Romanos 3

1Topʉare yʉcã abiro ĩrẽrẽ mʉjãcã tʉoiñañerõcã ¿judío basocʉ nirẽ ĩñerõcã conerigʉ yapa macã caserore widecõãrẽcʉtirere tire wapacʉtire ñarĩ o wapamanirĩ? 2Tie wapacʉtirucũmocãrẽ nirõ ya. Merẽ judío basocarena ãpẽrãsʉguero Manigʉ̃ cʉ̃ye quetire ãpẽrãrẽ wedearo ĩgʉ̃ cʉ̃jãrẽ cũrĩgʉ niwĩ.#Dt 4:8; Sal 147:19. 3Ĩcãrã judío basocacã Manigʉ̃ye quetire cametʉanʉcã tiere yʉheririgue queorora ña nirõpʉa. Buri cʉ̃jãcã tora abiro tiriguera Manigʉ̃pere cʉ̃cã cʉ̃jãrẽ nipetirere “abiro tigʉda” ĩriguere tiheriñerõcã tiroacu ĩrõmerã ya.#2Tm 2:13; Heb 4:2. 4¡Icãta tairo niheriga! Nipetira marĩ basoca marĩcã “tirada” ĩãriguere tiherimocã ĩritorepira nicapetacã Manigʉ̃pe nipetire cʉ̃cã “tigʉda” ĩrẽrẽ queoro tigʉ icãta ĩritohegʉ ñawĩ.#Jn 3:33. Merẽ cʉ̃ye wederucũrẽrẽ ojayoriapũpʉra abiro ojayore ña:

«Manigʉ̃ mʉye wederucũrẽ diamacã maquẽ nirõ ya.

Mʉcã ĩrõrã abirora queoro tigʉ niñerõcã icãta ĩcʉ̃nopera mʉrẽ “queoro tiheriwi” ĩmasĩherigawi»#Sal 51:4.

ĩ ojayoriaro niwʉ̃. 5Buri tamʉ “nipetire marĩcã ñañarẽ tiremenarã Manigʉ̃rẽ cʉ̃cã ñugʉ̃ nirẽrẽ eñocametʉonʉcõ” ĩrẽrẽ ¿marĩ dairo ĩrãgari? ¿Manigʉ̃ tieyewapamenarã marĩrẽ cuaremena ñañarõ tiñerõcã “Manigʉ̃ queoro tihegʉ ñawĩ” ĩrõãgari?#Ga 3:15. 6¡Tairomerã ña! Buri topʉare cʉ̃ ñuhegʉ nigʉ̃pʉa ¿dairo binigʉ̃ nipetira basoca atibʉreco macãrãrẽ “mʉjã ñurã ña; mʉjãpe ñañarã ña” ĩ ĩñabesemasĩbogari?#Gn 18:25. 7Bicapetacã ĩcãrã abiro wãcũmequẽdemocãwã: Merẽ ʉ̃sãye ĩritorera Manigʉ̃ye diamacã maquẽ nirẽrẽ ñurõ baunirõpʉ pʉtʉañerõcã ticapetacã, tiemenarã cʉ̃ ñurõ wederucũyocapeicã ¿dairo tigʉ Manigʉ̃ marĩcʉ̃ ʉ̃sãrẽ ñañarẽrẽ cʉoribasocare tigʉra abiro ĩñabeseri? ĩmequẽdemocãwã.#3:4. 8Buri tora abiro queoro niñerõcãpʉare ñañarẽpe wadore tiradara ʉseamocãbogawa merẽ Manigʉ̃ ñañarẽrẽna ñurẽpe pʉtʉañerõcã yawí; tairora tiemenarã Manigʉ̃ nemorõ ñurõ tirucũmocãwĩ ĩnirã.#5:20; 6:1, 15. Buri tora abiro tʉoiña mawisiherimocãña. Tora abiro wãcũrẽ queoro nihere ña. Tierena ĩcãrã yʉcã tora abiro buehericapetacã ãpẽrãrẽ ñañarõ wãcũãro ĩrã “Pablora tairo ĩ buewi” ĩ wederucũwã. Buri bicapetacã Manigʉ̃pe queoro tigʉ ñawĩ. Tairo tigʉ cʉ̃jãrẽ tora abiro ĩritorepirare queoro ñañarõ tigʉagawi.

Icãta ĩcʉ̃nopera ñugʉ̃ maniwĩ

9¿Topʉare atiere marĩ dairo ĩmasĩbogari? ¿Manigʉ̃cã ĩñacoropʉre marĩ judío basocara judío basoca niherasotoape ñucametʉanʉcãrã ñarĩ? ¡Tairo niheri! Merẽ yʉcã mʉjãrẽ wedesiariarora abiro marĩ nipetira judío basoca, judío basoca niheracã ñañarẽrẽ cʉora wado ninirã wapa cʉora wado ña.#3:23; Ga 3:22. 10Merẽ Manigʉ̃ye wederucũrẽrẽ ojayoriapũpʉra abiro ĩ:

«Icãta ĩcʉ̃nopera pẽrõ ñugʉ̃ nigʉ̃no manijomocãwĩ;#Sal 14:1-4; 53:1.

