Jakkobbu 3
3
Lulimi
1Nibakwesu, kutabi bayingi banu baba bayiisyi, , nkaambo mulizi kuti iswe nituyiisya tuyobetekwa zyindilide kapati. 2Nkaambo toonse tuli akulubizya kwiingi, alimwi kuti umwi katalubizyi muli nzyaamba muntu ululeme, ulakonzya kwendelezya mubili wakwe woonse lubo. 3Kuti twabikka tuzangala kumilomo yambongolo kuti zitulemeke, tulazyotolola mibili yazyo yoonse. 4Tulange alubo kumaato mapati; nikuba kuti mapati loko alimwi alatontwa aluwo lupati, alazyotololwa ansoke ndiini kufumbwa mweenzyi nkwayanda kutozya. 5Aboobo lulimi nchizo chiniini alimwi lulalisumpula azintu zipati.
Ndupati biyeni lusaka luumpwa ansasi yamulilo! 6Alimwi lulimi mulilo. Lulimi ninyika italuleme pe akati kazizo zyesu, lubisizya mubili woonse, lukunka mulilo weendelela mubuumi bwakwe boonse, alimwi mbuli mulilo uzwa kubbila lyamulilo. 7Nkaambo musyobo woonse wamunyama awakayuni, waziyavula azilengwa zyamulwizi, zileendelezegwa alimwi zileendelezegwa abantu, 8Pesi taakwe muntu unga uleendelezya lulimi pe ndubi, luzwide buyoka bujeya. 9Andulo tulumbayizya Mwami aTaata, alimwi andulo tutuka bantu, bakalengwa muchikozyano chaLeza. 10Kuzwa kumulomo nguwo ooyo kuzwa kulumbayizya alutuko. Bakwesu, eechi tacheelede kuba mbuboobu pe. 11Kasawu kamwi ngakalakonzya na kugwisya meenda mabotu aalula? 12Nibakwesu, nga mukuyu, ulazyala masansa na, nikuba musamu wamasansa uzyale nkuyu? Taakwe kasawu kalweela kanga kalagwisya meenda mabotu.
Busongo Buzwa KuJulu
13Ngwani musongo alimwi umvwisisisya akati kanu? Abuumi bwakwe bubotu ngatondeezye milimu yakwe mukulifwiinsya kwabusongo. 14Pesi kuti kamuli abbivwe abutangazu mumyoyo yanu, mutalisumpuli pe akukaka kasimpe. 15Busongo oobu tabuli mbuli oobo pe buzwa kujulu, pesi kuti mbwamunyika, tabuli bwamuuya, mbubwa Sikuchenga. 16Nkaambo ooko kuli bbivwe abutangazu, kuyooba lupyopyongano alimwi kuchitwa milimu mibi yoonse. 17Pesi busongo buzwa kujulu chitaanzi buliluleme, eelyo buli aluumuno, buli abubombe, bulalemeka, buzwide luse amichelo mibotu, tabukwe kusalulana nikuba kuwupawupa. 18Alimwi butebuzi bwabululami bubyalwa muluumuno abaabo bachita luumuno.
The Word for the World International