Rawma ege 4

Laslaŋgal ma ata lalam mala Əybərahəyma

1Na ŋgha ca, heje nazlap ata jeje ŋtakwaw Əybərahəyma ca, vaŋgay? Səkan maa a lemew, mbe a ha anta ca, vemey? 2Mada Gazlavay káca Əybərahəyma aza ŋ ɗala ma taŋtaŋ ta ŋ zlan anta ege maa a lata ca, kəɗe a nala ghav, cemey, mbəy kula ŋ law, a tama Gazlavay səkwaw. 3Njəwen, kéŋtereye, a ŋgaya: «Əybərahəyma ca, kálamza Gazlavay aza, mavəday anta, Gazlavay káca aza ŋ ɗala ma taŋtaŋ.» 4Ɗala mala zlan ca, laŋtar gef anta aka. Səlay anta ca, əy nevelene kulakw ata zlan maa a law, səkwaw ca, əy nevelene bəse səkwaw. 5Mada, ɗala a kala zlan, askwaw, cemey, mada kálamza Gazlavay ma kabawzata hejəye mala gay ege aza, ŋ hejəye ma kala səkan a heɗe a heɗe ege ca, Gazlavay a naca aza, ŋ ɗala ma taŋtaŋ mavəday lalam anta. 6Dawuda kázlap ana ebe ŋghe ata sasam mala ɗala maa Gazlavay a lene taŋtaŋ, kaw kásarzata zlan anta ege maa a lata, askwaw, a ŋgaya:

7«Zəhay mbəy ata hejəye

maa Gazlavay a pelzetene səkan ma kadak səkwaw ege maa, əy lata ege aza,

maa Gazlavay kásafayza gay tata ege aza.

8Zəhay mbəy ata ɗala

maa Bay Madakal a kaŋgaɗ gay anta ege, askwaw.»

9Zəhay anta ca, kéveleye ŋ Yahudu ege gagaha vaw, askwaw ca, kéveleye ŋ hejəye maa tata Yahudu ege səkwaw yam, vaw? Cemey, nene kazlap ca, neney: «Gazlavay a ŋta Əybərahəyma ŋ ɗala ma taŋtaŋ ca, mavəday lalam anta.» 10Cemey, Gazlavay a ŋta Əybərahəyma aza ŋ ɗala ma taŋtaŋ ca, maa kázla mandulay aza vaw, maa kázla kwagwa, səkwaw vaw? Kaw, askwaw! Cemey, mar a nazla mandulay ca, Gazlavay ka ŋta aza tew. 11Mar Əybərahəyma a nelem lazla mandulay aza ca, ara ɗala ma taŋtaŋ. Kélem lazla mandulay aza, lazla mandulay anta ca, ara səkan ma kaghwalza ca, Gazlavay káca aza ŋ ɗala ma taŋtaŋ a tama anta, mavəday lalam anta. Ana ebe ŋghe, Əybərahəyma kála anta ŋ cen hejəye ma lamza Gazlavay aza ege tewtew, kaw maa əy kázla mandulay aza, kaw maa əy kázla mandulay, askwaw. Hejəye ŋghe anta ege ca, Gazlavay káŋta aza, ŋ hejəye ma taŋtaŋ ege. 12A zeney, mbəy cen hejəye ma zla mandulay aza ege. Ana zlap ca, hejəye ma zla mandulay aza ege, ma lamza Gazlavay aza ege, ana vana ŋtakwaw Əybərahəyma maa a lamza Gazlavay aza maa kázla mandulay kwagwa, səkwaw.

