2 Corintios 13
13
Pablocã “mʉjãrẽ tiere tiherimocãña ĩ wedesiawʉ” ĩ wedetʉocore
1Anomena marĩcʉoro yʉcã mʉjã cʉtiropʉ ĩñagʉ̃ watomena itiãrĩ warodaro ya. Yʉcã topʉ eawañerõcã ãpẽrãrẽ wedesãrugarare Manigʉ̃ye wederucũrẽrẽ ojayoriapũpʉ ĩrõrã abiro tiro nirõãcu. Tie maquẽrẽ abiro ojayorigue ña: «Ãpẽrãrẽ wedesãrãdara pʉ̃ãrã o itiãrãno tiwãmerã wedere cʉora nirõ bo; cʉ̃jãcã tairo ĩrẽmena tiere queorora tairora wayu ĩmasĩãtora abiro» ĩ ojayorigue ña.#Dt 19:15; Mt 18:16; 2Co 12:14. 2Merẽ yʉ tosʉgueropʉ mʉjãrẽ pʉãrĩ ĩñagʉ̃ eariwatoamena mʉjãrẽ mʉjã nipetira tʉocoropʉra “ñañarẽ tiriarare, tosirope ñañarẽ tira earacãrẽ bʉtoro ñañarõ tigʉacu” ĩ wedesiawʉ. Tairo tigʉ marĩcʉorocãrẽ tamʉ ano yoaropʉ nicapeicãrã tierena mʉjãrẽ “yʉ marĩcʉorore topʉ mʉjãrẽ ĩñagʉ̃ wagʉ ñañarẽ tirare icãta bopacaĩñaheriga sua; yʉcã ĩriarora abirora diamacãrã cʉ̃jãrẽ ñañarõ tigʉacu” ĩ mʉjãrẽ upatutira wedecogʉ ya tamʉ.#2Co 2:1. 3Tora abiro mʉjãrẽ wedegʉ ya mʉjãcã “mʉ nirõrã Jesucristocã cʉ̃ye quetire wededotiyorigʉ nigʉ̃ mʉpʉmenarã Jesucristocã wederucũrẽrẽ ʉ̃sãrẽ masĩñerõcã tiya” ĩ mʉjãcã tiere masĩrugara niñerõcã. Merẽ cʉ̃ Jesucristo mʉjãmenarẽ abiro tigʉda ĩgʉ̃ tutuahegʉni niheriwi; buripe mʉjã watoare cʉ̃ye tutuaremenarã timasĩgʉ̃rã nigʉ̃ yawí.#Mt 10:20; 1Co 5:4; 2Co 9:8; 10:4. 4Queorora ña nirõpʉa cʉ̃ atiũpʉ̃mena bajuagʉ earigʉ ninigʉ̃ tutuahegʉra abiro curusapʉ papatuyo cõwõãrigʉ niwĩ. Buri cʉ̃ tora abiro cõwõãrigʉ nicapeicã marĩcʉorore Manigʉ̃ye tutuaremena catiwi. Tiwãmerã ʉ̃sãcã cʉ̃cã niriarora abirora tutuahera nicaperacãrã Jesucristoyarara ninirã cʉ̃cã nirõrã abirora Manigʉ̃ye tutuaremenarã cati cʉ̃ye tutuaremenarã mʉjãrẽ titamurãdara. Mʉjãrẽ ĩñarã warapʉ tie tutuarere eñomasĩboro boñerõcãno tie tutuarere eñorãda.#Ro 6:4, 8; 2Co 12:14; Flp 2:7-8; 1Pe 3:18. 5Mʉjã, mʉjãbasurupera mʉjãye catirere “ʉ̃sã dairo nirẽcʉtiri” ĩ ĩñabeseya; tairo tinirã mʉjãcã “ʉ̃sã Jesucristorena wedewõrẽ cʉora nirã ña ĩrẽcʉtirere queorora ña” ĩ masĩrãdara. Mʉjãcã tora abiro mʉjãbasurupe ĩñabesera earemenarã tiecã queoro nirõ eañerõcã Jesucristocã mʉjãmenarã ĩcãrõ nirẽrẽ masĩrã earoacu. Tiecã queoro niheriñerõcãpere “marĩ cʉ̃rẽ queoro wedewõheri; Jesucristo marĩmena ĩcãrõ niheriwi” ĩ masĩrã earoacu.#Jn 6:6; 1Co 9:27; 11:28. 6Tairora mʉjãrẽ ʉ̃sãcã Jesucristoyara nirẽrẽ, cʉ̃cã ʉ̃sãrẽ buedotigʉ cũyoriara nirẽrẽ merĩãpe tiherara; queoro tiremenarã Manigʉ̃cã ʉ̃sãrẽ “mʉjãcã tire queorora ña” ĩrẽrẽ mʉjãrẽ tiere masĩrã eañerõcã boga. 7Ʉ̃sã mʉjãrẽ ĩcãwãmenoperena ñañarẽrẽ tiherimocãro ĩrã Manigʉ̃rẽ mʉjãye niãte maquẽrẽna ñubue sãĩbosa. Mʉjãrẽ ñubue sãĩbosara merẽ ʉ̃sãpʉa nipetirere nʉcã cametʉapetira eariarapʉ ña ĩrãmerã ya. Buripe mʉjãrẽ mʉjãcã wedewõrẽ cʉoriwãmerã diamacã maquẽrẽna tirucũãro ĩrã ya; ãpẽrã basocacã marĩcʉ̃ “cʉ̃jãrẽ cʉ̃jãcã nirõrã Jesucristocã buedotigʉ beseyoriara nirẽrẽ masĩñamani” ĩ cʉ̃jãcã wãcũyora nicaperacãrã.