Filipenses 1

Ñudoticore

1Yʉ Pablo ĩñerõcã Timoteo#Hch 16:1. Jesucristore padedecoteribasoca mʉjã nipetira Filipo macãrãrẽ Jesucristomena ĩcãrõ ninirã Manigʉ̃yamacã macãrã ñañarẽ cʉohera nirãrẽ tairora mʉjãrẽ sionirãrẽ ĩñerõcã cʉ̃jãrẽ titamurãrẽ ñudotico.#1Co 1:2. 2Manigʉ̃ marĩ Pacʉ̃ ĩñerõcã marĩ Nirũpʉ̃ Jesucristo mʉjãrẽ ĩñamaĩrẽ cʉoaro#1:2 Ĩñamaĩrẽ cʉoaro ĩrõrã aperore ñurẽrẽ nʉniãro ĩ wede. tairora cʉ̃jãye yerisãrẽrẽ mʉjãrẽ nʉniãro.

Pablocã Jesúre wedewõrãrẽ Manigʉ̃rẽ ʉseapeo sãĩbosare

3Yʉcã mʉjãrẽ wãcũcorecãrõ ya Manigʉ̃rẽ ʉseare nʉni. 4Tairora yʉcã ñubuerecãrõpʉre ñurõ ʉsearemena mʉjã nipetirare mʉjãye niãte maquẽrẽ ñubuebosa. 5Merẽ mʉjã mamarõpʉra yʉcã mʉjãrẽ Jesucristoye quetire wederere mʉjãcã tʉo wedewõsocoriasiropʉra, cʉ̃ye quetire basocare wede yʉre titamusocowʉmʉãtisiawʉ. Tocawatoapʉmenarã, marĩcʉoropʉcãrẽ tairo titamurucũmocã.#1:16. 6Yʉ mʉjãrẽ atiere Manigʉ̃ mʉjãrẽ ñurẽrẽ tiñerõcã tisocorigʉra cʉ̃cã mʉjãrẽ tisocoriarora abirora ñurẽrẽ queoro tiyapatira eañerõcã tigʉagawi pʉ Jesucristocã atibʉrecopʉre upatuti watiriwatoapʉ tairo tigʉagawi ĩ.#1:10. 7Yʉcã mʉjã nipetirapʉrena anorã abiro wãcũñerõcã ñujo; mʉjãrẽ yʉ bʉtoro maĩnigʉ̃ tora abiro ĩ. Merẽ mʉjã Manigʉ̃cã yʉre padedere cũriguere titamu. Yʉcã peresupʉ o nirũpãrã wedesãrẽrẽ beseribasoca watoapʉ niñerõcãcãrẽ yʉcã Jesucristoye quetire cʉ̃jãrẽ tie queorora ña ĩriwatoanocãrẽ mʉjã yʉre titamu, mʉjãcã yʉmenarã Manigʉ̃cã yʉre ñurẽ quetire wededotiriguere wedetamurã ninirã.#1:13-14, 17. 8Manigʉ̃ yʉcã mʉjãrẽ bʉtoro maĩrẽrẽ queorora maĩgʉ̃ yawí ĩ masĩwĩ. Jesucristocã mʉjãrẽ maĩrẽ cʉorora abirora yʉcã mʉjãrẽ maĩ. 9Mʉjãye maquẽ niãtere yʉcã Manigʉ̃rẽ ñubuerepʉre “cʉ̃jãcã came maĩrõ nemorõpe cʉ̃jãrẽ sotoa came maĩnemowʉmʉãñerõcã tiya” ĩ sãĩbosa. Tairo ĩ ñubuebosa mʉjãrẽ mʉjãcã Manigʉ̃rẽ nirõrã cʉ̃cã nirĩwãmerẽ ĩñamasĩnemowʉmʉãtora abiro ĩñerõcã atie ñurẽ ña; atiepe ñañarẽ ña ĩmasĩãtora abiro.#Col 1:9; 1Ts 3:12. 10Tora abirope tinirã mʉjã ñurẽ diamacã maquẽ nirẽpere besemasĩnʉcõ timasĩrõãcu.#Ro 12:2; Heb 5:14. Tiere tira mʉjã Jesucristocã upatuti atibʉrecopʉre watiñerõcã ñañarẽ cʉohera nirõãcu ĩñerõcã noãnope mʉjãrẽ “cʉ̃jã wapa cʉora ñawã” ĩyoyamanirõãcu.#1Ts 3:13. 11Merẽ mʉjã Jesucristocã mʉjãrẽ titamurẽmenarã nipetire ñurẽrẽ tirucũrã nirõãcu. Basoca mʉjãcã tairo tira niñerõcã ĩñarã Manigʉ̃rẽ “cʉ̃ ñucametʉasuwi” ĩ ʉseapeoroagawa.

