2 Tesalonisenses 2
2
Pablocã Jesúcã upatuti watiate maquẽrẽ wedequẽnorẽ
1Yara, marĩcʉorore mʉjãrẽ marĩ Nirũpʉ̃ Jesucristocã upatuti watiate maquẽrẽ, marĩcã cʉ̃mena neãpoate maquẽrẽ 2“noborenomenarã mʉjãye wãcũrẽpʉre wasoañerõcã tiherimocãña” ĩ sãĩ. Tairora ĩcʉ̃nocã “marĩ Nirũpʉ̃ Jesúcã upatuti watiatibʉreco easia merẽ” ĩñerõcãcãrẽ mʉjã ʉcʉaherimocãña. Mʉjãrẽ tora abiro ĩ wedera abiro ĩritoroagawa: “ʉ̃sãrẽ Espíritu Santobasurupera tiere wedeawi” o “Pablojãbasurupera ʉ̃sãrẽ tiere wedeawa” o tairo tiera “buri ʉ̃sãrẽ ojacoariara niãwã” ĩrõãgawa. 3Mʉjã anorã abiro “Jesúcã upatuti watiatibʉreco easia merẽ” ĩ cʉ̃jãcã wederemena cʉ̃jãrẽ icãta pẽrõgãno ĩritoyoherimocãña. Buripe marĩ Nirũpʉ̃ Jesúcã upatuti watiribʉreco eatosʉguero niñerõcãpere marĩcʉ̃ Manigʉ̃rẽ bʉtoro cametʉanʉcãrẽ watiroacu. Tocawatoamenarã ʉmʉ ñañagʉ̃ bajuagʉagawi. Merẽ cʉ̃rã ñañarõ ticõãyoacʉpʉ nigʉ̃rã tosirore ñañarõ ticõãyogʉ nigʉagawi. 4Cʉ̃rã Manigʉ̃rẽ ĩñatutigʉ, nipetire basocacã Manigʉ̃ diamacã macʉ̃ nigʉ̃rẽ wedewõrẽnorẽ bohegʉ nigʉagawi. Ãni ʉmʉ ñañajomocãgʉ̃rã cʉ̃ wadorena wedewõñerõcã bogʉ Manigʉ̃wipʉ sãwa “yʉra ña Manigʉ̃” ĩgʉagawi. 5Mʉjã merẽ atiere wãcũga. Merẽ yʉ mʉjã cʉtiropʉ nigʉ̃rã mʉjãrẽ tiere wedesiawʉ. 6Tairo tira mʉjã marĩcʉorore mʉjãbasurupera Manigʉ̃cã “tocawatoano niñerõcã ʉmʉ ñañagʉ̃ bajuagʉagawi” ĩcũriasʉguerora noboriwatoanorã cʉ̃cã watiborere acutagʉre mʉjã ñurõ masĩ. 7Tairo nicapetacãrã cʉ̃ye ñañarẽ masĩña manirẽ nirẽ socosia merẽ. Marĩcʉorore tiere acutagʉre newaro wado dʉsaro ya. 8Tocãrõpʉ docare cʉ̃ ʉmʉ ñañagʉ̃ bajuagʉagawi. Cʉ̃rẽna Nirũpʉ̃ Jesús upatuti watigʉ ĩcã wederucũriʉseromenarã sĩãcõãgʉagawi ĩñerõcã tora abiro cʉ̃ye asibateremena watigʉ cʉ̃rẽ cõãyapaticogʉagawi. 9Cʉ̃ ʉmʉ ñañagʉ̃pe watigʉ, wãtĩã nirũpʉ̃ titamurẽmena eagʉagawi. Tairo tigʉ cʉ̃ paca tutuare cʉogʉ nigʉagawi ĩñerõcã apeye paca merĩã baure ĩñaʉcʉaremena, nipetiriwãme tiẽñorẽmena basocare tiritogʉ nigʉagawi. 10Cʉ̃ ʉmʉ ñañagʉ̃ nipetire ñañarẽ tiremena ñañarõ posarucũãtopʉ wanarẽ ĩritogʉagawi. Cʉ̃jãcã ñure diamacã maquẽ Jesúye quetire maĩrẽmena ñeheririgue wapamena cametʉoyoatere cʉohera eaheririara ninirã tora abiro tiyoroagawa. 11Tairo tigʉ Manigʉ̃ cʉ̃jãcã diamacã maquẽ nirẽrẽ wedewõrugahere wapa cʉ̃jãrẽ ĩritore tutuare cʉogʉmenape ĩritoyoñerõcã tigʉagawi, tiepere wedewõãro ĩgʉ̃. 12Tora abiro cʉ̃jãcã Jesucristoye ñurẽ quetipere wedewõrugaherinirã õpe ñañarẽpere tirugarucũrã niñerõcã Manigʉ̃ cʉ̃jã nipetirare ñañarõ posarucũãtopʉ ñañarõ ticõãgʉagawi.
