Xa̱bo̱ ebréo̱ 10
10
Mbóó miꞌtsú nijáñuu Krísto̱ ga̱jma̱á numuu aꞌkhán
1Rí xtángoo drígo̱o̱ Moisés, xómá mbá nákoo rí máján ma̱ꞌkha̱ nda̱wa̱á ñajuun ne̱, ra̱ꞌkháa máꞌ rí phú gakon. Ikhaa jngó, tsíꞌngo̱o̱ ne̱ gáꞌne-káxi̱in xa̱bo̱ tsí naguwá ná inuu Ana̱ꞌlóꞌ mbámbá tsigu rí mu̱xna̱xíi̱ mbámbá miꞌtsú ikhaa máꞌ xuñúú xu̱kú tsí nijáñúú. 2Xí numuu rí tsi̱gi̱jña̱ꞌ rúꞌkhue̱n naꞌne-káxi̱in xa̱bo̱, náxármáꞌáan máꞌ a̱kuíi̱n rí gíꞌmii̱ aꞌkhán, jamí mu̱ni̱ꞌñáa̱ ru̱xna̱xíi̱ tsi̱gi̱jña̱ꞌ ná inuu Ana̱ꞌlóꞌ xúꞌkhue̱n rá. 3I̱ndo̱ó máꞌ numuu rí xu̱kú tsí nijáñúú, tsúꞌkhue̱n naꞌne rí mbámbá tsigu ma̱rmáꞌáan a̱kuíi̱n rí gíꞌmii̱ aꞌkhán ná inuu Ana̱ꞌlóꞌ. 4Numuu rí iꞌdiúún xede̱ jamí tso̱toon tsíꞌngo̱o̱ ne̱ gárngudi̱i aꞌkhán.
5Ikhaa jngó, nákhí ni̱ꞌkha̱ Krísto̱ ná numbaa ríge̱ꞌ, niꞌthúu̱n Ana̱ꞌlóꞌ:
«Tsíyaaꞌ rí mi̱xnáxi̱in xu̱kú tsí nijáñúú ni máꞌ tsi̱gi̱jña̱ꞌ ná inaaꞌ.
Ikhaa jngó, nithane̱-ku̱maa xuyuꞌ.
6Tsíni̱gua̱a̱ꞌ máꞌ rí mi̱kha-rámii xu̱kú tsí nijáñúú ná inaaꞌ,
ni máꞌ tsíni̱gua̱a̱ꞌ tsi̱gi̱jña̱ꞌ ga̱jma̱á numuu aꞌkhán.
7Ikhaa jngó ni̱tha̱nlo̱ꞌ: “Táta̱ Mikhuíí, ge̱jyoꞌ xtáá,
kajngó ma̱ne̱ rí naꞌne a̱kia̱anꞌ.
Xómá ka̱ma naꞌthán ná i̱yi̱i̱ꞌ rí jambúxu̱u̱ꞌ ga̱jma̱á numuꞌ”».#10.5-7 Ajngáa ríge̱ꞌ na̱ꞌkha̱ ná I̱yu̱u̱ꞌ ajmúú 40.6-8.
8Ginii niꞌthée̱n: «Tsíyaaꞌ rí mi̱xnáxi̱in xu̱kú tsí nijáñúú ni máꞌ tsi̱gi̱jña̱ꞌ ná inaaꞌ, xúꞌkhue̱n máꞌ tsíni̱gua̱a̱ꞌ rí mi̱kha-rámii xu̱kú tsí nijáñúú ná inaaꞌ, ni máꞌ tsi̱gi̱jña̱ꞌ ga̱jma̱á numuu aꞌkhán», maske máꞌ xtángoo naꞌthán rí mi̱xnáxe̱ mbá xúgíí rúꞌkhue̱n. 9A̱ꞌkhue̱n niꞌthée̱n xóó: «Táta̱ Mikhuíí, ge̱jyoꞌ xtáá, kajngó ma̱ne̱ rí naꞌne a̱kia̱anꞌ». Xkuaꞌnii kajngó Ana̱ꞌlóꞌ nirígúu awan rí wayuu, a̱ꞌkhue̱n niꞌgíi̱ awan rí nuxe̱ꞌ. 10Ikhaa jngó na̱ka̱-ra̱gu̱ma-jaꞌwáanꞌlóꞌ, numuu rí Krísto̱ niꞌnii̱ rí nandoo Ana̱ꞌlóꞌ nákhí nixnáxe̱-mine̱e̱ꞌ rí ma̱ja̱ñúu̱. Mbóó miꞌtsú nijáñuu̱ jamí jámuu gíꞌdoo numuu ne̱.
