péé yɔ́b yɛ́ a zɔŋɔ ŋgâ pɔ́b péé nɛ́, ndɔ́ɔ́ wɔ́b puŋ pɔ́b kaa náá sǒ mbəb yúŋ pɔ́b, njʉ́ kaŋ miŋi tsɔ́ nɛ́. Néré, pe k wɔ̂ tó yɔ́b. Kɛ́ʼɛ́, ŋkɔŋɔ pɔŋ zé náá ŋgâ meno pɛ́ pé ntsɔ́ ne tíí wo nɛ́, mbwɔ̂. Ŋkyé ŋgâ wo ke tsé nyí njʉ́ Kaŋ Mǔsê zɔŋɔ nɛ́. 25Ŋgɛmbɛ ne pɔŋ pɛ́ pɔ́b pɛ Yúda nɛ́ po, ntsʉʼmbé mbó tsʉ́ʼ pǔkristo nɛ́, psi kɛ ŋweʼé no yɛ́ psi kɛ tíí nɛ́, ntwɔ́ né pɔ́b. No yéré pɛ́ɛ́ ŋgâ, pɔ́b zhyáŋa ndzab yɛ́ pɛ kiizɛ́mboʼmvé fɛ́ shʉ́ núŋ nɛ́, mbɛ nsə, mbɛ ndzab yɛ́ pe fúbú fúbú nɛ́. Kii pɔ́b ndɛ ŋgyɛ́ pɛ́ menoghóʼotó.» 26Keemvé, Pɔ́lə yɔ́ɔ́ pɔŋ péré, pú pɔ́b ghú ndzyě mbǒdne mbəb yɔ́b njʉ́ kaŋ Mǔsê tsɔ́ nɛ́. A ŋkúŋɔ́ Ndámboʼmvé, ne ntsóne zhyémve yɛ́, pe fɛ́ shʉ́ ne tíí Mbɛwɔ̂ ndzɔ́ʼɔ́ pɔ́b ŋkhoʼyɛ́ sǒne mbəb yéré mye nɛ́.
Pe gbáá Pɔ́lə Ndábmboʼmvé
27Zhyémve pesambáá péré kɛ ghɛ́ ndzáʼa, pɛ Yúda pɛ pɔ́b kɛ twɔ́ ndzó pɛ́rɛ́ ŋgɔŋ Azi nɛ́, zǐ Pɔ́lə Ndámboʼmvé. Ŋkʉ́yɛ̌ pɔŋ pe gbáá wé. 28Pɔ́b kɛ ghéʼe ntsɔ́ ŋgâ: «Pɔ́ŋ Issayɛ, fɛ́ne ya ne ŋɔŋ! Ŋɔŋ wɛ́ a maʼa wíŋi, mbó maʼ kaŋ miŋi pú ywoʼ yɔŋ, ne ntʉ́ʉ́ yɛ́ a fɛ́ pwó ŋkɔŋɔ pɔŋ ndzó ŋkɔŋɔ ywoʼ náá nɛ́, pé níŋ! A zhyɛ́ kaʼatɛ ndɔ́ɔ́ mbé Gerɛʼ ŋkúŋ ne wɔ́b Ndámboʼmvé. A zhyɛ́ kɛ́ʼɛ́, siŋɛ́ Ywoʼ Yáŋme yɔ̂ŋ.» 29A kɛ zhyɛ́ no yɛ́, pɔ́b kɛ zhʉ́ wú Trofimə ŋɔŋ Éfɛ̂zə ndzó mbɛ́lʉ́ŋ Yerʉ́salɛm nɛ́, Mkpáŋ kɛ́ʼɛ́ ŋgâ Pɔ́lə kɛ zhyɛ́ a ŋkuŋɔ́ ndáb Ndámboʼmvé. 30Kɛ́ʼɛ́, no yéré gbáʼ, pɔŋ tô. Pé gbáá Pɔ́lə, ntwɔ́ ne yé Ndámboʼmvé. Kpaʼ ŋkhoʼyéré, pe fûŋ pɛ ntswěndáb. 31Pe kɛ táʼá ne nɔ̌ʼne Pɔ́lə, ŋkhoʼyɛ́ yéré no kɛ páŋa ndzó ntə́ŋé ntsɛ́ssó ŋkáb káŋató pɛ Roma nɛ́. Pé kɛ tsɔ́ pwó ye ŋgâ: «Vaʼ gháʼmbwó nɛ́ Yerʉ́salɛm!» 