Romanos 8

Espíritu Santomena apewãmepe nirẽcʉtire 8:1-39

1Tairo tiro marĩcʉoropere marĩ Jesucristomenarẽ ĩcãrõ nirãpere icãta ñañarõ ticõãyomocã pecamepʉ cõãyoateno mani.#5:16. 2Cʉ̃ Jesucristomena marĩcã ĩcãrõ niñerõcãrã Espíritu Santo marĩrẽ apewãmepe cʉ̃cã dotiriwãmepe nirẽcʉtiñerõcã yawí. Tairo tigʉ marĩrẽ ñañarẽrẽ tirecʉtiñerõcã tirere camewitiñerõcã yawí ĩñerõcã pecamepʉ ñañarõ ticõãyoboatecãrẽ camewitiñerõcã yawí.#Jn 8:32, 36; Ro 6:14, 16; 1Co 15:45. 3Manigʉ̃ cʉ̃cã Moisére dotire cũriguecã icãta tiheriboaririguere tirigʉ niwĩ. Marĩ ñañarẽ ʉgaripeare wadorena tirecʉtinirã Moisére dotire cũriguere icãta tipetimasĩheririara niwʉ̃. Tiepecã marĩrẽ icãta camewitira eañerõcã timasĩheriboriaro niwʉ̃. Tairo tigʉ Manigʉ̃ cʉ̃basurupera cʉ̃ macʉ̃rẽ ticorigʉ niwĩ marĩcã ñañarẽ tirigue wapare cõwõãbosaro ĩgʉ̃. Cʉ̃ icãta ñañarẽrẽ cʉohegʉ nicapeicã marĩcã ñañarẽrẽ tirigue wapamenape wapa cʉori ũpʉ̃rã abiro cʉogʉ ea marĩrẽ cõwõãbosarigʉ niwĩ marĩcã ñañarẽ tirecʉtirigue wapare wapatibosagʉ.#Hch 13:39; Flp 2:7; Heb 2:14; 7:18. 4Tora abiro cʉ̃ marĩrẽ wapatibosarigʉ niwĩ Manigʉ̃ cʉ̃cã dotire cũriguecã queoro dotire nirẽrẽ timasĩrã niãro ĩgʉ̃. Merẽ marĩ tosʉgueropʉ ñañarẽ ʉgaripearere tirecʉtiriũpʉ̃mena niriarora abiro ñañarẽrẽ tirucũrẽmenarã niheri; buripe Espíritu Santocã boriwãmepe tirucũrã ña.#Ga 5:16, 25.

5Merẽ ñañarẽ tirecʉtiñerõcã tirere ʉgaripearemena nirucũrãno tie wadorena wãcũ tirugarucũwã; buri Espíritu Santocã dotiriwãmepe tirucũ nirãno cʉ̃cã tiñerõcã borenope wadore wãcũrucũ tirugarucũrã ñawã.#Ga 5:19, 25. 6Marĩya ũpʉ̃cã ñañarẽ tirere ʉgaripeare wadorena wãcũ tirugarucũrã pecamepʉ ñañarõ ticõãyoroacu; buri Espíritu Santocã dotiriwãmepe wadorena wãcũ tirugarucũrã diamacã maquẽ catirere ĩñerõcã Manigʉ̃mena yerisãrẽrẽ cʉoroacu.#6:21; Ga 6:8. 7Ñañarẽ tirere ʉgaripeare wadorena wãcũ tirugarucũrã Manigʉ̃mena came ĩñatutira pʉtʉawa; cʉ̃cã dotirere tirugaherinirã ĩñerõcã tiere timasĩhera ninirã.#Stg 4:4. 8Tairo tira ñañarẽ tirecʉtiñerõcã tirere ʉgaripearemena nirucũrãno Manigʉ̃cã peñarẽnorẽ tiherinirã icãta cʉ̃rẽ ʉseañerõcã timasĩheriwa.#7:5.

9Buri mʉjãpe ñañarẽ tirecʉtiñerõcã tirere ʉgaripearemenape nirucũherapʉ ña; buripe Espíritu Santocã dotiriwãmepe nirucũrã ña Manigʉ̃ya Espíritu Santore mʉjãpʉre nirucũyora ninirã. Merẽ ĩcʉ̃no Jesucristoya Espíritu Santore cʉohegʉno Jesucristoyagʉmerã ñawĩ.#Jn 3:34; 1Co 3:16; Ga 4:6; Flp 1:19; 1Jn 4:13. 10Buri Jesucristocã mʉjãpʉre nirucũñerõcã mʉjãye yeripũnarĩpe catirucũmocãrõãcu merẽ Manigʉ̃ mʉjãrẽ ñurã ñañarẽ cʉoherara abiro niñerõcã tisiarigʉ niwĩ mʉjãye ũpʉ̃rĩjoropʉare ñañarẽ tirigue wapamenarã cõwõãtiũpʉ̃rĩ nicapetacãrã.#Ga 2:20; Ef 3:17. 11Manigʉ̃ cʉ̃ya Espíritu Santomenarã Jesucristore cõwõãrigʉpʉre upatuti catiañerõcã tiriarora abirora marĩpʉre Espíritu Santocã nirucũñerõcã maricãrẽ marĩya ũpʉ̃rĩ cõwõãriasiro nimocãcapetacãrã upatuti marĩcãrẽ catiañerõcã tigʉagawi.#8:11 Pablo anorẽ “mama ũpʉ̃rĩ nʉnigʉagawi” ĩgʉ̃ yawí (1Co 15:35-57).

