Rawma ege 11
11
Gazlavay kánahzata hejəye Əysərayəyla ege aza, askwaw
1Aya, sa kaɗawzahune: Gazlavay kánahzata hejəye anta ege aza vaw? Njenjəwen, kaw, askwaw! Sa, a ha naka, sa ɗala Əysərayəyla, mba dəmas Əybərahəyma, ŋseŋ Benyaməyn. 2Gazlavay kánahzata hejəye maa a mayata zlezle ege aza ca, askwaw. Hune kasan ma maa Ɗerewel ma keweɗ a zlap ata Eləya maa a ŋkəɗawata hejəye Əysərayəyla ege, ara Gazlavay, səkwaw vaw? 3A ŋgaya: «Bay Madakal, əy kájata uzəye ma zlap ma ŋkwa ege aza, əy kághwaramzata la ma ata fatahwaw səkan ege aza, sa teŋguleŋ naka ma menha, əy kampam taf ŋ jekey aza, zeney yam.» 4Cemey, Gazlavay, a zenene ca, vaŋgay? A zenene, a ŋgaya: «Sa kémenzata hejəye mawal ege aka, bəlakw ŋsəleɗ ŋ sa, hejəye maa kaw əy kégəleɓ matakwtakwa tata ege a tama kule maa əy kayaɓa Baal, askwaw.» 5A nja ana mbe, na ŋgha yam, kémenha hejəye cekuɗe ende ŋghe maa Gazlavay a mayata a laɗaw. 6Ca, mada Gazlavay a mayata a laɗaw anta ca, a mayata mavəday zlan tata ege, səkwaw. Mada ana ebe ŋghe, səkwaw ca, taŋtaŋ mala Gazlavay ca, a kanala ŋ taŋtaŋ ma njenjəwen, səkwaw. 7Ma anta a ɗaw ŋ zlap ca, vaŋgay? Səkan maa hejəye Əysərayəyla ege, əy kampam ca, əy kélemew, askwaw. Cemey, hejəye maa Gazlavay a mayata ege ca, a tata ca, əy kélemza. Ca, hejəye vedəye ca, unaf tata ege, əy kábaw tata ɓarɓar, əy kezləme zlap mala Gazlavay, səkwaw. 8Ana maa Ɗerewel ma keweɗ, a zlap, a ŋgaya:
«Gazlavay kábawzata unaf tata ege aka ɓarɓar,
nje ma ata gəre la səkwaw,
leŋ kéveletene zlam ma ata zləme səkwaw,
ha a tambaca.»
9Dawuda yam kázlap, a ŋgaya:
«Səkan ta zam gwaygwaya tata ege, əy mabaw tata a səkan ma ata mbalata ege ŋ uley,
səkan ma ata ndavzata aza ege, səkan ma ata setene gef, ege.
10Nje tata ege, əy mulaf tata, əy ɗaw ŋ gəre la səkwaw,
ŋteɓetene dawan tata ege aka kaw vepey.»
11Sa kaɗawzahune zeney, sa ya, maa mejembeɗew#11.11 ana zlap ca, ŋ geɓza taf Gazlavay aka a jata Yahudu ege wese ca, əy kandav tata, kaw əy kanagwarzamha aza, askwaw vaw? Njenjəwen ca, andəwse, səkwaw! Cemey, mavəday dadawar tata ege wese ca, hejəye ma tata Yahudu səkwaw ege, əy kélem lereh aza. A laha ana ebe ŋghe ca, ŋ gwarzamaza sərah mala Əysərayəyla ege. 12Dadawar tata ege, əy kédetene bəzla mambaza ŋ manhayak, landav tata ege, əy kábaw tata ŋ laŋcaɗ ŋ hejəye vedəye. Ca mada Əysərayəyla ege tewtew, əy kája mbahw aza ca, ana ebe ŋghe ca, bəzla a navas ŋ la pa ma day mambaza zeney.
Lereh mala hejəye ma tata Yahudu ege səkwaw
13Na ŋgha, sa kazlapahune ŋ hune hejəye ma hune Yahudu ege səkwaw ege. Sa, sa malaɓ mala hejəye ma tata Yahudu ege səkwaw, sa kasasam ata zlan naka. 14Sa deŋza ana ebe ŋghe ca, ŋ gwarzamaza sərah mala hejəye naka ege ŋ rehzata hejəye vedəye aza ŋ taba tata. 15Cemey, maa Gazlavay a nahzata aza ca, kájav manhayak aza a mbe. Ana ebe ŋghe ca, mada Gazlavay kézen ŋ lamzata aza ca, səkan ma kanalaha, vemey? Hejəye ma mac tata ege, əy nagwarzamaha aza ata lamac.
