Xa̱bo̱ ebréo̱ 11
11
Xa̱bo̱ tsí ni̱we̱je̱ a̱kui̱ín ná inuu Ana̱ꞌlóꞌ
1Xa̱bo̱ tsí wéje̱ a̱kui̱in ná inuu Ana̱ꞌlóꞌ, mbá jañii a̱kuii̱n nanimbo̱o̱ꞌ rí ma̱grui̱guíi̱ rí gíꞌthu̱u̱n, xúꞌkhue̱n máꞌ ndaꞌyoo̱ mújúu̱n rí ríga̱ rí tsíkujma mba̱ꞌyoo̱ ga̱jma̱á iduu̱. 2Ga̱jma̱á numuu rí xkuaꞌnii ni̱we̱je̱ a̱kui̱ín táta̱-xi̱ꞌñálóꞌ wajyúú, phú ni̱ni̱gu̱u̱ꞌ Ana̱ꞌlóꞌ jaꞌñúu̱. 3Ga̱jma̱á numuu rí wéje̱ a̱kia̱nꞌlóꞌ ná inuu Ana̱ꞌlóꞌ, nduꞌyáálóꞌ rí ikhaa̱ neꞌne-ku̱maa̱ mbá xúgíí rí ríga̱ ná tsu̱du̱u̱ numbaa ga̱jma̱á majñu̱u̱ ajngóo̱. Ikhaa jngó, rí nandoo nduꞌyáálóꞌ xúge̱ꞌ, ni̱gu̱ma-ku̱maa ne̱ ga̱jma̱á majñu̱u̱ rí tsíkujma nákhí wapha.
4Ga̱jma̱á numuu rí ni̱we̱je̱ a̱kui̱in Abél ná inuu Ana̱ꞌlóꞌ, i̱tha̱án máꞌ máján tsi̱gi̱jña̱ꞌ nixnáxi̱i̱ ikhaa̱ xó rí Kaín. Ikhaa jngó niꞌthán Ana̱ꞌlóꞌ rí nda̱a̱ aꞌkhúu̱n jamí ni̱grui̱gíi̱ tsi̱gi̱jñu̱u̱ꞌ. Maske máꞌ wajyúú nijáñuu Abél, xóó máꞌ naꞌthánlóꞌ ga̱jma̱á majñu̱u̱ rí ni̱we̱je̱ a̱kuii̱n ná inuu Ana̱ꞌlóꞌ.
5Ga̱jma̱á numuu rí ni̱we̱je̱ a̱kui̱in Enók ná inuu Ana̱ꞌlóꞌ, ndaꞌyee̱ ni̱ka̱ jiꞌyáa̱ mikhuíí, jamí nánguá nikujmaa̱ ná numbaa ríge̱ꞌ, numuu rí Ana̱ꞌlóꞌ ni̱ka̱a jayáa̱. Ná i̱yi̱i̱ꞌ ajngáa rawuun Ana̱ꞌlóꞌ naꞌthán rí nákhí xóó táꞌga jiꞌyáa Enók, ni̱ni̱gu̱u̱ꞌ Ana̱ꞌlóꞌ jaꞌyoo̱. 6Numuu rí ma̱xáxóo rí ma̱ni̱gu̱u̱ꞌ Ana̱ꞌlóꞌ jaꞌyoo xa̱bo̱ tsí na̱nguá wéje̱ a̱kui̱in ná inuu̱. Xí mbáa nandoo rí maxuꞌma-mina̱ꞌ ná inuu Ana̱ꞌlóꞌ, ginii gíꞌmaa ma̱nimbo̱o̱ꞌ rí xtáa Ana̱ꞌlóꞌ, jamí rí naxnúu̱ rí máján tsí nduꞌyáa̱.
7Ga̱jma̱á numuu rí ni̱we̱je̱ a̱kui̱in Noé ná inuu Ana̱ꞌlóꞌ, nákhí waꞌtháa̱n rí ma̱ri̱gá mbá rí ni miꞌtsú xóó táríga̱, ndiya-makuu̱ Ana̱ꞌlóꞌ jamí ga̱jma̱á ngamí niꞌnii̱ mbá guꞌwá-rguwa ná ma̱jáwíin xa̱bii̱. Ga̱jma̱á numuu rí ni̱we̱je̱ a̱kuii̱n ná inuu Ana̱ꞌlóꞌ, ni̱dri̱gú jamínu̱ꞌ xa̱bo̱ numbaa, jamí ninindxu̱u̱ xa̱bo̱ tsí nánda̱a̱ aꞌkhúun ga̱jma̱á majñu̱u̱ rí ni̱we̱je̱ a̱kuii̱n ná inuu Ana̱ꞌlóꞌ.
