2 Corintios 12

Pablocã quẽgʉ̃rã abiro ĩñarigue

1Marĩye maquẽrẽna marĩbasurupera “abigʉ ña yʉ” ĩ wederucũboyemocãgʉ̃ eagʉ ñenojororena bʉa wapatayamani. Buri tairo nimocãcapetacãrã yʉpe marĩ Nirũpʉ̃ Jesúcã quẽrõpʉra abiro yʉre eñonigʉ̃ yʉre ĩñamasĩgʉ̃ eañerõcã tiriguere mʉjãrẽ wederucũnemocogʉda.#Ga 1:12; 2:2; 1Pe 5:10. 2Yʉcã Jesucristore wedewõsocoriasiro yʉre abiro wawʉ: quẽrõpʉre tirora abiro Manigʉ̃ yʉre cʉ̃cã nirõ ʉmʉãwesepʉ newʉmʉãwĩ. Yʉre tairo wariasiro catorce cʉmarĩ cametʉa. Buri yʉ topʉre atiũpʉ̃menape o yeripũnamenape newayogʉ newayotayu tiepʉare masĩheriga; Manigʉ̃ wadora masĩwĩ.#2Co 11:11. 3Tairo birigʉ yʉra nigʉ̃ ya. Buri to docare atiũpʉ̃menape o ya yeripũnamenape topʉre yʉcã warigue docare icãta masĩheriga; Manigʉ̃ wadora masĩwĩ. 4Atie wadorena ñurõ masĩ: Manigʉ̃ yʉre topʉ wãcũña manirõ newʉmʉãgʉ̃ ñucametʉariditaro ñurẽ wadora nirõpʉ nejeagʉ eawi. Topʉre yʉ “abiro ĩrugaro ya” ĩñamasĩña manirẽrẽ tʉowʉ; tiera niwʉ̃ Manigʉ̃cã icãta ĩcʉ̃no basocʉnorẽ wededotihere.#Lc 23:43. 5Atieno yʉre abiro wareno docare icãta boboro manirõrã wederucũboyerora nirõ ya; buripe yʉbasurupera yʉcã tirenope wadorena wederucũboyerono tigʉ. Yʉ yaye maquẽrẽ wederucũboyerugagʉno yʉcã tutuahegʉ nirẽ wadorena wederucũboyemasĩ. 6Buri queorojopʉare yʉ yʉre biriguere wederucũboyemasĩgʉ̃ eagʉnocã niñayoribasocʉra abiro wederucũgʉ̃ eagʉmerã tiboga; merẽ tiera yʉcã tairo wederucũboyerera queoro nirĩwãmerã yʉcã wedere nirõ earo tiboga. Yʉpe tiere tairo tiheriga yʉcã tairo wederucũrẽmena wadora ãpẽrãrẽ “ãpẽrãsotoa nigʉ̃ ñawĩ” ĩ tʉoiña wedewõrã eaherimocãro ĩgʉ̃. Yʉcã tirecʉtirere ĩñariasiropʉ doca, yʉcã buerere tʉoariasiropʉ doca yʉre “cʉ̃ ñujowi” ĩ wedewõrã eañerõcã bo.