Rawma ege 15
15
Hune la səkan ma kendəremzetene ŋ hejəye
1Cemey, heje hejəye ma ɓarɓar ŋ lalam ege, səy heje cekzetene ŋ hejəye ma tata ŋkulaf ege ŋ lalam. Heje mpam səkan ma kendəremzetene ŋ heje, gagaha səkwaw. 2Kaw vayay ŋtakwaw, mampam ŋ la səkan ma kendəremzene ŋ mesleje anta. Ara səkan ma taŋtaŋ, ma kanagalza ŋ lalam. 3Mavəday, kaw Almasəyhu a ha anta ca, kámpam ŋ la səkan ma kéndəremzene ŋ ha anta ca, askwaw. Cemey, ana maa kéŋtereye ŋ Ɗerewel ma keweɗ, a ŋgaya: «Lara hejəye ma karahwaw ege, əy kézenha aza ata sa.» 4Cemey, ma maa kéŋtereye ege tewtew zlezle, əy kéŋtereye ŋ sasərakzaheje. Əy kavalaheje ɓarɓar ey ledeɓ unaf ŋ lem səkan maa heje kana ca ŋkwaɓ aka a heɗe. 5Gazlavay ma kaval ɓarɓar ey ledeɓ unaf, mavalahune ŋkwaɓ ŋ nja kadak ŋ taba ŋkune, ana maa Yesu Almasəyhu a kaɗawaw, 6ndar hune həmanza Gazlavay, Cen Bay Madakal ŋtakwaw Yesu Almasəyhu, a unaf ma teŋguleŋ ey ula ma teŋguleŋ.
Hejəye tewtew əy mahəmanza Gazlavay
7Hune lamza ha ŋkune ege, ana maa Almasəyhu a lamzahune, ŋ həman Gazlavay. 8Cemey, sa kazlapahune, Gazlavay ca, mbəy tuwah, mavəday anta, Almasəyhu kábaw anta ŋ mala zlan mala Yahudu ege, ŋ la səkan maa a zlepetene ŋ jeje tata ege, a nalaw. 9A zeney, ndar hejəye vedəye əy həmanza Gazlavay ata hahar anta, ana maa kéŋtereye, a ŋgaya:
«Mavəday anta, sa nahəmanzahwaw ŋ taba hejəye vedəye,
sa nahəmanzahwaw a dəraf.»
10Kézlepeye zeney, a ŋgaya:
«Hune hejəye vedəye, hune sasam a hejəye mala Gazlavay ege.»
11A zeney:
«Hune hejəye vedəye tewtew, hune həmanza Bay Madakal,
aya, hejəye tewtew ma ata hayak ege əy mahəmanza.»
12Esaya, a zlap yam, a ŋgaya:
«Mba dəmas Yesa, a nandaha,
a nagwarzam ŋ zam bay ata hejəye vedəye.
Aya, əy naca ŋkwaɓ tata ka ŋ mbe.»
13Gazlavay ma kaval ŋ ca ŋkwaɓ ata səkan, mavalahune sasam ey zəhay ŋ lalam. Aya, hune naca ŋkwaɓ dakala ata səkan a ɓarɓar Zəwet ma keweɗ.
