Rawma ege 13
13
Lawan ha aka ŋ hejəye ma kazam bay ege
1Səy kaw vayay mewenzetene ha aka ŋ madakal dakal ma kazam bay ege. Cemey, lazam bay kaw vekey ca, a ndaha aka ara Gazlavay. Hejəye ma kazam bay ege tewtew ca, ara Gazlavay ma cata aka. 2Ana ebe ŋghe, ɗala maa ŋkwaɓ anta ɓarɓar a tama hejəye ma kazam bay ege ca, kásəbar ma maŋkanaŋkan mala Gazlavay, askwaw. Hejəye ma kaɗa gham a hejəye ma kazam bay ege ca, əy nelem guma ata ha tata. 3Mada ɗala a kala taŋtaŋ ca, a kalalak ata hejəye ma kazam bay ege, askwaw, səy ɗala ma kala dadawar. Hwa kaɗaw, ndar hwa lalak ata hejəye ma kazam bay ege səkwaw vaw? Cemey, la taŋtaŋ, əy nahəmanzahwaw. 4Ayaw, hejəye ma kazam bay ege ca, əy lene zlan ŋ Gazlavay ŋ ghwalzahwaw ŋ la taŋtaŋ. Cemey, mada hwa kala dadawar ca, səy hwa lalak ata tata, mavəday, əy a ɓarɓar ma ata ŋgazahwaw. Əy naŋgazahwaw ca, mala bəse səkwaw. Əy ŋgaz ɗala ca, əy la zlan mala Gazlavay ŋ ghwalza laghwaɗ unaf anta ata ɗala ma kala dadawar. 5Mavəday anta, kadak ca, heje wenzetene ha aka. Heje wenzetene ha aka ca, mavəday ŋ rehaza ata laghwaɗ unaf mala Gazlavay gagaha səkwaw, cemey, mavəday unaf ŋtakwaw a kedeŋza ca, ara səkan ma tuwah ŋ law. 6Mavəday anta, hune kaŋtar budaw yam. Hejəye ma cak budaw ege ca, ara Gazlavay ma cata aka ŋ la zlan anta. 7Hune velene səkan ŋ mazam bay kaw vekey, ana maa a kaɗawza ara hune. Mada ara budaw, hune valza, mada ara səlay ma ata cak ata səkan ege vedəye, hune valza, mada ŋ wenzene ha aka ca, hune wenzene ha aka kadak kadak, mada ŋ həmanza, hune həmanza.
Laɗaw kusam
8Hune ɗaw ŋ nja ka a duwa ɗala ata ha ŋkune səkwaw, səy duwa mala laɗaw maa hune kanaɗaw kusam ŋ taba ŋkune. Ɗala ma kaɗaw ɗala ca, kéwenzene ha aza a ma maŋkanaŋkan tewtew. 9Cemey, hune kasanata ma maŋkanaŋkan ege, maa, əy ŋgaya: «Hwa ɗaw ŋ ŋta kusam a bəza səkwaw, hwa ɗaw ŋ ja ŋkəɗeh səkwaw, hwa ɗaw ŋ ŋhel səkwaw, hwa ɗaw ŋ la nje ata səkan mala ɗala səkwaw.» Ma maŋkanaŋkan ŋghe ege ey ma maŋkanaŋkan ege vedəye tewtew, əy kéjeveye ŋ zlap ŋgha: «Ɗaw mesleje ŋkwa ana maa hwa kaɗaw ha ŋkwa.» 10Ɗala ma kaɗaw mesleje anta ca, a kenelene dadawar, kaw askwaw. Ana ebe ŋghe, laɗaw ɗala ca, ara lawan ha aka ŋ ma maŋkanaŋkan tewtew.
11Hune kasan vah maa heje ŋma. Ara vah ma ata fəɗaha aza ŋ lawan ŋkune ege. Cemey, na ŋgha ca, lereh mbəy pa mbermber ara heje aha vah maa heje mar ŋ lamza Yesu. 12Zaɗaw slaɓ ŋtakw, mapat slaɓ ŋ zlarha. Ana ebe ŋghe, səy heje yakzata səkan ege ma kadak səkwaw maa heje kalata ŋ kuzle ege ka, heje ŋtakwaw səkan ma ata ɗa gham ege mala leweɗ. 13Ŋ njakwaw tuwah ana maa a pes. Heje ɗaw ŋ zam səkan ey ŋ sa səkan aza dəydey səkwaw, heje ɗaw ŋ ŋta kusam a bəza ey ŋ palza ha ŋtakwaw aka ŋ la səkan ma kala hawa ege səkwaw, heje ɗaw ŋ gulak ey ŋ la sərah səkwaw. 14Cemey, hune nja ana Bay Madakal Yesu Almasəyhu. Hune ɗaw ŋ yakza ha ŋkune ege ka ŋ la səkan ma kadak səkwaw ege maa zleykusam ŋkune a kaɗawata səkwaw.
Currently Selected:
Rawma ege 13: BHS
Highlight
Copy
Compare
Share
Want to have your highlights saved across all your devices? Sign up or sign in
© 2025 CABTAL