Mateyo 12

Mubuzho waamba a Nsabata

(Maako 2.23-28; Luuka 6.1-5)

1Ono mu chiindi icho, Jesu wakalinga kweenda mumunda wamaila mu Nsabata, amane bashichiiya bakwe bakanva nzala bakatalika kutyola mitwi ya maila akulya. 2Bama Faliisi nibakabona icho bakamwaambila ati, “Bona bashichiiya bako batokuchita chitazumizhigwi amulawo mu buzuba bwa Nsabata 3Jesu wakanviila ati, “Saa tamuna kubala Devedi nchakachita, chiindi walo abaabo mbakalinga ambabo nibakafa nzala? 4Wakaunka mu ng'anda ya leza, alimwi abenzhinyina bakalya chinkwa chisala chakapegwa kuli leza, iicho nchibatakali kwelele kulya, chita boo bapaizhi beenka. 5Saa taaku nimwakabala mumulawo wa Mozesi mbuli bapaizhi ba mu ng'anda ya leza mbubakali kutyola mulawo wa Buzuba ubu? pesi taaku nibakapegwa mulandu? 6Ono ndamwaambila ati, ano mpali wiinda tempele. 7Nimwakazhiba majwi aya nchaamba, ‘Ndanda luse kutaashi zhituuzho zha banyama,’ Nimwatakatamikizha bantu batachite mulandu. 8Nkambo Mwana a Muntu ngu Mwami wa Nsabata.”

Muntu wakalikuchite lyaanza lyakalikuyuminine

(Maako 3.1-6; Luuka 6.6-11)

9Jesu nakazwa kubusena uko wakaunka akunjila mu sinagogo yabo. 10Uuko kwakalinga musankwa umwi wakalinga mulema lyaanza. Amane bantu kabalangaula akumupela kaambo, bakamubuzha kwaambaati, “Saa chili mu mulawo kuponya muntu mu Nsabata?”

11Alimwi wakabanviila ati, “Ino nguni ali ndimwe wiinga kachite mbelele yomwi yawiila muchilindi mu buzuba bwa Nsabata amana saa inga taigushi? 12Alimwi muntu ulayandika maningi kwiinda mbelele! Abobo mulawo ulazuminya kuchita chilikabotu mu buzuba bwa Nsabata.” 13Nakamana Jesu wakambila musankwa wakalinga kuyuminine lyaanzaati, “Olola lyaanza lyako.”

Amane wakalyolola lyaanza lyakwe alimwi lyakaba kabotu bweenka mbuli lyeenzhinyina. 14Penka awo, bamafaliisi bakaunka akupangana mbweshi ba mujaye Jesu.

Musale wa Leza

15Ono Jesu nakanva mizezo njibakali kuchite ali nguwe wakazwako kubusena, alimwi imbunga yabantu yakamuchilila amane wakaponya boonse bakalinga balwazhi. 16Alimwi wakabaambila kwaamba batamuyubululi. 17Ichi chakachitika kuzuzikizha chakaamba Mumushishimi Izaya. “Ngooyu musebezhi wangu,

18ngundakasala,

ngunyandisha alimwi mulinguwe ndakomana.

ndakutuma Muuya wangu alinguwe,

Alimwi ulakwaambilizha lubeta lwakwe lulyelele ku nyika.

19Takakazhi naa koolobezha,

Taaku naba omwi eshi akanve jwi lyakwe mumazhila.

20Teshi akatyole katete kapapukile

nakuba kuzhimya kamumuni kayaka

Ulakuzumanana mpaka mashimpe akazunde.

21Mu liina lakwe mashi alakubika bulangizhi bwabo.”

Jesu bakamubejesha kusebenzha muya wa Belizebule

(Maako 3.20-30; Luuka 11.14-23)

22Amane bakamuletela muntu wakalinga kuchite myuuya ibiibi wakalinga moofu alimwi kalichibuulu, alimwi Jesu wakamuponya, kuchita kwaamba aambe akubona antomwi. 23Ono mbunga yoonse ya bantu yakakankamana ku nchakachita. Bakabuzha ati, “Saa uyu inga kali Mwana a Devedi?”

24Ono pesi bafaliisi nibakanva ichi bakanviila ati, “Ngu beeluzebebu mweendelezhi wa myuuya ibiibi ngu umupa nguzu uyu mweenzuma zhakugusha myuuya ibiibi.”

25Ono Jesu wakazhiba nchibakali kuyeeya wakabaambila ati, “Naa bwami bwalilwana bwiine, bwami ubo bulafa. Alimwi munzhi naa mukwashi wapalangana akulilwana mukwashi uyo ulawa. 26Alimwi naa Satani walilwana mubwami bwakwe ulalilwana mwiine, ino ing bwami bwakwe bwaimikana buti? 27Alimwi naa ndagusha myuuya ibiibi anguzu zha Beeluzabelu, amungabile, ino imwe bantu balasebenzha nguzu zhabaani kugusha myuuya ibiibi? Ono anu balakuba mbubabeteshi banu. 28Pesi naa kwiinda mu Muya wa Leza kwaamba ndagusha myuuya ibiibi, nkukwaamba bwami bwa Leza bwaza ali ndimwe.