12Tairo tira yara marĩ tiere masĩnirã ñañarẽ tirere ʉgaripeare wadorena wãcũ tirugarucũborapʉmerã ña. 13Buri marĩ tairiwãmerã ñañarẽ tirere ʉgaripearepe wadorena wãcũ tiere tirucũrã pecamepʉ ñañarõ ticõãyoroacu; buri Espíritu Santo tutuaremena ñañarẽ tirecʉtirere cõwõweoriarara abiro tiere piticõãmocãrã tairo catirucũmocãrõãcu.#Ga 6:8; Col 3:5.

14Merẽ nipetira Espíritu Santocã siosʉgueriwãme tiquetaturano Manigʉ̃ pũnarã ñawã.#Ga 5:18. 15Cʉ̃ Espíritu Santo Manigʉ̃cã marĩrẽ ticoyorigʉ dotiepeyoribasocacã cʉ̃jã nirũpʉ̃rẽ cuiremena nirĩwãmepera abiro marĩrẽ upatuti Manigʉ̃rẽ cuiremena niñerõcã tiheriwi; buripe marĩrẽ Manigʉ̃ pũna nirã eañerõcã tinigʉ̃ marĩrẽ Manigʉ̃rẽ “¡Pacʉ!” ĩ pisuñerõcã yawí.#Ga 4:5, 6; 2Tm 1:7; Heb 2:15. 16Cʉ̃ Espíritu Santora marĩrẽ marĩye yeripũnarĩpʉmenarã “mʉjã nirõrã Manigʉ̃ pũnarã nisia” ĩ masĩñerõcã yawí.#2Co 1:22; Ef 1:13. 17Tairo tira marĩ cʉ̃pũnarã ninirã cʉ̃cã “yʉpũnarẽ nipetirere nʉnigʉ̃da” ĩriguere Cristocã tiere ñerõrã abirora marĩcã tiere ñerõãcu. Marĩ Cristoyarara ninirã cʉ̃cã atibʉrecopʉre ñañarõ cametʉariarora abiro marĩcã ñañarõ cametʉacaperacãrã cʉ̃cã nirucũrõrã abirora marĩcã cʉ̃menarã siropʉcãrẽ ñucametʉaro nirucũrõãcu.#Ga 4:7; 2Tm 2:12; 1Pe 4:13.

Siropʉre ñucametʉare niãte

18Marĩcʉoro marĩcã atibʉrecopʉ posare icãta wapamanijomocãrẽ ña siropʉ ʉmʉãwesepʉ Manigʉ̃cã marĩrẽ ñucametʉare nʉniãtemenapere ĩñañerõcã.#2Co 4:17; Col 3:4; 1Pe 5:1. 19Nipetire atibʉreco maquẽ Manigʉ̃cã tiyorigue ĩcãbʉreco Manigʉ̃cã marĩrẽ “ãnijãrã yʉpũna ñawã” ĩ eñoatere basocacã apeyenorẽ bʉtoro ĩñarugarora abiro yuero ya.#1Pe 1:7, 13; 1Jn 3:2. 20Sugueropʉ Adáncã ñañarẽrẽ tiriasiro atibʉreco maquẽ nipetire posapetiasuriaro niwʉ̃. Tiecã boriwãmepe tairo waheririaro niwʉ̃; buripe Manigʉ̃pʉra tiere tairo wañerõcã borigʉ niwĩ. Tiere tairo tiriasiro nicapetacã siropʉre tiere ñurẽ wasoañerõcã tigʉagawi.#Gn 3:17-18. 21Tairo tigʉ Manigʉ̃ atibʉreco maquẽcã boapetiate nicapetacãrã marĩ cʉ̃pũna nirãrẽ wasoatiwãmerã tie nipetirecãrẽ ñurẽ wado wasoagʉagawi tamʉ.#Hch 3:21; 2Pe 3:13; Ap 21:1. 22Marĩ anocawatoapʉcãrẽ marĩcʉ̃ nipetire atibʉreco maquẽcã bʉtoro pũniyo ñañarõ posarere masĩ; ĩcõ nomiõ cocã wĩmagʉ̃ cʉoatosʉguero bʉtoro pũniyo ñañarõ cametʉarora abiro. 23Tie wadora bʉtoro pũniyo ñañarõ posaromerã ya, marĩpʉcã posarara ya; Manigʉ̃ cʉ̃cã marĩrẽ siropʉre nʉniãtere tigʉ Espíritu Santore nʉnisʉgueyoriarapʉ nicaperacã. Marĩcʉorore bʉtoro ñañarõ cametʉacaperacãrã siropʉ cʉ̃cã marĩrẽ “yʉpũnarã ñawã” ĩnigʉ̃ cʉ̃cã marĩrẽ cõwõheriatiũpʉ̃rĩ mama ũpʉ̃rĩpere nʉniãtere ʉsearemena yuerucũmocã.#2Co 1:22; Ga 5:5. 24Merẽ tie marĩcã yuerucũrẽrẽna “cʉoroacu” ĩ wedewõrẽ cʉora eariara ninirã marĩ cametʉoyoariarapʉ nirã eawʉ. Yueriguecã eariasiropere ñenopere yuenemomasĩñamani. ¿Ñerũgʉ̃no cʉ̃cã cʉogʉ eariguepʉrena yuerucũmasĩbogari? 25Buri bicaperacãrã marĩcʉ̃ marĩcã ĩñaherepere siropʉ marĩcã cʉoatepere binirã marĩ patacãrõ manirõ ĩcãdiamacãrã ñurõ yuerucũmocã.

