Bielínyélínyé 18

Pólo agá tísɔn wa Kolɛ́nt

1Agá gélem ány, Pólo guadɔg agá tísɔn wa Atɛ́n, uwɔb agá tísɔn wa Kolɛ́nt. 2Uwelumen kɔ́ na mɔɔn wá Beyúdɛn ɔfɛ́n ká Akilása, umebíbién agá giéns gá gus gá Póŋ. Mɔnd uwaány moólónín agá gɛdɔŋ gá Italí, umabá na agany wág Pilisíl. Gágual ká Kolódo ofuŋ uwɔgɔn mabá umámán guéŋín bugaga ká Beyúdɛn gidigid ádɔg agá tísɔn wa Lɔ́m. Pólo uwɔnɔfuɔ́gɛ́n bɔ́. 3Anyɛ́ bámáabá bála bubuol búmóm bágúdábúna musuŋ, uwenelukúmín ɔgɔbɔ́ ká bála buol ɔlɔŋ. 4Sig buɔ́s bá sábát búnyá buɔ́s bá gudúkid bá Beyúdɛn, Pólo mabá ugálá agá gians gá mbísógól, wamba ká úyág Beyúdɛn na bá Gɛlɛ́k ká bádáb ubú wɔyɔnɔ́. 5Anyɛ́ na Silása na Timoté máasiám bádɔ́gán Maseduan, Pólo uwebiéŋin gidigid e waga gá guɔyɔ gugál gá Gɔdányá. Umɔyɔɔ́n Beyúdɛn ká Yésu nyɛ Kilíse. 6Beyúdɛn ebeén guádáb buóny bág, abásɛga wɔ́. Ány gɔg, Pólo uweyikidin otuútu wá bɛla bág. Uganyɛ gɔ́b ká: «Núményím, búnyɛ gɛnana gán, saá gám. Nɛ́nuán, giáy gá ebe bádiábá Beyúdɛn nganɔ́b.» 7Uwadɔg gɔg agá kɔɔ́m agany. Uwɔ́ gɔb aga mɔnd ondodió ɔfɛ́n ká Titúse Yúsutusɛ. Umabá wala Gɔdányá ɛŋɔ́bɛnɔ, gians gág mabá egúy na gians gá mbísógól gá Beyúdɛn. 8Kilisípuse ɔgɔn wa gians gá mbísógól gá Beyúdɛn, na gians gág gá band gidigid abɛɛ́y beédéb. Giod gá band bá Kolɛ́nt bɔ́mɔ́ɔbɛ́dɔ́lɛ́gɔɔ́n Pólo abɛɛ́y sɔ́n beédéb, ebédu bɔ́. 9Buɔ́s búmodió na budug, Ɔgúnɔ́ ganyɛ gá Pólo agá ɛlɛmɛ ká: «Adiábiánán buwa, mbaán nobusió na gugála, ediluŋ. 10Gá guán, nnyɛ nɔ́w, ta mɔnd udɛgaguadɛgɛn ká úgual buanda bá bɔbɛ. Gágual ká agá tísɔn ewe, giod nyɛ kɔ́ gíŋɔ́bɔnɛnɔ́.» 11Pólo uwedúmbi ány Kolɛ́nt yɔŋ na giéns, ufúnyifunyi band gugál gá Gɔdányá.

Pólo ogóbusió bá Galiyɔ́ŋ

12Agá gɛsɛgɛl ɛgɛ́ Galiyɔ́ŋ máabá ngɔ́monɔ wa giéns gá gus gá Akayí. Beyúdɛn gidigid abándɛn Pólo ɛdɔg, abádɛgɛn wɔ́, abáb nág agá nɛgál. 13Bɔ́mɔyɔ́ ká: «Mɔnd ewe guámba gufúnyifunyi band ká díbúlígenyi Gɔdányá nɛnama ɛnɛ́ bisele diɔ́yɔ́nɔ́.» 14Pólo mambá guondinyi, Galiyɔ́ŋ ganyɛ gá Beyúdɛn gɔg ká: «Óokó banuá Beyúdɛn ebe, búmábá buóny bá muɔ́nɔ́n, gúmén gianta gá gɛnana, gesí ngɔ́l gɛsɛgɛl gá gual ká nnúbɛ́dɔ́lɛ́gɛn. 15Anyɛ́ búnyá gɔg ká nugúsuŋenenyi gá gufúnyifunyi gá ɛfɛ́n, na bisele bán, búgúnúlɛ́ŋa. Yaŋuá, ndibá osúmb moóny gá nɛnama ná manda iniány.» 16Ány Galiyɔ́ŋɔ uwasán bɔ́ agá nɛgál. 17Bɔ́bɔ́ gidigid ɔbɔ́nyɔkɛn Sosotɛ́na ɔgɔn wa gians gá mbísógól gá Beyúdɛn. Ebégide wɔ́ ogóbusió bá nɛgál. Ngɔ́mɔnɔ Galiyɔ́ŋɔ dimɔgɔ́lɔɔn gɔg gɛsɛgɛl.

