Roméne 1

Mbétíyé

1Noó Póoro, yeŋga manɔnɔwɔ yá Yésusu Kirítu kójo ŋgo nó tiranámó. Irɔŋgɔ a ma mbérááná anáá ndií onásá rá Yésusu kó a ma ŋgijátá ukú ójó anáá ŋgoja Usi wa Cómó waá. 2Usi wa Cómó mwané, ójó Irɔŋgɔ a ma táná kɔ́ɔ́m na uŋgúté vá vahúmíye maró váa naáté yá va kárate ává mwáŋ mwáŋ, 3a néménámó Mwaná waá ójó a ma uré ámó moto, kó a ma byánávéná na mbɔŋɔ ra ahumu Dáviti, kókó ráa. 4Na mwáŋ mwáŋ wa ireréŋgi, Irɔŋgɔ a ma tíhíyé vato anáá a ámó Mwaná waá ójó a timbámó ŋguru árá a ma me honóná na raaté wa vigwé, wó ámó Yésusu Kirítu Okí wa visó. 5Na nimé raá kówo to ma timbé ntá éjé anáá ndií onásá na wusó wá niimí ná Kirítu, ukú ójó anáá ture vato ává na mayɔŋɔ mimé índi vá me atɔ́wɔ vá wúnde o me ová. 6Vinó honó no ámó na ŋcámbá ra vato mwané esene éyé Yésusu Kirítu a ma nó bérááná. 7Ŋgo nó tíranámó, vinó ává na edɔŋgɔ yá Róma, vinó bimé ává Irɔŋgɔ a diŋgámó kó a ma nó bérááná anáá no sɔ́tɔ́ na wusó wáa. Ŋgá Irɔŋgɔ Tetáŋgá wa visó na Okí Yésusu Kirítu vá nó hwá ntá na dɔ́ŋgɔrɔ́ɔ́ŋ.

Póoro a támámó anáá a enda ená va atɔ́wɔ ává na edɔŋgɔ yá Róma

8Manámó okésyé otéŋgyé Irɔŋgɔ wame na niyó ná Yésusu Kirítu na wusó wá vinó bimé, esene éyé naa cí ra ndono iŋgimé vá ojámó anáá no tɔ́wɔmó. 9Irɔŋgɔ a jembámó anáá ŋgo ojámó vatɔ́ɔ́tɔ́, ómwané ójó ŋgo me nɔnɔwenámó na otémá ramé uŋgímé ará ŋgo ojámó Usi wa Cómó ójó a néménámó Mwaná waá, a jembámó anáá tɔɔ́nɔmó vibérááná vyá vinó támaa iŋgimé éjé ŋgo vásoóriyámó, 10kó cúcámó Irɔŋgɔ anáá wó a ríi mbaŋgéná raá, índi timbe pé ra uré ówó na vinó. 11Esené timbámó ekáné yá njeŋge éjé anáá ŋgo nó ená ukú ójó anáá ŋgo nó békíye akéré rá Mwáŋ mwáŋ wa Ireréŋgi, ɔ́wɔ́ nó né timbámó ŋguru nasesi. 12Yɔŋsi ŋgo mó géremena anáá ará ŋgo né riyámó na kɔ́ŋgɔ́ ra vinó, ŋgɔ́tééná éjé to timbámó orɔŋgɔ e né só réryámó notó. 13Ta diŋgé náá no tatará va mbísó, anáá ŋgo katámó síré anáá ŋgo enda na vinó, vedá ondo húmé tetee ojó ta katé timbe pé. Ŋgo katé diŋge anáá kámbané ŋgo ená vibomá vyá manɔnɔwɔ mamé na vinó sɛ́ɛm ámó ví ma enávená na vidɔŋgɔ ivyomó. 14Ŋgeremenámó weŋga manɔnɔwɔ mamé na kɔ́ŋgɔ́ ra vato bimé, ava vá ma yééré mamba mbunu na ava vá ta ma yeére, ava vá tímbámó njembéná na ava vá ta timbé. 15Wandá mwané kówo ndiŋgámó anáá ŋgo uré ŋgo enda nó ojána Usi wa Comó, vinó honó ává no ámó na Róma.

Ŋguru ra Usi wa Cómó

16Ŋgo ojámó Usi wa Cómó ka na wuswéní: Usi wa Cómó a ámó ŋguru éjé Irɔŋgɔ a timbaanámó na ejé ukú ójó anáá a sótyé ava vá atɔ́wɔmó, va Yúdene na makésyé, tii waá ava vá ta ámó va Yúdene. 17Na vatɔ́ɔ́tɔ́ Usi wa cómó kójo a tíhíyámó twiiŋí kówo Irɔŋgɔ a eŋgámó anáá vato vá rií ndíŋgirííŋ na aŋgísó ráa, wó ámó bɛ́ŋ na ŋgɔ́tééná moká, esene éyé aŋgóŋgí ájá Mwáŋ mwáŋ á járámó anáá: «Ojo a atɔ́wɔmó Irɔŋgɔ a ámó ndíŋgirííŋ kó a mó sɔ́tɔ́mó.»

