Roméne 16

Mbétíyé

1Ŋgo nó tévérámó Fwebe, mbéyí ra visó éjé e nɔnɔwenámó iwónjá rá va atɔ́wɔ íjí na Cenkeréyá. 2O me akámáno na ebéráána yá Okí ámó vatɔ́wɔ vá géremenámó weŋga. Vinó o me héríbye na wandá wimé ówó a hítyámó o nó váŋga ɔ́wɔ́, esene éyé ómwané honó a ma héríbyé vato mbunu ítɔɔ noó maté. 3Vinó ombétíyé Pirisíyá na Akirása ává vá katé nɔnɔɔ name na wusó wá Okí. 4Esené vá ma cáná kpá na nugwé ukú ójó anáá vá cótyé, kó ta ámó moká ójó a geremenamó o wó téŋgyé, mowóŋjá mwá vatɔ́wɔ mwimé úmú mó ta ámó mwá va Yúdene honó mó wó téŋgyámó. 5Vinó ombétíyé honó iwóŋjá rá vatɔ́wɔ íjí í váwónjáanámó na yanje yáwó, no mbétíyé mbérá wame ójó Epenéte, ómwané kójo moto wa makésyé ójó a ma atɔ́wɔ́ Kirítu na cí ra Asíyá. 6Vinó ombétíyé Maréyá ójó a ma váhwá etɔɔ mbunu na wusó wá vinó. 7Vinó ombétíyé Andoronikúsu na Yuniyása, vá ámó va Yúdene ámó noó kó vá ma ríi na mboo orɔŋgɔ name. Vá ámó enásá ra ekáné yá jiní, vámwané vá ma búndé honó va atɔ́wɔ hɔrɔ́ noó ŋgo a rérií ka búndé. 8Vinó ombétíyé Ampiriyatúsu, usi wa mbérá wame naáté yá Okí. 9Vinó ombétíyé Urubéne ójó a ámó na visó na manɔnɔwɔ má Okí, no mbétíyé Satakísi mbérá wame. 10Vinó ombétíyé Aperése ójó a ma tíhíyé anáá a ámó mpaŋá ra atɔ́wɔ. Vinó ombétíyé vato ává na yanje yá Arisitobúre. 11Vinó ombétíyé Erodiyóŋo ójó Yúdene ámó noó, no mbétíyé vato ává ná yanje yá Narásísi ává vá atɔ́wɔmó Okí. 12Vinó ombétíyé Tiripéne na Tiripóse, wó ámó vakótó ává vá nɔ́nɔwɔmó mbunu na wusó wá Okí. Vinó ombétíyé mbérá wame ójó Perisíde, a ámó mbéyí rame ra ekáné yá jiní. Ómwané honó a ma wɔ́rɔ́ etɔɔ mbunu na wusó wá Okí. 13Vinó ombétíyé Rupúsu ójó Okí a ma ijátá, no mbétíyé honó netí ójó a ámó honó maáŋgá na wusó wamé. 14Vinó ombétíyé Asinkiríte, Peregóno, Heremése, Patarobása, Heremása na va mbísó bimé ává nawó. 15Vinó ombétíyé Piroróge na Yuríyá, Neréyá na erená yáa, Orempása na va atɔ́wɔ bimé ává nawó. 16Ovávétíyánámáno vinó na vinó na ŋgundi ámó va atɔ́wɔ. Mowónjá mwá va atɔ́wɔ mwimé mwá Kirítu mó nó vétíyámó.

Ndébɔ́ rá mamana

17Va mbísó, até éyé ŋgo nó rébámó kéeye: Kéríkyáno na vato ává vá sámó va kiritene vá wúnde o wó déŋgyé pé, esene éyé vá pékáanámó na ehoóhona éyé no ma timbé na até éyé é néménámó Kirítu. Ndáno urehí nawó, 18esene éyé vato mwané vá ta nɔnééná Kirítu Okí wa visó, vedá vá nɔ́neenámó embumu ráwó. Vá tímbaanámó na vesi vá vipéŋgé vyáwó na vesi va njáréná váwó ukú ójó anáá vá jeénye vato ává vá ta taŋgá. 19Moto uŋgimé a jembámó mowá ámá no timbámó na Okí. Takámó sɔ́ na wusó wá vinó, vedá ndiŋgámó anáá no rii táásé na peyɔ ra weŋga ówó wusi, no rií kwɛɛ́ŋ na ovásaára ówó wobé. 20Irɔŋgɔ wa dɔ́ŋgɔrɔ́ɔ́ŋ a né gorámó Saátana na cí ra vinó ra eŋgoró ará wó kérámó ará. Ŋgá ntá ra Okí wa visó ójó Yésusu e rií na vinó bimé! 21Timotéya ójó a nɔnɔwɔmó orɔŋgɔ name a nó vétíyámó, Rusiyúsu, Yasóŋo na Sosipatére ává va Yúdene ámó noó vá nó vétíyámó honó. 22Wó ámó noó ójó Teretiyúsu kójó ŋgo má tíré kárate omójo, ŋgo nó vétíytámó naáté yá Okí ójó a só wóŋjéenámó. 23Gayiyúsu ójó cɔ́tɔ́mó na ómwané a nó vétíyámó, na yanje yáa kówo iwónjá rá va atɔ́wɔ í bérúmanámó. Eráseta ójó a vétyáanámó mwení rá oŋgórá a nó vétíyámó, ítɔɔ karátúsu mbísó wa visó. [ 24]

Irɔŋgɔ moká a geremenamó na niimí

25Ŋgáno to no eréena Irɔŋgɔ niimí, esene éyé a hítyámó weŋga anáá no timbe ŋguru na Usi wa Cómó ójó ŋgo ojámó ará tɔ́ŋɔ́mó maró wa Yésusu Kirítu. Naáté yá Usi wa cómó mwané kówo Irɔŋgɔ a eŋgámó anáá vato vá jémbe ndímbe éjé e ma ríi aséénérí na maá maá, 26kó tetee ojó yo ohúmé na ineŋgí. Kaá owó, mayɔŋɔ mimé ámá ka rií va Yúdene ma hítyámó ojembe ndímbe mwané na va kárate vá vahúmíye maró vá Irɔŋgɔ. Irɔŋgɔ ójó na kɔ́rɔ́tɔ́tɔ́ a ma eŋgá anáá vá eŋgá naná ukú ójó anáá mayɔŋɔ mimé má me atɔ́wɔ má wúnde orií na mowá naá. 27Ŋgáno to no eréena Irɔŋgɔ niimí, ómwané moká ójó a timbámó peyɔ́! Niimí nó rií náá na ebérááná yá Yésusu Kirítu na mbeya aá mbeya! Wó rií naná.

Currently Selected:

Roméne 16: tii

Highlight

Copy