8Ga̱jma̱á numuu rí ni̱we̱je̱ a̱kui̱in Abraám ná inuu Ana̱ꞌlóꞌ, neꞌne-mbánuu̱ nákhí waꞌtháa̱n neꞌne Ana̱ꞌlóꞌ rí ma̱ꞌgee̱ ná ꞌgí mbaa rí ma̱grui̱gúu̱ nda̱wa̱á. Jamí nigájnuu̱ ni̱ke̱e̱, maske máꞌ tsíꞌyoo̱ náá i̱ke̱e̱. 9Ga̱jma̱á numuu rí ni̱we̱je̱ a̱kuii̱n ná inuu Ana̱ꞌlóꞌ, nixtáa̱ xómá xa̱bo̱ tsí na̱ꞌkha̱ i̱mba̱ xuajen ná mbaa rí nixuda-mina̱ꞌ Ana̱ꞌlóꞌ rí ma̱janáa̱, asndo xómá rí mbayuu i̱mba̱a̱ꞌ xa̱bo̱. Nixtáa̱ ná awúun guꞌwá-xtíin, xómá rí Isaák ga̱jma̱á Jakób mangiin, tsí ikhaa máꞌ rí nixuda-mina̱ꞌ Ana̱ꞌlóꞌ ga̱jma̱á nindxu̱ún. 10Xkuaꞌnii nixtáa Abraám, numuu rí ni̱gi̱ꞌthu̱u̱n mba̱ꞌyoo̱ xuajen rí ꞌgí jámuu, rí jmína̱a̱ꞌ máꞌ Ana̱ꞌlóꞌ niríya̱ꞌ xkri̱doo jamí neꞌne-mújúun.
11Ga̱jma̱á numuu rí ni̱we̱je̱ a̱kui̱in Sára̱ mangaa ná inuu Ana̱ꞌlóꞌ, nijanáa̱ tsiakhe̱ rí mago̱-édee̱. Jamí neꞌne-xuajii̱n, maske máꞌ a̱ꞌgo̱ tsí tsíꞌne-xuajen jamí nána̱-xíñu guéño máꞌ ñajuu̱n, numuu rí ninimbo̱o̱ꞌ rí kuwiin tsí nixuda-mina̱ꞌ ga̱jma̱á nindxu̱u̱. 12Ikhaa jngó, maske máꞌ phú nikhi̱i̱ Abraám, jamí inu máꞌ ma̱ja̱ñúu̱, maphú mbaꞌiin mi̱ndaꞌkho xa̱bo̱ ri̱jyu̱u̱ꞌ ni̱gu̱mii, xómá a̱ꞌgua̱án jamí xómá we̱ꞌe̱ rí ríga̱ ná rawuun iya a̱pha̱, rí nimbáa tsíꞌngo̱o̱ gágu̱xnuu.
