Rawma ege 12
12
Lala zlan ŋ Gazlavay
1Zlana ege, Gazlavay kághwalaheje hahar anta aza. Mavəday anta, sa karakahune, hune valza ha ŋkune ege ka ana səkan ma ata la kwakwas ma a nje, ma keweɗ, ma kendəremzene ŋ Gazlavay. Ebe ŋghe ca, ara lala kwakwas ma njenjəwen maa hune kenelene. 2Hune ɗaw ŋ səbar ledeŋ ŋkwaɓ mala hejəye ma ŋ manhayak ŋghe ege səkwaw. Cemey, hune yakza Gazlavay mabawza ata unaf ŋkune ege aza, mavalahune ledeŋ ŋkwaɓ mewe. Ana ebe ŋghe, hune nasan səkan maa Gazlavay a kaɗawaw. Ana zlap ca: Səkan ma taŋtaŋ, ma kendəremzene, ma a heɗe a heɗe.
3Gazlavay kélekey taŋtaŋ anta aza mala bəse, mavəday anta sa kazlapahune tewtew: Ɗala a ɗaw ŋ ca ha anta aza, pa ma day aha ɓarɓar anta səkwaw. Cemey, kaw vayay masarza ha anta tete a laslaŋgal lalam maa Gazlavay a velene. 4Hune sarza kusam heje dakənak may, lazav ege a heɗe vəram, cemey, kaw vekey a zlan anta parpar. 5Heje yam, heje nja ana mbe, kaw heje vəram ca, heje kábaw ŋtakwaw ŋ kusam teŋguleŋ ŋ lajav ŋtakwaw a Almasəyhu. Heje tewtew ŋtakwaw, heje kéjeveye ana lazav ege ma ata kusam teŋguleŋ. 6Gazlavay kávalaheje səkan ege aza bəse, parpar parpar. Kaw vayay mala zlan a mbe ana maa a velene ŋ law. Ɗala maa a velene ŋ zlap ma anta ca, malaw, a lalam anta tewtew. 7Ɗala maa a velene ŋ cekzetene ŋ hejəye ca, mecekzetene. Ɗala maa a velene ŋ sasərakzata hejəye ca, masasərakzata. 8Ɗala maa a velene ŋ deɓetene unaf aka ŋ hejəye ca, medeɓetene aka. Ɗala maa a velene ŋ ɓez səkan ma asa ra anta aza ca, mavalza a unaf teŋguleŋ. Ɗala maa a velene ŋ la a madakal ma a tama ca, malaw, a heɗe a heɗe. Ɗala maa a velene ŋ san hahar ata hejəye ca, malaw, a sasam.
9Hune ɗaw kusam ma njenjəwen. Hune hey ata səkan dadawar ege, hune tal ŋ la səkan ma taŋtaŋ. 10Hune ɗaw kusam a unaf ŋkune teŋguleŋ ana maa hune ata zlanahw ŋkune ege ŋ Almasəyhu. Kaw vayay ŋ taba ŋkune masasam ŋ wenzene ha aka ŋ ɗala wende. 11Hune tal ŋ la zlan, hune ɗaw ŋ la masagal səkwaw, hune lene zlan ŋ Bay Madakal a unaf ma teŋguleŋ. 12Hune sasam ata səkan maa hune káca ŋkwaɓ aka a heɗe ŋ lemew, hune sew gef ege, hune rak Gazlavay kaw vepey. 13Hune cekzetene ŋ hejəye ma lamza ma mala Yesu aza ege, ma kaɗaw lacak ege, hune lamzata mbəlakw ege a wata ŋkune kadak kadak.
14Hune bəzletene ŋ hejəye ma kasahune gef ege. Hune bəzletene səkwaw ca, hune ɗaw ŋ gayzata səkwaw. 15Hune sasam a hejəye ma kasasam ege, hune han a hejəye ma kahan ege. 16Hune jav ma ŋkune ege aka kadak kadak, hune ɗaw ŋ la ghav ŋ taba ŋkune səkwaw, cemey, hune lamza ŋ la zlan kaw ma pəzekw pəzekw ege. Hune ɗaw ŋ ca ha ŋkune ege, hune hejəye kəleŋ ege səkwaw. 17Hune ɗaw ŋ zenzene dadawar ŋ ɗala ma lahune dadawar səkwaw. Hune mpam ŋ la taŋtaŋ a tama hejəye tewtew. 18Mada hune kula ca, hune tal ŋ nja a zəhay a kaw vayay. 19Ŋgama naka maɗawaɗaw ege, mada ɗala kálahune dadawar ca, hune ɗaw ŋ zenza a ha ŋkune səkwaw. Cemey, hune yakza Gazlavay a laghwaɗ unaf anta mezenzene, mavəday Gazlavay Madakal a zlap ŋ Ɗerewel ma keweɗ, a ŋgaya:
«Ara sa ma kenezenza dadawar,
sa ma keneŋteretene ŋ hejəye ma letene dadawar ŋ vedəye.»
20Cemey, a zlap zeney yam, a ŋgaya:
«Mada metes a kaja ɗala ma kaɗaw ŋ gərehwaw ata nje səkwaw ca,
velene səkan ŋ zam,
mada yam a kajaw ca,
velene yam ŋ sa,
mada hwa kala ana ebe ŋghe ca,
ana maa hwa keɓecene ŋva kwahwaw ata ha anta#12.20 hwa keɓecene hawa ata ha anta.»
21Hwa ɗaw ŋ yakza dadawar a ndavzahwaw aza səkwaw, cemey, karba ndavaza dadawar aza a lala taŋtaŋ.
Currently Selected:
Rawma ege 12: BHS
Highlight
Copy
Compare
Share
Want to have your highlights saved across all your devices? Sign up or sign in
© 2025 CABTAL