Romanos 4

Abrahamye maquẽ 4:1-25

Abrahamcã Manigʉ̃rẽ wedewõrẽ cʉorigue

1Marĩ topʉare ¿marĩ ñecʉ̃ Abrahamrẽ biriguere dairo ĩrãgari? 2Queorojoropʉare Abrahamrẽ cʉ̃cã nipetire ñurẽrẽ tirepere ĩñagʉ̃merã Manigʉ̃ cʉ̃rẽ “mʉ ñugʉ̃ wapa cʉohegʉra abiro nigʉ̃ ña” ĩheririgʉ niwĩ. Buri tora abiro ĩriasiro niñerõcãpʉare Abraham cʉ̃basurupera “yʉcã ñurẽrẽ tirewapa yʉ wapa cʉohegʉra abiro nigʉ̃ ña” ĩmasĩbogatiyi. Buri Manigʉ̃cã ĩñacoropepʉare icãta tairo ĩmasĩheriboarigʉ nicapeicã.#1Co 1:31. 3Tierena Manigʉ̃ye wederucũrẽrẽ ojayoriapũpʉ abiro ojayorigue ña: «Manigʉ̃ Abrahamcã cʉ̃rẽ wedewõrẽ cʉoñerõcã ĩñagʉ̃rã cʉ̃rẽ “mʉ ñugʉ̃ wapa cʉohegʉra abiro nigʉ̃ ña” ĩ ĩñarigʉ niwĩ»#Gn 15:6; Ga 3:6; Stg 2:23. ĩ ojayore ña. 4Marĩ atiere masĩ. Ĩcʉ̃norẽ apeyenorẽ cʉ̃cã padedearigue wapare wapatira burijorora cʉ̃rẽ wapatiramerã yawa. Cʉ̃cã padedearigue wapapere cʉ̃jãcã cʉ̃rẽ wapamorẽpere wapatira yawa.#11:6. 5Buri Manigʉ̃pe tairo tiheriwi. Ñurẽrẽ tirewapamenape “mʉjã ñurã wapa cʉohera ña” ĩ ĩñaheriwi. Buripe “cʉ̃ Manigʉ̃rã basoca ñañarẽ tirecʉtirare ñurã wapa cʉoherara abiro pʉtʉañerõcã tigʉ ñawĩ” ĩ cʉ̃rẽ wedewõñerõcãpere Manigʉ̃ “mʉjã ñurã wapa cʉoherara abiro ña” ĩ ĩñawĩ; ñeno wapamenajorope tora abiro tiyoboariara nihericapetacã. 6Nirũpʉ̃ Davidcã yʉcã ĩrõrã abirora basoca cʉ̃jãcã cʉ̃jãbasurupe ñurẽ tirere ĩñayonirãmerã buripe cʉ̃jãcã cʉ̃rẽ wedewõrẽ cʉoremenape Manigʉ̃rẽ “mʉjã ñurã wapa cʉoherara abiro ña” ĩ ĩñayora ʉseare bʉawa ĩ wederucũrigʉ niwĩ. 7Cʉ̃cã tairo ĩrigue Manigʉ̃ye wederucũrẽrẽ ojayoriapũpʉ abiro ĩ:

«Ñañarẽrẽ tirecʉtira nicaperacãrã tieyewapamena

Manigʉ̃rẽ ñañarõ tiyoherara buripe acõboyora ʉseawa.

Manigʉ̃cã ñurõ tiyora ñawã.

8Manigʉ̃cã “mʉ ñañarẽ cʉohegʉra abiro pʉtʉa” ĩyogʉ ʉsearo.

Manigʉ̃cã ñurõ tiyogʉ ñawĩ»#Sal 32:1-2; 2Co 5:19.

ĩ ojayorigue ña.

