Popular Bible Verses from Filipenses 1

Share

Yʉ mʉjãrẽ atiere Manigʉ̃ mʉjãrẽ ñurẽrẽ tiñerõcã tisocorigʉra cʉ̃cã mʉjãrẽ tisocoriarora abirora ñurẽrẽ queoro tiyapatira eañerõcã tigʉagawi pʉ Jesucristocã atibʉrecopʉre upatuti watiriwatoapʉ tairo tigʉagawi ĩ.

Mʉjãye maquẽ niãtere yʉcã Manigʉ̃rẽ ñubuerepʉre “cʉ̃jãcã came maĩrõ nemorõpe cʉ̃jãrẽ sotoa came maĩnemowʉmʉãñerõcã tiya” ĩ sãĩbosa. Tairo ĩ ñubuebosa mʉjãrẽ mʉjãcã Manigʉ̃rẽ nirõrã cʉ̃cã nirĩwãmerẽ ĩñamasĩnemowʉmʉãtora abiro ĩñerõcã atie ñurẽ ña; atiepe ñañarẽ ña ĩmasĩãtora abiro. Tora abirope tinirã mʉjã ñurẽ diamacã maquẽ nirẽpere besemasĩnʉcõ timasĩrõãcu. Tiere tira mʉjã Jesucristocã upatuti atibʉrecopʉre watiñerõcã ñañarẽ cʉohera nirõãcu ĩñerõcã noãnope mʉjãrẽ “cʉ̃jã wapa cʉora ñawã” ĩyoyamanirõãcu.

Atie yʉre abiro ña. Anorẽ yʉ catigʉno tigʉ Cristoye wadore tairo wederucũmocãgʉacu. Yʉcã anorẽ cõwõãñerõcã docare anorẽ nirõsotoape ñucametʉasuroacu; yʉ cʉ̃menarã ĩcãrõ tairo nirucũmocãgʉacu.

Yʉcã mʉjãrẽ wãcũcorecãrõ ya Manigʉ̃rẽ ʉseare nʉni.

Atie wadore mʉjãrẽ sãĩ: Cristoye queticã buerora abirora mʉjã tiwãme wadora tirucũ nirẽcʉtiya. Yʉ mʉjãrẽ ĩñagʉ̃ wagʉnocã o wahegʉnocã “cʉ̃jã Filipo macãrã ĩcãrõmena wedewõrã tiayura; ĩcãrõpemena ‘ñurẽ quetire wedewõrẽrẽ diamacã maquẽrã ña’ ĩ wedera tiayura

Atie tairora waroacu. Cristoyere yʉcã wederucũrẽmena atiere cuiro manirõ ĩcãdiamacãrã “Manigʉ̃ yʉre ñañarõ pʉtʉañerõcã tiherigawi” ĩ yue. Tairo tigʉ yʉcã ticucũãriarora abirora yʉ catigʉnocã o anopʉra cõwõãgʉ̃nocã tairo tirucũmocãrugagʉ cati marĩcʉ̃, dairiwãme yʉre bironomenarã Cristore “ñucametʉagʉ ñawĩ” ĩãro ĩgʉ̃.

Atiere mʉjãrẽ anorã abiro ĩ: merẽ Manigʉ̃ mʉjãrẽ Cristore wedewõmasĩrẽ wadore cũheriyi; cʉ̃rẽ wedewõrẽ wapamenacãrẽ “tairora ñañarõ cametʉamasĩrõãcu” ĩcũyi.