#2Co 10:8; 11:16. 7Manigʉ̃ cʉ̃cã paca ñucametʉanʉcãrẽrẽ dairo ti queomasĩña manirẽrẽ yʉre eñoriguemenarã yʉre yʉbasurupera “ãpẽrãsotoa nigʉ̃ ña” ĩ tʉoiñaboyegʉ eaherimocãro ĩgʉ̃ wãtĩã nirũpʉ̃cã cʉ̃rẽ wedecotegʉmena ya ũpʉ̃pʉre pũnirigueturugarere acutaheririgʉ niwĩ. Yʉre Manigʉ̃basurupera pũniriguetuñerõcã tirigʉ niwĩ. Tiemena yʉ bʉtorojoro pũnirẽ posacametʉanʉcãgʉ̃ bigʉ ya; tie ya ũpʉ̃pʉre pũnirẽ potagacã sãrõrã abiro pũni.#1Co 5:5; 11:30; 1Tm 1:20; Job 2:10. 8Itiãrĩ yʉ marĩ Nirũpʉ̃rẽ “yʉre atie pũnirẽrẽ cametʉoya” ĩ sãĩmiwʉ̃.#Mt 26:44. 9Cʉ̃pe yʉre abiro ĩwĩ: «Yʉcã mʉrẽ maĩrẽ cʉoremenarã yʉcã mʉrẽ ñurõ titamurẽrã ña mʉcã bopetijomocãrẽ; tie mʉrẽ icãta dʉsahericu. Tutuaheri ĩrãnomenarã yʉ yaye tutuarere eñogʉ̃ ñurõ titamu ãpẽrãcãrẽ yʉcã tutuarere masĩnemorã earo ĩgʉ̃» ĩwĩ. Tairo tigʉ yʉ “yʉre tiere cametʉoya” ĩ ñubue cʉ̃rẽ sãĩrõno tigʉ yʉcã tutuahegʉ nirẽpere yʉ ʉsearemena wederucũboyegʉ niruga; yʉcã tairo tiremenape Jesucristocã cʉ̃ye tutuarere yʉpʉmenarã eñoãro ĩgʉ̃.#2Co 11:30; Flp 4:13; 1Pe 4:14. 10Anorã abiro yʉcã tutuahegʉ nirẽmenarã yʉre noquẽ ñañarõ cametʉañerõcã tirere yʉ ʉsearemenape nʉcãrucũmocã. Yʉcã Jesucristore queoro yʉquetature wapara ãpẽrãcã yʉre ñañarõ ĩdocatucapetacãrã, apeyenorẽ dʉsayogʉ nicapeicãrã, ãpẽrãcã yʉre ñañarõ posañerõcã ticapetacãrã, yʉre paje ñañarẽ wisiore bicapetacãrã ʉsearemenarã tiere nʉcã apõtĩõrucũmocã. Merẽ yʉre yʉcã tiere dairo ti apõtĩõmasĩheri tutuahegʉ nigʉ̃ eañerõcãrã Jesucristope cʉ̃ye tutuaremenarã yʉre tiere apõtĩõmasĩgʉ̃ õpe tutuagʉra nigʉ̃ eañerõcã yawí; ñañarõ cametʉarere ãpõtĩãro ĩgʉ̃. Tairo tigʉ yʉ bʉtoro ʉsea.#Ro 5:3; 2Co 6:4; Ef 3:16; Flp 4:13; 2Ts 1:4.

