Nzyeté 30
30
1Lǎshÿɛ̂ la gwɔ́ tà ńgyá ngie ngwɔ́ pɔ́ Yakwɔ̂b le zyé, ńzye lékwɔ́ʼɔ lóŋ na fɛ̌ we Léyà. Atsɔ́ lyɛ̌ʼ gwɔ́, Lǎshÿɛ̂ gɔɔn né Yakwɔ̂b ngie: «Gÿo, n zyé yɔ́ɔn gubé. Tà á té púʼu wɔ́, mbà n ge kwé.» 2Yakwɔ̂b júʼu nò gie Lǎshÿɛ̂ gɔ̌ɔn, á gyáŋa yé. Á zɛ́te yé ngie: «Ɔ̀ gɔɔn ngie n tɔʼɔ gú légẅiin múɔ páʼɔɔn, n gwɔ́ pɔ́ Ssé keen?» 3Á tsɔ́ʼ ngie: «Mbila, ngàŋafàʼ wɔ̀ɔn awɛ̂, pi yé nuŋe. À zyé múɔ, ńná n gẅiin, ńzsé ngie n zẅɛʼɛ́ yé, ńgẅiin pɔ́ɔn penkʉ́.» 4Á gɔɔn púʼu, ńnáa Mbila, ngàŋafàʼ we, mbwó Yakwɔ̂b, pɔ́ yé nuŋe.
5Mbila shwoŋ, ńgÿo ńzyé múɔ mbàŋa. 6Lǎshÿɛ̂ gɔɔn ngie: «E Ssé zǎʼ ntsaŋ yɔɔn, à jǔʼ ngyè yɔ̀ɔn, ńnáa wɔ́ɔn tàʼ múɔ mbàŋa.» Áa mmó gie á la gÿo, á tsẅi lezíŋ sé lê Ndaŋ#30:6 Áa na shwóŋè Ébɛ̀ lezíŋ Ndaŋ sẅé gɔ̀ɔn gie mé kyagte ngie ńzáʼ ntsaŋ.. 7Mbila ngàŋafàʼ Lǎshÿɛ̂ gÿo ńgíŋe shwoŋ, ńzyé tàʼ múɔ mbàŋa, pɔ́ Yakwɔ̂b lɔgɔ ńgẅiin gubé yépʉ́a. 8Lǎshÿɛ̂ gɔɔn ngie: «N dÿɔ̌ʼ ncù gẅie pʉ̀a mesoŋ té mǒ kuʼ; á nzèm fɛ̌ wɔ̀ɔn, ńjÿó.» Ńtsẅi lezíŋ múɔ lê: Nɛbtali#30:8 Áa na shwóŋè Ébɛ̀ Nɛbtali sẅé gɔɔn gie mé kyagte ngie Ńdÿɔ́ʼ ncù..
9Léyà la gwɔ́ tà ńgyá ngie à te gíŋe ne ńzyé wɔ́, ńnáa Zilépà ngàŋafàʼ we né Yakwɔ̂b, pɔ́ yé nuŋe. 10Zilépà ngàŋafàʼ Léyà pɔ́ Yakwɔ̂b la gÿo ńzyé múɔ mbàŋa. 11Léyà gɔɔn ngie: «N gee ngàŋa fùʼ» ńtsẅi lezíŋ sé lê Ngâd#30:11 Áa na shwoŋo Ébɛ̀ lezíŋNgâd sẅé gɔɔn gie mé kyagte jʉʼɔɔn le N gee ngàŋa fùʼ!.