Gazlavay a navalza səkan maa a zlap ŋ valza, ŋ hejəye ma lamza ma anta aza, ege

13Gazlavay, a zlepene ŋ Əybərahəyma ey ŋ uzəye dəmas anta ege, a neveletene manhayak. A neveletene manhayak anta ca, mavəday maa Əybərahəyma a wenzene ha aka ŋ ma maŋkanaŋkan, səkwaw, cemey, mavəday Gazlavay káŋta aza ŋ ɗala ma taŋtaŋ mavəday lalam anta. 14Mada hejəye, əy nelem səkan maa Gazlavay a zlap, a navalza anta, mavəday ma maŋkanaŋkan ca, wese ca, taŋtaŋ lalam, askwaw, səkan maa Gazlavay a zlap, a navalza wese yam, a nala anta ana səkan bəse. 15Cemey, ma maŋkanaŋkan ca, a kadaha laghwaɗ mala Gazlavay ata hejəye. Ata la maa ma maŋkanaŋkan, askwaw ca, hejəye, əy newenzene ha, səkwaw ca, ŋ eze, vemey? 16Ana ebe ŋghe ca, ɗala a nelem səkan maa Gazlavay a zlap, a navalza ca, ta ŋ lalam, ara səkan maa a valza bəse. Səkan maa a zlap, a navalza anta ca, a neveletene ŋ uzəye dəmas Əybərahəyma ege tewtew. A navalza ca, ŋ hejəye ma kewenzene ha aka ŋ ma maŋkanaŋkan gagaha səkwaw, cemey, ŋ hejəye ma lamza Gazlavay aza ege, ana Əybərahəyma yam. Əybərahəyma ca, ara vana ŋtakwaw, heje tewtew. 17Cemey, kéŋtereye, a ŋgaya: «Sa kálahwaw aza ŋ cen ŋseŋ hejəye vəram.» Əybərahəyma ca, ara vana ŋtakwaw a tama Gazlavay maa a lamza aza. Ara Gazlavay ma kagwarzamata hejəye aza ata lamac, ara mbe ma kala səkan ma a ŋcəne anta kéleye, askwaw, səkan anta a la. 18Əybərahəyma kálamza ma maa Gazlavay a zlepene, a nelem səkan wese aza, cemey, vah maa ɗala kédeŋza ŋ lem səkan zeney ca, askwaw keɗe. Əybərahəyma kálamza Gazlavay aza, mavəday anta, kála anta ŋ «cen ŋseŋ hejəye vəram,» ana maa Gazlavay a zlepene, a ŋgaya: «Uzəye mba dəmas ŋkwa ege, əy nala vəram mambaza.» 19Ata vah wese ca, va Əybərahəyma a la anta temere, cemey, kénjeye ɓarɓar a lalam. A kasanaw, mbəy kula ŋ mbawha uzəye zeney, səkwaw. Wala anta Saratu yam, mbəy msəra mambaza, mbəy kula ŋ la a dəmas zeney, səkwaw. 20A mbe anta tewtew ca, kaw Əybərahəyma káŋga ŋkwaɓ ata ma maa Gazlavay a zlepene wese, askwaw, cemey lalam anta kévelene ɓarɓar, káhəmanza Gazlavay. 21Əybərahəyma kálamza aza njenjəwen, Gazlavay ca, mbəy kula ŋ la səkan aza tewtew ana maa a zlap, mbəy zlaɓa ɓarɓar. 22Mavəday anta «Gazlavay káca aza ŋ ɗala ma taŋtaŋ.» 23Kéŋtereye, a ŋgaya: «Gazlavay káca aza ŋ ɗala ma taŋtaŋ,» zlap ŋghe anta ege ca, mavəday Əybərahəyma gagaha səkwaw. 24Cemey, zlap anta kéŋtereye mavəday heje yam, heje maa Gazlavay kácaheje aza ŋ hejəye ma taŋtaŋ ege, heje ma lamza Gazlavay ma gwarzamaza Yesu, Bay Madakal ŋtakwaw aza ata lamac. 25Gazlavay a geɓza aka mamac ca, mavəday gay ŋtakwaw ege. A gwarzamaza aza ata lamac ca, ndar ŋ bawzaheje aza ŋ hejəye ma taŋtaŋ ege.

Currently Selected:

Rawma ege 4: BHS

Highlight

Copy