26To watoarena marĩcã apewatoa apeyenorẽ titutuahera nirã eañerõcãcãrẽ, Manigʉ̃rẽ dairiwãmenope marĩcã sãĩmasĩhera niñerõcãcãrẽ Espíritu Santora marĩrẽ titamuwĩ. Tairo tigʉ marĩrẽ marĩye niãte maquẽrẽ Manigʉ̃rẽ tãnurẽmena dairo ti wedemasĩña manirĩwãmepe marĩrẽ ñurõ sãĩbosawi.#Ef 6:18. 27Merẽ Manigʉ̃ marĩye yeripũnarĩrẽ ñurõ masĩpetigʉ ninigʉ̃ Espíritu Santocã marĩrẽ sãĩbosarere ñurõ masĩwĩ. Cʉ̃ Espíritu Santora Manigʉ̃ cʉ̃cã cʉ̃yarare bosãrĩwãmepera abiro marĩrẽ tairo sãĩbosarucũmocãwĩ.#Sal 139:1-2; Lc 16:15; Ap 2:23.

Ñañarẽrẽ cametʉanʉcãmasĩrẽ

28Tairo tira marĩ Manigʉ̃cã boriwãmerã abiro sioyoriara nirã niñerõcã cʉ̃rẽ maĩrãrẽna “nonirẽ ñurẽ o ñañarẽ marĩrẽ biñerõcã tirera Manigʉ̃cã tiemenarã marĩye ñurẽ maquẽ niãtere cʉ̃cã marĩrẽ amabosare ña” ĩ masĩ.#8:32; 9:11, 22, 23, 24; 2Tm 1:9. 29Manigʉ̃ cʉ̃basurupera ñurõ ĩñamasĩtuwanigʉ̃pʉ merẽ mamarõpʉra “ãnijãrã yʉmacʉ̃rã abiro nirãgawa” ĩcũsiarigʉ niwĩ; cʉ̃ macʉ̃rẽna cʉ̃rẽ wedewõrã pajʉ sõwʉ̃ cʉ̃jãrẽ nisocogʉra nigʉ̃ earo ĩgʉ̃.#11:2; Ef 1:5, 11; Flp 3:21; 1Pe 1:2, 20.