32A téré pɛ káŋató pwɛ pɛ ntsɛ́ssó mkpǐ káŋató zǎŋazâŋa, ntwɔ́ wɔ́b ŋgâ pɔ́b ghú shʉbɛ wɔ́b. Pɔŋ péré ke ŋgɛ́ njʉ́ ntsɛ́ssó ŋkáb káŋató pwɛ pɛ káŋató, ntéé gbîne Pɔ́lə. 33Ŋkhoʼyɛ́ ntsɛ́ssó ŋkáb káŋató kɛ páŋ nɛ́, a mgbáá Pɔ́lə, ŋgyɛ́ ŋgâ pe ŋkwód wé ne tsáŋ yípáá. A kɛ táʼá ne ndzéne ŋɔŋ wɛ́ a yé nɛ́, ne yɔ́b yɛ́ a kɛ zhyɛ́ nɛ́. 34Ntsʉʼmbé, Mbɛwɔ̂ ke ŋgeʼe, ntsɔ́ɔ́ yé no. Mbziʼe njʉ́ zɔd kɛ gháʼmbwó nɛ́, ntsɛ́ssó ŋkáb káŋató pe kúʼɔ́ ne ndzóʼne cyó no pó. A nyáŋá ŋgâ pe kúŋ ne ye ndzó ywoʼ yɛ́ pɛ káŋató tsó nɛ́. 35Ŋkhoʼyɛ́ Pɔ́lə kɛ páŋá ndzó ywoʼ yɛ́ pe kɔ́ʼɔ́ ŋkhúŋɔ ndáb nɛ́, pɛ káŋató kyɛ́ wé kyɛ́, ŋkyé ndʉʼ yɛ́ a kɛ ghɛmbɛ pɔŋ tséʼé nɛ́. 36Ŋkyé ŋgâ ŋkɔŋɔ pɔŋ náá kɛ zɔŋɔ wé, ŋgeʼe ŋgâ: «A ke pfó pfó!»
Pɔ́lə kpéé mbəb yé síŋ pɛ Yúda
37Ŋkhoʼyɛ́ pe kɛ zɔŋɔ ŋkúŋɔ ne yé ndáb yéré nɛ́, Pɔ́lə tsɔ́ pwó ntsɛ́ssó ŋkáb káŋató wéré ŋgâ: «Tɛɛmbɛ mə ntsɔ́ no pwó wo?» A pɔ́rɔ́ pwó yé ŋgâ: «Wo táŋ ndzɛ́ nsó Gerɛʼ? 38A wo mbé ŋǔ Egibto wɛ́ wo máʼá vaʼ, mbó ndɔ́ɔ́ ŋkáb səbntswee pékwa puŋ pɔ́b ghú ghúŋkwéʼé kpee kpee nǐmwɔ̂ nɛ́ pɔɔ?» 39Pɔ́lə pód ŋgâ: «Mo yɔ́ɔ́! Mə ŋɔŋ Yúda, ŋɔŋ Taasə ndzó mbɛ́lʉ́ŋ kəkwéʼe yɛ́ tíí Silisya nɛ́. Mə mbóʼmbwó pwó wo ŋgâ wo tee, mə ntsɔ́ no pwó pɔŋ pɔ́ŋ.» 40A fɛ́ nsó pwó Pɔ́lə. A tsɛ́ ndzó ywoʼ kʉrʉ́me, ŋkʉ́rʉ pwó ye fɛ́ nsó ŋgâ pɔ́b naʼ ndzwə́ʼé. Ywoʼ zhírí ŋgâ kyéd. A ntsɔ́ ne pɔ́b ne nsó pɛ Yúda ŋgâ:
Currently Selected:
:
Highlight
Share
Copy
Want to have your highlights saved across all your devices? Sign up or sign in