Nzyeté 29

Yakwɔ̂b pɔ́ Lǎshÿɛ̂ zseté mennɛ́

1Yakwɔ̂b la gɔɔn púʼu, ńgíŋe ńdu ssé, ńcʉ́me mánzsè, ńgee tsɛ̀ɛ ngwòŋ púɔ shÿó sǎʼnèm. 2Ńgiŋ tà ńkúu tsɔ́ tsẅɛ, ńgyá tsɔ́ ntse ntǔŋ, menjʉ̀njÿò nuŋte ngʉ̀ŋe wó menùɔ méntá, ńne ńzẅɛte. Mélàʼmie mé lɔ́ɔn ńtúʼu ntse menɔ̀ɔn pɔ́ tsɛ̀ɛ wɔɔn ntse ntǔŋ ŋwɛ́, tá ńnáa pɔ́ núu. Mé lɔ́ɔn ńdɔgɔ máa tóon ńziŋe wɔɔn ntse ntǔŋ. 3Menùɔ menɔ̀ɔn lɔ́ɔn ńgwɔ́ tà ḿbú ńcúʼte jʉʼó, mé fóo ncwò ntse ntǔŋ ńzyɛ́bɛ tóon, ńgÿo menɔ̀ɔn núu ntse, tá mé gíŋe ḿbiŋe tóon ńzába ndumó. 4Yakwɔ̂b zɛ́te papféle menɔ̀ɔn ngie: «Mefɛ̌ pɔ́ɔn, pi fóo wɛ̌ shÿó?» Pɔ́ tsɔ́ʼ ngie: «Peg ée pʉ̀a Alaŋ.» 5Á gíŋe ńzɛ́te wɔ́b ngie: «Tà pi ne ńzsé Lambaŋ míŋ Nahɔɔ?» Pɔ́ tsɔ́ʼ ngie: «Oon, peg ne ńzsé yé.» 6Á gíŋe ńzɛ́te wɔ́b ngie: «Aa tentʉ́ʉ?» Pɔ́ tsɔ́ʼ ngie: «À gwɔ̌ pɔ́ ntentʉ́. Míŋ we Lǎshÿɛ̂ wɛ̂ gẅie à ne ńdɔgɔ nùɔ menɔ̀ɔn pé ńtóo lɛ̂.» 7Yakwɔ̂b gɔɔn ngie: «Wɔɔn gǐŋ ńgwɔ́ pɔ́ tsɛ̀ɛ zsǒ, afʉ̀ʼ gie mé cúʼte menɔ̀ɔn kaa kuʼu. Pi ná ntse menɔ̀ɔn nú, pi piŋ ńgʉa ḿpféle wɔ́b.» 8Táʼ, pɔ́ pÿɛ ngie: «Menɔ̀ɔn ntsèm lɔɔn ńnyé te pǔ ńtó tà ńcúʼte jʉʼɔɔn, mbà ngwɔ́ peg é le fʉʼʉ. Menɔ̀ɔn ntsèm ge pú tó, tà mé fó ncwò ntse ntǔŋ, ńzyɛ́bɛ tóon, tá peg ná ntse pɔ́ nú.»

9Pâ pɔ̌ la nyé ne shwóŋe shwoŋé, Lǎshÿɛ̂ lɔgɔ nùɔ menɔ̀ɔn tá we Lambaŋ ńtó. Ńtí nue à laa mpfèle menɔ̀ɔn wemanzwě. 10Yakwɔ̂b la gwɔ́ tà ńgyá Lǎshÿɛ̂ míŋ Lambaŋ gẅie aa fɛ̌ má we, ḿbiŋ ńgyá nùɔ menɔ̀ɔn Lambaŋ, ńgʉa né ngʉ̀ŋe ntse ntǔŋ, éfó ncwò wó ńzyɛ́bɛ tóon, ńtúʼ ntse ńná, menɔ̀ɔn Lambaŋ fɛ̌ má we, nú. 11Yakwɔ̂b péle Lǎshÿɛ̂ kʉ́kʉ́b yé, ńkág tà ńdʉa. 12Ńdeen ńké shwóŋo Lǎshÿɛ̂ ngie, yé Yakwɔ̂b aa tsɔ̌ métá tá we. Ńgwɔ́ míŋ Lɛpékà. Lǎshÿɛ̂ júʼ, ńkÿote ńgʉa shwóŋo tá we. 13Lambaŋ la leen ńjúʼ páʼ míŋ fɛ̌ we tǒ, ńkÿote ńgʉa ńzáʼa yé, ńkyɛ́ ńcʉŋe na ye, ḿbéle yé kʉ́kʉ́b yé, ńdɔgɔ yé ńgʉa né mbʉ̀a yé. Á pú ḿbíte kɔ̀ɔkɔ́ɔ, éshwóŋo Lambaŋ. 14Á cʉa púʼu Lambaŋ gɔɔn né Yakwɔ̂b ngie: «Ɔɔ kwaʼ múɔ ndá weg, ńgwɔ́ metse még.» Ńgÿo púʼu, pɔ́ Yakwɔ̂b tsẅé wó tà ḿmaga saŋ.