Jesucristoye quetire wedewõnemowʉmʉãrẽ

12Yara yʉcã maĩrã atiere mʉjãrẽ masĩñerõcã boga. Queorojoropʉare yʉre ano ñañarẽ birera pajʉre Jesucristoye quetire wedewõwʉmʉãñerõcã ya. 13Yʉcã peresupʉ nirẽmenarã nipetira surara nipetire macãrĩ macãrã nirũpʉ̃cã nirĩwire coteribasoca ĩñerõcã ãpẽrãcã “cʉ̃cã Jesucristoye quetire wedere wapa cʉ̃ peresupʉ ñawĩ” ĩ masĩpetiwa.#4:22. 14Ĩñerõcã tairora yʉcã peresu nirẽrã marĩyarare Jesucristoye quetire wedewõrãrẽ bʉtoro marĩ Nirũpʉ̃rẽ wedewõnemowʉmʉãñerõcã tinirõ cuiro manirõmena Manigʉ̃ye quetire wedeñerõcã ya.#1:7. 15Nirõrã ĩcãrã Cristoye quetire buewa yʉre ĩñatutiremena basocare yʉcã buerere quetatuheriñerõcã tirugaremena. Ãpẽrãpe Cristoyere buewa ñurõ wãcũrẽmena diamacã maquẽrẽ tirugaremena.#2:3. 16Ãnijã ñurõ wãcũrẽmena buerara tairo yawa yʉre maĩnirã. Cʉ̃jã tairo yawa yʉre “Manigʉ̃ cʉ̃rẽ peresupʉ cũwĩ basocare cʉ̃cã Cristoye quetire diamacãrã ña ĩ eñoãcʉ cũyorigʉ” nirẽrẽ masĩnirã.#1:12; 1Co 9:17. 17Ãpẽrã yʉre ĩñatutirape basocare cʉ̃jãpere quetatuñerõcã bora Cristoyere buewa. Tie queoro niheri. Cʉ̃jãcã tairo tiremena yʉ peresupʉ nigʉ̃rẽ cʉ̃jãrẽ ĩñatuti, ñañarõ tʉoiña wacũpasʉtiñerõcã tirugara tairo buewa.#2:3. 18Queorojoropʉare no nirĩwãmemena ñurõ tirugariwãmemena o ñañarõ tirugariwãmemena Cristoyere bueñerõcã ñujo; merẽ Cristoye quetirena buera yawa. Tairo tigʉ ʉsearemena ña. Tairora ña; sotoape ʉseanemowʉmʉãgʉacu. 19Atiere abiro masĩnigʉ̃ ʉsea: Mʉjãcã Manigʉ̃rẽ yʉre sãĩbosaremena, Jesucristocã yʉre nʉnirigʉ Espíritu Santocã titamurẽmenarã yʉre birere Manigʉ̃ “mʉ diamacã maquẽrẽ tiwʉ” ĩ yʉre cametʉogʉagawi. 20Atie tairora waroacu. Cristoyere yʉcã wederucũrẽmena atiere cuiro manirõ ĩcãdiamacãrã “Manigʉ̃ yʉre ñañarõ pʉtʉañerõcã tiherigawi” ĩ yue. Tairo tigʉ yʉcã ticucũãriarora abirora yʉ catigʉnocã o anopʉra cõwõãgʉ̃nocã tairo tirucũmocãrugagʉ cati marĩcʉ̃, dairiwãme yʉre bironomenarã Cristore “ñucametʉagʉ ñawĩ” ĩãro ĩgʉ̃.#Ro 5:5; 8:19; Ef 6:19. 21Atie yʉre abiro ña. Anorẽ yʉ catigʉno tigʉ Cristoye wadore tairo wederucũmocãgʉacu. Yʉcã anorẽ cõwõãñerõcã docare anorẽ nirõsotoape ñucametʉasuroacu; yʉ cʉ̃menarã ĩcãrõ tairo nirucũmocãgʉacu. 22Buri yʉ catigʉno tigʉ Cristoye maquẽrẽ tairo tirucũwʉmʉãrucũmocãgʉacu. Tairo tigʉ cõwõãrẽrẽ o catirepere ñemasĩheriga yʉre pʉawãmepʉ ñeñerõcã wisiojo. 23Pʉawãmepʉ yʉcã ñerugañerõcã yʉre dutuyarojoro cati. Bicapeicã yʉ anorẽ cõwõãsurugamiga ano nirõsotoape ʉmʉãwesepʉ Cristomena nigʉ̃ wagʉdagʉ; todocare yʉre ñucametʉasuboga.#2Co 5:8; 2Tm 4:6. 24Buri aperore mʉjãye wapamena yʉre atibʉrecopʉra niñerõcã ñujo. 25Tairo tiro “yʉre catiremenarã niñerõcã ñurõãcu” ĩ tʉoiña mʉjãcã yʉre bora nirẽye wapamena. Yʉ “anorẽ mʉjã nipetiramenarã nigʉacu” ĩ masĩ yʉcã padederere mʉjã watoare tiwʉmʉãgʉ̃dagʉ. O aperore torena yʉcã mʉjãrẽ titamurẽmena mʉjã õpe wedewõwʉmʉã ñurõ ʉseara nirõãcu ĩgʉ̃ ya. 26Tairo tira yʉcã mʉjã cʉtiropʉ upatuti niñerõcã Jesucristomena sotoa ʉsearoacu cʉ̃cã yʉre mʉjã cʉtiropʉ pʉtʉocoñerõcã ĩñarã.#2Co 1:14; 5:12.

