Efesiɛ́ŋ 3
3
Buól bá Pólo góbusió bá bɛndiádábá
1Buád buanda, yaŋuá Pólo, inyá gɛmbɔg gá Yésu Kilíse góbusió bán, banuá nudiábá Beyúdɛn. 2Ala nusaman guɔ́b ká, Gɔdányá agág gá bese, águmfá buol báguala góbusió bán. 3Úgumfuun eŋís ká wúlinsi niɔs nág. Iyedúmbi guɔ́ŋ nɛ́ ká ínúbánsɔ́nɛn. 4Númábanan ubú nsɔguɔ́ŋ, nugagúsɔ́ŋɔ́n ká nŋɔ́lɛnsan niɔs nɛ́lɛ́ŋaná Kilíse. 5Gɔdányá dimelinsi dɔgɔndɔ dá band dúmáadɔ́mb niɔs iniány. Nɛ́nuán, agá Ɛsámb yá Mefúny, úgulinsi nɛ́ gá bedúmeb na mubús umáanyáŋɔ́n gág gá buol. 6Niɔs niád nyɛ ká, agá nɛlad ná Yésu Kilíse, ebe bádiabá Beyúdɛn gabia andáŋáb agá bɔnɛ́m ubú Gɔdányá máabɛ́dɛ́gɛ́nɛ́n Beyúdɛn. Banyɛ́ buláŋ bá nuɔ́l nuád númoóm, bányɛ́ na niaf agá ndán yaád imoom. Manda amaány guámanɛn agá Ndág ya Nsɔ́m. 7Gɔdányá agág gá bese águal ká mbá eŋeli buol ká yɔ́yɔɔn band Ndág ya Nsɔ́m agág gá bugaga. 8Ndɛbá ta onkól gá band bá Gɔdányá. Agág gá bese, yaŋuá gɔg unyá guán ká yɔ́yɔɔn ebe bádiábá Beyúdɛn Ndág ya Nsɔ́m, ya bɔnɛ́m búleniné aga Kilíse, búdɛ́bá ná nɛmanɛn; 9ndíye band dambɔ́ dambɔ nɛnama ɛnɛ́ Gɔdányá fuógonyó niɔs nág. Uwɔ́ unyá oluŋi manda mem. Umɔsɛ́gɛ́n band bú gutɔ gusiám agá gɛsɛgɛl egie, 10nɛnama nɛnyá ká, gubia gúnyá ugumuana na bugɔn bɔ́b án beédéb, bónd bálɛ́ns nanyá nsiŋi ya Gɔdányá gidigid nyá ta bɔ́guɔyɔ, 11búgubiál gɔɔ́gɔ anɛ́ Gɔdányá mɔ́ɔyɛ́d nsua na nsua ká ugaal, nɛnuán úgudɔ́mbɛ́n aga Yésu Kilíse Ɔgúnɔ́ wasɔ ká wál bú. 12Anyɛ́ dinyá baladán naga idiond idiádáb wɔ́, diganyɛ na bufilí bágúbɛ́sɛdɛnɛn Gɔdányá kand buwa. 13Kányɛ inuɔ́yɔnɔ́ ká nudɛbiá masɔlɔ́gɔgɔ gágual ká nŋuɔ́bɛ́gɔɔn gánɔ góbúsió, gúgú gúnuéŋene nugúm.
Nanyá Kilíse díbílénené
14Buád buanda ngunsené enú egegus ogóbusió bá Babá Gɔdányá, 15uwɔ́ waád nigúl gidigid nínyá ugumuana ta egegus nyá nág. 16Nugúm nág nyɛ gianta ta bɔ́guɔyɔ. Buád buanda mbísógólonyó wɔ́ ká, waág bugaga agán gá ɛdɛm agá Ɛsámb yá Mefúny, 17na ká, Kilíse lukumin agán gá ɛdɛm gágual ká nuguádában wɔ́, nubá bagúnínán bese na bese, núfuág gusɔ́d gán agá ɛlɛ́ga, 18ɔlɔŋ na ebe bányá bá Gɔdányá, nugabia bugaga bágúsɔ́ŋɔ́n nanyá ɛlɛ́gá yá Kilíse nyá duúmé, guya pélépét na guyuum. 19Nugalɛns ɛlɛ́ga iyaány, ídɔ́mbaná buanda gidigid ubú mɔnd nyá bágúlɛns, núgadáŋáb gusɔ́d gá Gɔdányá gidigid, wɔ́b gá gúlukumen aganuá busió bum. 20Bugaga bá Gɔdányá buálaná buol nagadá wasɔ nyɛ́ báguala manda ɔmɔ́ diófonó wɔ́, gúmén manda ɔmɔ́ díbɛ́dáganá gudúmbídenyi. 21Nsɛ́ nugúm nág bá agá giɔ́b gá beédéb na aga Yésu Kilíse agá bɛsɛgɛl gidigid na bánamana! Anaány.
Currently Selected:
Efesiɛ́ŋ 3: MMU2
Highlight
Share
Copy
Want to have your highlights saved across all your devices? Sign up or sign in
CABTAL