11Jamí gakon máꞌ rí jámba̱a̱ dxakuun tsitsíí wéje̱ inuu̱ rí maxnáxi̱i̱ mbaꞌa miꞌtsú ikhaa máꞌ xuñúú xu̱kú tsí nijáñúú, rí ni miꞌtsú tsíꞌngo̱o̱ gárngudi̱i aꞌkhán. 12Xómáꞌ Krísto̱ rá, mbóó miꞌtsú nixnáxi̱i̱ mbóó tsi̱gi̱jña̱ꞌ ga̱jma̱á numuu aꞌkhán jamí jámuu gíꞌdoo numuu ne̱. Nda̱wa̱á a̱ꞌkhue̱n ni̱gi̱ꞌi̱i̱ ná ñawún mújúun Ana̱ꞌlóꞌ. 13Jamí ikhín máꞌ ꞌgíi̱ gíꞌthu̱u̱n, asndo ma̱ga̱nú mbiꞌi rí Ana̱ꞌlóꞌ maskuíji̱in xa̱bo̱ sia̱nꞌ drígo̱o̱ ná agoo nakhúu̱. 14Numuu rí ga̱jma̱á majñu̱u̱ mbóó tsi̱gi̱jña̱ꞌ neꞌne-káxii̱n jámuu tsí ikhaa̱ na̱ka̱-raꞌne-jaꞌwuu̱n. 15Jamí ikhaa máꞌ rúꞌkhue̱n naꞌthánlóꞌ Xu̱u̱ꞌ Ana̱ꞌlóꞌ mangaa, ído̱ naꞌthán:
16«Awan ríge̱ꞌ ma̱gúꞌdo̱ꞌ gajmíꞌ
ído̱ gága̱nú mbiꞌi rúꞌkhue̱n, xkuaꞌnii iꞌthán Táta̱:
Ma̱gíwa̱nꞌ xtángoo drígo̱ꞌ ná awúun a̱kuíi̱n,
jamí ma̱tháán ne̱ ná awúun ju̱múu̱».#10.16 Ajngáa ríge̱ꞌ na̱ꞌkha̱ ná I̱yu̱u̱ꞌ Jeremía̱s 31.33.
Jamí naꞌthée̱n xóó:
17«Ni miꞌtsú ma̱xármáꞌáan a̱kui̱nꞌ ja̱yo̱o̱ aꞌkhúu̱n ni máꞌ rí ra̱máján nini̱i̱».#10.17 Ajngáa ríge̱ꞌ na̱ꞌkha̱ ná I̱yu̱u̱ꞌ Jeremía̱s 31.34.
18Numuu ído̱ rí neꞌne mba̱a̱ a̱kui̱in máꞌ Ana̱ꞌlóꞌ jaꞌyoo aꞌkhánlóꞌ, nánguá máꞌ iꞌyóo rí mi̱xnáxe̱ i̱mba̱ tsi̱gi̱jña̱ꞌ ga̱jma̱á numuu aꞌkhán.
Ndaꞌyóo rí ma̱wajún-gúkuálóꞌ
19Ikhaa numuu rúꞌkhue̱n, a̱ngui̱nꞌ, xúge̱ꞌ rí ma̱goo ma̱ta̱ꞌa̱ꞌlóꞌ ga̱jma̱á mbá jañii a̱kia̱nꞌlóꞌ Ná rí I̱tha̱án Tsúꞌkhaa rá, ga̱jma̱á numuu iꞌdiuu Jesús rí ni̱ga̱díí nákhí nijáñuu̱. 20Ikhaa̱ nirmáꞌthoo̱ mbá jamba̱a̱ nuxe̱ꞌ jamí rí ndaꞌya rí mbayá ikhalóꞌ, rí nanújngoo ná majñu̱u̱ xtíin rí kra̱jngaa, numuu rí xtíin rúꞌkhue̱n naꞌne xtiꞌkhuu xuyuu̱. 21Ikháánꞌlóꞌ, tsáanꞌ xa̱bo̱ guꞌwóo Ana̱ꞌlóꞌ ñajwanlóꞌ, guaꞌdaalóꞌ mbáa tsí jayá idxu̱ún dxakuun tsí maphú gíꞌdoo numuu. 22Ikhaa jngó, mbá jañii a̱kia̱nꞌlóꞌ gúxu̱ꞌmá-mijnálóꞌ ná inuu̱, jamí mbá jañii a̱kia̱nꞌlóꞌ gánimba̱ꞌlóꞌ juꞌyáa̱. Numuu rí ni̱gu̱ma-jaꞌwu̱u máꞌ a̱kia̱nꞌlóꞌ nákhí rí ni̱gata̱a mbá xúgíí rí xkawe̱ꞌ, jamí rí nigaꞌwu̱u máꞌ xuyalóꞌ ga̱jma̱á iya jaꞌwu. 