Mateyo 13

Kambyo kamushangi

(Maako 4.1-9; Luuka 8.4-8)

1Alimwi mu buzuba bweenka Jesu wakazwa mu ng'anda, a kuunka kukkala kumbali a chizhiba. 2Imbunga ya bantu yakamubunganina chakwaamba, Wakanjila mu bwaato a kukkala. Pesi imbunga yakashala kainvi kumbali a chizhiba. 3Amane wakabaambila zhintu zhiinji kwiinda mu twaambyo, wakaamba ati,

“Umwi mulimi wakaunka mukushanga mbuto yakwe. 4Mbuli mbwakalinga kumwaya, imwi mbuto yakalokela munzhila, a balo bayuni bakaza a kwiilya 5Imwi yakalokela amabwe, alo awo atakalinga bulongo buunji. chakufambana yakamena, nkambo bulongo bwakalinga bushoonto, 6Pesi lizuba nilyakabala chishango chakalinga kumenene chakayuma nkambo miyanda tiyakalinga anshi maningi. 7Imwi imbuto yakalokela mumyunva amane niyakakomena yakayaswa a myunva. 8Pesi mbuto imwi yakalokela mubulongo bu botu, alimwi a kuzhala michelo ili chisambomwe, makumi otatwe, makkumi chiloba kwiinda yakashangwa,

9Mfumbwa uchite matwi, a nvishe!”

Bupanduluzhi bwa kaambyo

(Maako 4.10-12; Luuka 8.9,10)

10Bashichiiya bakaza kulinguwe akubuzha ati, “Nkambo nzhi ulaamba mutwaambyo ku bantu?”

11Jesu wakanviila ati, nkambo luzhibo lwa “Maseseke lwa bwami bwa ku julu bwa pegwa kuli ndimwe, pesi kutaashi kuli mbabo. 12Mfumbwa uchite ulakupegwa kwiindilila. Alimwi balaakuba anzhizho kwiindilila. Pesi uyo oonse utachite, akoko koonse nkubachite kulakunyangwa kuli mbabo. 13Nchicheco nchingambila mu twaambyo kuli mbabo. “Nibabona, tababoni, nibanva tabanvishi, tabanvi naa kunvisha. 14Muli mbabo chishinshimi cha Izaya chakazuzikizhigwa,

“Mulakuna kunva lyoonse pesi tamukanvishi,

mulakuna kubona lyoonse pesi tamukaboneshi.

15Nkambo mizeezo yabo njifaafi tabayeeyi kabotu,

nchiyumu kunva amatwi abo,

alimwi meenso abo bajala.

Nikwatakalinga ubo, niinga abo meenso abo abona,

matwi abo nakanva,

mizeezo yabo niinga yakanvisha,

alimwi niinga bakasanduka, maamba Leza,

alimwi niinga ndabaponya.’

16Pesi alelekwa menso anu nkambo alabona, alimwi amatwi anu nkambo alanva. 17Kashimpe ndamwaambila, bashinshimi baanji alimwi a bantu baluleme bakalikuyandishisha kubona nchimubona, Pesi taaku bakachibon, alimwi akunva nchimunva pesi taaku bakachinva.

Jesu wakapandulula kambyo ka mulimi

(Maako 4.13-20; Luuka 8.11-15)

18Amunve ono ku kambyo kamulimi nchikaamba. 19Naa umwi wanva makani abwami alimwi kataanvishi, mubibi ulaza akwabweza makani ayo akashangwa mu myoyo yabo. Iyi nimbuto yakashangwa kumbali a nzhila. 20Imbuto yakalokela amabwe ilaimikanina babo bantu, chiindi nibanva ijwi balautambula chakusekelela. 21Pesi nkambo talichite miyanda, lilakkala boo chiindi chishoonto. Naa mapenzhi akupenzhegwa kwabashikila nkambo ka jwi, balafaambana akuwa. 22Imbuto yakawila akati kamyunva ilaimikanina bantu banva jwi, pesi nkambo kakulibilika kwa buumi ubu alimwi akubejegwa kwa buvubi ijwi lilashinkilizhigwa kulichita kwaamba litazhali michelo. 23Pesi imbuto yakawila mubulongo bubotu, ilaimikanina babo banva jwi alimwi akulinvisha. Iyi njiyeeyo izhala michelo, izhala mwaanda, chisambomwi naa zhiindi makkumi otatwe ku zhakashangwa.”

Kambyo ka nzau

24Jesu wakabaambila kambyo akamwi ati, “Bwami bwa ku julu buli mbuli muntu wakashanga mbuto ibotu mu muunda wakwe. 25Pesi boonse kaboona mashiku, shinkondonyina wakaza a kumwaya nzau akati ka maila, akaunka. 26Ono maila nakakomena alimwi mitwi niyakaboneka, ayalo nzau yakaboneka. 27Basebenzhi bakaza kuli shemalelo wabo akubuzha ati, ‘Mwami saa tona kumwaya mbuto ibotu mu munda waako? Ino nzau zhazwa kuli?’ 28‘Shinkondoma nguwakachita ichi,’ wakabanviila. Basebenzhi bakamubuzha ati, ‘Saa ulanda tuunke tuzhizhule?’ 29Wakanviila ati, ‘Taaku,’ nkambo mwano kuzhuzula nzau mulanakuzhulila kuntukomwi a maila. 30Amuzhileke zhikomenene antomwi kushikila chiindi chakutebula. Achiindi icho ndakubaambila batebuzhi kwaamba. Amutaangune kubwezelela nzau alimwi muzhaange mumile kwaamba zhitentwe, amane mubunganye maila akwaleta mubutala bwangu.’ ”

Kambyo ka nseke ya masitadi a mimena

(Maako 4.30-32; Luuka 13.18,19)

31Ono wakabaambila kambyo a kamwi ati, “Bwami bwa ku julu buli mbuli ka nseke kamasitadi. Ako muntu nkabwaza a kushanga mu munda wakwe. 32Nakuba kwaaamba nkukaseke kashoonto anseke zhoonse, Pesi naa chakomena chilaba chinsamu, amana a tuyuni tulaza a kuyaka binswa mumitabi yanchicho.”

