Xa̱bo̱ ebréo̱ 12
12
Gu̱ya̱xi̱ílóꞌ Jesús
1Ikháánꞌ mangáánꞌlóꞌ, ra̱ꞌkhá tháán mbaꞌiin xa̱bo̱ tsí ni̱we̱je̱ a̱kui̱ín ná inuu Ana̱ꞌlóꞌ wájun ná níjñálóꞌ nduyalóꞌ. Ikhaa numuu rúꞌkhue̱n, gu̱ni̱ꞌñáálóꞌ janíí mbá xúgíí inii rí na̱we̱je̱-ꞌtha̱nꞌlóꞌ, jamí mbá xúgíí inii aꞌkhán rí naxngróꞌoo nakhuálóꞌ, kajngó ma̱ꞌnga̱ꞌlóꞌ mu̱ga̱yálóꞌ máꞌ xúꞌkhue̱n ná inuu jamba̱a̱ rí kri̱ga̱ ná inalóꞌ. 2Gu̱ya̱xi̱ílóꞌ Jesús, tsí nigíꞌdu̱u̱n jamí ma̱ꞌne-gáxu̱u̱ rí wéje̱ a̱kia̱nꞌlóꞌ ná inuu Ana̱ꞌlóꞌ. Jesús ni̱ꞌngo̱o̱ a̱kuii̱n nimínu̱u̱ꞌ rí ma̱ja̱ñúu̱ ná ixe̱ krúsi̱, táxná-gamiéjuu̱n rí nigájnuu gamakuu̱, numuu ndiꞌyoo̱ rí nda̱wa̱á ma̱xtáa̱ gagi. Jamí xúge̱ꞌ ꞌgíi̱ naꞌthán-ñájwii̱n ná ñawún mújúun Ana̱ꞌlóꞌ.
3Ikhaa jngó, gu̱ya̱xi̱í májánlaꞌ xkri̱doo Jesús, tsí ra̱ꞌkhá tháán gakhe̱ nimínu̱u̱ꞌ nene̱ xa̱bo̱ tsí nune̱ aꞌkhán, kajngó ma̱xáꞌne níꞌnga̱ꞌlaꞌ ni máꞌ mu̱xúne̱-waba-mijnálaꞌ. 4Numuu rí xóó máꞌ túne̱ gakhe̱ a̱kia̱nꞌlaꞌ, rí asndo ma̱ja̱ñálaꞌ ná awúun rí na̱tsa̱ña̱ꞌlaꞌ ga̱jma̱á aꞌkhán. 5Jamí wámba̱ máꞌ nimbumalaꞌ ajngáa rí naꞌthán-máꞌánlaꞌ Ana̱ꞌlóꞌ tsáanꞌ i̱jii̱n ñajwanlaꞌ:
«Táa̱, ma̱xátha̱da̱ꞌ lá nikhuáa ajngáa tsixprígú rí naꞌtháanꞌ Táta̱,
ni máꞌ ma̱xáwabaa a̱kia̱anꞌ ído̱ rí naríyáa̱ꞌ.
6Numuu rí Táta̱ naxprígúu̱ tsí nandoo̱ jaꞌyoo̱,
jamí naxpáthii̱n jámba̱a̱ tsí na̱grui̱guíi̱ ma̱ꞌne a̱dée̱».#12.6 Ajngáa ríge̱ꞌ na̱ꞌkha̱ ná I̱yu̱u̱ꞌ ajngáa ju̱ma̱ 3.11-12.
7Ga̱ꞌngo̱o̱ a̱kia̱nꞌlaꞌ rí naxpríguálaꞌ Ana̱ꞌlóꞌ, numuu rí ikhaa̱ naꞌñalaꞌ xómá i̱jii̱n. Tsáa lá ada̱a̱ tsí na̱nguá nixpríguíí eꞌne tátée rá. 8Xí tsíxpríguálaꞌ Ana̱ꞌlóꞌ xómá naxprígúu̱n xúgíin i̱jii̱n, ra̱ꞌkhá i̱jii̱n ñajwanlaꞌ xúꞌkhue̱n rá, rí e̱je̱n-xáná ñajwanlaꞌ. 9Mbáá máꞌ rí nákhí makáanꞌlóꞌ nixpríguálóꞌ tátiálóꞌ ga̱jma̱á nániálóꞌ ná numbaa ríge̱ꞌ, jamí ndiꞌya-makúu̱nlóꞌ. Á ra̱ꞌkhá i̱tha̱án máján rí mu̱ꞌne̱-mbáníílóꞌ rí naꞌthán Ana̱ꞌlóꞌ Mikhuíí kajngó mbu̱ꞌyalóꞌ jámuu rá. 10Jamí tsí ñajuun tátiálóꞌ ga̱jma̱á nániálóꞌ ná numbaa ríge̱ꞌ, mbá wátha̱ máꞌ tsigu ni̱xpríguálóꞌ, xómá nifruꞌúu̱n ikhii̱n. Xómáꞌ Ana̱ꞌlóꞌ rá, naxpríguálóꞌ kajngó phú i̱tha̱án máján gágájnalóꞌ jamí ma̱ꞌne-jaꞌwáanꞌlóꞌ xómá ikhaa̱. 11Gakon máꞌ rí xúge̱ꞌ nimbá tsixprígú tsíꞌne ne̱ rí ma̱xtáa gagi tsí na̱grui̱gú ne̱, rí naꞌne ne̱ rí ma̱xtáa̱-jínúu̱. I̱ndo̱ó máꞌ numuu rí nda̱wa̱á rí ni̱ꞌngo̱o̱ máꞌ a̱kui̱ín tsí waxprígúún, nakujma rí xa̱bo̱ tsúꞌkhue̱n júwe̱e̱ꞌ tsímáá jamí nuni̱i̱ rí máján.