Zlan mala Pawl
14Zlana ege, sa a ha naka, sa kasan njenjəwen ca, hune kala səkan tewtew tuwah, hune ghef a lasan səkan ege. Hune kula ŋ ŋgaz kusam ŋkune ege ŋ taba ŋkune. 15Cemey, ata la vedəye, ŋ leŋter ŋgha ca, sa kéŋterahune ma ege vəram a ɓarɓar, ndar hune senzene ata səkan maa hune kasanaw. Sa ŋterahune ana ebe ŋghe ca, mavəday taŋtaŋ maa Gazlavay a lekey, 16kébewzekey aza ŋ ɗala mala zlan mala Yesu Almasəyhu ŋ hejəye ma tata Yahudu ege səkwaw. Kécekey ka parpar ŋ ghwal Ma Mewe ma Taŋtaŋ mala Gazlavay, ndar hejəye ma tata Yahudu ege səkwaw, əy baw tata ana səkan ma ata velene ŋ Gazlavay, ma kendəremzene, maa Zəwet ma keweɗ a bawza aza ŋ səkan ma keweɗ. 17Ana ebe ŋghe, sa kasasam ata zlan maa sa kelene ŋ Gazlavay, mavəday lajav naka a Yesu Almasəyhu. 18Cemey, kaw sa kanazlap ma wende zeney, askwaw, səy səkan maa Almasəyhu a law ta ŋ sa, ŋ data hejəye vedəye ŋ wenzene ha aka ŋ Gazlavay, ta ŋ zlap ey zlan, 19ta ŋ zaɓəla ege ma ɓarɓar ey ta ŋ ɓarɓar mala Zəwet mala Gazlavay. Ana ebe ŋghe, sa kághwalza Ma Mewe ma Taŋtaŋ mala Almasəyhu aza kaw a katay ata la maa sa nda, mar aka ŋ Urusaləyma ha hwas ŋ Əyləyrəya. 20Cemey, sa káɗaw ŋ ghwalza Ma Mewe ma Taŋtaŋ ca, ata la maa kaw əy kézləme zlam Almasəyhu a təwse, askwaw. Sa la ana ebe ŋghe ca, mavəday sa kaɗaw sa lam ujek ata ndaŋw ujek maa ɗala matakan a caw, səkwaw. 21Ana ebe ŋghe, sa la ana maa kéŋtereye, a ŋgaya:
«Hejəye maa əy kéghwelzetene ma anta, askwaw, ege ca, əy negəre,
hejəye maa əy kézləme ma anta askwaw, ege ca, əy nezləme.»
Pawl a ɗaw ŋ nda ŋ Rawma
22Ara zlan naka ŋgha anta ma tekekey ka ŋ gas vəram ŋ nda ara hune. 23Cemey, na ŋgha ca, sa káŋtakwza zlan naka aza ŋ hayak ŋghe ege. Va vəram, sa kaɗaw aza mambaza ŋ nda ara hune, 24maa sa kananda ŋ Espanəya. Cemey, sa kedeŋza ŋ sarzahune ara maa sa kananda a təwse, sa nanja ara a hune walaŋ cekuɗe, ndar hune cekzekey ŋ nda Espanəya anta. 25Cemey, na ŋgha ca, sa nda aza ŋ Urusaləyma kwagwa, ŋ cekzetene ŋ hejəye mala Gazlavay, ma a təwse ege, 26mavəday hejəye mala Gazlavay ma ŋ Makedawnəya ey Akaya ege, əy kédeŋza ŋ cak səkan ŋ veletene ŋ metetekw ma ŋ taba hejəye mala Gazlavay ege, ma ŋ Urusaləyma. 27Ayaw, ara tata ma deŋza ŋ law, ana ebe ŋghe. Cemey, kála anta ana duwa ata tata, mavəday Yahudu ege ma lamza ma mala Yesu aza ege, əy kéɓez səkan tata ma taŋtaŋ ege maa Zəwet a veletene a hejəye vedəye. Ana ebe ŋghe, hejəye vedəye, səy əy mecekzetene a səkan ma asa ra tata ege ŋ Yahudu ege yam. 28Mada sa kámaɗza zlan anta aza, sa kéveletene səkan maa əy cak wese aza ca, sa nanda ta ara hune maa sa kananda ŋ Espanəya. 29Sa kasanaw, maa sa kananda ara hune ca, sa nandaɓa zlaɓa bəzla Almasəyhu ghef.
30Cemey, zlana ege, sa karakahune a zlam Bay Madakal ŋtakwaw Yesu Almasəyhu, a laɗaw maa Zəwet ma keweɗ a valahune, hune cekzekey ŋ tal ŋ rak Gazlavay dakala ata sa. 31Hune rak Gazlavay mavəday sa, ndar a rehzekey aza asa ra hejəye maa lalam, askwaw ege ŋ Yahudəya, a zeney, ndar səkan maa sa kejeɓzetene ŋ hejəye mala Gazlavay ege ma ŋ Urusaləyma ege wese, əy lamza a sasam. 32Ana ebe ŋghe, sa nahwas ara hune a sasam. Mada Gazlavay kálamza ca, sa nazazak walaŋ cekuɗe ara hune. 33Gazlavay ma kaval zəhay, manja a hune tewtew! Aməyna!
Currently Selected:
Rawma ege 15: BHS
Highlight
Copy
Compare
Share
Want to have your highlights saved across all your devices? Sign up or sign in
© 2025 CABTAL