13Mbá xúgíin xa̱bo̱ tsíge̱ꞌ ni̱we̱je̱ a̱kuíi̱n ná inuu Ana̱ꞌlóꞌ, jamí xkuaꞌnii asndo nijáñúu̱, jamí túdri̱guíi̱ rí nixuda-mina̱ꞌ Ana̱ꞌlóꞌ rí ma̱janúu̱. I̱ndo̱ó máꞌ numuu rí ni̱we̱je̱ a̱kuíi̱n ná inuu Ana̱ꞌlóꞌ ikhaa jngó asndo nákhí máꞌ tsíngua̱ꞌ ndiyáa̱ ne̱ jamí ni̱ya̱xíi̱ ne̱. A̱ꞌkhue̱n nithee̱n rí ra̱ꞌkhá xuajñúu̱ ñajuun numbaa ríge̱ꞌ, rí xa̱bo̱ tsí nagóó-ranújngúún ñajúu̱n. 14Rí xkuaꞌnii nithee̱n, jaꞌwu máꞌ ni̱snga̱jmee̱ rí ngrigúu̱n nduꞌyée̱ numbaa ná ma̱ꞌne xuajñúu̱. 15Xí numuu rí ni̱ndxa̱ꞌwa̱-mijnée̱ rí xuajñúu̱ ñajuun numbaa ná nigájnúu̱, asndo wapha máꞌ nithangii̱n ikhín. 16Xómáꞌ ikhii̱n ndiñúu̱ mbá xuajen rí i̱tha̱án mitsaan, rí ꞌgí ná mikhuíí. Ikhaa numuu rúꞌkhue̱n, tsíti̱yu̱u̱ꞌ Ana̱ꞌlóꞌ rí ma̱nindxu̱u̱ Anúu̱, numuu rí neꞌne-mújúu̱n xuajñúú tsúꞌkhue̱n ná mikhuíí.
17Ga̱jma̱á numuu rí ni̱we̱je̱ a̱kui̱in Abraám ná inuu Ana̱ꞌlóꞌ, nixnáxi̱i̱ Isaák xómá tsi̱gi̱jña̱ꞌ, nákhí rí Ana̱ꞌlóꞌ ndiyoo mba̱ꞌyoo xí jañii a̱kuii̱n. Inu máꞌ xtáa̱ rí maxnáxi̱i̱ a̱dée̱ tsí mbátsíi, maske máꞌ nixuda-mina̱ꞌ Ana̱ꞌlóꞌ ga̱jma̱á nindxu̱u̱, 18jamí wapha máꞌ waꞌtháa̱n neꞌne Ana̱ꞌlóꞌ: «Ga̱jma̱á majñu̱u̱ Isaák ma̱gu̱mii xa̱bia̱aꞌ».#11.18 Ajngáa ríge̱ꞌ na̱ꞌkha̱ ná I̱yu̱u̱ꞌ xó ni̱gi̱ꞌdu̱u̱n-muu 21.12. 19Numuu ni̱ju̱mu̱u̱ Abraám rí Ana̱ꞌlóꞌ gíꞌdoo tsiakhe̱ rí ma̱ꞌne rí mbuya̱a mbiꞌñúú asndo tsí nijáñúú. Jamí gakon máꞌ rí asndo xómá rí nijáñuu máꞌ a̱dée̱ jamí ndiyáa̱ mbu̱júꞌ jaꞌnii.
20Ga̱jma̱á numuu rí ni̱we̱je̱ a̱kui̱in Isaák ná inuu Ana̱ꞌlóꞌ, wapha máꞌ niꞌthée̱n rí Jakób ga̱jma̱á Esaú ma̱gu̱ma-tsakun-rámii̱ nda̱wa̱á.
21Ga̱jma̱á numuu rí ni̱we̱je̱ a̱kui̱in Jakób ná inuu Ana̱ꞌlóꞌ, neꞌne-tsakun-rámaa̱ mbámbáa a̱dée José, nákhí rí inu máꞌ ma̱ja̱ñúu̱. A̱ꞌkhue̱n ni̱rnga̱du̱u̱n niríguii̱ idxu̱u̱ ná inuu ixe̱ rí gída̱ꞌ ñawúu̱n, kajngó ma̱ꞌne-mba̱a̱ Ana̱ꞌlóꞌ.
22Ga̱jma̱á numuu rí ni̱we̱je̱ a̱kui̱in José ná inuu Ana̱ꞌlóꞌ, nákhí rí inu máꞌ ma̱ja̱ñúu̱ niꞌthée̱n rí ma̱ga̱jnáa i̱ji̱in Israél ná numbaa Ejípto̱, jamí nixná-ñájwii̱n rí ma̱ꞌga̱a itsu̱u̱ mangaa.
23Ga̱jma̱á numuu rí tátée jamí nánée Moisés ni̱we̱je̱ a̱kuíi̱n ná inuu Ana̱ꞌlóꞌ, nákhí rí ni̱gu̱maa Moisés, ni̱rkaꞌwii̱ atsúun go̱nꞌ. Numuu rí kuitsíin cháña̱ꞌ ndiyáa̱, jamí támíñúu̱ eꞌne xtángoo drígo̱o̱ thúngaa.