9¿Topʉare atie ʉseare bʉare judío basoca conerigʉ yapa macã caserore widecõãyora wadorena ĩrõ yari o judío basoca niheracãrẽ ĩrõmerã yari? Merẽ yʉ mʉjãrẽ atierena Abraham mañurẽ cʉ̃cã Manigʉ̃rẽ wedewõrẽ cʉoremenarã Manigʉ̃ cʉ̃rẽ “mʉ ñugʉ̃ wapa cʉohegʉra abiro ña” ĩ ĩñarigʉ niwĩ ĩ wedesiawʉ. 10Buri ¿nocawatoano niñerõcã Abrahamrẽ “mʉ ñugʉ̃ wapa cʉohegʉra abiro ña” ĩ ĩñayuri? ¿Cʉ̃cã cʉ̃ya conerigʉ yapa macã caserore widecõãriasirope o tosʉguerope? Cʉ̃ cʉ̃cã widecõãtosʉguerope tairo ĩyosiarigʉ niwĩ.#4:3; 3:30. 11Queorojoropʉare Abraham tosʉgueropʉra cʉ̃cã Manigʉ̃rẽ wedewõrẽ cʉoremenarã “mʉ ñugʉ̃ wapa cʉohegʉra abiro ña” ĩyosiarigʉ niwĩ. Tairo tigʉ tiesiropʉ cʉ̃cã Manigʉ̃rẽ wedewõrẽ cʉorere eñogʉ̃pʉ cʉ̃ya conerigʉ yapa macã caserore widecõãrẽrẽ tirigʉ niwĩ. Anorã abiro tiriguemena Abraham nipetira Manigʉ̃rẽ wedewõrẽ cʉora pacʉ nigʉ̃ earigʉ niwĩ; conerigʉ yapa macã caserore widecõãrẽrẽ tihera nicapetacã. Abiriwãmemena Manigʉ̃ cʉ̃jãcãrẽ cʉ̃rẽ cʉ̃jãcã wedewõrẽ cʉoremenarã “mʉjã ñurã wapa cʉoherara abiro nirã ña” ĩ ĩñawĩ.#Gn 17:10; Lc 19:9. 12Ĩñerõcã Abraham tairora conerigʉ yapa macã caserore widecõãrẽrẽ tiracãrẽ cʉ̃jã pacʉra nigʉ̃ yawí; buri cʉ̃cã cʉ̃ya conerigʉ yapa macã caserore widecõãrẽrẽ tiato sʉguropʉra Manigʉ̃rẽ cʉ̃cã wedewõrẽ cʉoriawãmerã abirora Manigʉ̃rẽ wedewõrẽ cʉora niñerõcã.