#2Co 6:9. 8Ʉ̃sã diamacã maquẽcã nirĩwãmepe wadorena timasĩrã nirã ya. Tie diamacã maquẽ nirẽrẽ daironope tinirã ʉ̃sã tiere acutamasĩheri. Ʉ̃sã mʉjãcã diamacã maquẽrẽ tiñerõcã “tiere tiheracã” ĩ acutarono tira buripe “tairora tiya” ĩmasĩrõãcu. 9Tairo tira ʉ̃sã, ʉ̃sãbasurupera tutuahera tʉoiñarã eacaperacãrã mʉjãpere mʉjãcã wedewõrẽmenarã tutuara nirã eañerõcã ʉ̃sã ʉsea. Tiera ña ʉ̃sãcã mʉjãrẽ Manigʉ̃rẽ ñubue sãĩbosare; mʉjãrẽ õpe Jesucristore ñucametʉaro wedewõqueturibasoca nirã eanirã icãta ñañarẽ cʉohera nirã earo ĩrã.#2Co 11:30; 12:10. 10Tie maquẽrẽ tigʉra yʉcã mʉjã cʉtiropʉ watosʉguero yʉ mʉjãrẽ atipũrẽ ojacogʉ ya; yʉcã eatosʉgueropʉra mʉjãcã wasoa merĩãwãmepe nirẽcʉtiatora abiro. Tora abiro mʉjãcã tira eañerõcãrã marĩ Nirũpʉ̃cã yʉre tidotiriarora abiro mʉjãrẽ bʉtoro ñañarõ tigʉ eaheriga. Merẽ marĩ Nirũpʉ̃ yʉre “yʉcã dotiriarora abirora tiya” ĩwĩ. Tie dotiremenarã mʉjãcã cʉ̃rẽ wedewõrẽ cʉorere posoya ĩgʉ̃merã tiwi; buripe mʉjãrẽ cʉ̃rẽ õpe wedewõnemowʉmʉãrã nirã eañerõcã bogʉpe tiwi.#2Co 2:3; 10:8; Tit 1:13.
Pablocã uitʉocore
11Yara yʉcã mʉjãrẽ ojacore tocãrõrã ña. Yʉ mʉjãrẽ “mʉjã ñurõ ʉsearemena niña” ĩ sãĩrẽmena mʉjãrẽ uitʉocogʉda. Yʉcã mʉjãrẽ tidotirere queoro tira yʉcã wederora abirora mʉjã mʉjãbasurupe mʉjãcã wedewõrẽ cʉorere õpe bʉtiwʉmʉãrucũrã diamacã maquẽpere tiwʉmʉãrucũ niña. Ĩcãrõpe came wãcũrẽmenarã nirẽcʉtiya ĩñerõcã ñurõ nirẽcʉtiñerõcã tiremenarã came nirẽcʉtiya. Mʉjãcã tiere tiñerõcãrã Manigʉ̃ marĩrẽ maĩrẽ cʉogʉra ĩñerõcã tairora marĩrẽ came ñurõ nirẽcʉtiñerõcã tirere nʉnigʉ̃rã mʉjãmenarã nirucũgʉagawi.#Ro 15:33; Ef 6:23; 1Ts 5:23. 12Mʉjãbasurupe Manigʉ̃yamacã macãrãrã abiro ñurõ came maĩrẽmena came ñudotiya.#Ro 16:16. 13Nipetira marĩyara Jesucristore wedewõrã anopʉ nirãcã mʉjãrẽ ñudoticowa.#Flp 4:22. 14¡Jesucristo marĩ Nirũpʉ̃ mʉjã nipetirare ñucametʉaro wañerõcã tiaro! ¡Manigʉ̃ marĩrẽ maĩrẽ cʉogʉ mʉjãmenarã nirucũmocãro! Ĩñerõcã ¡Espíritu Santo marĩmena nirucũgʉ̃cã mʉjã nipetiramenarã tairo bapurucũmocãro! Tairora niãro. Pablo.#Mt 28:19; Hch 2:32-33; 1Co 12:4-6; Ef 2:18; 4:4-6; 2Ts 2:13-14; 1Pe 1:2; 1Jn 3:23-24.
Currently Selected:
2 Corintios 13: yui
Highlight
Share
Copy
Want to have your highlights saved across all your devices? Sign up or sign in
© 2026, SIL Global. All rights reserved.