12Ikhaa jngó, ikháanꞌlaꞌ tsáanꞌ níꞌnga̱ꞌlaꞌ, gu̱ne̱-nuxi̱iꞌlaꞌ ski̱yu̱u̱ꞌ ñawánlaꞌ rí níꞌngo̱o̱ jamí iduu nakhuálaꞌ rí neꞌne xa̱ꞌ. 13Jamí gu̱ꞌyálaꞌ mbá jamba̱a̱ rí jmbu mu̱ꞌgualaꞌ, kajngó ma̱ꞌni̱i nakhuálaꞌ, ra̱ꞌkhá ma̱wi̱ngoo-wóo rí ni̱wi̱ngoo máꞌ.
Rí nithúún tsí tsíyamakuíí Ana̱ꞌlóꞌ
14Gu̱xna̱-míjnálaꞌ tsiakhe̱ rí ma̱juwalaꞌ tsímáá gajmiálaꞌ mbá xúgíin xa̱bo̱, jamí jaꞌwu gájuwalaꞌ ná inuu Ana̱ꞌlóꞌ. Numuu rí nimbáa tsí na̱nguá jaꞌwu xtáa, ma̱xáꞌyoo̱ Táta̱. 15Phú gu̱ña̱wa̱n-mijnálaꞌ, kajngó nimbáa ma̱xáꞌne tsíngua̱ꞌ-mina̱ꞌ inuu rí májáan a̱kui̱in Ana̱ꞌlóꞌ jaꞌyalóꞌ, a̱ꞌkhue̱n ma̱nindxu̱u̱ xómá mbá ajmu̱u̱ iná miꞌkhu̱u̱n rí ma̱ꞌne-maꞌchíin mbaꞌiin tsí ikháanꞌlaꞌ. 16Ma̱xáxtáa nimbáa tsí nabóo ga̱jma̱á xa̱bo̱ tsí táyáa ná majña̱ꞌlaꞌ, ni máꞌ ma̱xáxtáa nimbáa tsí tsíya-makuu Ana̱ꞌlóꞌ xómá neꞌne Esaú, rí ni̱ngu̱jwe̱e̱ rí jaꞌyoo̱ rí ada̱ ginii ñajuu̱n ga̱jma̱á numuu mbá xúba̱ ganitsu. 17Numuu rí ndu̱ya̱álaꞌ máꞌ rí nda̱wa̱á ndiyoo̱ ma̱gu̱ma-tsakun-rámaa̱ gáꞌne tátée̱, jamí táwatri̱guíi̱. Maske máꞌ phú ni̱mbi̱ye̱e̱ꞌ, nánguá ndiyoo rí ma̱thanga̱a a̱kuii̱n rí niꞌnii̱.
18Numuu rí ikháanꞌlaꞌ, túxu̱ꞌmá-mijnálaꞌ ná júba̱ rí nandoo mu̱xkajmalóꞌ, rí nakha, rí mijína jamí rí naxpíbi ná inuu. 19Ni máꞌ túdxawíínlaꞌ a̱ꞌwóo che̱je̱ꞌ, ni máꞌ túdxawíínlaꞌ a̱ꞌwóo Ana̱ꞌlóꞌ xómá ni̱dxawíín xa̱bo̱ Israél wajyúú. Tsí ni̱dxawíín a̱ꞌwá rúꞌkhue̱n, nithan-kháa̱n rí náxíꞌthúu̱n. 20Numuu ndiyáa̱ rí ma̱xáꞌgúu̱n gúne̱-mbáníi̱ rí waꞌxná-ñájúu̱n: «Jámba̱a̱ xa̱bo̱ o xu̱kú tsí nangájmaa júba̱ rúꞌkhue̱n, gíꞌmaa mi̱ꞌxnáa̱ ga̱jma̱á itsí ma̱ja̱ñúu̱ o ga̱jma̱á ixu̱u̱ xkamídá mbo̱ꞌ».#12.20 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá iꞌthán: «o ga̱jma̱á ixu̱u̱ xkamídá mbo̱ꞌ». 21Maphú ngamí nikujma ná júba̱ rúꞌkhue̱n ndiyáa̱, kajngó niꞌthán Moisés: «Asndo naguꞌwúún rí namíñuꞌ».
