Imbombo 1

1 # Luk1.1-4. Mughindikiwa Tiyofilasi, mwibuku lyangu ilya bwandilo ngakusimbila nisya findu fyosi fyo u Yesu akabombagha nukumanyisya, 2mupaka pisiku lyo akasenyiwagha ukubuka kumwanya, bo abalaghila mwa Mbepo Mwikemo abatumiwa bo akabasala. 3Bo ukutamiwa kwake kwamala, u Yesu akababonekela mumasiku fote mutubalilo utwingi, pakusimikisya ukuti naloli mumi. Abene bakamutesya, po akayugha nabo nisya Bunyafyale bwa Chala. 4#Luk24.49.Bo abungana nabo poka, akabalamula akati, “Mutakafumemo mu Yelusalemu, loli mulindililaghe ipangano lya Tata, lyo akati, mukalifwa kwa une, 5#Mat3.11; Miko1.8; Luk3.16; Yoh1.33. pakuti u Yohani akabosya na misi, loli mumasiku amapala mukwisa pakosiwa nu Mbepo Mwikemo.”

U Yesu akusenyiwa pakubuka kumwanya

6Bo abatumiwa babungana poka nu Yesu, bakamulalusya bakati, “Malafyale, imba pakabalilo aka utanganyokesya sona Ubunyafyale kwa Izilayeli?”

7Po akababusya akati, “Tesinyu umwe pakumanya ichinja nakabalilo ko u Tata apimite mumaka ghake mwene. 8#Mat28.19; Miko16.15; Luk24.47-48.Loli mukwisa pakupokela amaka, bo u Mbepo Mwikemo isa papinyu, po mukwisa pakuba bakamboni bangu mu Yelusalemu, na mu Yudeya mosi, na mu Samaliya, mupaka kubumalilo bwa chisu.”

9 # Miko16.19; Luk24.50-51. Bo ayugha sisisi, akasenyiwa pakubuka kumwanya bo bakumutesya, sona akafifiwa ni bingu.

10Bakaba bakali bakutesya kumwanya bo akubuka, po umwakukenusya bubu abanalume babili bo bakafwala amalaya amaswepu bakimilila pambali pabo, 11nukubalalusya ukuti, “Mwe bandu ba mu Galileya, choni cho mwimilile papapo mukutesya kumwanya? U Yesu yo asenyiwa kukwinyu ukubuka kumwanya akwisa pakunyokela bububu, ukuyana namo mukamutesekesya akubuka kumwanya.”

Uwa kupyana pa Yudasi asaliwa

(Matayi27.3-10)

12Po abatumiwa bakanyokela ku Yelusalemu ukufuma kwighamba ilya misyunguti, lyo likaba papipi na kaya ka Yelusalemu, lyo bakendaghako pisiku lya kutusya. 13#Mat10.2-4.Bo bingila, bakakwela kuchipinda icha pamwanya ko bakikalaghako. Mula mula mukaba u Pitala nu Yohani, u Yakobo nu Andileya, u Filipu nu Tomasi, u Batulomeyo nu Matayi, u Yakobo umwana wa Alifeyo, nu Simoni u Ziloti, nu Yudasi umwana Yakobo. 14Bosi baba bakabunganagha pipi pipi pakwiputa, poka na bakolo nu Maliya ung’ina wa Yesu, na bawamwabo.

15Mu masiku ghala, u Pitala akimilila pakati pabanine, (muchilundilo cha bandu bo bakaba ngati wanu handiledi twende bosi poka), nukuyugha ukuti, 16“Mwe bakamu bangu, amasimbo ghakwanilisiwe gho u Mbepo Mwikemo akayugha ukwendela mwa Davedi nisya Yudasi, yo akalongosya abandu bo bakamukola u Yesu. 17Pakuti akabelengiwa poka nutwe, pakupokela ichigaba cha mbombo yake.

18(Akaghula umughunda ni ndalama syo akapokela chifukwa cha mbibi syo akabomba, po akawila umutu, ulufukwe lwake lukapunda, sona amala ghake ghakafumila kusi. 19Po sisisi sikamanyikwa nabosi bo bakikalagha mu Yelusalemu, po munjugha yabo bakawita umughunda ghulaghula ukuti Akeledama ko kuti, “Umughunda wa Libanda.”)

20Pakuti sisimbiwe mwibuku lya Masalimo ukuti,

‘Yileke inyumba yake yibe chisami,

nayumo umundu atakikalaghemo,

sona nimbombo yake yumo apyanilepo.

21Pololi chikulondiwa pakusala yumo mubanalume bo bakabanga nutwe akabalilo kosi ko u Malafyale u Yesu akendagha nutwe, 22#Miko1.1-4; Mat3.6.ukwandila palosyo lwa Yohani mupaka pisiku lyo akasenyiwagha pakubuka kumwanya ukutuleka utwe. Pakuti weka uwa bababa abe we kamboni nisya kusyuka kubufwe ubwa Yesu.”

23Po bakasala abanalume babili, u Jozefu yo bakamwitisyagha ukuti Balasabasi (yo sona bakati Yusito) nu Matiyasi. 24Po bakiputa ukuti, We Malafyale, we ukumanya imyoyo ya bandu bosi, po utulangisye weka pa babili aba yo umusalite, 25ukuti apyanile pambombo iyi, iya butumiwa bo u Yudasi akabuleka, nukubuka kubuyo bo bukumwenelela. 26Po bakapanga ubulaghusi, po ubulaghusi bukamuwila u Matiyasi, yo akongelesiwa ku batumiwa leveni bala.

Currently Selected:

Imbombo 1: SSTP

Highlight

Copy