16Mada ɗala kévelene kəva peŋ ma mpar aza ŋ Gazlavay ca, sekəɗe peŋ anta tewtew mala anta yam. Mada slaslalay mpe əy kéveleye ŋ Gazlavay ca, zləram anta ege tewtew, mala anta yam. 17Əysərayəyla ege ca, əy nja ana mpe maa əy kayaɓa jaytun, maŋgaɓaŋgaɓ ŋ jarne, maa Gazlavay kábalata zləram anta ege vedəye aza. Kázavahune aka a uley tata, hune nja ana zləram mpe jaytun ege ma jaha a damaw. Gazlavay kázavata aka ata zləram ege vedəye, hune kélem ɓarɓar ta ŋ slaslalay mala mpe jaytun ma ŋ jarne. 18Mavəday anta, hune ɗaw ŋ la ghav səkwaw, hwa ɗaw ŋ sarzata zləram maa əy kébeleye aza ege, ana səkan bəse ege səkwaw. Hwa ma kambal slaslalay aka səkwaw, cemey, ara slaslalay ma kambalahwaw ka. 19Hwa nazlap hwa ya: «Zləram ege, əy kébeleye aza amba əy zevekey ka a uley tata.» 20Ayaw, andəwse njenjəwen. Cemey, əy balata aza ca, mavəday lalam tata, askwaw. Ŋkwa ca, hwa kézeveye ata mpe anta mavəday lalam ŋkwa. Hwa ɗaw ŋ la ghav səkwaw, hwa lalak karba. 21Cemey, mada Gazlavay kábalata zləram mpe ege maŋgaɓaŋgaɓ ŋ jarne aza ca, mbəy kula ŋ law, andəwse a hwa yam. 22Aya, hune sarza taŋtaŋ Gazlavay ey laghwaɗ unaf anta. Kághwaɗ anta ata hejəye ma ndav tata ege, mbəy a taŋtaŋ a hwa. Cemey, a nalahwaw taŋtaŋ ca, səy hwa kénjeye ŋ taŋtaŋ anta, askwaw ca, a nabalahwaw, aza yam. 23Mada Yahudu ege, əy zenha aza, əy lamza Gazlavay ca, tata yam, Gazlavay a nazavata ka, mavəday, Gazlavay mbəy kula ŋ zen ŋ zavata ka zeney. 24Cemey, mada hwa zləram mpe jaytun ma davha a damaw, əy kábalahwaw aza, əy kázavahwaw aka ata mpe jaytun maŋgaɓaŋgaɓ ŋ jarne, a heɗe a heɗe ca, ana ebe ŋghe səkwaw, keɗe. Yahudu ege ca, tata ca, tata zləram mpe jaytun ege maŋgaɓaŋgaɓ ŋ jarne, ara Gazlavay ca, pa ŋ kefkef ŋ zen ŋ zavata ka ata mpe anta, səkwaw vaw!
Lereh mala Əysərayəyla ege tewtew
25Cemey, zlana ege, sa ɗaw ŋ ghwalzahune səkan maɓahaɓah ŋgha, ndar hune ɗaw ŋ ŋta ha ŋkune ege aza ana hune hejəye kəleŋ ege, səkwaw. Unaf Əysərayəyla ege vedəye ɓarɓar, əy nanja ɓarɓar ha hwas ata vah maa hejəye ma tata Yahudu ege səkwaw, əy mandaha aza tewtew tata ara Gazlavay. 26Ana ebe ŋghe, ata vah anta wese ca, Əysərayəyla ege tewtew əy nelem lereh aza, ana maa kéŋtereye, a ŋgaya:
«Ɗala mereh ca, a nandaha ka ŋ Səyawna,
a neŋtetene dadawar a ŋseŋ Yakubu ege aza.
27Ebe ŋghe, ara laŋkan ma naka maa sa kanaŋkan a tata,
ata vah maa sa keneŋtetene gay tata ege aza.»
28Tata ca, əy kaŋgəlay nje a Gazlavay səkwaw, mavəday maa, əy kalamza Ma Mewe ma Taŋtaŋ, səkwaw. Ara səkan ma taŋtaŋ ŋ hune. Cemey, mada ata lamay ca, Gazlavay a kaɗawata mavəday jeje tata ege. 29Cemey, səkan maa Gazlavay a valza ey laya anta ca, kaw əy kanambaɗ, askwaw. 30Hune ca, zlezle, hune kéwenzene ha aka ŋ Gazlavay, askwaw. Cemey, na ŋgha ca, Gazlavay kásan hahar aza ata hune mavəday Yahudu ege, əy kéwenzene ha aka, askwaw. 31Ŋ tata yam, a nja ana mbe. Na ŋgha, əy kéwenzene ha aka ŋ Gazlavay, askwaw, ndar Gazlavay a san hahar ata hune. A laha ana ebe ŋghe ca, ndar Gazlavay a san hahar ata tata na ŋgha yam. 32Cemey, Gazlavay kámpakata hejəye aka tewtew ana daŋgay ege, mavəday əy kéwenzene ha aka, askwaw, ndar a senzetene hahar anta ŋ tata tewtew.
33Njenjəwen, Gazlavay ca, ara madakal! Kəleŋ anta ey lasan səkan anta gədak! Ma kula ŋ san ma maa a kedeŋza ŋ unaf anta ca vayay? Ma kula ŋ san səkan maa a kaɗaw ŋ lata ege vayay? Ana ma Ɗerewel ma keweɗ, a zlap, a ŋgaya:
34«Cemey, ɗala ma kasan ledeŋ ŋkwaɓ mala Gazlavay Madakal ca, vayay?
Askwaw ca, ma kana zenzene zlap ŋ Gazlavay ca, vayay?»
35«A zeney, ma velene səkan mpar ŋ Gazlavay,
ndar a ŋterene ka a dəwze anta ca, vayay?»
36Səkan ege tewtew, əy ndaha aka ara mbe, əy nja tewtew mavəday mbe, səkan anta ege tewtew mala anta ege. Hejəye, əy mahəmanza Gazlavay kaw vepey! Aməyna.
Currently Selected:
Rawma ege 11: BHS
Highlight
Copy
Compare
Share
Want to have your highlights saved across all your devices? Sign up or sign in
© 2025 CABTAL