Roméne 15

Obyɔɔnɔ ówó eheyá yá Kirítu

1Visó ává to timbámó ŋguru na ŋgɔ́tééná, to geremenámó obyá wohota wá ava ka na ŋguru mwané. To ta geréméná osɔsɔ até éyé é só wɔ́tɔ́mó. 2Amó moto na visó a geremenamó osɔsɔ anáá a wɔ́tɔ́ vasɔ́ɔ́ ukú ójó anáá í rií wusi, índi í góná naáté yá ŋgɔ́tééná, 3esene éyé kirítu a ta ma sɔ́sɔ́ até éyé é katé me wɔ́tɔ́, vedá va kárate ává mwáŋ mwáŋ vá jarámó anáá: «Ceyɔ́ rá ava vá wo seyámó í ma ŋgobáánéná noó.» 4Wó je rií anáá mamba mimé ámá má ámó tiré tíré na va kárate ává mwaŋ mwáŋ má ma tirévéná na poná ukú ójó anáá to jembe até éyé to geremenámó weŋga, má géremenámó o só hwá iháká na nomendá índi to timbe ipitína Irɔŋgɔ. 5Ŋgá Irɔŋgɔ ójó a eréenámó iháká na nomendá a eŋga anáá no ováana vinó na vinó esene éyé naná wó ámó obyɔɔnɔ ówó eheyá yá Yésusu Kirítu. 6Táma mwané, na otémá umwéesií kó na mií imwesií, no né hítyámó weréena Irɔŋgɔ niimí, ómwané ójó Tetáŋgá wa Okí wa visó ójó Yésusu Kirítu. 7Óvákáánámáno sɔ́ vinó na vinó, ámó kirítu a ma nó áká na wusó wá niimí ná Irɔŋgɔ. 8Ŋgo nó ojánámó anáá Irɔŋgɔ a ámó a járá weŋga ámó a mó járá, wandá mwané kówo Kirítu a ma búndé yeŋga manɔnɔwɔ yá va Yúdene, ukú ójó anáá tánó íjí Irɔŋgɔ a ma eŋgéná va kókó váwó í núwé, 9kó ava ka rií va Yúdene vá eréenámó Irɔŋgɔ niimí na wusó wá usi wa otémá waá, ámó va kárate ává mwáŋ mwáŋ vá járámó anáá: «Wandá mwané kówo ŋgo mó wo gúmíyámó na raaté wa mayɔŋɔ ámá ka rií má va Yúdene, kó ŋgo mó vaánamó ebérááná yɔɔ́ na esawo.» 10Va kárate ává mwáŋ mwáŋ vá járámó hée anáá: «Aá vato ává ka rií va Yúdene, takáno orɔŋgɔ na noyɔŋɔ éné Irɔŋgɔ a ma ijátá!» 11Kó hée anáá: «Vinó ává ká rií va Yúdene vidɔŋgɔ váánénano Okí esawo, vinó ává mayɔŋɔ mimé, o me váánénámáno esawo!» 12Isáyá a járámó honó anáá: «Ukúmbú rá Yesé o né urámó, ó né hateenámó na ujwé ówó vidɔŋgɔ, kó vidɔŋgɔ mwané ví né váámó ipitíráwó na ómwané.» 13Ŋgá Irɔŋgɔ ójó a eréenámó ipitía nó nwiyé otémá ra vinó na vitaka na dɔ́ŋgɔrɔ́ɔ́ŋ naáté yá ŋgɔ́tééná, ukú ójó anáá no rií táásé na ipitína ekáné yá ŋguru ra mwáŋ mwáŋ wa Ireréŋgi.

