2 Tesalonisenses 3
3
Pablocã “ʉ̃sãye maquẽ niãtere Manigʉ̃rẽ sãĩbosaya” ĩ wederigue
1Yara, mʉjãrẽ abiro ĩtʉocogʉda. Mʉjã ʉ̃sãye maquẽ niãtere Manigʉ̃rẽ ñubue sãĩbosaya, ʉ̃sãcã marĩ Nirũpʉ̃ye quetire matasãñurõ nipetiropʉre eañerõcã tiatora abiro. Ĩñerõcã pajʉ basocare tie quetire tʉoranorẽ ñurõ cuwiopesaremena boca ñeãrõ ĩrã ñubue sãĩbosaya, cʉ̃jãcãrẽ mʉjãrẽ wariarora abirora waro ĩrã. 2Tairora Manigʉ̃rẽ ñubue ʉ̃sãrẽ sãĩbosarucũña, basoca diamacã maquẽrẽ tihera ñañarãrẽ ʉ̃sãcã camewitimasĩrã nirã eatora abiro. Merẽ nipetirapʉra Jesúye quetire tʉora wedewõheriwa. 3Buri merẽ marĩ Nirũpʉ̃pe cʉ̃cã “abiro tigʉda” ĩrẽrẽ queoro tigʉ ñawĩ. Tairo tigʉ cʉ̃rã mʉjãrẽ wãcũtutuarucũmocãñerõcã ti, acutagʉagawi wãtĩã nirũpʉ̃cã ñañarõ tirugarere. 4Tairo tira ʉ̃sã “cʉ̃rã ʉ̃sãcã mʉjãrẽ tidotiriguere queorora tiñerõcã yawí; tairora tiere õpe queoro tiwʉmʉãrucũñerõcã tigʉagawi” ĩ tʉoiña. 5Mʉjãrẽ marĩ Nirũpʉ̃rã Manigʉ̃cã maĩrẽrẽ masĩnemowʉmʉãñerõcã tiaro. Ĩñerõcã cʉ̃cã ñañarõ cametʉagʉ wãcũtutuariarora abirora mʉjãcãrẽ wãcũtutuañerõcã tiaro.
Pablocã “padedeya” ĩcorigue
6Ʉ̃sãyara, marĩ Nirũpʉ̃ Jesucristoyawãmemena mʉjãrẽ abiro dotico. Ãpẽrã Jesúre wedewõrã nicaperacãrã cʉ̃jãcã yatere cʉoradara padedeherara noboro biranorẽ tairora ʉ̃sãcã mʉjãrẽ bueriguere queoro tiquetatuheriñerõcã cʉ̃jãrẽ pitimocãña. 7Merẽ mʉjãbasurupera mʉjã cʉtiropʉ ʉ̃sãcã tirecʉtiriarora abirora tiere ĩñacũ, tiwãmerã tirecʉti niboriwãmerẽ mʉjã ñurõ masĩga. Ʉ̃sã mʉjã watoapʉre ñeno tiherara noboro birucũwõno tiheriwʉ. 8Icãta ĩcʉ̃noperena burijorora wapatihericaperacãrã sãĩyaheriwʉ. Buripe mʉjãrẽ patocõrugaherinirã bʉrecori, ñamirĩ bʉtoro padedewʉ ʉ̃sãcã yatere cʉoradara. 9Ʉ̃sãcã mʉjãrẽ buerewapa “ʉ̃sãrẽ mʉjã yarigue ecaya” ĩmasĩboariara nicaperacã icãta mʉjãrẽ tairo ĩheriwʉ. Tora abiro tirono tira buripe ʉ̃sãcã tirere mʉjãrẽ ĩñacũ tiquetatuaro ĩrã ʉ̃sãbasurupe padede wapata yawʉ. 10Merẽ ʉ̃sã mʉjã cʉtiropʉ mʉjãmena nirã mʉjãrẽ atie dotire cũwʉ̃: padederugahegʉnorẽ yarigue ecaherimocãña. 11Ʉ̃sã mʉjãmena nirã ĩcãrãrẽ padedeherara noboro birucũwõnorãye quetire tʉoawʉ. Padedehericaperacãrã paje nobore tipamarẽmena ãpẽrãrẽ patocõwõnorã tiayura. 12Tairo tira tora abiro biribasocare ʉ̃sã marĩ Nirũpʉ̃ Jesucristocã dotiromena “abirope tiya” ĩ sãĩco: “mʉjãcã nirĩbʉrecore yatere cʉoradara upatuti tamʉ ñurĩwãme padedesocoya” ĩco. 13Buri yara, mʉjãpe icãta sʉtiro manirõ ñurẽrẽ tairo tirucũmocãña. 14Ʉ̃sãcã atipũpʉmena doticorere tiere cametʉanʉcã tiheranorẽ cʉ̃jãrẽ ñurõ ĩñamasĩ bapuherimocãña, cʉ̃jãrẽ boboro cametʉaro ĩrã. 15Tairo ticaperacãrã cʉ̃jãrẽ ĩñatutiherimocãña. Buripe ĩcʉ̃ mʉjãyagʉre tirora abiro “mʉjã ñañarẽrẽ tira ya” ĩ wedeya cʉ̃jãcã ñurẽrẽ tiatora abiro.
Pablocã uitʉocorigue
16Tairora marĩ Nirũpʉ̃basurupera marĩrẽ ñurẽ yerisãrẽmena nirẽcʉtiñerõcã tigʉra mʉjãrẽ mʉjãcã no waro, mʉjãrẽ no merĩã birenorẽ cʉ̃ye ñurẽ yerisãrẽmena niñerõcã tiaro. Tairora mʉjã nipetiramenapʉra cʉ̃ nirucũmocãro. 17Yʉ Pablobasurupera atie yʉcã mʉjãrẽ ñudotitʉocorere oja yʉcã ojacucũãriarora abiro. Tairo tira mʉjã “cʉ̃rã ojayi” ĩ masĩrõãcu. 18Marĩ Nirũpʉ̃ Jesucristo mʉjã nipetirare ñucametʉaro tirucũmocãro. Tairora tiaro.
© 2026, SIL Global. All rights reserved.