24Ga̱jma̱á numuu rí ni̱we̱je̱ a̱kui̱in Moisés ná inuu Ana̱ꞌlóꞌ, ído̱ rí nikhi̱i̱ máꞌ, nánguá ndiyoo̱ rí muthan xa̱bo̱ rí nánée̱ ñajuun a̱dée Faraón. 25Rí i̱wa̱á máꞌ ni̱ni̱gu̱u̱ꞌ rí ma̱gu̱ma-ngínáa̱ gajmíi̱ xa̱bo̱ xuajñuu Ana̱ꞌlóꞌ, xó rí ma̱xtáa̱ tsímáá guéño mbégo jayu ná awúun aꞌkhán. 26Numuu ndiꞌyoo̱ rí i̱tha̱án máꞌ gíꞌdoo numuu rí mi̱ꞌthán-xkawíi̱ꞌ ga̱jma̱á numuu Krísto̱ xó rí ma̱gi̱ꞌdoo̱ mbá xúgíí rí gíꞌdoo guéño numuu guáꞌdáá xa̱bo̱ Ejípto̱. Numuu rí nitsijii̱ iduu̱ ná ríga̱ rí máján ma̱grui̱gúu̱ nda̱wa̱á gáꞌne Ana̱ꞌlóꞌ. 27Ga̱jma̱á numuu rí ni̱we̱je̱ a̱kuii̱n ná inuu Ana̱ꞌlóꞌ, nigájnuu̱ ná numbaa Ejípto̱, jamí támíñuu̱ xí ma̱jiꞌnáa thúngaa. Numuu rí ni̱we̱je̱ gúkúu̱, asndo xómá rí ndaꞌyoo̱ máꞌ Ana̱ꞌlóꞌ tsí tsíkujmaa jaꞌnii.
28Ga̱jma̱á numuu rí ni̱we̱je̱ a̱kui̱in Moisés ná inuu Ana̱ꞌlóꞌ, niꞌnii̱ ndxa̱a̱ Páskua̱ jamí nixná-ñájwii̱n rí magu̱u̱ iꞌdi ná rawuun xkrugua, kajngó tsí na̱gu̱díin e̱je̱n tsí ginuu ma̱xáxkajmii̱ i̱ji̱ín xa̱bo̱ Israél.
29Ga̱jma̱á numuu rí ni̱we̱je̱ a̱kui̱ín xa̱bo̱ Israél ná inuu Ana̱ꞌlóꞌ, ninújngúu̱n Iya A̱pha̱ Maña̱ꞌ asndo xómá inuu ju̱ba̱ꞌ mixoo. Ído̱ rí nene̱ ma̱nújngúún xa̱bo̱ Ejípto̱ mangiin, ikhín nixmátu̱ꞌúu̱n jamí nijáñúu̱.
30Ga̱jma̱á numuu rí ni̱we̱je̱ a̱kui̱ín xa̱bo̱ Israél ná inuu Ana̱ꞌlóꞌ, ningáxe̱ xu̱nꞌ rí narugua-maꞌáan xuajen Jerikó, ído̱ rí wámbúu̱n nigótuaꞌée̱n mbá juwan mbiꞌi níjñúu ne̱.
31Ga̱jma̱á numuu rí ni̱we̱je̱ a̱kui̱in Raáb ná inuu Ana̱ꞌlóꞌ, a̱ꞌgo̱ tsí na̱ngu̱jwa̱-mína̱ꞌ nákhí wajyúú, tájáñuu̱ gajmíi̱ xa̱bo̱ Jerikó tsí tánimbu̱únꞌ juyáá Ana̱ꞌlóꞌ, numuu rí tsímáá ni̱grui̱gúu̱n ná guꞌwóo̱ xa̱bo̱ Israél tsí nigóó gúña̱maa mbaa.