11icãta ĩcʉ̃no Manigʉ̃ye maquẽrẽ tʉomasĩgʉ̃no maniwĩ;

icãta ĩcʉ̃no Manigʉ̃rẽ masĩrugagʉno maniwĩ.

12Nipetira Manigʉ̃rẽ dumocã aperope wado wapetiasuwa;

nipetira ĩcãrõpera ñañarã wado posapetiasuwa.

Icãta ĩcʉ̃nopera ñurẽrẽ tigʉno maniwĩ.

¡Icãta ĩcʉ̃no manijomocãwĩ!#Ecl 7:20.

13Masãcope pãwõrĩcopere ʉ̃niwitirera abiro cʉ̃jãye wederucũrẽ ñañarẽ ña;

ĩritore wadorena ĩritorucũmocãrã ñawã.#Sal 5:9; 140:3.

Cʉ̃jãye wederucũrẽmenarã basocare bʉtoro posowa

tiera ña ãña nimarã abiro nirẽ.

14Cʉ̃jãye ʉserire cʉ̃jãcã ñañarõ ĩtutire wadora

ĩñerõcã basocare “mʉjãrẽ ñañarõ waro” ĩrẽ wadora dadayomocãwã.#Sal 10:7.

15Perõ cuaremenarã basocare sĩãcõãrẽpʉare boyera ñawã.#Is 59:7.

16No cʉ̃jãcã waro basocare ñañarõ ticõã

cʉ̃jãrẽ ñañarõ posañerõcã tirecʉtira ñawã.#Is 59:7.

17Ĩñerõcã came ñurõ yerisãrẽmena nirẽcʉtiñerõcã tirere icãta masĩhera ñawã.#Is 59:8.

18Tairora Manigʉ̃rẽ cuwiopesaremena, cʉ̃rẽ cuiremena ĩñahera ñawã»#Sal 36:1.

ĩ ojayore ña.

19Tairora ña: merẽ marĩ atiecãrẽ Manigʉ̃ye wederucũrẽrẽ ojayoriapũpʉ Manigʉ̃cã Moisémena marĩ judío basocarena dotire cũriguere tipetiherosiro niñerõcã tiecã “mʉjã abira ña” ĩrẽcãrẽ masĩ. Tairo tira marĩ atiemenarã icãta “wapa cʉohera ña” ĩmasĩheri. Nipetira judío basoca, nipetira judío basoca nihera wapa cʉora wado ninirã Manigʉ̃rẽ ñañarõ tiyoana wado ña.#Ro 2:12. 20Icãta ĩcʉ̃ basocʉno Moisécã dotire cũriguere tipetimasĩherigawi. Tairo tigʉ “Manigʉ̃rẽ yʉre ‘ñugʉ̃ ñawĩ’ ĩ ĩñagʉagawi” ĩmasĩherigawi. Manigʉ̃ cʉ̃cã atie dotirere cũriguemenarã marirẽ “mʉjã ñañarẽrẽ cʉoribasoca ña” ĩ masĩñerõcã yawí.#3:28; Sal 143:2; Hch 13:39; Ga 2:16; 3:2, 5, 10.

Manigʉ̃ marĩcã Jesucristore wedewõrẽ cʉoremenarã marĩrẽ ñurã wapa cʉoherara abiro pʉtʉañerõcã yawí 3:21-31