Pablocã Tesalónica macãrãrẽ “mʉjãrẽ Manigʉ̃ siorigʉ niwĩ cametʉoyoana niãro ĩgʉ̃” ĩ wãcũñerõcã tire
13Yara, mʉjãrẽ marĩ Nirũpʉ̃cã maĩyorare mamarõpʉra merẽ Manigʉ̃rã besesiarigʉ niwĩ cʉ̃cã cametʉoyoana niãro ĩgʉ̃. Manigʉ̃ mʉjãrẽ cʉ̃ya Espíritu Santoye tutuaremena ñañarẽ cʉohera nirã eañerõcã tiremenarã ĩñerõcã diamacã maquẽ nirẽrẽ mʉjãcã wedewõrẽmenarã mʉjãrẽ cʉ̃cã cametʉoyoana nirã eañerõcã tirigʉ niwĩ. Tairo tira ʉ̃sã atiemenarã mʉjãye maquẽrẽ wãcũrã Manigʉ̃rẽ toquẽrĩrã ʉseare nʉnirucũmocãrãda. 14Manigʉ̃cã basocare cametʉore quetire ʉ̃sãcã mʉjãrẽ wederemenarã Manigʉ̃ mʉjãrẽ siorigʉ niwĩ mʉjãcãrẽ marĩ Nirũpʉ̃ Jesucristocã ñucametʉanʉcãrẽ cʉorere cʉ̃menarã cʉora earo ĩgʉ̃. 15Tairo tira yara mʉjã Manigʉ̃rẽ pitiro manirõ tairo wedewõrucũmocãña. Ʉ̃sãcã mʉjã cʉtiropʉ nirã mʉjãrẽ bueriguere, ʉ̃sãbasurupera ʉ̃sãcã mʉjãrẽ ojacoriguere icãta acõboherara tiere tairo tirucũmocãña. 16Manigʉ̃ marĩ Pacʉ cʉ̃cã ĩñamaĩrẽmena marĩrẽ maĩgʉ̃ tairo nirucũmocãtere wãcũtutuañerõcã yawí ĩñerõcã cʉ̃cã marĩrẽ ñurẽ nʉniãtecãrẽ “marĩ cʉoroacu” ĩ marĩrẽ masĩñerõcã yawí. Tairo tigʉ cʉ̃rẽ ĩñerõcã marĩ Nirũpʉ̃ Jesucristore 17“cʉ̃jãye yeripũnarĩpʉre wãcũtutuañerõcã tiya; tutuare nʉniña nipetire cʉ̃jãcã wederucũrẽ, nipetire cʉ̃jãcã tire ñurẽ wadora nirucũmocãtora abiro” ĩ sãĩ.
Currently Selected:
2 Tesalonisenses 2: yui
Highlight
Copy
Compare
Share
Want to have your highlights saved across all your devices? Sign up or sign in
© 2026, SIL Global. All rights reserved.