30Marĩrẽ cʉ̃cã mamarõpʉra “yʉmacʉ̃rã abiro nirãgawa” ĩcũsiariararena cʉ̃pũnarã abiro pʉtʉañerõcã tirigʉ niwĩ; cʉ̃cã cʉ̃pũnarã abiro pʉtʉañerõcã tiriararena ñurã wapa cʉoherara abiro nirã eañerõcã tirigʉ niwĩ; cʉ̃cã ñurã wapa cʉoherara abiro nira eañerõcã tiriararena cʉ̃ macʉ̃rã abiro siropʉcãrẽ ʉmʉãwesepʉre ñucametʉaro nirucũãna niñerõcã tirigʉ niwĩ.#1:6; 9:23, 24; 1Co 6:11; Ef 1:5, 11; Heb 9:15; 1Pe 2:9. 31Marĩ anorã abiro tiriguere masĩmocãcaperacãrã ¿Ñenopere apeye ĩnemomasĩbogari? Manigʉ̃cã marĩyapanepe niñerõcã ¿daigʉnope marĩrẽ ñañarõ timasĩgʉagari?#Sal 118:6; Mt 10:28; Lc 12:4. 32Merẽ Manigʉ̃ cʉ̃ macʉ̃ diamacãjoro mañurẽ icãta maĩrõ manirõ marĩ nipetiraye wapare cõwõãbosaro ĩgʉ̃ cʉ̃rẽ atibʉrecopʉre ticomocãrigʉ niwĩ. Tiejoro mañurẽ tora abiro tirigʉ nimocãnigʉ̃ ¿dairo binigʉ̃ apeye docare cʉ̃ macʉ̃menarẽ marĩrẽ nipetirere nʉnimasĩhegʉagari?#Jn 3:16; Ro 4:25; 5:8. 33Topʉare marĩcã Manigʉ̃basurupera beseyoriarara nimocãcapetacã ¿daigʉnope marĩrẽ Manigʉ̃cã beseyoriara “ñañarẽrẽ tira ñawã” ĩmasĩbogari? Merẽ cʉ̃ Manigʉ̃ wadora ñawĩ ñurã wapa cʉoherara abiro nirã eañerõcã tigʉ.#Is 50:8-9; Lc 18:7. 34¿Daigʉnope marĩrẽ “cʉ̃jãcã ñañarẽrẽ tirigue wapa niñerõcã cʉ̃jãrẽ ñañarõ tiya” ĩmasĩgʉagari? merẽ Jesucristora marĩrẽ marĩcã ñañarẽ tirigue wapare cõwõãbosarigʉ niwĩ; cõwõãbosare wadora cõwõãbosaheririgʉ niwĩ masã ʉmʉãwesepʉ mʉãsurigʉ niwĩ. Tairo tigʉ Manigʉ̃ diamacãpanepe duiwi. Topʉ duigʉra marĩrẽ marĩye maquẽ niãtere tairo sãĩbosarucũmocãwĩ.#Mc 16:19; Col 3:1; Heb 1:3; 7:25; 1Jn 2:1. 35Cristocã marĩrẽ maĩrẽrẽ ¿daigʉnope Cristore cʉ̃jãrẽ tocãrõrã maĩpitiya ĩmasigʉagari? Icãta manigawi o manijomocãga. Ñañarõ posañerõcã tirecã o marĩrẽ wisiore warenocã o ãpẽrãcã marĩrẽ ñañarõ tirugara quetaturenocã tiere pitiñerõcã timasĩheriga. Tairora ʉaboarecã o suti cʉoherecã o cuwiore warenocã o ñañarĩwãmemena cõwõãñerõcã tirenocã icãta tiere pitiñerõcã timasĩheriga. Cristope marĩrẽ maĩrucũmocãgawi. 36Tiemaquẽrẽna Manigʉ̃ye wederucũrẽrẽ ojayoriapũpʉ abiro ojayoriaro niwʉ̃: «Ʉ̃sãcã mʉyara nirẽye wapa ãpẽrã ʉ̃sãrẽ bʉrecoricãrõ sĩãrugarucũmocãwã. Ovejare sĩãrãdara cʉ̃jãrẽ sĩãrõpʉ neãrãrã abiro ʉ̃sãrẽ yawa»#Sal 44:22. ĩ ojayoriaro niwʉ̃.#2Co 4:11. 37Buri atiecã abiro bicapetacã marĩ “nonirẽ ñañarẽrẽ ñañarõ cametʉacaperacãrã Jesucristo marĩrẽ maĩrigʉcã titamurẽmenarã marĩ nipetire ñañarẽrẽ cametʉonʉcãmasĩpetiroacu” ĩ masĩ.#1Co 15:57; Ap 1:5. 38Yʉ atiepʉare “icãta apeyenorã Manigʉ̃cã marĩrẽ maĩrẽrẽ acutamasĩheriroacu” ĩ masĩ: Cõwõãrẽnorã, catirenorã, Manigʉ̃rẽ wedecoteribasocanorã, tutuare cʉoranocã, wãtĩãnorã, marĩcʉorore birenocã, siropʉre biatenocã#Ef 1:21; 1Pe 3:22. 39ĩñerõcã emʉãrõpʉ maquẽnocã, ʉ̃cʉ̃ãrõpʉ maquẽnocã tairora icãta apeye Manigʉ̃cã tiriguenocã cʉ̃cã marĩrẽ maĩrẽrẽ acutamasĩheriga. ¡Icãta ñenojorocã Manigʉ̃cã marĩrẽ marĩ Nirũpʉ̃ Jesucristomenarã cʉ̃cã maĩrẽrẽ eñoriguere acutamasĩherijomocãrõãcu!

Currently Selected:

Romanos 8: yui

Highlight

Copy