23Ga̱wajún-gúkuálóꞌ jamí ma̱xáꞌne a̱jma̱ a̱kia̱nꞌlóꞌ inuu mbá xúgíí rí nanimba̱ꞌlóꞌ ga̱jma̱á numuu Ana̱ꞌlóꞌ, ná ga̱jma̱á mbá jañii a̱kia̱nꞌlóꞌ guáꞌthi̱ínlóꞌ, numuu rí phú jmbii tsí nixuda-mina̱ꞌ. 24Ga̱xná-gamiéjwanlóꞌ rí mu̱mbáyú-mijnálóꞌ kajngó ma̱wa̱ꞌa̱ a̱kia̱nꞌlóꞌ rí ma̱galóꞌ juꞌñúú xa̱bo̱ jamí rí mu̱ꞌne̱lóꞌ rí máján. 25Mu̱xúꞌyá-ri̱dúúnlóꞌ mbá tikhuun tsí naguꞌwúún máꞌ rí nánguá igóó ná na̱gi̱mbíin a̱ngia̱nꞌlóꞌ, rí a̱gi̱mbáanꞌlóꞌ gajmiálóꞌ a̱ngia̱nꞌlóꞌ kajngó mu̱xprígú-mijnálóꞌ, i̱wa̱á máꞌ xúge̱ꞌ rí nduꞌyáálóꞌ rí nangiyuu máꞌ mbiꞌi rí Ana̱ꞌlóꞌ maxúdaa awan ga̱jma̱á numúú xa̱bo̱.
26Xí nu̱ꞌne̱-ñajwanlóꞌ máꞌ xúꞌkhue̱n aꞌkhán tsáanꞌ ne̱ꞌne̱-nuwiinlóꞌ máꞌ rí gakon, nánda̱a̱ tsi̱gi̱jña̱ꞌ rí ma̱goo mi̱xnáxe̱ ga̱jma̱á numuu aꞌkhánlóꞌ. 27Rí i̱ndo̱ó máꞌ ga̱jma̱á ngamí mu̱waꞌthi̱ínlóꞌ rí ma̱to̱ꞌo̱o̱ awan ga̱jma̱á numalóꞌ, mbiꞌi rí mi̱khiin ga̱jma̱á agu xa̱bo̱ sia̱nꞌ drígo̱o̱ Ana̱ꞌlóꞌ. 28Xí a̱jmi̱i o atsúun xa̱bo̱ ndiyáá rí mbáa xa̱bo̱ na̱nguá ndiyoo gáꞌne-mbánuu xtángawoo Moisés, xa̱bo̱ tsí nu̱xu̱da̱a̱ꞌ awan na̱nguá iñáwíin a̱kuíi̱n rí mu̱xna̱xíi̱ xa̱bo̱ tsúꞌkhue̱n rí ma̱ja̱ñúu. 29Á ra̱ꞌkhá i̱tha̱án mba̱a̱ jamínu̱ꞌ ma̱grui̱gú xa̱bo̱ tsí natsíjmaa A̱dée Ana̱ꞌlóꞌ, tsíya-makuu rí nijáñuu̱, jamí naꞌne-ñawúu̱n Xu̱u̱ꞌ Ana̱ꞌlóꞌ tsí nandoo jaꞌyoo̱, i̱ju̱ma̱ꞌlaꞌ rá. Numuu rí ga̱jma̱á majñu̱u̱ iꞌdiuu Krísto̱ ni̱gu̱ma-jaꞌwii̱ rí ma̱ꞌnii̱ ñajuun Ana̱ꞌlóꞌ jamí ni̱gu̱ma-mbáníí awan nuxe̱ꞌ. 30Numuu rí nduꞌyáálóꞌ máꞌ rí Ana̱ꞌlóꞌ niꞌthán: «Ikhúúnꞌ ma̱rthanga̱alo̱ꞌ rí nune̱ xa̱bo̱. Ikhúúnꞌ máꞌ ma̱ne̱-numa̱alo̱ꞌ mbámbáa».#10.30 Ajngáa ríge̱ꞌ na̱ꞌkha̱ ná I̱yi̱i̱ꞌ rí naꞌthán ikhaa máꞌ xtángoo 32.35. Jamí niꞌthée̱n mangaa: «Ikhúúnꞌ ma̱xu̱ꞌdáa awan ga̱jma̱á numúú xa̱bo̱ xuajñuꞌ».#10.30 Ajngáa ríge̱ꞌ na̱ꞌkha̱ ná I̱yi̱i̱ꞌ rí naꞌthán ikhaa máꞌ xtángoo 32.36. 31¡Á tháán mingínáaꞌlóꞌ xí magatuwáanꞌlóꞌ rí maxpátháanꞌlóꞌ Ana̱ꞌlóꞌ, tsí xtáa ndaꞌya jámuu rá!