Pablocã Jesúre wedewõrã Corinto macãrãrẽ bʉtoro wãcũrẽ

11Yʉ masĩ, yʉ yʉbasurupera yaye maquẽrẽna wederucũ ojacogʉ eagʉ ĩcʉ̃ niñayoribasocʉcã tirora abiro tigʉ eagʉ ya; yʉcã tora abigʉ nigʉ̃ earugahericapetacã buri mʉjãrã ña yʉre atiere anorã abiro yaye maquẽrẽna ĩcʉ̃ niñayoribasocʉra abiro yʉre wederucũgʉ̃ eañerõcã tira. Buri atiere tibora mʉjãpera niboyu yʉre “cʉ̃ queorora tigʉ ñawĩ” ĩnirã ãpẽrãrẽ wedecomasĩbora. Mʉjãcã yʉre tora abiro tihericapetacãrã, mʉjãcã yʉre “cʉ̃ buri nigʉ̃ ñawĩ” ĩcapetacãrã icãta pẽrõgãnorã Jesúcã cʉ̃ye quetire buedotigʉ cũyoriara nihericaperacãrã “ʉ̃sã Jesúcã cʉ̃yere buedotigʉ cũyoriarasotoape nirã ña” ĩ tʉoiñanirã ĩritoremena bueribasocare “cʉ̃jã yʉsotoape nirã ñawã” ĩherijomocã.#1Co 3:7; 15:8-9; 2Co 11:1, 5; Ga 2:6-8. 12Mʉjã cʉtiropʉ nigʉ̃ bʉtoro ñañarõ cametʉacapeicãrã tiere apõtĩõnigʉ̃ nʉcãrẽmena yʉcã padederiguere, Manigʉ̃cã tutuaremenarã yʉcã paje ñucametʉarere tiẽñoriguere mʉjã ĩñawʉ̃; tairo tiro tiera ña yʉcã nirõrã Jesúcã cʉ̃ye quetire buedotigʉ cũyorigʉ nijomocãgʉ̃ nirẽrẽ eñorẽ.#1Co 9:2; Ro 15:17-19; Heb 2:3-4. 13Mʉjã Corinto macãrã Jesúre wedewõrĩbumacãrãrã ãpẽrã Jesúre wedewõrĩbumacãrãcã yʉre tiriaronorã mʉjã yʉre tiheriwʉ. Mʉjãrẽ yʉ icãta “yʉre niyeru nʉniña” ĩ sãĩpatacõheriwʉ. ¿Yʉcã mʉjãrẽ tora abiro tiriguemerã ñarĩ mʉjãrẽ ãpẽrã doca tʉoiñarẽcʉtira niñerõcã tire? Yʉcã mʉjãrẽ “yʉre niyeru titamuña” ĩ sãĩheririgue wapamena wadora mʉjã ãpẽrã Jesúre wedewõrĩbumacãrã docape tʉoiñarãmerã tiwa. ¡Yʉcã tora abiro queoro niheriwãmepe mʉjãrẽ tora abiro ñañarõ tiriasiro niñerõcã yʉre tiere acõboya!#1Co 9:12, 18; 2Co 11:7-9. 14Merẽ yʉ anomena itiãrĩ mʉjã cʉtiropʉ ĩñagʉ̃ wagʉdagʉ quenoarigʉpʉ nigʉ̃ ya; buri tiwãmerã marĩcʉorocãrẽ mʉjãrẽ yʉ “yʉre titamurã niyeru nʉniña” ĩ sãĩpatacõmocã tiheriga. Yʉ mʉjãya niyerure bogʉmerã ya; mʉjãpe docare Jesucristoyepere tinemowʉmʉãñerõcã bogʉpe ya. Pũnamerã ñawã pacʉsʉmʉãcã borere nʉnirãdara niyerure neõ quenobosara; pacʉsʉmʉãpe ñawã pũnacã borere nʉnirãdara niyerure neõ quenobosara.#1Co 4:14-15; 10:24, 33; 2Co 13:1; Pr 19:14. 15Tairo tigʉ yʉcã, yʉcã cʉore nipetiremenarã ñurõ ʉsearemenarã mʉjãrẽ titamugʉ̃da. Ĩñerõcã tairora mʉjãye maquẽrẽ tigʉra yʉcã apõtĩõrõcãrõ ya catirepʉmenarã mʉjãrẽ bʉtoro titamugʉ̃da. Buri yʉcã ĩñañerõcã anorã abiro yʉcã mʉjãrẽ õpe bʉtoro maĩrẽ cʉomocãcapetacãrã mʉjãpe yʉre pẽrõgãjoro maĩrẽ cʉora nimocã.#Flp 2:17; 1Ts 2:8. 