Anò mándendele lɔ́ɔnndá Yakwɔ̂b

15Lambaŋ gíŋe ńgɔɔn né Yakwɔ̂b ngie: «Ɔɔ fɛ̌ wɔ̀ɔn, táʼ, ngwɔ́ ń de lɔgɔ yɛ̌ jʉʼ ńgÿo, ɔ̀ faʼa mbwó mèŋ sẅɛ̀ɛ sẅɛ̀ɛ wɔ́. Shwóŋo wɔ́ɔn páʼ n ge péen gú púʼu.» 16Á laa púʼu Lambaŋ gẅiin púɔ panzwě mépʉ́a: lezíŋ múɔ letwó we, é laa lê Léyà, e se ncʉ̀ʼnzèm we, é gwɔ́ lê Lǎshÿɛ̂. 17Léyà laa múɔ manzwě, eshÿó wé kaba kaba, Lǎshÿɛ̂ piŋ sí tɛʼ. 18Púʼu, Yakwɔ̂b kwoŋ pɔ́ Lǎshÿɛ̂. Ńgɔɔn né Lambaŋ ngie: «N ge faʼa mbwó gù ngùʼ sɔɔnmbʉ́a, ńzsé ngie ɔ̀ nǎa Lǎshÿɛ̂ nzèm míŋ gù né mèŋ.» 19Lambaŋ tsɔ́ʼ ngie: «À lɔɔn ńcʉ́ʼ gie n náa yé mbwó tsɔ̌ mámbàŋa ndyɛ̀ʼɛ, ɔ̀ tsẅé jʉʼɔɔn, éfaʼa mbwó mèŋ, n náa yé mbwó gù.»

20Púʼu la, Yakwɔ̂b faʼa mbwó Lambaŋ ngùʼ sɔɔnmbʉ́a, lélɔg ńdúɔ Lǎshÿɛ̂. Táʼ, mɛ̌ mengùʼ sɔɔnmbʉ́a ŋwɛ́ lwo ńtɔ́gɔ mbwó yé; pɔ́ páʼ mbɔ́ melyɛʼɛ́ láʼ la. Ńtí páʼ à la kwoŋo Lǎshÿɛ̂ tɛʼ. 21Yakwɔ̂b leen ńké ńgɔɔn né Lambaŋ ngie: «E fǎʼ ngùʼ sɔɔnmbʉ́a páʼ pɔ̀gɔ la lʉʼte. Leen ńké ńnáa nzwě wɔ̀ɔn. Peg yé zɔ́ʼ.»