Pólo mónd Antiyóso

18Pólo máand gudúmbi gianta gá gɛsɛgɛl Kolɛ́nt. Agá gélem ány, uwádɔ́gan na beédéb, uwɔ́ gubɔ́lɛ́g agá gidoŋ ɛgɛgɔn gá gɔb Silí ɔlɔŋ na Pilisíle, na Akilása. Gisiósio ká Pólo dɔ́mbɔ, umabɛ́muá ɔduɔ́ agá kɔɔ́m bábɛ́laná ka Sankelé gágual ká uméeŋín Gɔdányá ndán. 19Abánaám Efɛ́s, Pólo guádɔ́gan na Pilisíle, na Akilása. Uwɔb agá gians gá mbísógól gá Beyúdɛn, uwesuŋenenyi gugál gá Gɔdányá nɔbɔ. 20Ebe mɔyɔ́ gág ká wánd gudúmbi gianta gá gɛsɛgɛl nɔbɔ, uwen. 21Uwadɔg ɔgɔbɔ́ gɔg wɔyɔ gɔ́b ká: «Gɔdányá mádáb, ngand gusiondo aganuá gɛsɛgɛl gíndodió.» Uwabɔ́lɛ́g agá gidoŋ ɛgɛgɔ́n gá guadɔg Efɛ́s. 22Anyɛ́ Pólo méesém agá tísɔn wa Sesalé, uwakɛn gɔb Yelúsalɛm gá guebígélídí beédéb bányá kɔ́, uwabád gɔb gɔg Antiyóso. 23Uwedúmbi kɔ́ gianta gá gɛsɛgɛl. Uwakɛn gɔb agá giéns gá gus gá bá Galát, uwadɔg ány gá gɔb Filigi wágan bafɔ́nɔfɔ́n gidigid makánya.

Apolóso Efɛ́s na agá tísɔn wa Kolɛ́nt

24Yúdɛn ondodio ɔfɛ́n ká Apolóso uméebíbién agá tísɔn bábɛ́laná ká Alɛkɛsandilí masiám agá tísɔn wa Efɛ́s. Umabá ginɔ́g gá alálúlal, ulɛnsan nŋɔ́ŋɛn bese na bese. 25Umafɔ́nɔfɔɔ́n nŋili ya Ɔgúnɔ́, umabá sɔ́n kuany kuany, umɔyɔ́ wond ofúnyifúnyi bese na bese ubú búmáalɛ́ŋá Yésu. Gɔɔ́gɔ nduén yá Sáŋa umaálɛnsaán. 26Uwedúm gugála sáaŋŋŋ kand buwa agá gians gá mbísógól gá Beyúdɛn. Pilisíle na Akilása máal na gubɛ́dɔ́lɛ́gɔn wɔ́ gɔg, ɔbɔ́gɔ́l wɔ́, ebédíye wɔ́ bese na bese nŋili ya Gɔdányá. 27Anyɛ́ umáabiánán mbɛ́dágɛ́dɛ́n ya gɔb agá tísɔn wa Akayí, beédéb abágaan wɔ́ makánya. Ɔbɔ́ŋɛ́n beédéb sɔ́n bá gɛdɔŋ igiány ká bágɛ́ndɛ́gɛn wɔ́ bese. Umáal wégéne, uwabá gianta gá gidúgune gá beédéb, gágual ká Gɔdányá mabá naga. 28Gágual ká ogóbusió bá band, bugaga bá biondíny bág, mabiánán nɛɛ́m gɛsɛgɛl umóondínónyí Beyúdɛn, udíyényí bɔ́ agá nŋɔ́ŋɛ́n ká Yésu unyá Osód.

Currently Selected:

Bielínyélínyé 18: MMU2

Highlight

Copy