32Ga̱rmáꞌáan a̱kia̱nꞌlaꞌ ju̱ya̱á mbiꞌi rí ninújngoo máꞌ, nákhí rí ni̱kú máꞌ nimbiꞌyalaꞌ. Maske máꞌ mbaꞌa inii jamínu̱ꞌ ni̱ꞌkha̱ ná inalaꞌ, ni̱ꞌngo̱o̱ a̱kia̱nꞌlaꞌ ni̱míni̱ílaꞌ jamí niwajúnlaꞌ xa̱ꞌ. 33Mbá tikhuun tsí ikháanꞌlaꞌ waꞌthán-xkawiu̱únꞌ jamí ni̱gu̱ma-ngíníi ná inúú xa̱bo̱, jamí tsí i̱ꞌwíin nene̱-mijná a̱ngui̱ín tsí na̱gu̱ma-ngíníi xkuaꞌnii. 34Xúꞌkhue̱n máꞌ mangaa, niñáwíin a̱kia̱nꞌlaꞌ ju̱ñu̱ú tsí traꞌi̱in géjwa̱nꞌ, jamí gagi a̱kia̱nꞌlaꞌ ni̱ni̱ꞌñá-mijnálaꞌ rí ma̱ga̱taa dríga̱ꞌlaꞌ, numuu ndu̱ya̱álaꞌ rí i̱tha̱án máján jamí jámuu ríga̱ rí mu̱drígúulaꞌ ná mikhuíí.
35Ikhaa jngó, mu̱xúni̱ꞌñáálaꞌ-raꞌne jañii a̱kia̱nꞌlaꞌ ná inuu Ana̱ꞌlóꞌ, numuu rí ikhaa rúꞌkhue̱n ma̱ꞌne rí phú mba̱a̱ rí máján ma̱janálaꞌ. 36I̱ndo̱ó máꞌ ndaꞌyóo rí ma̱ꞌngo̱o̱ a̱kia̱nꞌlaꞌ, kajngó ído̱ rí wámba̱ꞌlaꞌ ne̱ne̱laꞌ rí nandoo Ana̱ꞌlóꞌ, a̱ꞌkhue̱n rí mbu̱ya̱alaꞌ rí nixuda-mine̱e̱ꞌ. 37Numuu rí naꞌthán ná ajngóo Ana̱ꞌlóꞌ:
«I̱mbá lájwíin máꞌ iꞌyóo
rí ma̱ꞌkha̱ tsí wéje̱ máꞌ rí ma̱ꞌkha̱.
Náxágajyúu̱ máꞌ.
38Xómáꞌ xa̱bo̱ tsí nánda̱a̱ aꞌkhúun,
ma̱xtáa̱ jámuu ga̱jma̱á numuu rí wéje̱ a̱kuii̱n ná inuu Ana̱ꞌlóꞌ.
I̱ndo̱ó máꞌ numuu rí, xí nathangaa̱ rá,
ma̱xáni̱gu̱ꞌ gáꞌnii̱».#10.38 Ajngáa ríge̱ꞌ na̱ꞌkha̱ ná I̱yu̱u̱ꞌ Abakúk 2.3-4.
39Xómáꞌ ikháánꞌlóꞌ rá, ra̱ꞌkhá xa̱bo̱ tsí nathangi̱in jamí nune̱-mbáti̱ga̱-mijná ñajwanlóꞌ, rí xa̱bo̱ tsí wéje̱ a̱kui̱ín ná inuu Ana̱ꞌlóꞌ jamí najáwíin jámuu ñajwanlóꞌ.
Currently Selected:
Xa̱bo̱ ebréo̱ 10: tcf
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Global. Creative commons license CC BY-SA.