22Xómáꞌ ikháanꞌlaꞌ rá, ni̱xu̱ꞌmá-mijnálaꞌ ná júba̱ «Sióón», ná xuajñuu Ana̱ꞌlóꞌ tsí xtáa ndaꞌya, ná Jerusalén rí ꞌgí mikhuíí, ná ni̱gi̱mbíin ga̱jma̱á gagi mbaꞌiin mi̱ndaꞌkho ánje̱l rí mune̱-mba̱a̱ Ana̱ꞌlóꞌ. 23Ni̱xu̱ꞌmá-mijnálaꞌ ná nu̱ru̱wa-mijnáa i̱ji̱in Ana̱ꞌlóꞌ tsí ginuu ni̱gi̱ꞌma mbiꞌñúú ná mikhuíí. Xúꞌkhue̱n máꞌ ni̱xu̱ꞌmá-mijnálaꞌ ná inuu Ana̱ꞌlóꞌ, tsí naxuda awan ga̱jma̱á numúú mbá xúgíin xa̱bo̱. Jamí ni̱xu̱ꞌmá-mijnálaꞌ ná ríga̱ xu̱únꞌ xa̱bo̱ tsí májíin tsí neꞌne-káxi̱in máꞌ Ana̱ꞌlóꞌ. 24Ni̱xu̱ꞌmá-mijnálaꞌ ná inuu Jesús tsí naꞌthán-mbáá numalóꞌ ná inuu Ana̱ꞌlóꞌ ga̱jma̱á mbá awan nuxe̱ꞌ, jamí ná ríga̱ iꞌdi rí neꞌne-jaꞌwáanꞌlóꞌ, rí i̱tha̱án máꞌ máján iꞌthán xó rí iꞌdiuu Abél.
25Ikhaa jngó, gu̱dxawíínlaꞌ ajngóo tsí naꞌthánlaꞌ. Numuu rí tájáwíin rí mu̱drígú jamínu̱ꞌ tsí túdxawíín ajngóo tsí nixprígúu̱n ná numbaa ríge̱ꞌ. I̱wa̱á máꞌ ma̱jáxáwiáanꞌlóꞌ ikháánꞌlóꞌ, xí tsídxawíínlóꞌ ajngóo tsí naxpríguálóꞌ asndo ná mikhuíí. 26Nákhí mbiꞌi rí ñúꞌún, niꞌba̱a̱n ju̱ba̱ꞌ neꞌne a̱ꞌwóo Ana̱ꞌlóꞌ, xómáꞌ xúge̱ꞌ naxuda-mine̱e̱ꞌ: «Ma̱ne̱-maꞌba̱a̱n xóó i̱mbo̱ó miꞌtsú, ra̱ꞌkhá i̱ndo̱ó ju̱ba̱ꞌ, rí asndo mikhu mangaa».#12.26 Ajngáa ríge̱ꞌ na̱ꞌkha̱ ná I̱yu̱u̱ꞌ Ajéo̱ 2.6. 27Ído̱ naꞌthée̱n: «Ma̱ne̱-maꞌba̱a̱n xóó i̱mbo̱ó miꞌtsú», rúꞌkhue̱n iꞌthán rí magruígúu̱ rí nandoo naꞌba̱a̱n, rí ni̱gu̱ma-ku̱maa, kajngó ma̱nguanúu i̱ndo̱ó máꞌ rí ríga̱ jámuu.
28Ana̱ꞌlóꞌ naxnálóꞌ tsiakhe̱ rí mu̱ꞌthán-ñájunlóꞌ jámuu. Ikhaa jngó, gu̱rígu̱ulóꞌ gamaku inuu̱. Gu̱ꞌne̱-mba̱a̱lóꞌ xómá rí na̱ni̱gu̱u̱ꞌ ikhaa̱, ga̱jma̱á ngamí jamí gamaku, 29numuu rí Ana̱ꞌlóꞌ ñajuun xómá agu rí naꞌne-gámbo̱o̱ mbá xúgíí.
Currently Selected:
Xa̱bo̱ ebréo̱ 12: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.
