Rawma ege 14
14
Hune ɗaw ŋ ghemata hejəye ata səkan zam səkwaw
1Hune lamza ɗala maa ɓarɓar anta parham ŋ lalam. Hune ɗaw ŋ ghem ledeŋ ŋkwaɓ anta səkwaw. 2Ketegəre ɗala maa mbəy ɓarɓar ŋ lalam ca, kula ŋ zam səkan ege aza tewtew, cemey, ɗala maa lalam anta parham ca, a zamɓa ca, urey ŋkusaf ende ŋghe. 3Ɗala ma kazam səkan ege tewtew ca, a ɗaw ŋ raɓa ɗala ma kazam səkan ege vedəye səkwaw, səkwaw. Ɗala ma kazam səkan ege vedəye səkwaw ca, a ɗaw ŋ ghem ɗala ma kazam səkan ege tewtew səkwaw yam, mavəday Gazlavay kálamza aza yam. 4Hwa ma keghem mala zlan ɗala wende ca, hwa ca, hwa vayay? Mada ɗala anta a kala zlan a heɗe a heɗe, mada a kala zlan a heɗe, askwaw ca, səy təwjek anta ma kanasarza zlan anta. Ayaw, a kanandav askwaw, a nala zlan anta a heɗe a heɗe, mavəday Bay Madakal, kula aza ŋ cekzene ŋ la zlan anta.
5Ɗala wende a deŋza ca, wan ege parpar parpar. Ɗala wende yam, a deŋza ca, wan ege tewtew əy ma teŋguleŋ. Kaw vayay masan səkan maa a kedeŋza a unaf anta aka kadak kadak. 6Ɗala ma kedeŋza, wan ege vedəye əy day aha wan ege vedəye ca, a la ana ebe ŋghe ca, ŋ həmanza Bay Madakal. Ɗala ma kazam səkan ege tewtew ca, a la ana ebe ŋghe ca, ŋ həmanza Bay Madakal, mavəday, a kelene wasay ŋ Gazlavay ata səkan ta zam anta. A zeney, ɗala ma kazam səkan ege tewtew səkwaw ca, a la ana ebe ŋghe ca, ŋ həmanza Bay Madakal, mavəday a kelene wasay ŋ Gazlavay ata səkan maa a kazamata səkwaw anta ege yam. 7Cemey, kaw ɗala teŋguleŋ ŋ taba ŋtakwaw, a kanja mavəday ha anta ca, askwaw. A zeney, kaw ɗala a kamac mavəday ha anta ca, askwaw. 8Mada heje kénjeye a nje ca, heje nja mala Bay Madakal. Mada heje kámac ŋtakwaw ca, heje mac mala Bay Madakal. Kaw heje a nje, kaw heje kámac ŋtakwaw ca, heje hejəye mala Bay Madakal ege. 9Cemey, Almasəyhu kámac anta, kágwarzamha aza ata lamac, mavəday ŋ la ŋ Bay Madakal mala hejəye mamacamac ege ey hejəye ma a nje ege. 10Cemey, ŋkwa ca, hwa ghem zlanahw ŋ vay? Hwa raɓa ŋ vay? Heje tewtew, heje nagar a tama laja guma Gazlavay, ŋ ja heje guma. 11Mavəday anta, kéŋtereye, a ŋgaya:
«Sa kemeɗahune ma, sa Gazlavay Madakal ma a nje,
hejəye tewtew əy negəleɓ a tama naka,
hejəye tewtew əy nehəmenzekey.»
12Ana ebe ŋghe, kaw vayay, a nazlap a ha anta ata zlan anta ŋ Gazlavay.
Hwa ɗaw ŋ ndavza zlanahw səkwaw
13Ŋ yakzakwaw leghem kusam ŋ taba ŋtakwaw. Cemey, zukwan ca, ŋ deŋzakwaw, heje ɗaw ŋ la səkan ma kandavzata zlana ŋtakwaw ege ŋ gay səkwaw. 14Sa kasanaw, mavəday Bay Madakal Yesu, sa kasan njenjəwen, səkan ma kadak səkwaw ŋ zam ca, askwaw. Cemey, mada ɗala a deŋza səkan ŋgha kadak səkwaw ca, a nelene kadak səkwaw ca, ŋ mbe gagaha. 15Mada hwa ghweɗene unaf ŋ zlanahw ata səkan maa hwa kazam ca, hwa kásəbar laɗaw kusam askwaw. Hwa ɗaw ŋ fətekza zlanahw maa Almasəyhu a mac mavəday anta aka ata səkan ma ata zam səkwaw. 16Səkan maa hune kedeŋza kadak ara hune ca, hejəye, əy ɗaw ŋ sarza kadak səkwaw, səkwaw. 17Lazam Bay mala Gazlavay ca, ara ma ma ata zam səkan səkwaw, ma ata sa səkan səkwaw. Cemey, ara taŋtaŋ, zəhay ey sasam ŋ Zəwet ma keweɗ. 18Ɗala ma lene zlan ŋ Almasəyhu ana ebe ŋghe ca, a ndəremzene ŋ Gazlavay, aya, hejəye əy həmanza. 19Mavəday anta, ŋ mpamakwaw səkan ma kadaha zəhay ey səkan ma kacakzaheje ŋ gal ŋ la anta ŋ lalam. 20Hwa ɗaw ŋ gayza zlan mala Gazlavay aka mavəday səkan ma ata zam səkwaw. Njenjəwen, səkan ma ata zam ege tewtew ca, əy tuwah. Cemey, mada ɗala a zam səkan ene, a nandavza zlaŋgan ŋ la gay ca, kadak səkwaw. 21Səkan ma tuwah ca, hwa ɗaw ŋ zam zley səkwaw, hwa ɗaw ŋ sa mavaw səkwaw, hwa ɗaw ŋ la səkan kaw vemey ma kanandavza zlanahw ŋ la gay səkwaw. 22Səkan maa hwa kedeŋza ata ma ŋgha, mbal ka ŋ hwa a tama Gazlavay. Zəhay ata ɗala maa ledeŋ ŋkwaɓ anta a keghemew ata səkan maa a kalaw, askwaw. 23Cemey, ɗala a kazam səkan maa unaf anta a kalamza səkwaw ca, Gazlavay a neghemew. Mavəday a la səkan maa lalam anta kálamza, askwaw. Ana ebe ŋghe, səkan ege tewtew maa ɗala a kalata, a lalam, askwaw ca, ara gay.
Currently Selected:
Rawma ege 14: BHS
Highlight
Copy
Compare
Share
Want to have your highlights saved across all your devices? Sign up or sign in
© 2025 CABTAL