29“Taaku muntu wiinga wanjila mu ng'anda yashimanguzu akubweza zhintu zhakwe, chiita watalikila kwaanga shinguzu uyu. Niinga wanjila kubweza zhintu mu ng'anda yakwe.

30Alimwi mfumbwa muntu utali andime ngushinkodoma, mfumbwa utavuuni kubunganya ulamwaya. 31Akambo aaka, ndamwambila kwaamba bantu blakonzha kulekelelwa zhinyonyono azhibiibi nzhibaamba. Pesi uyo oonse usampaula Muuya Usalala takalekelelwi. 32Alimwi oonse waamba zhimwi zhintu zhibiibi ku Mwana a Muntu ulakonzha kulekelelwa, Ono uuyo waamba zhibiibi ku Muuya Usalala takalekelelwi, ku chiindi chino nikuba ku chiindi chiza.”

Chisamu a michelo ya nchicho

(Luuka 6.43-45)

33“Ono kwaamba ube muchelo ubotu, ulandika kuba chisamu chichite nseba ilikabotu, naa kochite chisamu chitalikabotu, ulakuba muchelo ubiibi. Chisamu chilazhibwa kwiinda mu michelo njichizhala. 34Imwe nonzoka! Ino inga mwaamba buti zhintu zhibotu kakuli muli babiibi? Nkambo mulomo wa muntu ulaamba chizwile mukati ka moyo. 35Muntu mubotu ulaleta zhintu zhibotu kuzwa muchibikilo sha zhintu zhibotu, muntu mubyaabi ulaleta zhintu zhibiibi zhizwa muchibikilo.

36“Nchobeni ndamwaambila kwaamba, mubuzuba bwalubeta bantu balakupegwa mulandu ku mazwi oonse atachite nchito ngubakaamba. 37Majwi ako alakusebenzhegwa kukubeteka, kwaamba ulichite mulandu naa tochite.”

Chitondezho cha Joona

(Maako 8.11-12; Luuka 11.29-32)

38Ono bamwi ba maii ba mulawo aba Faliisi bakaambila Jesu ati, “O Muii,” “Tulanda kwaamba utuchitile chitondezho.”

39“Wakanviila ati, “Musela ubiibi alimwi ushizhimambe, ulalomba chitondezho! Pesi taaku nachiba chomwi ncheshi bapegwe chita boo cha mushinshimi Joona. 40Bweenka Joona mbwakakkala mumala answi, mazuba otatwe a mashiku otatwe, Awalo Mwana Muntu ulakuba anshi a nyika kwamazuba otatwe a mashiku otatwe. 41Buzuba bwalubeta, bantu baku Niniva balakuwimina musela uyu a kuupa mulandu, nkambo balo bakasanduka kuzwa kuzhibibi zhabo nibakanva Joona kakambauka, alimwi ndamwabila, nkwali muntu ano wiinda Joona. 42Buzuba bwalubeta muka Mwami uzwa ku musanza, ulakuwiimina uyu musela a kuupa mulandu, nkambo walo wakeenda kuzwa kweela kwa chishi kulaala a kuza mukunva ku yiisha kwabusongo bwa Sololmoni. Pesi ano nkwali muntu wiinda Solomoni.

Kujokela kwa muuya ubiibi

(Luuka 11.24-26)

43Naa muuya ubiibi wazwa mu muntu, uleendaana muchipayuma a kulangaula busene bwakupumunina. Naa wabula kujana akupumunina, 44Ulaamba, ‘Ndajokela ku ng'anda yangu, amana ulaunka a kujokela alimwi, naa wajana mu ng'anda taaku chilimo, ulabaamba mo kabotu. 45Alimwi ula jokela a kuletelawo aimwi myuuya ibiibi iliciloba kwiinda nzhiyo, ilaza a kukkala. Amane buumi bwa muntu bulabija kwiinda mbubwakalinga kumatalikilo. Mbubobo mbweshi chikabe kumusela ubibi uyu.”

Banyina Jesu a Bamakwabo

(Maako 3.31-35; Luuka 8.19-21)

46Ono Jesu kachibandika ku mbunga ya bantu, banyina aba makwabo bakashika bakaimikana asengwe, kabayanda kwaamba anguwe. 47Umwi wabantu wakamwaambila ati, “Banyoko abamakwanu baliinvi ansengwe, balanda kubandika andiwe.” 48Jesu wakanviila ati, “Ina ba maa a bamakwesu mbaani?” 49Wakatondeka ku bashichiiya bakwe a kwaamba ati, langa, “Ba maa a bamakwesu mbaaba! 50Mfumbwa uyo uchita nchayanda Taata waku julu, ngumukwesu alimwi mbu ba maa.”

Currently Selected:

Mateyo 12: STP

Highlight

Copy