12Zilépà ngàŋafàʼ Léyà pɔ́ Yakwɔ̂b gíŋe ńgÿo ńzyé mbɔ́ɔntè múɔ. 13Léyà gɔɔn ngie: «Eshÿó wɔ́ɔn é kyɛʼɛ́. Afʉ̀ʼɔɔn la, epúɔ ngùɔ ge láʼa tóŋo wɔ́ɔn lê shÿó mbòŋo.» Ńdeen ńké ńtsẅi lezíŋ wɛ̌ múɔ lê Ashÿɛ̂ɛ #30:13 Áa na shwóŋè Ébɛ̀ lezíŋ Asɛɛ sẅé ndù gie mé kyagte jʉʼɔɔn le Eshÿó wɔ́ɔn kyɛʼɛ́! 14Á gÿo ńgwɔ́ tsɔ́ lyɛ̌ʼ, á fʉ̀ʼ gie mé laga ngesáŋ ntsíŋ, Lẅímbèŋ gʉa nkáʼ, ńkúu wó, ńkáb tsɔ́ ntɔ́ɔn tÿǒ gẅie lezíŋ ée lê mânkɔ́ʼ nkwòŋe#30:14 Mé lɔ́ɔn ńkwaŋa ngie mânkɔ́ʼ nkwòŋe (kà mandalangɔɔ wɔ́ɔ), à gÿo manzwě lwo shwoŋ. , ńdɔg ńtó ńná né má we Léyà. Lǎshÿɛ̂ leen ńgyá, ńgɔɔn né Léyà ngie: «Shúshu ná tsɔ́ metɔ́ɔn mânkɔ́ʼ nkwòŋe míŋ gù wɛ̂ né mèŋ.» 15Léyà tsɔ́ʼɔ mbwó yé ngie: «Ńzsé ngie ɔ̀ ka kaa ndúm wɔ̀ɔn páʼa, á té kuʼ, tà ɔ̀ giŋé ne ńkẅé mânkɔ́ʼ nkwòŋe míŋ wɔ̀ɔn káa?» Lǎshÿɛ̂ tsɔ́ʼ ngie: «Oon pi Yakwɔ̂b ge láʼ letsẅɛ́ʼ lyɛ̌ʼɔɔn, pɔ̀gɔ lɔg ńkúbe mânkɔ́ʼ nkwòŋe míŋ ɔ̀.»
16Ncwònzém gÿo ńgwɔ́, Yakwɔ̂b ne fóo nkáʼ ḿbiŋe nzèm, Léyà kẅɛ ńzáʼa yé, ńgɔɔn né yé ngie: «Pɔ̀gɔ zɔ ge láʼ#30:16 Áa na tsẅé pʉ̀a Ébɛ̀, mámbàŋa zɔ̌ gʉa ńdáʼa ndá manzwě., ńtí páʼ n ně ńdɔgɔ mânkɔ́ʼ nkwòŋe míŋ wɔ̀ɔn ńjú.» Ńgÿo púʼu, pɔ́ yé láʼ wɛ̌ letsẅɛ́ʼ ŋwɛ́. 17E Ssé júʼu sẅíŋtè Léyà, á shwoŋ, ńgÿo ńzyé múɔ mbàŋa. Á lɔgɔ ńgwɔ́ múɔ mbɔ́ɔntè yétʉ̂a gẅie pɔ́ Yakwɔ̂b lɔgɔ ńzyé. 18Léyà gɔɔn ngie: «E Ssé tsɔʼɔ́ fàʼ yɔ́ɔn ńtí nue n ka náa ngàŋafàʼ wɔ̀ɔn né ndúm wɔ̀ɔn.» Ńdeen ńké ńtsẅi lezíŋ múɔ lê Esakaa#30:18 Áa na shwóŋè Ébɛ̀, lezíŋ Esakaa sẅé ndù gie mé kyagte é lɔgɔ ngie ntsɔʼɔ́ fàʼ wɔ́ɔn..
19Léyà gíŋe ńgÿo shwoŋ, ńgÿo ńzyé múɔ mbàŋa. Wɛ̌ ŋwɛ́ lɔgɔ ńgwɔ́ mbɔ́ɔntè ntɔgɔ́ gẅie pɔ́ Yakwɔ̂b lɔgɔ ńzyé. 20Léyà gɔɔn ngie: «E Ssé ka náa fùʼu mbòŋo né mèŋ. Andúm wɔ̀ɔn ge kwoŋo wɔ́ɔn fʉ̀ʼɔɔn. Ńtí páʼ peg yé zyě gubé ntɔgɔ́.» Ńdeen ńké ńtsẅi lezíŋ wɛ̌ ŋwɛ́ lê Zambuloŋ#30:20 Áa na shwóŋè Ébɛ̀ lezíŋ Zambuloŋ e sẅé gɔ̀ɔn gie mé la kyagte jʉʼɔɔn, ngie ge gÿo ná mekùʼ.. 21Ńgíŋe ńgÿo ńzyé tsɔ̌ tàʼ, wɛ̌ gwɔ́ manzwě, á tsẅi lezíŋ sé lê Ndínà.