22Lambaŋ cúʼte pʉ̀a jʉʼó ntsèm, ńgÿo máamáa línɔ̀ɔn lɔ́ɔnndá. 23Á gÿo ńgwɔ́ ncwònzsém, Lambaŋ gʉa ńnáa míŋ we Léyà, á mbwó Yakwɔ̂b, pɔ́ yé láʼ. 24Lambaŋ náa ngàŋafàʼ we Zilépà né Léyà, páʼ à cʉ́ʼ faʼ pɔ́ mbwó yé. 25Njÿó gÿo ńdʉ́a, Yakwɔ̂b gyá, á gwɔ́ pɔ́ Léyà, á kʉʼʉ yé, á zɛ́te Lambaŋ ngie: «Lemaŋ sɔɔn! Yɔɔn ée yɛ̌ ntí nò gie ɔ̀ ka tɔ́ɔn na mèŋ? N kɔ̌ɔn těen faʼa mbwó gù ńtí pɔ́ Lǎshÿɛ̂ wɔ́ le? Ɔ̀ ka piŋ ńgÿo lêkɔ́, éfʉte wɔ́ɔn?» 26Lambaŋ tsɔ́ʼ ngie: «Áa na tsẅé láʼa yég, mé ée těen ḿvɔgɔ ńnáa nzèm múɔ lɔ́ɔnndá, tá ńgÿo ńnáa mvfò wɔ́. 27Pi wɛ̂ manzwě zɔɔn ḿvɔg ḿmag ngàba láʼ línɔ̀ɔn lɔ́ɔnndá. Peg gíŋe ńnáa wetsɔ̌ né gù. Ńzsé ngie ɔ̀ giŋé faʼa mbwó mèŋ tsɔ́ mengùʼ sɔɔnmbʉ́a.» 28Yakwɔ̂b zẅíŋ púʼu. Pɔ́ Léyà tsẅé tà ḿmag ngàba láʼ lɔ́ɔnndá. Lambaŋ leen ńké ńnáa míŋ we Lǎshÿɛ̂ mbwó yé, pɔ́ yé zɔ́ʼ. 29Lambaŋ náa ngàŋafàʼ we Mbila né Lǎshÿɛ̂ páʼ à cʉ́ʼ faʼ pɔ́ mbwó yé. 30Yakwɔ̂b zɔ́ʼɔ Lǎshÿɛ̂ gẅie à la kwoŋo yé, ńcʉa Léyà. Ńdeen ńké ńgíŋe faʼa mbwó Lambaŋ tsɔ́ mengùʼ sɔɔnmbʉ́a.

Penkʉ́ Yakwɔ̂b

31 Cʉ̀apʉ̀a la gyá páʼ mé té Léyà kwoŋ, ńgÿo páʼ ngwɔ́ á zyé. Lǎshÿɛ̂ piŋ ńgwɔ́ pɔ́ nkǐŋ. 32Léyà la shwoŋ, ńgÿo ńzyé múɔ mbàŋa, ńtsẅi lezíŋ sé lê Lẅímbèŋ, «ńdɔgɔ ngie pi gyá múɔ.» Ńtí nue à la ne ńgɔɔn ntʉ́m yé ngie: «Cʉ̀apʉ̀a gyǎ ngʉ̀ngʉ̀#29:32 Áa na shwóŋè Ébɛ̀, lezíŋ Lẅímbèŋ é sẅé gɔɔn gie ńgwɔ́ mé kyagte lé (Cʉ̀apʉ̀a) à gyǎ. yɔ̀ɔn. Andúm wɔ̀ɔn ge kwoŋo wɔ́ɔn fʉ̀ʼɔɔn.»

33Ńgíŋe shwoŋ, ńgÿo ńzyé tàʼ múɔ mbàŋa, ńgɔɔn ngie: «Cʉ̀apʉ̀a jǔʼ páʼ mé té wɔ́ɔn kwoŋ, ńdeen ńké ńgíŋe ńnáa wɔ́ɔn wɔɔn múɔ,» ńtsẅi lezíŋ sé lê Simeyoŋ#29:33 Áa na shwóŋè Ébɛ̀ lezíŋ Simeyoŋ sẅé leŋweʼe gẅie mé kyagte jʉʼɔɔn lé (Cʉ̀apʉ̀a) a jǔʼ..

34Ńgíŋe ńgÿo shwoŋ, ńgÿo ńzyé múɔ mbàŋa, ńgɔɔn ngie: «Afʉ̀ʼɔɔn gie n zyě púɔ mbàŋa yétá lɔɔn, andúm wɔ̀ɔn ge líe wɔ́ɔn mboŋó.» Áa mmó gie á la gÿo, á tsẅi lezíŋ wɔɔn múɔ lê Lěvî.

35Léyà la gíŋe ńgÿo shwoŋ, ńtáa ńzyé múɔ mbàŋa ńgɔɔn ngie: «Afʉ̀ʼɔɔn la, n ge guʼte Cʉ̀apʉ̀a.» Áa mmó gie á la gÿo, á tsẅi lezíŋ múɔ lê Yúndà#29:35 Aa na shwóŋè Ébɛ̀ lezíŋ Yúndà sẅé leŋweʼe gẅie mé kyagte jʉʼɔɔn le guʼte. «ńdɔgɔ ńgɔɔn ngie: gùʼte.» Éfó púʼu, à te gíŋe ńzyé wɔ́.

Currently Selected:

Nzyeté 29: nnh

Highlight

Copy

Compare