Romanos 16

Pablocã Romamacãrãrẽ ñudoticore

1Mʉjãrẽ marĩyago Febe wãmecʉtigore Cencreas macãrã Jesucristore wedewõrĩbumacãrãrẽ ñurõ titamugõrẽ mʉjã cʉtiro eawañerõcã “core ñurõ tiya” ĩco.#Hch 18:18. 2Mʉjã marĩ Nirũpʉ̃ya wãmemena core ñurõ ʉsearemena boca ñeña; Jesucristore wedewõrãrã abiro mʉjãbasurupe came ñurõ tiboronorã abirora tiya. Co merẽ pajʉre titamurigo ñagõ. Ĩñerõcã yʉpʉrena titamurigora ñagõ.#15:15, 30; Flp 2:29; 3Jn5-6. 3Priscare ĩñerõcã co manʉ Aquilare ñudotiya; cʉ̃jãrã yʉcã Jesucristoyere bueñerõcã yʉre buetamuwã.#Hch 18:2, 26; 2Tm 4:19. 4Ãpẽrãcã yʉre sĩãcõãrugañerõcã yʉre acutara cʉ̃jãye catirepʉrena sĩwõriarocuwioro tiriarare yʉ wadomerã cʉ̃jãrẽ ʉseare nʉni; nipetira judío basoca nihera Jesucristore wedewõrãcã cʉ̃jãrẽ ʉseare nʉniwã. 5Tairora Jesúre wedewõrĩbumacãrãcãrẽ Prisca, Aquilayawipʉ neãporare ñudotiya. Yʉcã maĩgʉ̃ Epénetocãrẽ ñudotiya; cʉ̃rã Asiapʉre Cristore mama wedewõsocorigʉ niwĩ.#1Co 16:15-19; Col 4:15. 6Maríacãrẽ mʉjãye maquẽrẽ tigo bʉtoro padederigocãrẽ ñudotiya. 7Ya wedera Andrónicocãrẽ ĩñerõcã Juniacãrẽ ñudotiya. Yʉcã peresupʉ niñerõcã cʉ̃jãcã yʉmenarã peresupʉ niwã. Yʉcã Jesucristore wedewõsocoatosʉgueropʉra cʉ̃jãpe yʉsʉguero Jesúre wedewõsocoriara niwã. Cʉ̃jãrã Jesúcã buedotigʉ cũyoriaracã “ñurã ñawã” ĩ cʉ̃jãcã wedepeoyora niwã.#Ga 1:22. 8Ampliato yʉcã maĩyogʉ Jesúre wedewõgʉ̃cãrẽ ñudotiya. 9Urbanorẽ marĩmenarã Jesucristoye quetire wedegʉcãrẽ ñudotiya. Ĩñerõcã yʉcã maĩgʉ̃ Estaquicãrẽ ñudotiya. 10Apelere Jesucristore ñurõ wedewõgʉ̃cãrẽ ñudotiya; ĩñerõcã Aristóbuloyawi macãrãcãrẽ ñudotiya. 11Ãpĩ ya wedegʉ Herodióncãrẽ ñudotiya. Ĩñerõcã Narcisoyawi macãrãrẽ marĩ Nirũpʉ̃rẽ wedewõrãcãrẽ ñudotiya. 12Trifenarẽ, Trifosare marĩ Nirũpʉ̃yere bʉtoro padedera nomiãcãrẽ ñudotiya. Ĩñerõcã tairora marĩyago Pérsidecãrẽ marĩ Nirũpʉ̃yere bʉtoro padedegocãrẽ ñudotiya. 13Rufocãrẽ nipetira basocapʉra “cʉ̃ Jesucristore ñurõ wedewõgʉ̃ ñawĩ” cʉ̃jãcã ĩyogʉcãrẽ, cʉ̃ paco yʉ pacora abiro nigõ earigocãrẽ ñudotiya. 14Asíncritocãrẽ, Flegontecãrẽ, Hermecãrẽ, Patrobacãrẽ, Hermacãrẽ ĩñerõcã Jesúre wedewõrã cʉ̃jãmena nirãcãrẽ ñudotiya. 15Tairora Filólogocãrẽ, Juliacãrẽ, Nereocãrẽ, cʉ̃ bajiocãrẽ, Olimpacãrẽ ĩñerõcã nipetira Jesucristore wedewõrã cʉ̃jãmena nirãcãrẽ ñudotiya.

16Mʉjãbasurupe mʉjãcã maĩrẽmena came pababa ñudotiya. Nipetira Jesucristore wedewõrĩburimacãrã mʉjãrẽ ñudoticowa.