22E Ssé gÿo mmó gie à la kwaŋa na Lǎshÿɛ̂, ńjúʼu sẅíŋtè yé, ńgÿo páʼ ngwɔ́ á zyé. 23Lǎshÿɛ̂ shwoŋ, ńgÿo zyé tàʼ múɔ mbàŋa, ńgɔɔn ngie «E Ssé sẅǎg shʉ́ wɔ́ɔn.» 24Ńtsẅi lezíŋ múɔ lê Yesyɛ̂b, ńdeen ńké ńgíŋ ńgɔɔn ngie: «Á zɛ́te ngie Cʉ̀apʉ̀a gíŋe ńnáa wɔ́ɔn tàʼ múɔ#30:24 Áa na shwóŋè Ébɛ̀ lezíŋ Yesyɛ̂b lɔgɔ ńgɔɔn ngie gíŋe ńná.!»
Yakwɔ̂b cʉʼʉ́ ngàŋa mmó
25Lǎshÿɛ̂ la gwɔ́ tà ńzyé Yesyɛ̂b, Yakwɔ̂b gɔɔn né Lambaŋ ngie: «Nyé wɔ́ɔn, n gʉa. N ge piŋ nzèm né tsɛ̀ɛ ngwòŋ wég. 26Ná mezwě pɔ́ɔn pie n kɔ̌ɔn faʼa mbwó gù ńtíi pɛ̌, ńná penkʉ́ pɔ́ɔn, peg lâ pɔ̌ pú ńgʉa! Ɔ̀ pǔ ne ńzsé nzẅìŋ fàʼ gie n ka faʼa mbwó gù.» 27Lambaŋ tsɔ́ʼɔ mbwó yé ngie: «Shúshu, n gyǎ ɔ̀ gwɔ́ ngàŋa pòŋontʉ́m! Messé mɔ́ɔn ka shwóŋo wɔ́ɔn ngie Cʉ̀apʉ̀a ka gwaa néŋ mbʉ́lè na mèŋ, ńcʉate pɔ́ na gù. 28Shwóŋo wɔ́ɔn mmó gie n ge lɔg péen gú, n náa yɛ̌ mmó né gù.» 29Yakwɔ̂b gɔɔn ngie: «Kwàʼ gù máŋwɛ́, ɔ̀ ne ńzsé ntí gie n ka lɔg faʼa mbwó gù púʼu, ḿbiŋ ńne ńzsé páʼ n ka gÿo, anùɔ menɔ̀ɔn pú cʉ́ʼ púʼu.» 30Ńtí nue mbɔ́ menɔ̀ɔn pie n da gwaa tó, ɔ̀ gẅiin, é kéen ḿbú ńgyɔ́ɔn. E Ssé la néŋ mbʉ́lè na gù tà fó lyɛ̌ʼ gie n da kúu mbʉ̀a gù. Ɔ̀ kaa gyá jú ngie á kǔʼ fʉ̀ʼ gie n ge faʼ, é lɔg jÿɔ́gɔ yɔ́ɔn tsìŋendá wɔ́ ka? 31Lambaŋ gíŋe ńzɛ́te yé ngie: «N náa kɔ́ né gù ńdɔg ḿbéen?» Yakwɔ̂b tsɔ́ʼ ngie: «Ɔ̀ te náa tsɔ́ mmó né mèŋ wɔ́. Ɔ̀ lɔɔn ńzẅíŋe légÿo mmó gie n gee ngɔ̌ɔn, mbà n ge gíŋe pféle mvfó jú pâ menjʉ̀njÿò mú, é piŋ pyɛ́b. 32N ge gʉa tsetsɛ̀ɛ menùɔ menɔ̀ɔn pú lyɛ̌ʼɔɔn, éfag menjʉ̀njÿò mie é gẅiin mepǎb, mbɔɔ mie é gẅiin meliŋé, tà mbɔɔ mie é síŋ; éfag mvfó gie é gẅiin mepǎb, mbɔɔ mie é gẅiin liŋé, é lɔg gÿo pèen fàʼ yɔ́ɔn 33Á ge táa gwɔ́ fʉ̀ʼ gie ɔ̀ tǒo, ńgee ńtsaʼa pèen yɔ́ɔn, ɔ̀ gyá nò nénʉ́ yɔ́ɔn. Ɔ̀ lɔɔn ńtáa ńgʉa na mvfó yɔ́ɔn, ńgyá gie é te mepǎb kà liŋé wɔ́ɔ gẅiin, ńgʉa na menjʉ̀njÿò, ńgyá mie é té síŋ, ɔ̀ zsé ngie n ka jʉʉ gú.» 34Lambaŋ gɔɔn ngie: «Oon, n zẅǐŋ púʼu.»