16Mʉjã masĩga. Yʉ mʉjãrẽ yʉre titamuñerõcã bogʉ niyerure sãĩpatacõmocã tiheriwʉ; mʉjãrẽ yʉcã tora abiro sãĩrẽmena yʉre niyeru nʉnirugara patacãrã niñerõcã tirugaherinigʉ̃. Buri bicapetacãrã ĩcãrã mʉjã watoamacãrãpe abiro ĩrã ñawã: “cʉ̃ memanigʉ̃ marĩrẽ ĩritoyi; siro marĩyere newagʉdagʉ” ĩwã. 17Buri anorã abiro ĩrẽ niñerõcãpʉare ¿topʉare yʉcã topʉ ticoranomena mʉjãrẽ yʉ ĩritonigʉ̃ mʉjãyere emagʉ̃ tiayuri? Cʉ̃jã icãta mʉjãye apeyenorẽ newaheririara niwã. 18Tairora yʉcã Titore ĩñerõcã ãpĩ Jesúre wedewõgʉ̃ marĩyagʉmenarã mʉjã cʉtiropʉ ĩñarã wadoticoriwatoare cʉ̃jã mʉjã cʉtiropʉ eara mʉjãrẽ icãta ĩritoremena mʉjãyere emaheririara niwã. Mʉjã ñurõ masĩga: Tito yʉcã tirora abirora mʉjãrẽ titamurugagʉ ñawĩ; mʉjãrẽ buegʉ ñurẽ wadorena tirugarigʉ niwĩ.#2Co 8:6, 16-18. 19Apewatoa tira mʉjã yʉcã anorã abiro ĩ ojacorere buera ãnijã cʉ̃jãrẽ ñañarõ ĩrẽrẽna “ʉ̃sã tiere tairo tiheriwʉ” ĩ marĩrẽ tiere wedera “marĩrẽ ñurõ wãcũñerõcã tirugara tiayuwa” ĩ tʉoiñarã eaboga mʉjã. Tora abiro mʉjãrẽ tirugaramerã ya. Buripe ʉ̃sã Jesucristoyara ninirã Manigʉ̃cã ĩñacorora mʉjãrẽ tiere queorora wedera ya. Yara yʉcã maĩrã nipetire ʉ̃sãcã tiremenarã mʉjãrẽ titamururgara ya; mʉjãrẽ Jesucristore õpe ñurõ nirĩwãmerã cʉ̃rẽ wedewõnemowʉmʉãro ĩrã.#Ro 9:1; 2Co 10:8. 20Buri yʉ cuigʉ nimocãgʉ̃ cati mʉjã cʉtiropʉ ĩñãgʉ̃ wagʉ apewatoa tigʉ yʉcã peñarĩwãmepera abiro mʉjãrẽ nirẽcʉtiherare bʉajeaheriboga ĩ wãcũnigʉ̃. O yʉpecã yʉbasurupera mʉjãcã bʉajearugariwãmerã abiro nigʉ̃rẽ bʉajeañerõcã tiheriboga ĩnigʉ̃. Tairora cui tʉoiñagʉ̃ nimocã apewatoa tigʉ mʉjãrẽ came cuaseorecʉtiremena nirãrẽ, ãpẽrãrẽ ĩñatutiremena nirãrẽ, o ãpẽrãmena tairo cuarucũĩcãrẽmena nirãrẽ, mʉjãye niãte wadorena wãcũrẽcʉtirare, ãpẽrãrẽ ñañarõ queti wederepirare, ñañarõ wedepasʉtirepirare, ãpẽrãsotoa tʉoiñarẽcʉtirare, mʉjãcã neãporopʉre no mʉjãcã boro timequẽderare bʉajeagʉ eaboga ĩ cui tʉoiñarẽmena wãcũrẽcʉtinigʉ̃.#1Co 1:11; 3:3; 2Co 2:1-4. 21Tairora yʉcã mʉjãrẽ topʉ upatuti ĩñagʉ̃ wariwatoare mʉjãcã ñañarẽrẽ tirecʉtire wapamena Manigʉ̃ yʉre bobocametʉaro cametʉagʉ eañerõcã tibogawi ĩgʉ̃; tairo tiremenarã yʉre wãcũpasʉtiremena otigʉ eañerõcã tibogawi ĩgʉ̃ yʉ bʉtoro cui tʉoiña wãcũrẽcʉtiremena bi. Merẽ mʉjã pajʉ icãta ñañarẽrẽ tirecʉtirere tiduherijomocã, tairo tiere tirucũmocã; tidotiheriwãmerẽna ʉmʉã nomiãmena, nomiãcã ʉmʉãmena came ñañarõ tirucũmocã.#2Co 2:1, 4; 13:2; Ga 5:19.

Currently Selected:

2 Corintios 12: yui

Highlight

Copy