17Yara mʉjã Jesucristore wedewõrã mʉjãrẽ bueriawãme niheriwãmepera ãpẽrãcã bue posorenorẽ, came dicawatiñerõcã tirenorẽ mʉjã ñurõ ĩñamasĩña. Cʉ̃jã mʉjãrẽ buerigue maquẽrẽna bueherigawa; tairo tira cʉ̃jãnorẽ dicawatiya.#Ga 1:8-9; 2Ts 3:6, 14-15; 1Tm 1:3; 6:3; Tit 3:10; 2Jn10. 18Cʉ̃jãno marĩ Nirũpʉ̃ Jesucristocã borere tiramerã yawa; buripe cʉ̃jãyepere cʉ̃jãcã noboro tirugarepere tira yawa. Cʉ̃jã queoro nirẽrẽ wederucũrãrã abiro cʉ̃jãcã ñurõ tʉoriaroñurõ wederucũmemarẽmenarã bʉtorojoro tʉomasĩtutuaherare ĩrito tiere cʉ̃jãrẽ wedewõñerõcã tiribasoca ñawã.#Flp 3:19; Col 2:4. 19Nipetira basocapʉra mʉjãcã Jesucristoyere ñurõ wedewõquetaturere masĩwã. Tairo tigʉ yʉ mʉjãmenarẽ bʉtoro ʉsea. Mʉjãrẽ mʉjãcã masĩrẽ cʉoremenarã ñurẽ maquẽpere tiñerõcã bo. Ñañarẽ maquẽpere tiñerõcã icãta bosãheri.#Mt 10:16; Ro 1:8; 1Co 14:20. 20Mʉjãcã tora abiro ñurẽpere timasĩñerõcã Manigʉ̃ marĩrẽ yerisãrẽmena niñerõcã tigʉra pẽrõgãsiro wãtĩã nirũpʉ̃rẽ mʉjãya dʉporidocape docaticũmuñerõcã tigʉagawi. ¡Marĩ Nirũpʉ̃ Jesucristo mʉjãrẽ ñurõ titamurucũmocãro!#Gn 3:15; Ro 15:33; 1Co 16:23; 1Ts 5:28. 21Timoteo yʉmenamacʉ̃ yʉmenarã Jesúye quetire wedecamesãgʉ̃cã mʉjãrẽ ñudoticowi. Ĩñerõcã ya wedera Lucio, Jasón, Sosípatrocã mʉjãrẽ ñudoticowa.#Hch 13:1; 16:1; 17:5; 20:4. 22Yʉ Tercio wãmecʉtigʉ Jesucristore wedewõgʉ̃cã Pablocã mʉjãrẽ wederere ojabosagʉcã mʉjãrẽ ñudotico. 23Gayocã mʉjãrẽ ñudoticowi. Yʉ Pablocã cʉ̃yawipʉra ña. Ĩñerõcã tiwipʉra Jesúre wedewõrãcã neãpoicãwã. Erasto cʉ̃rã timacã macãrãya niyerure ĩñanʉõrĩbasocʉcã mʉjãrẽ ñudoticowi. Ãpĩ Cuarto wãmecʉtigʉ Jesúre wedewõgʉ̃cã mʉjãrẽ ñudoticowi. 24¡Marĩ Nirũpʉ̃ Jesucristo mʉjãrẽ cʉ̃ye maĩrẽmena ñurõ titamurucũmocãro! Tairora tiaro.

Manigʉ̃rẽ basapeoremena tuwanʉcõrẽ

25Manigʉ̃rẽ basapeorada. Cʉ̃rã mʉjãrẽ yʉcã cʉ̃ye quetire mʉjãrẽ wederemenarã ĩñerõcã Jesucristocã marĩrẽ tibosariguere mʉjãrẽ yʉcã bueremenarã mʉjãrẽ cʉ̃ nemorõ ĩcãdiamacãrã wedewõrucũñerõcã timasĩgʉagawi. Atiera mamarõpʉra masĩñamanirigue Manigʉ̃cã masĩñerõcã tirosirora abirora queorora nirõ ya; tiera mamarõpʉra atibʉrecore tiatosʉgueropʉra masĩñamanirigue niriaro niwʉ̃.#1Co 2:7; Ef 1:9; 3:4-9; Col 1:26-27; Ap 10:7. 26Anocawatoapere tocawatoapʉre masĩñamaniriguere cʉ̃ye quetire wedesʉgueribasocacã ojariguemenarã masĩñerõcã yawí. Buri merẽ Manigʉ̃ tairo catirucũgʉ̃ cʉ̃cã dotirucũrõrã abirora tora abiro sʉgueropʉ masĩñamaniriguere tiere tairo waro ĩcũsiarigʉ niwĩ; tiemenarã nipetiriburimacãrãrẽ cʉ̃cã Cristomenarã marĩrẽ cametʉore quetire wedewõ cʉ̃rẽ yʉaro ĩgʉ̃.#Hch 3:18. 27¡Tairo tira marĩ marĩcʉorore Jesucristomenarã Manigʉ̃ ĩcʉ̃rã nipetirere masĩpetigʉ#1Tm 1:17; Jud25. nigʉ̃rẽ basapeorucũmocãrãda! Tairora tirada.

Tocãrõrã oja, Pablo.

Currently Selected:

Romanos 16: yui

Highlight

Copy