Rawma ege 16
16
Pawl a zlepzetene ŋ hejəye
1Sa kalaɓzahune zlana ŋtakwaw haldəma, ma kanda ara hune, zlam anta Febe. Ara wala ma kala zlan ata lajav hejəye ma lamza ma mala Gazlavay aza ege ma ŋ Keŋkereya. 2Hune lamza a heɗe a heɗe a zlam Bay Madakal, ana hejəye ma lamza ma mala Yesu aza ege, əy kalaw. Hune cekzene a səkan ege tewtew maa a kanaɗawza ara hune, mavəday mbe ca, kécekzetene ŋ hejəye dakala, kécekzekey yam.
3Hune zlepzene ka ŋ Pəyrəyska ey Akəylas, hejəye maa nene kala zlan mala Yesu Almasəyhu ŋ la anta ege. 4Ara hejəye ma valza ha tata ege aza ŋ mac ŋ rehzekey. Sa teŋguleŋ naka ma keneletene wasay səkwaw, cemey, lajav hejəye ma lamza ma mala Gazlavay ege aza tewtew, ma ŋ hayak hejəye ma tata Yahudu ege səkwaw yam. 5Hune zlepzetene ka ŋ hejəye ma lamza ma mala Yesu aza ege ma keɓec a wata tata ege yam. Hune zlepzene ka ŋ ɗala naka maa sa kaɗawaw, Epaynetus, mampar ŋ lamza Almasəyhu ŋ hayak Asəya. 6Hune zlepzene ka ŋ Marəyama, wala ma tal ŋ lahune zlan a unaf anta tewtew. 7Hune zlepzene ka ŋ Andərawnəykus ey Yunəyas, van naka ege maa nene zamha daŋgay tewtew a tata. Tata ca, tata malaɓ ege maa hejəye əy kaɗawata kadak, əy lamza ma mala Yesu mpar aha sa. 8Hune zlepzene ka ŋ Ampəyləyatus, ŋgama naka maa sa kaɗaw dakala ŋ Bay Madakal. 9Hune zlepzene ka ŋ Urbanus, ɗala maa heje kelene zlan ŋ Almasəyhu tewtew leŋ Əystakəys, ɗala ŋgama maa sa kaɗawaw. 10Hune zlepzene ka ŋ Apeles, ɗala ma ghwalza lalam anta aza ŋ Almasəyhu njenjəwen. Hune zlepzetene ka ŋ hejəye ma a wata Arəystawbul ege. 11Hune zlepzene ka ŋ van naka, Herawdəyaŋw, hune zlepzetene ka ŋ hejəye ma lamza ma mala Bay Madakal aza ma a wata Narsəys. 12Hune zlepzetene ka ŋ ata Təyrəyfena ey Təyrəyfawsa, ma valza ha tata ege aza ŋ lene zlan ŋ Bay Madakal. Hune zlepzene ka ŋ Persəys, ŋgama naka wala maa sa kaɗaw dakala, ma valza ha anta aza ŋ lene zlan ŋ Bay Madakal. 13Hune zlepzene ka ŋ Rufus, ɗala maa Bay Madakal kámay aza, ey maman ma nja ana mana yam. 14Hune zlepzetene ka ŋ ata Asəyŋkəyrəyt, Felegaŋw, Hermes, Patawrawbas, Hermas leŋ zlana ŋtakwaw ege maa əy a tata tewtew. 15Hune zlepzetene ka ŋ ata Fəylawlawgus ey Yuləya, Nerəyus ey zlaŋgan haldəma, Awləympas leŋ hejəye ma lamza ma mala Yesu ege aza tewtew maa əy a tata. 16Hune zlepzene ŋ kaw vayay, hune səkaw kusam ŋ taba ŋkune, ana maa hune ata zlanahw ŋkune ege, ŋ Almasəyhu. Lajav hejəye mala Almasəyhu ege tewtew əy kazlapzahune ka.
Pawl a ŋgazata hejəye
17Zlana ege, sa kazlapahune, hune sla ha ŋkune ege ka ata hejəye ma kada pahw ŋ taba ŋkune ege ey səkan ma kanandavzata hejəye aza, ŋ lalam tata, ma kenedederzata hejəye aza, ata lasasərak maa hune lemew. Hune kese ŋkune ara tata. 18Cemey, hejəye ma da ebe ŋghe anta ege ca, əy kélene zlan ŋ Almasəyhu, Bay Madakal ŋtakwaw, askwaw, cemey, əy la zlan ca, mala dəmas tata gagaha. Əy kefətekzata hejəye ma kasan səkan ege, səkwaw ege aza, ta ŋ zlap tata ma ndəram ndəram ege ey zlap tata ege ma kabaɗzata hejəye. 19Hejəye tewtew, əy kasan maa hune kewenzene ha aka ŋ Bay Madakal. Mavəday anta, sa kasasam ata hune. Cemey, sa ɗaw ca, hune lem kəleŋ ŋ la səkan ma taŋtaŋ, hune ɗaw ŋ la dadawar səkwaw. 20Vah slaɓ, Gazlavay, ma kaval zəhay a nakərap Sayɗanu aza, asa ŋgas ŋkune ege. Taŋtaŋ Bay Madakal ŋtakwaw Yesu, manja a hune.
21Təymawte, ɗala ma nene kala zlan gbak ŋ la anta, a kazlapzahune, leŋ Lukəyus ey Yasaŋw, Sawsəypater, van naka ege, əy kazlapzahune ka yam. 22Sa Tertəyus, ma ŋter ɗerewel mala Pawl ŋghe, sa kazlapzahune ka ŋ Bay Madakal ma kajavaheje. 23Gayus, ɗala maa sa Pawl, sa wata anta, a kazlapzahune ka. Ara ɗala maa lajav hejəye ma lamza ma mala Yesu aza ege tewtew a kajav a wata anta. Erastus, ɗala ma mbal səlay mala uzam a kazlapzahune ka, leŋ zlana ŋtakwaw Kawartus, yam. [ 24Taŋtaŋ Bay Madakal ŋtakwaw Yesu Almasəyhu manja a hune tewtew. Aməyna.]
Ŋ həmanzakwaw Gazlavay
25Ŋ həmanzakwaw Gazlavay! Mbe ca, kula ŋ valahune ɓarɓar ta ŋ Ma Mewe ma Taŋtaŋ maa sa kaghwalza ata Yesu Almasəyhu. Ta ŋ Ma Mewe anta ca, Gazlavay a kaghwalza səkan ma ɓahɓah mar aka zlezle. 26Cemey, na ŋgha ca, səkan anta kághwalha aza, kéveleye ŋ hejəye vedəye tewtew ta ŋ ma meŋtereŋter mala uzəye ma zlap ma ege, ana Gazlavay ma nja kaw vepey, a zlap, ndar hejəye tewtew əy lamza Almasəyhu, əy wenzene ha aka. 27Kəleŋ ca, mbəy ara Gazlavay teŋguleŋ anta, ɓardakw a mbe ta ŋ Yesu Almasəyhu kaw vepey! Aməyna!
Currently Selected:
Rawma ege 16: BHS
Highlight
Copy
Compare
Share
Want to have your highlights saved across all your devices? Sign up or sign in
© 2025 CABTAL