Gálatas Atipũ abiro tiro ojayoyu
Atipũ abiro tiro ojayoyu
Atipũ Jesucristocã cʉ̃ye quetire buedotigʉ beseyorigʉ Pablocã Jesúre wedewõrã Romapʉ nirĩdita Galacia macãrãrẽ ojacoriapũ ña. Pablocã cʉ̃jã Jesúre wedewõrãcã niriamacãrĩrẽ wãmebohericapetacãrã Jesúre wedewõrĩbumacãrã Derbe macãrã, Listra macãrã ĩñerõcã Iconio macãrã nigatiwa ĩ wãcũyo; cʉ̃jãrã Pablocã ĩñerõcã Bernabécã mama Jesúye quetire buecamesãrã cʉ̃jãcã Jesúre wedewõrĩbumacãrã nirã eañerõcã tiyoriara niyuwa (Hch 14:1-23). Pablo cʉ̃cã ĩcãrĩsiro Jesúye quetire wedecamesãrĩwatoamena ãnijã Jesúre wedewõrĩbumacãrãrẽna ĩñagʉ̃ eayi (Hch 15:6–16:6). Ãnijã Jesúre wedewõrĩbumacãrã watoare pajʉ nicametʉara judío basoca nihera niyuwa Iconiopere tomacãrã Jesúre wedewõrĩbumacãrã pajʉ Jesúre wedewõrã nijomocãrã judío basocape nijomocãcapetacãrã (Hch 14:1).
Atipũrã judío basocacã ĩritoremena buerere cʉ̃jãrã judío basoca niherare Moisécã dotire cũriguere tidotinirã tie dotire docapʉ nirã eañerõcã tirugarere wedequẽno ojayoro earipũ niyu (4:21). Cʉ̃jãrẽ nirõrã Jesúre wedewõrãrã nirã earugarapʉa conerigʉ yapa macã caserore widetacõãdotirere (6:12-13) ĩñerõcã judío basocacã bosebʉrecori cʉorere cʉ̃jã judío basocacã tirecʉtiriwãmerã tiro nirõ tiyuro (4:10). Tairo tigʉ Pablo atipũmenarã cʉ̃jãcã tairo bueremaquẽrẽ queoro nirẽmerã ña ĩ wedegʉra Moisécã dotire cũriguere queoro tiquetatuaremena Manigʉ̃cã cametʉoyorere bʉara eayamani; Jesucristore wedewõrẽ cʉore earemena wadora doca Manigʉ̃cã cametʉoyorere bʉariaro ña ĩ ñurõ tʉomasĩrĩwãmerã wedewi. Pablo anorã abiro bire niñerõcãrã cʉ̃cã Jesúye quetire bueriguepere wedewõherara apeyepere wedewõrã eañerõcã Jesúre wedewõrãrẽ tutuaro tutigʉ eawi (1:6-9).
Ĩñerõcã apeyere atipũrã niyu Pablore cʉ̃rẽ Jesucristobasurupera cʉ̃ye quetire buedotigʉ cũyorigʉ nirẽrẽ tairora cʉ̃cã Manigʉ̃cã Jesucristomena basocare cametʉore quetire wedere maquẽrẽ cʉ̃jãcã ñañarõ ĩpãmarẽrẽ “abiro ña” ĩ cʉ̃cã wedere maquẽrẽ ojayoro earipũ (1:10–2:21). Ãnijã judío basoca Jesucristomena ĩcãrõ nirã earemena ñurõ ñeno dotiyoyamanirãrã abiro; Moisére dotire cũriguere tiremena tie dotire docapʉ nirã eahere maquẽrẽ buerere icãta boheriyura (3:1–4:31). Pablo tie Jesucristomenarã ñeno dotireno doca nirõ manirõ nirẽ earemenarã Jesúre wedewõrãrẽ mʉjã Espíritu Santocã tiñerõcã boriwãmepe tirecʉti nirẽcʉtiya; mʉjãye ũpʉ̃rĩcã ñañarẽ ʉgaripearepere tiñerõcã borepere tirecʉti nirõno tira ĩ wedecogʉ eawi (5:1–6:10).
Pablocã Galacia ditamacãrãrẽ ojacoriapũ
Currently Selected:
Gálatas Atipũ abiro tiro ojayoyu: yui
Highlight
Share
Copy
Want to have your highlights saved across all your devices? Sign up or sign in
© 2026, SIL Global. All rights reserved.