Bielínyélínyé 17

Pólo na Silás Tesaloník

1Pólo na Silása madɔ́mbaan agá bá tísɔn bá Amfipolís, na Apoloní, abánaám agá tísɔn bábɛ́laná ká Tesaloník kɔɔ́m gians gá mbísógól gá Beyúdɛn máabá. 2Pólo mabiánán gisɔ gá gɔbaan agá gians gá mbísógól gá Beyúdɛn igiány. Gá bá sábát bádadɔ uweségenyi nɔbɔ gá moóny má ɛŋɔ́ŋɛ́n agá ɔnyɛb wɔ́b nagadá. 3Umebúlúnén bɔ́ inyɔ́ŋ, udíyenyi bɔ́ ká osód énúgú, wónd wányɔg aga ebeguén. Umabá wɔyɔɔn bɔ́ ká: «Kilíse ewe nnuɔ́yɔnɔ́, uwɔ́ unyá Yésu». 4Gɛdam gá Beyúdɛn máadab gugál uguány abábɛ́lád Pólo na Silása. Anaány sɔ́n bigúmín bá bagánd, na Bagɛlɛ́k bámáalá Gɔdányá ɛŋɔ́bɛnɔ, máalád Pólo na Silása. 5Beyúdɛn bóndodió ebédúm gualan Pólo yaág, abágɔ́sɛ́d bɛmbuánsɛl bɔ́mɔ́ɔfuɔ́g agá nŋili. Ebéligenyi bɔ́ gá gibueŋidie agá tísɔn. Abáb agá nuyá na Yásɔn gá guambá Pólo na Silása. Bámambá Pólo na Silása gá gɔbaan bɔ́ agá eŋís yá band. 6Bámáal na guáyɛ́n Pólo na Silása, abádɛgɛn Yásɔn na gɛdam gá beédéb, abában bɔ́ ogóbusió bá besumb bɛsan bá tísɔn, bánsa bɔ́yɔ ká: «Band abaány égubueŋidi gus gidigid, nɛ́nuán básaman gusiége ayana agás gá tísɔn. 7Yásɔn uwagɛ́ndɛ́gɛn band abaány agagá. Bɔ́bɔ́ bádɛ́n bábɛ́sáŋɔ́naná bisele bá ofuŋ Sesála, bɔ́yɔ ká ofuŋ omodió nyɛ kɔ́ bábɛ́laná ká Yésu.» 8Moóny amaány emébíŋín agá ɛdɛm sa band bámáabá ány, na besumb bɛsan sɔ́n. 9Obófún gɔg Yásɔn na bɔsɔ́gɔ́ beédéb gɛdám gá muonyi ká banɛɛn bɔ́.

Pólo na Silása Belé

10Budúg máal búsiámána, beédéb gudúmbi Pólo na Silása Belé. Bámáal na guege, abáb agá gians gá mbísógól gá Beyúdɛn. 11Band bá belé ɔbɔ́b bese na gugál gá Gɔdányá gudɔ́mb band bá Tesaloník gagual ká bɔ́mɔgɔ́l gugál ta gudúmbi gɛsɛgɛl. Buɔ́s gidigid, bámabá bábánan mbɔbɔnɔ ya Gɔdányá ká bálɛ́ns ɔ́gɔ manda Pólo na Sílas mɔ́ɔyɔ́ nyɛ buanda búmóm na ɛŋɔ́ŋɛ́n. 12Giod gá band ɔgɔ́b gá ɔlɔŋ igiɛ́y beédéb, bígúmin bá bagánd bá Gɛlɛ́k, na banɔ́mandɔ giod abɛɛ́y sɔ́n beédéb. 13Anɛ́ Beyúdɛn bá Tesaloník mɔ́ɔb ká Pólo guɔ́yɔ sɔ́n gugál gá Gɔdányá Belé, abásiám kɔ́ sɔ́n gá gibueŋidie, na guligenyi band bámáabá kɔ́. 14Kɔ́ nɔ kɔ́, beédéb gudúmbi Pólo ká wɔ́b giáy gá manáŋ abɔ́sa. Silása na Timoté ebésién Belé. 15Band bámáabá bédílígen Pólo abánaám naga Atɛ́n. Bɔ́bɔ́ gɔg guond, gɔb gá guɔyɛ́dɛ́n Silása na Timoté ká: Pólo guɔ́yɔ ká nuúl núsifuɔ́g wɔ́ fiaŋ fiaŋ.