Jesucristoye queticã ĩrõrã abirora tirucũ nirẽcʉtiya

27Atie wadore mʉjãrẽ sãĩ: Cristoye queticã buerora abirora mʉjã tiwãme wadora tirucũ nirẽcʉtiya.#Ef 4:1; Col 1:10; 1Ts 2:11-12. Yʉ mʉjãrẽ ĩñagʉ̃ wagʉnocã o wahegʉnocã “cʉ̃jã Filipo macãrã ĩcãrõmena wedewõrã tiayura; ĩcãrõpemena ‘ñurẽ quetire wedewõrẽrẽ diamacã maquẽrã ña’ ĩ wedera tiayura; 28cʉ̃jãrẽ acutarare cuiheriayura” ĩrẽ quetire tʉoruga. Mʉjãcã tairo tiremena “Manigʉ̃ cʉ̃jãrẽ ñañarõ ticõãgʉagawi; mʉjãpere cametʉogʉagawi” ĩ eñorã tiroacu. Merẽ Manigʉ̃rã “atie nipetirere tairo waroacu” ĩ masĩpetimocãwĩ.#Ro 8:17; 2Ts 1:5. 29Atiere mʉjãrẽ anorã abiro ĩ: merẽ Manigʉ̃ mʉjãrẽ Cristore wedewõmasĩrẽ wadore cũheriyi; cʉ̃rẽ wedewõrẽ wapamenacãrẽ “tairora ñañarõ cametʉamasĩrõãcu” ĩcũyi.#Mt 5:11, 12; Hch 14:22. 30Mʉjã Jesúre wedewõrã cʉ̃rẽ wedewõrẽ wapa yʉcã ñañarõ cametʉariarora abiro ñañarõ cametʉara ya. Mʉjã yʉcã ñañarõ cametʉañerõcã ĩñawʉ̃. Tairora marĩcʉorocãrẽ yʉcã anopʉre ñañarõ posarecãrẽ mʉjã tʉoga.#Hch 16:19.

Currently Selected:

Filipenses 1: yui

Highlight

Copy