32Dí lá xóó gátha̱nꞌlaꞌ rá. Ma̱xáꞌngo̱o̱ mbiꞌi xí ma̱tha̱nꞌlaꞌ ga̱jma̱á numuu Jedeón, Barák, Sansón, Jefté, Dabíd, Samuél jamí tsí ni̱rawíjnga̱a ajngóo Ana̱ꞌlóꞌ wajyúú. 33Ga̱jma̱á numuu rí ni̱we̱je̱ a̱kuíi̱n ná inuu Ana̱ꞌlóꞌ, ni̱ꞌngúu̱n ni̱dríguíi̱ xuajñúú xa̱bo̱ jamí nithan-ñajwii̱n, ni̱xu̱da̱a̱ꞌ mújúun awan, nijanúu̱ rí nixuda-mina̱ꞌ Ana̱ꞌlóꞌ, jamí ni̱ruguáa̱ rawúún i̱ndi̱í phuu. 34Ga̱jma̱á numuu rí ni̱we̱je̱ a̱kuíi̱n ná inuu Ana̱ꞌlóꞌ, ni̱sndui̱ꞌíi̱ agu rí gakhi̱i̱ mi̱ndaꞌkho, jamí nijáwíi̱n ná inuu chíde̱. Ído̱ rí phú níꞌngúu̱n, nixna-mijnée̱ tsiakhe̱, maphú gakhii̱n neꞌne ná niríga̱ xkujndu, jamí ni̱ꞌngúu̱n nini̱i̱ rí magáñúú xa̱bo̱ sia̱nꞌ. 35Xúꞌkhue̱n máꞌ nijúwa̱ꞌ go̱ꞌo̱ tsí ni̱dri̱gúun xa̱bi̱ín tsí nijáñúú ído̱ ndiya̱a mbiꞌñúú.
Xómáꞌ i̱ꞌwíin, nijáñúu̱ ná ni̱gu̱ma-ngíníi̱, jamí ra̱khúu̱n rí ma̱gu̱ma-jáwíi̱n, numuu ndiyáa̱ rí i̱tha̱án máꞌ máján gájúwe̱e̱ꞌ ído̱ rí mbuyaa̱ mbiꞌñúu̱. 36Nijúwa̱ꞌ i̱ꞌwíin tsí waꞌthán-xkawiu̱únꞌ, waxpáthuun, waxtuꞌwúún ga̱jma̱á ñuu ajwa̱nꞌ jamí nigóo̱ géjwa̱nꞌ. 37I̱ꞌwíin nijáñúú ga̱jma̱á itsí, i̱ꞌwíin nithon-ri̱gi̱in ti̱kua̱pha̱a̱ ga̱jma̱á ajwa̱nꞌ rí na̱ro̱thon ixe̱, jamí i̱ꞌwíin nijáñúú ga̱jma̱á chíde̱. Mbá tikhuu̱n ge̱e̱ ñúꞌún nigóo̱-rajúwe̱e̱ꞌ, rí xtíñúu̱ neꞌne xtúún xu̱kú mogo̱ jamí xtúún tso̱toon. Mingíníi̱, nijúwe̱e̱ꞌ ná awúun jamínu̱ꞌ, jamí nikhuáa ni̱gu̱mii̱ nene̱ xa̱bo̱. 38Ná numbaa ríge̱ꞌ ra̱jáꞌyoo rí ma̱ju̱wá xa̱bo̱ tsí xkuaꞌnii májáan a̱kui̱ín. Ge̱e̱ ñúꞌún nigóo̱-rajúwe̱e̱ꞌ ná mbaa niníí, ná inuu júba̱, ná iñúu itsí jamí ná iñúu ju̱ba̱ꞌ.
39Mbá xúgíin xa̱bo̱ tsúꞌkhue̱n, túdri̱guíi̱ rí nixuda-mina̱ꞌ Ana̱ꞌlóꞌ, maske máꞌ phú ni̱ni̱gu̱u̱ꞌ Ana̱ꞌlóꞌ nini̱i̱ ga̱jma̱á numuu rí ni̱we̱je̱ a̱kuíi̱n ná inuu̱. 40Numuu rí Ana̱ꞌlóꞌ niꞌgí-mina̱ꞌ mbá rí i̱tha̱án máján ga̱jma̱á numalóꞌ ikháánꞌlóꞌ, kajngó mbéꞌtháán gágu̱ma-káxáanꞌlóꞌ ga̱jma̱á nindxúu̱n ikhii̱n.
Currently Selected:
Xa̱bo̱ ebréo̱ 11: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.