21Anocawatoapere Moisére dotire cũriguere tipetiheririasiro nicapetacã Manigʉ̃ marĩrẽ marĩcã Jesúre wedewõrĩwãmemenape cʉ̃cã marĩrẽ “mʉjã ñurã wapa cʉoherara abiro nirã pʉtʉa” ĩrẽrẽ eñowĩ; merẽ tierena Moisére dotire cũrigue ĩñerõcã Manigʉ̃ye quetire wedesʉgueribasoca wederiguecã “tairora ña” ĩ wede.#1:2-4, 17; 9:30; Hch 10:43; Hab 2:4. 22Tairo tigʉ Manigʉ̃ Jesucristore wedewõrẽ cʉoremenarã nipetira cʉ̃ Jesúre wedewõrãnorẽ “mʉjã ñurã wapa cʉoherara abiro ña” ĩ ĩñawĩ. Dairo nirãrẽ judío basocare, judío basoca niherare tairo ĩ ĩñawĩ.#10:12; Ga 2:16; 3:28; Col 3:11. 23Marĩ nipetira ñañarẽrẽ tiriara wadora ña. Tairo tira Manigʉ̃cã “yʉmena ñurõ nirõãcu” ĩriguere marĩbasurupera marĩcã tiremena icãta bʉara eamasĩheriga.#Ga 3:22. 24Buri marĩcã taira nirã nicapetacãrã Manigʉ̃pe cʉ̃cã ĩñamaĩrẽmenarã ĩñerõcã apeyeno sãĩcãmerõ manirõrã Jesucristore wedewõrĩwãmemenape marĩrẽ ñurã wapa cʉoherara abiro nirã ĩñawĩ. Tora abiro marĩrẽ ĩñawĩ Jesucristocã marĩye ñañarẽ wapamena cõwõã marĩrẽ wapatibosariguemena.#1:17; 4:16; Ef 1:7; 2:8; Col 1:14; Heb 9:12, 15; 1Pe 1:18. 25Maricʉ̃ Manigʉ̃ sʉguerimacãrãpʉcãrẽ cʉ̃jãcã ñañarẽrẽ ticapetacãrã cʉ̃jãrẽ bopacaĩñarẽ cʉonigʉ̃ cʉ̃jãrẽ ñañarõ tiheririgʉ niwĩ. Tairo ĩñamocãrigʉ niwĩ. Cʉ̃jãpere ñañarõ tiboarigʉ nicapeicã Manigʉ̃ nipetira basocacã ñañarẽ tirigue wapare wapatibosadotigʉ Jesucristopere curusapʉ cõwõã di cõãñerõcã tirigʉ niwĩ; cʉ̃cã cõwõã di cõãriguemenarã cʉ̃rẽ wedewõrãnorẽ cʉ̃jãcã ñañarẽ tirigue wapare acõboñerõcã tigʉ.#Jn 1:29; 1Jn 2:2; 4:10; 1Pe 1:19; 2:24; 3:18; Heb 9:12-15, 24-26; 10:1-14. Cʉ̃cã tairo tiremenarã Manigʉ̃ cʉ̃cã diamacã maquẽrẽ tigʉ nirẽrẽ eñorigʉ niwĩ. 26Tiwãmerã anocawatoacãrẽ Manigʉ̃ Jesucristomenarã cʉ̃cã diamacã maquẽrẽ tigʉ nirẽrẽ eñogawi. Cʉ̃ diamacã maquẽrẽ tirucũgʉ̃ ninigʉ̃rã Jesúre marĩye ñañarẽ wapare wapatibosarigʉre wedewõrãrẽna “mʉjã ñurã wapa cʉoherara abiro nirã ña” ĩ ĩñawĩ. 27Topʉare marĩcã marĩbasurupe “¡ʉ̃sã Manigʉ̃cã ĩñacorore ñurã wapa cʉoherara abiro nirã ña!” ĩrẽ “¡ʉ̃sã Manigʉ̃cã Moisére dotire cũriguere tipetira nirã ya!” ĩrẽ ¿nopʉ pʉtʉari? ¡Tie icãta wapamanirẽ pʉtʉa! ¿Dairo binirõ tairo pʉtʉari? Jesucristore wedewõrẽ cʉoremenape Manigʉ̃cã “mʉjã ñurã wapa cʉoherara abiro nirã ña” ĩ ĩñarẽmenape tie tairo pʉtʉa.#2:17, 23; 4:2; 1Co 1:29-31; Ef 2:9. 28Tairo tira marĩ atiere Manigʉ̃cã Moisére dotire cũriguere tiñerõcãmerẽna Manigʉ̃ “mʉjã ñurã wapa cʉoherara abiro nirã ña” ĩ ĩñaheriwi. Buripe “Jesúre wedewõrẽ cʉoremenape Manigʉ̃ ‘mʉjã ñurã wapa cʉoherara abiro nirã ña’ ĩ ĩñawĩ” ĩ masĩrã ea.#Hch 13:39; Ga 2:16; Ef 2:8-9; 2Tm 1:9; Tit 3:5. 29Buri apewatoa tira mʉjã judío basocape Manigʉ̃rẽ “ʉ̃sãya Manigʉ̃ wadora nigʉ̃ yawí” ĩ wãcũmiga. Cʉ̃ mʉjãya Manigʉ̃ wadora niheriwi. Judío basoca niheracãrẽ cʉ̃rã cʉ̃jãya Manigʉ̃ nigʉ̃ yawí.#9:24; Hch 10:34-35. 30Manigʉ̃ ĩcʉ̃rã ñawĩ. Ãpĩ maniwĩ. Cʉ̃ wadora judío basocare, judío niheracãrẽ cʉ̃jãcã Jesúre wedewõrẽ cʉoremena wadora “mʉjã ñurã wapa cʉoherara abiro nirã ña” ĩ ĩñagʉ̃ ñawĩ.#Ga 3:8. 31¿Topʉare marĩ marĩcã Jesúre wedewõrẽ cʉore earemenape Moisére dotire cũriguepere icãta wapamanirẽ pʉtʉa ĩrã yari? ¡Tairo niheri! Buripe marĩcã Jesúre wedewõrẽ cʉoremenape tie dotirecã dotiriwãmerã abiro queoro yʉremenape tiecã dotire ñurẽ nirẽrẽ, queoro nirẽrẽ, wapacʉtire nirẽrẽ eñorã tiroacu.#13:8-10.

Currently Selected:

Romanos 3: yui

Highlight

Copy