35Alyɛʼó ŋwɛ́, Lambaŋ fag mepwɔ́b mie ée menzàʼ menzàʼ, tà mbɔɔ mie é gẅiin meliŋé, éfag mvfó ntsèm gie é gẅiin mepǎb kà meliŋé wɔ́ɔ, tà mbɔɔ gie é gẅiin mepǎb féfɔ́gɔ. Té lege menjʉ̀njÿò mie ée na nùɔ menjʉ̀njÿò, ésíŋ, ńcʉ́me mbwó penkʉ́ pé. 36Ńdeen ńké ńgÿo mé lɔg pɛ̌ menɔ̀ɔn ńgʉa, tà ntyě léfó jʉʼ gie Lambaŋ aa wó, ńgʉa ńkúu jʉʼ gie Yakwɔ̂b gẅie à pféle pfwɔ̀ʼɔ menɔ̀ɔn, aa yé wó, á gwɔ́ légiŋ giŋ lyɛ̌ʼ sétá.
37Yakwɔ̂b fag mbwó tÿǒ sẅisẅê na tsɔ́ metÿǒ mie mezíŋ ée lê tìʼifóm, amaŋndiye ńgÿo palataŋ, ésẅiŋ ngùb gígyé gígyé, á na ntí gie menkàŋ féfɔ́gɔ ge kẅɛɛ mǒ. 38Ńdeen ńké ńnéŋ mbwó tÿǒ mie á sẅǐŋ ngùb mǒ, á tsɛ̀ɛ ngwʉ̌ŋ ntse, á mvfò menɔ̀ɔn. Ńtí nue pɔ́ lɔ́ɔn ńgwɔ́ tà ńnúu, mezwě faʼa melúm. 39Mepwɔ́b pâ mekùkwòon lɔ́ɔn ńgee tà ńkúu jʉʼ gie mbwó tÿǒ ée wó, ńgwoon mezwě, pɔ́ gÿo ńcʉ́ʼʉ lézyé, ńzyé púɔ pie é gẅiin menzàʼ, ńgẅiin mepǎb melÿò lâ mekʉ́, á mbùm pɔ́b. 40Ńgʉa na menjʉ̀njÿò, Yakwɔ̂b fó tsɛ̀ɛ nùɔ menɔ̀ɔn Lambaŋ, ńkẅile mie é gẅiin menzàʼ pâ mie é síŋ. Ńgÿo púʼu ńdɔg ńnuŋe kwaʼ yé nùɔ menɔ̀ɔn, tà à te lɔg ḿvoŋ me Lambaŋ wɔ́. 41Yɛ̌ fʉ̀ʼ wɔ́ɔ gie menɔ̀ɔn pie é gẅiin mbwɔ̀ʼ nnɛ́ ne faʼa melúm, Yakwɔ̂b néŋ mbwó tÿǒ tsɛ̀ɛ ngwʉ̌ŋ ntse menɔ̀ɔn, á mvfò pɔ́b. Légwɔ́ gie melúm ge gwoon wɔ́b á ngʉ̀ŋe mbwó tÿǒ. 42À lɔ̌ɔn ńtóo na menɔ̀ɔn pie é loŋte loŋte, à těen ńnéŋe mbwó tÿǒ tsɛ̀ɛ ngwʉ̌ŋ ntse menɔ̀ɔn wɔ́. Á la fó pɔ́ púʼu, tá menɔ̀ɔn Lambaŋ cʉ́ʼ ńgwɔ́ pɔ́ pie é loŋte loŋte, e mie é gẅiin mbwɔ̀ʼ nnɛ́, é gwɔ́ mé Yakwɔ̂b.
Yakwɔ̂b fǒ mbʉ̀a Lambaŋ ńkÿo
43Yakwɔ̂b shÿéenshÿěen ńgáʼ, ḿbiŋ ńgẅiin láʼa menjʉ̀njÿò pâ mvfó, ńgẅiin ngàŋafàʼ yé, é mbàŋa lâ panzwě; ńgẅiin mekamɛɛ tà mbɔɔ menzikáasè.
Currently Selected:
Nzyeté 30: nnh
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL
