Nzyeté 28

1Ésàg tóŋo Yakwɔ̂b, ńgwaa néŋ mbʉ́lè na yé, ńne ńgɔɔn ngie: «Te zɔ́ʼɔ múɔ manzwě gẅie à kẅɛɛ láʼa Kánàhan. 2Lu ssé ńgʉa kwòŋo Alam á mbʉ̀a Mbetuwɛ tá pà má gù. Ɔ̀ ge kúu wó, é gʉa na púɔ panzwě pie é penkʉ́ Lambaŋ gẅie aa fɛ̌ má gù, é zɔ́ʼɔ tàʼ. 3Á zɛ́te ngie e Ssé gie e pǔ ńgẅiin ngʉ̀ʼ, e cÿɔʼɔ gú; ńgÿo ɔ̀ zyé, ngẅɛ̀ jù zyéen, ɔ̀ láʼ ńcʉ́ʼʉ mángʉanjʉʼ meláʼ tà ńgyɔ́ɔn. 4Á zɛ́te ngie à néŋ mbʉ́lè gie à la néŋe na Ábalaham á na gù, mbɔɔ na ngẅɛ̀ jù, tá à cʉa púʼu, ɔ̀ jÿó láʼ gie ɔɔ wó, ńgwɔ́ kÿoláʼ. Á láʼ gie e Ssé la ná né Ábalaham!» 5Ésàg tsẅi, Yakwɔ̂b gʉa né kwòŋo Alam, á mbʉ̀a Lambaŋ gẅie aa fɛ̌ Lɛpékà má pa Yakwɔ̂b pɔ́ Ezagẅi; Lambaŋ ŋwɛ́, á gwɔ́ míŋ Mbetuwɛ nyìŋ Alam.

6Ezagẅi júʼ ngie, Ésàg néŋ mbʉ́lè na Yakwɔ̂b tà ńtúmo yé kwòŋo Alam ngie à gʉa wó, éfaʼa nzwě we. Ńgíŋe ńjúʼ ngie Ésàg gwáa néŋ mbʉ́lè na Yakwɔ̂b, ńtÿɔ́gɔ yé ngie à pɔ́ɔn léláʼ ńzɔ́ʼɔ múɔ Kánàhan. 7Ezagẅi gwaa júʼ púʼu, mbà Yakwɔ̂b jǔʼ ncwò tá we pɔ́ má we, tà ńgʉa né kwòŋo Alam. 8Ezagẅi zsé ngie tá we te púɔ Kánàhan kwoŋ. 9Ńgʉa mbʉ̀a Esemayɛ̂ɛ míŋ Ábalaham, éfaʼa Mahalad ńzɔ́ʼɔ yé, ńkẅiʼi na mezwě pé. Mahalad laa púʼu ńgwɔ́ míŋ Esemayɛ̂ɛ, wemanzwě, à la ńgẅiin tsɔ̌ fɛ̌ we lezíŋ sé gwɔ́ lê Nembayɔd.

Anò na njÿòon Yakwɔ̂b

10Yakwɔ̂b fó Mbɛɛshÿeba ńgʉa né Alaŋ. 11Ńgʉa tà ńkúu tsɔ́ jʉʼ, nzěm síŋ, á láʼa jʉʼó. À la gwaa nuŋe, ḿbíi tsɔ̌ tàʼ na metǒon pie é laa jʉʼó, ńdɔg ńtóonte twó yé, tá ńdyé. 12Ńne ńdyé púʼu, ńdyé njÿòon, ńgyá kwɔ́ʼ, éfó ssé, ńkwɔ́ʼ kwɔ́ʼ tà ńkíbe lefaŋ. Mecÿɔ́ʼ Ssé ne fóo mǒ, ńkwɔ́ʼɔ ḿbiŋe ésẅɛ́ʼɛ. 13Cʉ̀apʉ̀a tyé ndumó, ńgɔɔn ngie: «Mèŋ n gee Cʉ̀apʉ̀a, é Ssé Ábalaham gẅie aa tá gù, ńgwɔ́ Ssé Ésàg. Atsetsáʼ gie ɔ̀ nuŋe mǒ lɛ̂, n ge gÿo náa mbwó gù tà mbɔɔ mbwó ngẅɛ̀ jù. 14Engẅɛ̀ jù ge gÿo gyɔ́ɔn páʼ mvɔbɔ́ pfepfɔ́b. Ɔ̀ ge gÿo jÿó shÿó mbyěnèm, é jÿó shÿó sǎʼnèm, é jÿó shÿó twó kwóŋ, é piŋ jÿó shÿó ntsíŋ. N ge gÿo cʉate pɔ́ na gù, mbɔɔ na ngẅɛ̀ jù, tá néŋ mbʉ́lè na menkenkÿo tsìŋendá ndùmo ssé tsetsáʼ. 15N gee né gù, n ge pyɛ́bɛ gú, á jʉʼ ntsèm gie ɔ̀ ge gʉa wó. É piŋ lɔgɔ gú piŋ né wɔɔn ngwòŋ, ngwɔ́ ń de gú gwáʼ; tà láʼ kú fʉ̀ʼ gie n gÿǒ mmó gie n da shwóŋo gú.»

16Yakwɔ̂b zyeen ńgɔɔn ngie: «Áa kwaʼ nénʉ́, Cʉ̀apʉ̀a aa jʉʼɔɔn. Táʼ, n ka te ne ńzsé wɔ́.» 17Ecÿɔʼ gwoon yé, á gɔɔn ngie: «Yɔɔn áa jʉʼ té mémá we, yɔɔn ée ndá Ssé. Ńgwɔ́ ncwò tÿǒ lepwó!» 18Yakwɔ̂b gÿo ńdu ssé tsɛ̀ɛ mbaʼámbaʼ, ńkáa tóon gẅie à ka lɔg ńtóonte twó yé, ḿbʉʼʉ ńtÿɔ́g tÿɔ́g, ḿpfɛte mevɛ́ ndumó. 19Ńtsẅi lezíŋ jʉʼó lê Mbetɛɛ «ńdɔgɔ ńgɔɔn ngie ndá Ssé.» Mbà mé kɔ́ɔn ńzɔɔn ńtóŋo yɛ̌ tÿǒsoŋ lê Lûuzè. 20Yakwɔ̂b záb ngie: «Cʉ̀apʉ̀a lɔɔn ńgwɔ́ né mèŋ, ḿbyɛ́bɛ wɔ́ɔn mánzsè jʉʼ gie n gee né wó, ńnáa wɔ́ɔn mbelég gie n ge pfɛ́, ńnáa wɔ́ɔn nzsǒ gie n ge maʼ, 21m biŋ ḿbiŋ né lesaʼá peg té lɔ̌ʼ, mbà Cʉ̀apʉ̀a ge gwɔ́ Ssé yɔ̀ɔn. 22Tóon wɔɔn gẅie m bʉʼʉ́ ńtÿɔ́g tÿɔ́g lɔɔn ge láʼ cʉ́ʼ ndá Ssé. N ge láʼa gee na shúm sɔ́ɔn nzsè legém, é píi tàʼ nzsè, é náa mbwó Ssé.»

Currently Selected:

Nzyeté 28: nnh

Highlight

Copy

Compare