Rawma ege 9
9
Gazlavay a mayata hejəye Əysərayəyla ege
1Ma maa sa kanazlapata ŋghe ege ca, ara ma ma njenjəwen ege, sa la metəwle səkwaw, mavəday sa ɗala mala Almasəyhu. Zəwet ma keweɗ mbəy ŋ sa, ŋkwaɓ naka a kaghwalza ca, sa zlap ma ma njenjəwen. 2Unaf naka a kaŋkəɗaw ata pes ata pes, sa kejejekw mambaza. 3Ayaw, sa káɗaw kəɗe Gazlavay megeyzekey aza, meɓezekey aza a Almasəyhu mavəday zlana ege ma mbawha ata ŋseŋ hejəye naka ege. 4Hejəye anta ege ca, ara Əysərayəyla ege, Gazlavay kábawzata aza a uzəye anta ege, kéghwelzetene ɓardakw anta aza, káŋkan ma anta aza a tata, kéveletene ma maŋkanaŋkan anta aza, kéghwelzetene taf ma ata rak aza, kézlepetene a neveletene səkan ege, 5əy mbawha ata ŋseŋ jeje ma zlezle maa zlam tata ege a kaya. Almasəyhu yam a mbawha ana heje dakənak ata ŋseŋ tata, mbe ara Gazlavay ma mgba ata ha səkan ege tewtew, hejəye əy mahəmanza kaw vepey. Aməyna.
6Sa kázlap ene, səkan ege maa Gazlavay a zlap a navalzata ege wese ca, əy kanala askwaw ca, askwaw. Cemey, hejəye ma ata ŋseŋ Əysərayəyla ege tewtew ca, tata Əysərayəyla ege njenjəwen, səkwaw. 7Uzəye maa Əybərahəyma a mbawata ege ca, ara uzəye anta ege tewtew, njenjəwen, səkwaw. Cemey, Gazlavay kézlepene ŋ Əybərahəyma, a ŋgaya: «Uzəye maa sa zlap, sa navalahwaw ata ege wese ca, ara Əysəyaku ma kanambawata.» 8Ana zlap ca: Uzəye tewtew ma mbawha ana laɗaw kusam mala ata mawal ey wala ca, tata uzəye Gazlavay ege, səkwaw. Cemey, uzəye Gazlavay ege ma njenjəwen ca, ara uzəye maa a zlap, a navalzata ege wese. 9Ŋghe səkan maa Gazlavay a zlap, ŋ law: «A makuɗa ana ebe ŋghe, sa nezenha, Saratu kámbawha mba mawal aza.»
10Ebe ŋghe gagaha səkwaw, Rebeka yam kámbawha musa gbak, cen tata ma teŋguleŋ, ara Əysəyaku, jeje ŋtakwaw ma zlezle. 11-12Cemey, Gazlavay a may hejəye ca, ana maa a deŋza ŋ law. A mayata ca, ata zlan tata ege, səkwaw, cemey, a yata ende ŋghe. Ŋ ghwalza ca, səkan maa a zlap ŋ la ca, a nalaw. Aya a zlepene ŋ Rebeka, a ŋgaya: «Mba ma dakal a nelene zlan ŋ mba ma pəzekw.» Maa Gazlavay a zlap ana ebe ŋghe ca, uzəye anta ege əy kámbawha kwagwa səkwaw, əy kála səkan ma taŋtaŋ ey səkan ma kadak səkwaw kaw, kwagwa, askwaw. 13Ana maa kéŋtereye ŋ Ɗerewel ma keweɗ, a ŋgaya: «Sa káɗaw Yakubu aza, cemey, Əysuwa ca, sa kécecefza, səkwaw.»
14Ana ebe ŋghe ca, heje nazlap vaŋgay? Gazlavay ca, a kala səkan ma kadak səkwaw, vaw? Njenjəwen ca, kaw, askwaw. 15Cemey, a zlepene ŋ Musa, a ŋgaya:
«Sa nelene taŋtaŋ ŋ ɗala maa sa kaɗaw ŋ lene taŋtaŋ.
A zeney, sa nasan hahar ata ɗala maa sa kaɗaw ŋ san hahar a heɗe.»
16Gazlavay a lene taŋtaŋ ŋ ɗala ca, mavəday maa heje anta a kaɗaw, səkwaw, mavəday latal anta, səkwaw, cemey, mavəday mbe ma san hahar a heɗe ende. 17Ŋ Ɗerewel ma keweɗ ca, Gazlavay a zlepene ŋ Fəyrawna, a ŋgaya:
«Sa cahwaw ŋ bay ca, ndar ŋ ghwalza ɓarɓar naka ta ŋ hwa, a zeney ndar zlam naka a ya a manhayak tewtew.»