Nyéŋgé ra ava vá ta ámó va Yúdene

18Irɔŋgɔ na máná ɔkɔ́, a tíhíyámó mbésé raá na wusó wá nyéŋgé iŋgimé na wobé wimé ówó vato vá eŋgámó, esene éyé ŋgeŋgéná mwané í mándyáanámó vatɔ́ɔ́tɔ́ anáá vá mwané ka eŋgá manɔnɔwɔ máa. 19Wó je rií anáá wimé ówó moto a ámó ojembe na Irɔŋgɔ wó enéyámó na vámwané, Irɔŋgɔ a ma wó tíhíyé wusi na wusi. 20Esené nará Irɔŋgɔ a ma héndéná cí ra ndono, vesi vá ŋcaŋa váa ává nisó nó ta ámó wená naná wó ámó anáá ekáné yá ŋguru raá éjé kɔ́rɔ́tɔ́tɔ́ na até éyé a ámó ómwané maté, peyɔ ra vato yo enámó mamba mwané na até yimé éyé a ma héndá. Vato vá ta geréméná sɔ́ na vijukáná. 21Esené vá ma jembé Irɔŋgɔ kó vá ta ma me hwá niimí ka me téŋgyé honó ámó wó géremenámó anáá wó eŋgávena na wusó wáa, océ ójó anáá vá eŋgá naná, vá ma késyé otimbe vambé vá mbuŋgáná kó otémá ráwó ka na peyɔ ó ma dáŋgá naáté yá mbinó. 22Vá ojámó anáá vá ámó na peyɔ ndeke vá ámó byejá, 23océ ójó anáá vá gúmíye Irɔŋgɔ wa niimí ójó a ta gwé, vá ma késyé gúmíyé motéé mwá sásáá. Motéé mwané mó púranámó na moto ójó a gwámó, umumú mó púrana na monóoní, umumú mó púrana na nama rá eŋgoró ene, umumú mó púrana na nama íjí í rambámó. 24Wandá mwané kówo Irɔŋgɔ a ma wó céŋgityé naáté yá vambé váwó vá ŋgeŋgéná ámó etémá rawó e vaŋgámó, ukú ójó anáá vámwané maté vá vaá wuswéní na nótó ráwó na manyɔ́tɔ́ máwó. 25Vá ma céŋgítyé vatɔ́ɔ́tɔ́ ává vá néménámó Irɔŋgɔ vá té atɔ́wɔ́ viváná, vá gúmíyé vá wúnde onɔneena até éyé Irɔŋgɔ a ma héndá océ ójó anáá vá gúmíye vá wúnde onɔneená Ahéndá maté ójó a geremenamó na esawo na kɔ́rɔ́tɔ́tɔ́. Wó rií naná. 26Wandá mwané kówo Irɔŋgɔ a ma wó céŋgítyé anáá vá díŋge mamba má wuswéní. Vakótó váwó vá ta ne vétéma na vanómótó, vá etá ovétémá na vasɔ́ɔ́ vakótó, wó je rií anáá até naná kówo Irɔŋgɔ a ma téká mamba. 27Vanomótó honó vá mícámó ovétéma ówó na vakótó, kó vá dúutanámó na vitámáká vámwané na vámwané, vá vétéma na vasɔ́ɔ́ vanómótó kó vá tímbaanámó na mayáákana ámá vambé vá ŋgeŋgéná váwó vá túrámó. 28Kaá ámó vá ta ma diŋge anáá vá ne jembe Irɔŋgɔ, Irɔŋgɔ a ma wó céŋgítyé na péyɔ rawó éjé téŋgéŋgé, kó vá eŋgámó até éyé vá ta geréméná weŋga. 29A ámó táásé na kána rá mamba mimé ámá ka rií ndíŋgirííŋ, vá eŋgá wobé, vá támá até éyé é ámó yá vasɔ́ɔ́, vá mbe vá etémá, táásé na ŋjíŋí. Vá onámó, vá gíte na cáŋgó, vá jéjíye vasɔ́ɔ́, vá eŋgá yeŋgá eŋga, vá ojá viváná na notó rá vasɔ́ɔ́, 30vá ámó na vikɔɔkɔ́tɔ́, vá rií vambéebéná vá Irɔŋgɔ, vá ámó na enjoóra, na mebúnú, vá vágíte ikiní, vá tímbe akéré na wéŋga ówó wobé, vá béyáana icé na vabonda váwó. 31Vá ámó ka na peyɔ́, vá ta eŋgá até éyé vá járámó, ka na etémá kó vá ta ová moto noóŋgó. 32Ítɔɔ ámó vá jémbámó anáá na jósi wa Irɔŋgɔ vato ává vá eŋgámó ikúkú ra mamba mwané vá géremenámó na nugwé, vámwané maté vá eŋgámó mamba mwané, kó vá sítiyámó honó ava vá eŋgámó sɛ́ɛm ámó vámwané.

Currently Selected:

Roméne 1: tii

Highlight

Copy