Manɔnɔɔ má Póoro

14Va mbísó, na até éyé é nó néménámó, mpétɔ́ e ta ámó naáté yá otémá ramé anáá vinó maté no ámó na vesi vá mbuŋgáná, anáá no jembámó até yimé éyé no geremenámó ojembe kó no hítyámó ovárébáana vinó na vinó. 15Ítɔɔ naná, naáté yá kárate ojó, pandó imó í ámó ɔ́wɔ́ íjí ŋgo ma nó tíréná na ŋguru iŋgimé ukú ójó anáá ŋgo no kúmutyena mamba ámá no ma ríi no etá jembe. Ŋgo ma eŋgá naná esene éyé Irɔŋgɔ naáté yá ntá raá 16a ma eŋgá anáá ndií yeŋga manɔnɔwɔ yá Yésusu Kirítu na wusó wá ava vá ta ámó va Yúdene, a ma ŋgijátá anáá ŋgoja Usi wa Cómó waá ukú ójó anáá ava vá ta ámó va Yúdene vá búndé mómí éjé e wɔ́tɔ́mó Irɔŋgɔ, kó mwáŋ mwáŋ wa ireréŋgi kójo a eŋgámó anáá mómí mwané e geremena anáá e rií ra Irɔŋgɔ. 17Wandá mwané kówo naáté yá iretye éyé na Yésusu Kirítú, ndo ámó otaka na wusó wá manɔnɔwɔ ámá ŋgo ma eŋgéná Irɔŋgɔ. 18Esené ŋgo a buné uŋgúté anáá njárá wandá womó, wandá mwané wó néménámó bɛ́ŋ até éyé Kirítu a ma eŋgá na nime rame ukú ójó anáá ava ka rií va Yúdene vá rií na mowá na Irɔŋgɔ. A ma eŋgá wandá mwané na vipéŋgé kó na ŋgeŋgéná mamba, 19na ndeme rá ŋguru, na mamba má okémbyé, na ekáné yá ŋguru ra Mwáŋ mwáŋ wa Ireréŋgi. Naná kówo ŋgo ma ojá Usi wa Cómó owɔ́rɔ́ ówó na Yerúsareme ondo humé na isímbí yá edɔŋgɔ éyé anáá Iríri. 20Vedá ŋgo ma caká odiŋge anáá ŋgoja Usi wa Cómó bɛ́ŋ na pandó íjí vato vá ma ríi vá arɔ́wɔ́ ka ová vá jará ndɔ́ŋɔ́ ra Kirítu, ukú ójó anáá ndií ka haá na vivévérá íví moto undyeé a ma tímé. 21Naná, ŋgo ma byɔɔnɔ́ até éyé va kárate ává mwáŋ mwáŋ vá járámó, esene éyé vá járámó anáá: «Ava vá ta ma wó ojána ndɔ́ŋɔ́ raá vá mó me enámó, ava vá ta ma vátɔ́rɔ́ oráŋá ráa vá mó ovámó.»

Eŋgendɔ ra Póoro

22Até éyé é ma eŋgá anáá eŋgendɔ mbunu ndií ka uré na vinó kéemé. 23Kaá tetee ojó ŋgo má máná manɔnɔwɔ mamé na vidɔŋgɔ iví. Wó etá maá mbunu ójó cakámó otámá anáá ŋgo enda na vinó, 24kó ndiŋgámó anáá ŋgo eŋga naná ará ŋgo né endámó na edɔŋgɔ yá Panyá, esene éyé pityámó anáá ŋgo né térémenámó o nó ená índi no ŋgaka na wenda ówó ɔkɔ́ kó ŋgo né endámó hɔrɔ́ ŋgo omana otúmbyé mwaná wa itíndíkáná orɔŋgɔ na vinó. 25Vedá tetee ojó ŋgo endámó na Yerúsareme ukú ójó anáá ŋgo enda eréena mwení vatɔ́wɔ ává okɔ́, 26esene éyé va atɔ́wɔ ává na Maseduwána na ava na Akáya vá má sómbá anáá vá eréenanámó mwení na wusó wá va atɔ́wɔ ává vawora na Yerúsareme. 27Vámwané maté káva vá má sómbá naná, vedá na vatɔ́ɔ́tɔ́, wó ámó ihí kéye vá káte yáána, esene éyé va atɔ́wɔ ává na Maseduwána na ava na Akáya vá ta ámó va Yúdene, vedá va Yúdene vá ma táŋgááná mesi máwó má Ireréŋgi nawó, káá vámwané honó vá géremenámó otáŋgáana ekúmé ráwó rá embɔɔ́ na va Yúdene. 28Ará ŋgo né manámó maró mwané, ará ŋgo né wó cékiyámó mwení íjí í káte wónjávena, kaá noó wenda na edɔŋgɔ yá Panyá hɔrɔ́ tómbéna na vinó, 29kó njembámó anáá ará ŋgo né endámó na vinó, ŋgo né urámó na nosanjá ra Kirítu táásé. 30Vedá até éyé ŋgo nó súsámó va mbísó é ámó anáá no nywáana orɔŋgɔ name táma éjé no vásoóriyámó Irɔŋgɔ na wusó wamé, ŋgo nó súsámó na ebéráána yá Yésusu kirítu kó na andiŋgé ájá Mwáŋ mwáŋ wa Ireréŋgi a eréenámó, 31ukú ójó anáá pambena vato ává na Yúdeyá ává vá ta atɔ́wɔ́ Kirítú, índi va atɔ́wɔ ává na Yerúsareme vá wɔ́rɔ́ wusi yáka éyé ŋgo wó endénámó neyé. 32Naná, ŋgo né jinámó na vinó na vitaka bimé, kó ŋgo né huwetámó na raaté wa vinó ŋgé Irɔŋgɔ a atɔ́wɔ́. 33Ŋgá Irɔŋgɔ wa dɔ́ŋgɔrɔ́ɔ́ŋ a rií na vinó bimé! Wó rií naná.

Currently Selected:

Roméne 15: tii

Highlight

Copy