18Ana ebe ŋghe, mada Gazlavay a ɗaw ŋ san hahar ata ɗala ca, a law, mada a ɗaw ŋ bawza unaf ɗala aza ɓarɓar ca, a bawza.
Gazlavay ca, a la səkan ana maa a kaɗawaw
19Ketegəre, hwa nazlap, hwa ya, Gazlavay a zenzetene ghem ŋ hejəye zeney ca, ata vemey? Mada Gazlavay a kaɗaw ŋ la səkan maa a kaɗaw ca, ma kula ŋ zlepene, hwa la səkwaw ca, vayay? 20Hwa ɗala ma kaja səbakw a Gazlavay ŋgha ca, hwa vayay? Lalam kula ŋ zlepene ŋ malam, «Hwa lemekey ende ŋghe ca, ŋ vay,» vaw? 21Malam kula ŋ lam səkan maa a kaɗawaw, a dəres anta aza. A dəres ma teŋguleŋ ca, mbəy kula ŋ lam səkan ege aza, gbak, səkan wende maa ghav anta aka, səkan wende zeney, maa ghav anta, askwaw, səkwaw vaw?
22Ayaw, Gazlavay káɗaw aza ŋ ghwalza laghwaɗ unaf anta ey ɓarɓar anta. A mbe anta tewtew ca, késew laghwaɗ unaf anta aza dakala ata hejəye maa unaf anta a kaghwaɗ ata tata ege, maa a kenefətekzata aza. 23A la ana ebe ŋghe ca, ŋ san hahar ata hejəye vedəye, kéghwelzetene ɓardakw anta aza mambaza, káslata aka zlezle ŋ lem ɓardakw anta. 24Hejəye anta ege ca, ara heje. A yahaheje ca, ŋ taba Yahudu ege gagaha səkwaw, cemey, ŋ taba hejəye maa tata Yahudu ege səkwaw yam. 25Gazlavay kázlap ma anta ŋ ɗerewel Hawsea, a ŋgaya:
«Hejəye ma tata hejəye naka ege səkwaw ca, sa nayata a hejəye naka ege,
hejəye maa sa kaɗawata ege səkwaw ca, sa nayata a hejəye naka maɗawaɗaw ege.
26Aya, ata la maa əy zlepetene, əy ŋgaya:
“Hune hejəye naka ege, səkwaw” ca,
əy nayata a uzəye mala Gazlavay ma a nje ege.»
27Esaya yam, kázlap ata uzəye Əysərayəyla ege, a ŋgaya: «Kaw uzəye Əysərayəyla ege, əy vəram ana vakw ma ŋ lakwat ca, ara hejəye cekuɗe ende ŋghe ŋ taba tata, ma kenereh. 28Cemey, Bay Madakal a nala səkan maa a zlap tewtew kəcaŋ ata hayak#9.28 Esa 10.22-23.»
29A zeney, Esaya kázlap zlezle, a ŋgaya:
«Mada keɗe Bay Madakal ma ɓarɓar kégeɓzaheje ŋseŋ hejəye aka cekuɗe, askwaw ca,
heje kála ŋtakwaw ana hejəye Sawdawma ege,
ana hejəye Gawmawra ege#9.29 Esa 1.9.»
Almasəyhu ey Əysərayəyla
30Ma anta a ɗaw ŋ zlap ca, vaŋgay? A ɗaw ŋ zlap ca, kaw hejəye ma tata Yahudu ege səkwaw, ma kampam ŋ la səkan ege a heɗe a heɗe, səkwaw ca, Gazlavay kábawzata aza ŋ hejəye ma kala səkan ege a heɗe a heɗe ta ŋ lalam. 31Karba, hejəye Əysərayəyla ege, ma kampam ma maŋkanaŋkan ma kanabawzata ŋ hejəye ma taŋtaŋ ege a tama Gazlavay ca, əy kéndewzene a taŋtaŋ anta askwaw. 32Mavəday vemey? Mavəday, əy kahəbar ta ŋ lalam, askwaw, cemey, əy deŋza ca, əy nelem ta ŋ zlan tata ege. Ana ebe ŋghe, əy kája mejembeɗew aza, ata «ŋkəɗaŋ mejembeɗew,» 33ana maa kéŋtereye, a ŋgaya:
«Ŋghe, sa ca ŋkəɗaŋ mejembeɗew aka ŋ Səyawna,
kefe ma kandavzata hejəye.
Cemey, ɗala ma lamza aza ca,
a kanaya marava, askwaw.»
Currently Selected:
Rawma ege 9: BHS
Highlight
Copy
Compare
Share
Want to have your highlights saved across all your devices? Sign up or sign in
© 2025 CABTAL