Manigʉ̃cã Abraham pãrãmerã nitutiarare “abiro tigʉda” ĩrigue

13Manigʉ̃ Abrahamrẽ “tiditarore mʉrẽ, mʉpãrãmerã nitutiaracãrẽ nʉnigʉ̃da” ĩrigʉ niwĩ. Cʉ̃cã dotire cũriguere tiñerõcãmerẽna cʉ̃rẽ tairo ĩrigʉ niwĩ; buripe cʉ̃cã cʉ̃ Manigʉ̃rẽ wedewõrẽ cʉoremenape cʉ̃rẽ “mʉ ñugʉ̃ wapa cʉohegʉra abiro nigʉ̃ ña” ĩ ĩñanigʉ̃ cʉ̃rẽ “tiditarore nʉnigʉ̃da” ĩrigʉ niwĩ.#Gn 17:4-6; Sal 37:9, 11, 22, 29, 34; Mt 5:5; Ga 3:29. 14Buri Moisére dotire cũriguere tiremenape Manigʉ̃cã “tiditarore nʉnigʉ̃da” ĩriasiro niñerõcãpʉare marĩcã Manigʉ̃rẽ wedewõrẽ cʉorepe icãta wapamanirẽ pʉtʉamocãboyu. Ĩñerõcã cʉ̃cã Abrahamrẽ “tairo tigʉda” ĩriguecã tairora queoro wayapacʉtiheribogatiyu.#Ga 3:18. 15Buri bicapetacã basocare dotireno maniñerõcãpʉare cametʉanʉcãrẽno manibogatiyu. Tairo tigʉ Manigʉ̃ cʉ̃cã Moisére dotire cũriguemenarã marĩrẽ cʉ̃cã cuaremena ñañarõ yawí; marĩcã tiere cametʉanʉcãñerõcã ĩñagʉ̃.#3:20; 5:13; 7:8, 10, 11; Ga 3:10. 16Tairo tigʉ Manigʉ̃ Abrahamrẽ “abiro tigʉda” ĩriguere Abraham pãrãmerã nitutiarare cʉ̃rã abiro wedewõrẽ cʉora wadorena nʉnigʉ̃dagʉ icãta wapa boheririgʉ niwĩ. O queorojoropʉare Moisére dotire cũriguere yʉrano wadorena tie nʉniyoate niheririaro niwʉ̃. Nipetira Abrahamcã wedewõrẽ cʉoriarora abirora Manigʉ̃rẽ wedewõrẽ cʉoranocãrẽ nʉniãte niriaro niwʉ̃. Tairo tigʉ Abraham tiemenarã marĩ nipetira pacʉ nigʉ̃ earigʉ ñawĩ.#3:24; 9:8; 15:8-9; Ef 2:8-9. 17Merẽ Manigʉ̃ cʉ̃ye wederucũrẽrẽ ojayoriapũpʉra Abrahamrẽ «Nipetira basocaburicãrõ pacʉ nigʉ̃ eagʉacu»#Gn 17:5. ĩsiarigʉ niwĩ. Ãnirã ñawĩ Manigʉ̃ Abrahamcã wedewõgʉ̃ earigʉ. Cʉ̃rã ñawĩ Manigʉ̃ cʉ̃ye tutuaremena basocare cʉ̃jãcã cõwõãriasiropʉ nicapetacã masõmasĩgʉ̃ ĩñerõcã cʉ̃ye wederucũrẽmenarã manirẽpʉrena bajuanemasĩgʉ̃. 18Abraham cʉ̃rẽ Manigʉ̃cã «mʉpãrãmerã nitutiara pajʉ nirãgawa»#Gn 15:5. ĩriguere cʉ̃cã yuerucũrẽmenarã pũnamanigʉ̃rã muñucapeicã tairora cʉ̃ “Manigʉ̃ cʉ̃cã yʉre ĩriarora abirora queoro tigʉagawi” ĩ wedewõrucũmocãyugʉ. Tairo binigʉ̃ Abraham nipetira basocaburi pacʉ nigʉ̃ earigʉ niwĩ. 19Abraham cien cʉmarĩ watoano cʉocapeicã cʉ̃ nʉmomenarã bʉcʉjoro nicapeicã#Gn 17:17; Heb 11:11. Manigʉ̃rẽ wedewõrẽ cʉogʉ ninigʉ̃ “icãta pũnamanirõãcu” ĩheririgʉ niwĩ. Buripe “ʉ̃sãrẽ pʉ̃ãrãpʉrena pũnacʉtiboro cametʉariasiro nicapetacã Manigʉ̃ cʉ̃cã yʉre ĩriarora abirora queoro tigʉagawi” ĩ tʉoiñarigʉ niwĩ. 20Icãta “Manigʉ̃cã yʉre abiro tigʉda ĩriguere tiherimocã tiherigawi” ĩheririgʉ niwĩ. Buripe tora abiro ĩrõno tigʉ cʉ̃rẽ wedewõpitiro manirõ õpe sotoa cʉ̃rẽ wedewõrucũmocã tairora cʉ̃rẽ “mʉ ñucametʉagʉ, tutuacametʉanʉcãgʉ̃ ña” ĩ ʉseare nʉnirucũmocãrigʉ niwĩ. 21Tairora Manigʉ̃cã cʉ̃rẽ “mʉrẽ abiro tigʉda” ĩriguere “cʉ̃ye tutuaremenarã queorora tiyapaticogʉagawi” ĩ wedewõrẽ cʉorucũmocãrigʉ niwĩ. 22Cʉ̃cã anorã abiro cʉ̃rẽ wedewõrẽ cʉoñerõcãrã Manigʉ̃ cʉ̃rẽ “mʉ ñugʉ̃ wapa cʉohegʉra abiro ña” ĩ ĩñarigʉ niwĩ.#Gn 15:6, 7. 23Atiere Manigʉ̃ye wederucũrẽrẽ ojayoriapũpʉra ojayoriaro niwʉ̃. Tie Abrahamye wadorena ojayoremerã niriaro niwʉ̃.#15:4. 24Marĩye maquẽpʉcãrẽ ojayorera niriaro niwʉ̃. Cʉ̃ Manigʉ̃rã marĩ Nirũpʉ̃ Jesucristore cõwõrigʉpʉre masõrigʉ niwĩ. Tairo tigʉ marĩcãrẽ Abrahamrẽ ĩriarora abirora cʉ̃rẽna marĩcã wedewõrẽ cʉoñerõcãrã marĩrẽ “mʉjã ñurã wapa cʉoherara abiro ña” ĩ ĩñagʉagawi.#10:9; Hch 2:24. 25Manigʉ̃ marĩcã cʉ̃rẽ cametʉonʉcãrẽ wapara Jesucristore cʉ̃rẽ sĩãnapʉre wiyorigʉ niwĩ marĩye waparena cõwõãbosaro ĩgʉ̃. Buri cʉ̃cã cõwõãriasiro cʉ̃rẽ masõmocãrigʉ niwĩ cʉ̃cã marĩrẽ tairo tibosaremenarã icãta ñañarẽnorẽ tiheririarara abiro marĩrẽ ĩñagʉ̃dagʉ.#Is 53:5, 6; 1Co 15:17; 2Co 5:21.

Currently Selected:

Romanos 4: yui

Highlight

Copy