Rawma ege 10
10
Bay Madakal mala Yahudu ege ey mala hejəye maa tata Yahudu ege səkwaw ca, ma teŋguleŋ
1Zlana ege, səkan maa sa kaɗaw ŋ unaf naka ey maa sa karak Gazlavay ata Yahudu ege ca, əy melem lereh. 2Njenjəwen, sa kula ŋ zlap aza, tata ca, əy katal ŋ lene zlan ŋ Gazlavay mambaza, cemey, latal tata anta ca, kéweɗeye a lasan ma taŋtaŋ, askwaw. 3Cemey, əy kasan maa Gazlavay a kabawzata hejəye aza, ŋ hejəye ma taŋtaŋ ege a tama anta, səkwaw, əy mpam ca, ŋ bawza ha tata ege aza, ŋ hejəye ma taŋtaŋ ege a ha tata. Ana ebe ŋghe, əy kalamza taf maa Gazlavay a la ka ŋ, bawzata hejəye ŋ hejəye ma taŋtaŋ ege, səkwaw. 4Cemey, maa Almasəyhu a ndaha aza ca, ɓarɓar mala ma maŋkanaŋkan ŋtakw, ndar kaw vayay ma lamza Almasəyhu anta aza ca, Gazlavay a bawza aza ŋ ɗala ma kala səkan a heɗe a heɗe a tama anta.
5Musa a ha anta kéŋter ata taŋtaŋ ma ndaha ka ŋ ma maŋkanaŋkan, a ŋgaya: «Ɗala ma kasəbar ma ege ma ŋ ma maŋkanaŋkan ca, a nanja mavəday anta.» 6Cemey, taŋtaŋ mala lalam ca, a zlap ana ebe ŋghe, a ŋgaya: «Hwa ɗaw ŋ zlap a unaf ŋkwa ene, “Ma kenetev mgba ata uzlaf, vayay?” səkwaw.» Ana zlap ca, ma kenetev mgba ata uzlaf ŋ tadakwaza Almasəyhu aza ca, vayay? 7A zeney, a ŋgaya «Hwa ɗaw ŋ zlap a unaf ŋkwa, “Ma kanadam uza asa hayak, vayay?” səkwaw.» Ana zlap ca, ma kanadam uza asa hayak ŋ daza Almasəyhu aza a bəza ŋ taba hejəye mamacamac ege ca, vayay? 8Cemey, zlap mala Gazlavay a zlap ca, vaŋgay? A zlap, a ŋgaya: «Zlap Gazlavay mbəy mbermber a hwa, mbəy ŋ pakam ŋkwa, mbəy ŋ unaf ŋkwa.» Zlap anta ca, ara zlap mala lalam maa nene kaghwalza. 9Mada hwa zlap a ma ŋkwa a tama hejəye, Yesu ca, ara Bay Madakal, mada hwa kálamza ŋ unaf ŋkwa, Gazlavay kágwarzama aza ata lamac ca, hwa nereh. 10Cemey, mada ɗala kálamza aza ŋ unaf anta ca, Gazlavay a nabawza ŋ ɗala ma taŋtaŋ. Ɗala ma ghwalza lalam anta a ma anta a tama hejəye ca, Gazlavay a nerehza aza. 11Mavəday, Ɗerewel ma keweɗ, a ŋgaya: «Kaw vayay ma lamza aza ca, a kanaya marava, askwaw.» 12Ana ebe ŋghe, Yahudu ege ey Yunanəyŋkaw ege, tata tewtew tata ma teŋguleŋ, Bay Madakal tata ma teŋguleŋ ma kala taŋtaŋ ŋ kaw vayay ma ɗawza ŋ cekzene. 13Ɗerewel ma keweɗ, a ŋgaya: «Kaw vayay ma ɗawza Bay Madakal ŋ cekzene ca, a nereh.»
14Cemey, mada hejəye əy kálamza Bay Madakal, askwaw ca, əy nasan ŋ ɗawza ŋ cekzetene, vaŋgay? Mada hejəye, əy kézləme zlap a heɗe, askwaw ca, əy nasan ŋ lamza, vaŋgay? Mada, əy kéghwelzetene Ma Mewe ma Taŋtaŋ askwaw ca, əy nasan ŋ zləme, vaŋgay? 15Mada, əy kálaɓzata hejəye ŋ ghwalza ma anta, askwaw ca, a nasan ŋ ghwal, vaŋgay? A zeney kéŋtereye ŋ Ɗerewel ma keweɗ, a ŋgaya: «Səkan ma kadak ana hejəye maa əy kandaha ŋ ghwal Ma Mewe ma Taŋtaŋ ca, askwaw!» 16Cemey, hejəye tewtew ana ma lamza Ma Mewe ma Taŋtaŋ aza, səkwaw. Ana maa Esaya, a zlap, a ŋgaya: «Gazlavay Madakal, ma lamza laghwal zlap ŋcene ca, vayay?» 17Ana ebe ŋghe, lalam ca, a ndaha aka, ta ŋ lezləme laghwal zlap, laghwal zlap yam, ara ma mala Almasəyhu.
18Aya, sa kaɗawzahune, Yahudu ege ca, əy kézləme Ma Mewe ma Taŋtaŋ anta, askwaw vaw? Ayaw njenjəwen, əy kézləme. Ɗerewel ma keweɗ, a zlap, a ŋgaya:
«Əy kézləme ula hejəye maa əy nda ŋ ghwal zlap ata hayak tewtew,
zlap tata ege hwas, ata ghala manhayak.»
19Sa kaɗawzahune zeney: Hejəye Əysərayəyla ege ca, əy kásan ma anta, askwaw vaw? Musa kázlap aza mpar anta, Gazlavay, a ŋgaya:
«Sa nabawzahune aza ŋ hejəye mala sərah ege ata hejəye ma kececefzata, səkwaw ege.
Sa nagwarzamza ata unaf ŋkune ege ŋ ghwaɗ ata hejəye maa ŋkwaɓ ŋ ha ege, askwaw.»
20Esaya yam kázlap day aha ebe ŋghe zeney, a ŋgaya, Gazlavay kázlap:
«Hejəye ma kempemekey ege, askwaw, əy kéndewzekey aza,
sa kéghwelzetene kusam naka ŋ hejəye maa kaw əy keɗewzekey a səkan, askwaw.»
21Cemey, ata hejəye Əysərayəyla ege ca, Gazlavay a ŋgaya: «Pes pes sa kaɗaf ra naka kəɗa ata hejəye ma kewenzekey ha aka, səkwaw ege, ma kaɗa gham a sa ege.»
Currently Selected:
Rawma ege 10: BHS
Highlight
Copy
Compare
Share
Want to have your highlights saved across all your devices? Sign up or sign in
© 2025 CABTAL