Pólo agá Tísɔn wa Atɛ́n

16Pólo máal umányá gúbídenyi Silása na Timoté agá tísɔn wa Atɛ́n, uwabia masɔlɔ́gɔgɔ giod gágual ká umáanaán tísɔn uwaány ofuógón na bá Gɔdányá bá gus. 17Pólo mabá usuŋenenyi agá gians gá mbísógól gá Beyúdɛn na band bámáabá bála Gɔdányá ɛŋɔ́bɛnɔ, na Beyúdɛn. Anaány sɔ́n umáalá buɔ́s gidigid, kɔɔ́m umáabá ufuɔgɔn band. 18Gɛdam gá bianta bá belinsi bámáabá bábɛ́laan ká Epikilién na bá Sitoyisiɛ́ŋ móond gá gusuŋunenyi sɔ́n na Pólo. Bóndodió mɔyɔ́ ká: «Ewe mɔnd wa igoóg guámba guɔyɛd ká giág e?» Gɛdam ɔ́yɔ́ ká: «Ugúlɛŋanɛn anɛ uguámba ká wɔ́yɔ bienyibienyé bá bá Gɔdányá.» Ga guán, Pólo medúmbényí Ndág ya Nsɔ́m ya Yésu, wond wɔyɔ ká band ebeguén ganyɔgan. 19Abádɛgɛn gɔg Pólo gá guban wɔ́ agá kɔɔ́m ɔgɔ́ belinsi lúmenené, bágɔ́bɛ́laan gɔ́ ká Aleyopál. Obófún wɔ́ ká: «Dinyi bágual dɛlɛns nɛnama ná gufúnyifunyi nɛgɔ́s edúmbenye e? 20Agúdiáda edú na manda ɔmɔgɔ́s, dɛguámba ká dɛ́lɛ́ns ubú ámbaná guɔyɛd.» 21Band gidigid bá tísɔn wa Atɛ́n na benyi bámáabá bɔ́sɔ́dɔn agá gadágadá wɔbɔ mabá bédúmbenyi gɛsɛgɛl giod gá guɔyɔ ɔ́gɔ ká gá gúbɛ́dɔ́lɛ́gɔɔn ɛmbɛ́dágɛ́dɛ́n sɛgɔ́s. 22Pólo máal ná gudélímin gadágadá wa kɔɔ́m gá nilumen ná belinsí bábɛ́laná ká Aleyopád. Uganyɛ ká: «Band bá Atɛ́n, mmán ká nugúgúmenyi bá Gɔdányá bán gudúmbídenyi. 23Gɛsɛgɛl ɛgɛ́ yandaná agán gá iŋili, eŋís yám gɔ́baan agá biíyé bán bɛfɔnan. Nguán sɔ́n nɛfuɛn bidug nɛ́biananá bulinsi ká: “Nɛfuɛn enie nyɛ Gɔdányá bádiálɛnsáná”. Yaŋuá ngúnuɔ́yɔɔn ubú nugúmenyé kand gulɛnsa. 24Unyɛ Gɔdányá umáalɔŋɔ gus gidigid na buanda gidigid búnyá kɔ́, ɔwɔ́ unyá ɔgɔn wá muana na gus. Udigúgɛ́ga agá bians bá mbísógól bɛfuágán na ɛmbɔ́g sá band. 25Ɔdɛguámba ká band álaan wɔ́ buol anyɛ ugúbaŋa buanda. Gágual ká, uwɔ́ wéŋené mɔnd gidigid gusɔ́d, mefúny na manda mésiénené.

26«Agá gélem gá mɔnd omoom, uwalɔŋ band gidigid ká bɔ́sɔ́dɔn agá gus gidigid. Uwedényígenyi bigúl na melinsi. Uwadándɛ́d imbál sá biéns bá gus. 27Umáal anaány ká band ámba wɔ́. Ta bábianan meyú má guamba wɔ́, ala bányɛ́ bɔ́gúfuɔg wɔ́. Agá meliŋítas, udɛbá ayáyá na sig mɔnd a.

28«Gágual ká agagá dɛbiananá gusɔ́d, dibiéyen, dɛ́bá, gɔɔ́gɔ anɛ́, gɛdam gán gá bóŋ mɔyɛ́d sɔ́n ká: “Dɛnyɛ sɔ́n baan bág.”

29«Anyɛ́ dɛnyá baan bág, dɛdɛgɔ́sɛgɛmanan gúbɛ́dága ká Gɔdányá gúbɛ́fuáganan biíyé bálaná na gól, na muonyi, gúmén na adany, biíyé ɛbɛ́ band álaná na ɛmbɔ́g na meéne mɔ́b. 30Nɛ́nuán gɔg, Gɔdányá dɛguánd gulɛ́ŋa sɔ́n gɛsɛgɛl ɛgɛ́ band maábá bádɛ́lɛnsaan wɔ́. Nɛnuán, ugúbɛ́laan band gidigid bá gus ká bénúgi gusɔ́d gɔ́b. 31Gá guán, Gɔdányá saman gudényígenyi buɔ́s bá nɛgál na band gidigid bá gus agá busi. Ugaal bú na mɔnd uwɔ́ uságuman gudɔ́bɔ́n. Uméeŋín bulinsi gá bem anyɛ́ uméenyí wɔ́ aga ebeguén.»

32Anyɛ́ band máal na guɔ́b Pólo gála buóny bá «guanyɔg gá ebeguén», band bóndodi ebédúm guɔnɔ wɔ́. Ebe ɔ́yɔ ká: «Digɔbɛdɔ́lɛ́gɛn buóny ubuány gá gɛsɛgɛl gíndodió.» 33Anaány Pólo máadɔ́gán nɔbɔ. 34Gɛdám gá band gíndodió malád wɔ́, ebédúmbí guɛ́y beédéb. Bɔ́bɔ́ bádɛ́n bámáabá: Deníse, mɔnd wa nilúmen ná belinsí bábɛ́laná ká Aleyopál, omodió agánd ɔfɛ́n ká Damalíse, na bɔsɔ́gɔ́ bóndodi sɔ́n.

Currently Selected:

Bielínyélínyé 17: MMU2

Highlight

Copy