Efesiɛ́ŋ 2

Guadɔg agá nigú guám agá gisódio

1Núgubá nsua beguén nubal ndényé góbusió bá bifondi na bɛfal bán. 2Núguládaan gual gá band bá gus nuond nuládaan ofuŋ wá biád bá biliíndie unyá ugumuana, uwɔ́ waád walaná buol nɛ́nuan agá duɔ́l dá band bádialáná Gɔdányá nŋɔ́bɛ́nɔ. 3Basuá bem dígubá sɔ́n anyɛ bɔ́bɔ́ gigúl dinyá gubá diala biád bá manda ɛbɛ́ na duɔ́l dásɔ, na bíliíndié bás bílénené. Agá gubá gásɔ uguány, ilób yá Gɔdányá águbianan ká, ɛ́dɛ́guɛn gɔɔ́gɔ́ anɛ bɔsɔ́gɔ́ abaány. 4Gɔdányá gɔg gudiánan gɔsɔ́g ta bɔ́guɔyɔ, gágual ká ɛlɛ́ga yág agás gá giáy nyɛ gianta, 5nɛnama nɛnyá ká, gɛsɛgɛl dimaábá béguén nubál ndényé góbusió bá bɛfal bás, uwadífa gusɔ́d gugɔ́s aga Kilíse. Úgunusódi gá gilé gilé. 6Agás gá nɛlad na Yésu Kilíse, Gɔdányá égudiényugi anɛ́ dinyá gubá beguén nubal ndényé, uwond uwedílúkuminyi ugumuana ɔlɔŋ na Yésu Kilíse. 7Agá bese waga ɔwɔ́ unyá gudíal agá Yésu Kilíse, Gɔdányá águamba anaány ká, údíye gá mɔɔ́s anyɛ mɔɔ́s moólonó nanyá unyá bese ta bɔ́guɔyɔ. 8Gɔdányá unyá bese úgunúsódi gágual ká nuguádábaan wɔ́. Gisódio igiány diguúlenin aganuá, Gɔdányá unyá gunufa gɛ́. 9Gisódio igiány diguúlenin agá bɛnɔ́g bán bá bielínyélínyé. Kányɛ gunyá ká mɔnd dɛbɛ́kányɛ́d. 10Gá guán, dinyɛ bɛlɔŋalɔŋa bá Gɔdányá. Umadɛ́lɔ́ŋ agá nɛlad na Yésu Kilíse; uwadɛ́fa gusɔ́d gugɔ́s aga Yésu Kilíse ká diála bɛnɔg bá manda. Bɛnɔ́g bá manda ibiány, Gɔdányá máakɛ́n gudábɔ́na ká diála bɛ́.

Bem agá nŋɔ́sa ege Yésu

11Beyudɛn nyɛ na bulinsi bá buensi ɔgɔ́b gá duɔ́l, bébíléne gubɛ́bɛ́laan ká «biansansa». Banuá nudiábá «Beyúdɛn bá tas», nudɛbá na bulinsi ubuány agán gá duɔ́l, búbɔ́ bánúbɛ́laná ká besud sud. O! Ánubɛ́dágɛ́d anɛ́ nunyá gubá nsua; 12Nsua, numabá ayáyá na Kilíse; nudimebíbúlidenyi ta gá nɛlad, agá nŋɔ́sa ɛyɛ́ Gɔdányá máal na baan Bísalayɛ́l. Numabá anyɛ benyi, nubába agá gus uguány, nudiágán ɔdɛm agá Gɔdányá, nudɛlɛnsán wɔ́. 13Nɛnuán gɔg, agá nɛlad nánɔ na Yésu Kilíse, banuá nunyá gubá nsua ayáyá na Gɔdányá, manɔŋ má Kilíse águal ká núbá egúy naga. 14Gágual ká, Kilíse muát unyá gudílénin bumben anɛ́ unyá gual ká na Beyúdɛn na ebe bádiábá Beyúdɛn ónd gidɔŋ gímoom. Anyɛ́ uméeŋín gusɔ́d gág agá bɔdɛ́d bá gisanda, úgugad nɛnama ná ɛfɛmɛ nɛ́nyá guádɔ́na bɔ́. 15Úguéli bugaga bá bisele bá Beyúdɛn na bisúŋígín bɔ́b, ká úlád Beyúdɛn na ebe bádiábá Beyúdɛn naga, waág bumben ká bónd gɛŋɛ́lɛŋɔ́siɔ gá gidɔŋ gímoom. 16Gágual ká, umegú agá bɔdɛ́d bá gisanda, ɛfɛmɛ dɛbá andɔ gadágadá wɔbɔ, úguéli yɛ́. Uwal ká bónd nuɔ́l númoóm, uwond uwadábɔ́n ɛmbɛlɛ yɔbɔ ná Gɔdányá. 17Kilíse éguúl gɔg ká úsinúdúmbínyí bánuá nunyá gubá ayáyá na ebe bányá egúy Ndág ya Nsɔ́m ya bumben. 18Bunyɛ ká, dɛ́mádɔ́mbɛn agá Kilíse, Beyúdɛn anɛ ebe bádiábá Beyúdɛn, dinyɛ bégúdélímin ogóbúsió bá Babá Gɔdányá agá bugaga bá Ɛsámb yá Mefúny ímoom. 19Nudigábá andɔ benyi gúmén band bá musal, nuganyɛ band bá nigúl ná Gɔdányá, band bá nigúl nág. 20Úgunúbíŋinyi agá gɛfuág ɛgɛ́ gudágɛ́n gá gɛ́ nyá bedúmeb na mubús. Yésu Kilíse muát unyá ɛgɔnɔ ɛyɛ́ gians bídímbígeniné gá yɛ́. 21Agá bulada bán na Kilíse, úguál ká amam yá gɛfuág bɛ́lád, gɛbɔ́lɛ́gan gɛ́sɛɛ́yɛ gians gá Ɔgúnɔ́ ɛgɛ́ úlɔbɔnɔ́ kɔ́. 22Anyɛ́ nunyá baladán na Kilíse, banuá sɔ́n, nunyɛ ɔlɔŋ na beédéb gidigid agá gɛfuág igiány ɛ́gɛ́ Ɛsámb yá Mefúny yá Gɔdányá lɔbɔnɔ́ kɔ́.

Currently Selected:

Efesiɛ́ŋ 2: MMU2

Highlight

Copy