Jakkobbu 4
4
Kutaba Abweenzunyina Anyika
1Niinzi chipa nkondo, alimwi niinzi chipa kulwana akati kanu? Teenjalalando zyanu na eezyo zilimunkondo akati kanu? 2Mulayandisya pesi alimwi taakwe nchimulaacho pe; aboobo mulajeya. Mpawo muli achiyandisyo pesi tamujani pe, aboobo mulalwana mpawo mujana nkondo. Taakwe nchimulaacho pe, nkaambo tamukumbili pe kuli Leza. 3Mulakumbila alimwi tamutambuli pe, nkaambo mukumbila munzila italuleme pe, kuti muzimanine munjalalando zyanu. 4Inywe nibasibwaamu batasyomeki! Tamuzina kuti mwenzunyina anyika nguusinkondonyina aLeza? Nkikaako kufumbwa uyanda kuba mwenzunyina wanyika walichita kuba sinkondonyina aLeza. 5Nikuba kuti muyeeya kuti malembe aamba zyakubeja na kuti, “Uchita buzuba kumuuya ooyo ngwakachita kuti ukkale mulindiswe”? 6Pesi upa luzyalo lwiindilide, nkikaako aamba kuti, “Leza ulabakazya balisumpula, pesi upa luzyalo kuli balibombya.”
7Nkikaako ngamulibombye kuliLeza. Amukazye Sikuchenga mpawo uyoomuchija. 8Ngamuswene afwiifwi kuliLeza alimwi uyooswena afwiifwi kulindinywe. Ngamusambe maboko aanu, inywe nibasizibi, alimwi musalazye myoyo yanu, inywe nibantu basimyoyo ibili. 9Ngamuuse akulila akoomoka. Kuseka kwanu ngakusanduke kube kulila akukondwa kwanu kube kuusa. 10Ngamulibombye lwanu kunembo lyaMwami alimwi uyomusumpula.
Inchenjezyo Atala Akubetekana
11Nibakwesu, mutaambuuli bubi atala awumwi. Ooyo waambula bubi atala amweenzunyina nikuba kubeteka mweenzunyina, waambula bubi atala amulawu alimwi ubeteka mulawu. Pesi kuti wabeteka mulawu, tuli sikuchita wamulawu pe pesi sikubeteka. 12Kuli sikupa mulawu uumwi asikubeteka, ooyo ukonzya kufutula akunyonyoona. Pesi nduweni iwe nuubeteka muyakilani wako?
Inchenjezyo Atala Akulisumpula
13Amuswiilile lino, inywe nimwaamba kuti, “Sunu nikuba junza tuzoyinka kuteedi nikuba kudolopo liteedi mpawo tukakkale munyaka nkuko alimwi tukasambale akujana mpindu,” 14anukuti taakwe nchuzi atala ajuunza. Niinzi buumi bwanu? Nkaambo mulibasikunku ooyo uba kwachiindi chiniini eelyo mpawo wamana. 15Nikuba boobo mweelede kwaamba kuti, “Kuti Mwami wayanda, tuyoopona mpawo tuyoochita eechi nikuba eechiya.” 16Mbuli mbukubede, mulalikankayizya mubusintaze bwanu. Kulikankayizya ooku koonse nkwabubi.
17Kufumbwa uzi chiluleme kuchita mpawo wakachilwa kuchichita, kulinguwe nchibi.
The Word for the World International