Kaambyo ka mamena

(Luuka 13.20-21)

33Wakabaambila alimwi kaambyo a kamwi ati, “Bwami bwaku julu, buli mbuli mukaintu ubweza mamena a kusanganya magaloni onee a fulaulo, kushikila wafutumuka.” 34Jesu wakaambila mbunga ya bantu zhintu zhoonse izhi mu twaambyo, taaku nakaamba chintu chili choonse kwakubula kusebenzha twaambyo. 35Ono icho chakaambwa kwiinda mumushinshimi chakazuzikishigwa.

“Ndakujalula mulomo wangu mu twaambyo,

Ndakwaamba zhintu zhisisilwe kuzwa chiindi nyika niyakalengwa.

Jesu wakapandulula Kaambyo ka nzau

36Amane Jesu wakaishiya mbunga ya bantu a kunka mu ng'anda, bashichiiya bakwe bakaza kuli nguwe a kwaamba, “Tupandulwile kaambyo ka nzau mu munda nchikaamba.” 37Wakanviila ati, “Uyo wakashanga mbuto ibotu ngu Mwana a Muntu. 38Muunda nii nyika amana imbuto ibotu ilaimikanina bantu ba Bwami, Nzau mbantu bamubiibi, 39alimwi shinkondoma wakamwaya mbuto ngu dyabooli. Butebuzhi mamanino a musela, alimwi batebuzhi mbangele. 40Mbuli nzau mbuzhizhulaulwa a kuwaalwa mumulilo, ono mbweshi chikabe kumamanino a musela. 41Mwana a Muntu ulakutuma bangele bakwe kugusha zhoonse nzau mu Bwami bwakwe izho, zhichitisha bantu kubisha a kuchita zhibiibi, 42Balakubawaala mu mulilo ubbebbele umo mweshi bakalile a kulumanya meno, 43Amane baluleme balakumwekamweka mbuli lizuba mu Bwami bwa Ishi wabo. Oonse uchite matwi anve.

Kaambyo kalubono lusisilwe

44“Ono bwami bwa ku julu buli mbuli lubono lusisilwe mumunda, naa muntu walujana ulalusisa alimwi ulaunka akuuzha zhoonse nzhachite alimwi a kuula munda uyo.

Kambyo ka mabwe amwekamweka adduula

45Alimwi bwami bwa ku Julu buli mbuli muntu shikuzha ulangaula mabwe amwekamweka adduula. 46Ono naa waajana mabwe amweka mweka adduula, ulaunka alimwi a kuuzha zhintu zhakwe zhoonse alimwi akwaula.

Kaambyo kantangala

47“Alimwi Bwami bwa ku julu buli mbuli bazeli ba nswi, bawala tunzabwe twabo mu maanzhi, a kujata nswi zhi pusene pusene. 48Ono naa ntangala yazula, muzeli ulaigusha mumanzhi a kwibika atala, amana akukkala anshi akutalika kusala nswi zhili kabotu a kuzhibika mumitaanga pesi zhibiibi zhoonse ulazhisowa. 49Ichi mbweshi chikabe kumamanino a musela uyu, bangele balakuza a kwandanya baluleme kuzwa kubabishi 50alimwi balakubawala mumulilo ubbebbele, mwalo umo mweshi bakalile a kulumanya meno.

Mashimpe apya a kaiindi

51Ono saa mwazhiinvisha zhintu izhi zhoonse?” Jesu wakabuzha ati, “Mbumbubo,” bakanviila. 52Wakaamba kuli mbabo ati, “Abobo, oonse muii wamulawo uba shichiiya mu Bwami bwaku julu uli mbuli mwiine ng'anda ugusha zhintu zhipya a zhakaindi kuzwa mu ng'anda yakwe.”

Jesu wakakakwa ku Nazaleti

(Maako 6.1-6; Luuka 4.16-30)

53Ono Jesu nakamana twaambyo utu, wakazwa kuzwa uko. 54alimwi wakajokela kumunzhi wamuzhaabo, wakatalika kuiisha bantu muma sinagogo abo, alimwi boonse bakamunva bakakankamana a kubuzha ati, “Ina uyu muntu busongo a nguzu zhamalele izhi zhoonse wakazhijana kuli? 55Saa uyu taashi Mwana a shikubeza? Saa banyina tabashi ba Maliya, alimwi bamakwabo saa tabashi bene Jemusi a Josefa a Simyoni a Judasi? 56Saa bamakwabo ba makaintu tabali a ndiswe? Ina muntu uyu izhi zhintu zhoonse wakazhijana kuli?” 57Amane Jesu bakamukaka, Pesi Jesu wakabambila ati, “Mushinshimi ulalemekwa koonse pesi kutaashi mumunzhi wamuzhaabo a mukwashi wakwe.” 58Alimwi taaku nakachita maleele aanji kulya nkambo kakubula lushomo muli mbabo.

Currently Selected:

Mateyo 13: STP

Highlight

Copy