Nzyeté 27

Yakwɔ̂b jʉ̌ ńkẅé mbʉ́lè gie e laa ye Ezagẅi

1Ésàg la zẅiŋ, enÿɔ́g mé kʉ̌a tà à te gíŋe ne ńgyá jʉʼ wɔ́. Atsɔ́ lyɛ̌ʼ gwɔ́, á tóŋo Ezagẅi, múɔ letwó we, ńgɔɔn né yé ngie: «Míŋ wɔ̀ɔn!» Á tsɔ́ʼ ngie: «Oon, wɔ́ɔn wɛ̂!» 2Á gɔɔn ngie: «Mèŋ, n gee páʼɔɔn, mbà mèŋ n zẅǐŋ, mé ké te zsé lyɛʼɛ́ legwé wɔ́. 3Shúshu pi mekwoŋ mú, ńnéŋe mbʉ́a, ḿbiŋ ńkaa kyɛ́d gù, ńdɔg ńgʉa tsẅɛɛ pwóon, éfaʼ mbab; 4ńdɔg ńdɔ́ɔn mmó mbòŋo gie n kwoŋ, ńná m pfɛ́, ńnéŋ mbʉ́lè na gù tá ńkwé.»

5Ésàg la gwaa gɔɔn né míŋ we Ezagẅi púʼu, Lɛpékà ne ńjúʼu. Ezagẅi gʉa né tsẅɛɛ pwóon léfaʼ mbab ńdɔg ńtó. 6Lɛpékà cʉ́ʼ nzèm, ńgɔɔn né míŋ we Yakwɔ̂b ngie: «N jǔʼ páʼ tà gù gɔɔn né fɛ̌ gù Ezagẅi ngie 7à gʉa éfaʼ mbab; ńdɔg ńdɔ́ɔn mmó mbòŋo gie à kwoŋ, ńná à pfɛ́, ńnéŋ mbʉ́lè na yé mvfò Cʉ̀apʉ̀a tá ńkwé. 8Míŋ wɔɔn, afʉ̀ʼɔɔn la, cwoŋo ńjúʼu nò gie n gee ńtsẅi né gù lɔɔn. 9Shúshu, gʉa nùɔ mvfó, éfaʼ púɔ mvfó mbòŋo yépʉ́a ńdɔg ńtó ńná né mèŋ; n dɔg ńdɔ́ɔn kwaʼ mmó mbòŋo gie tá gù kwoŋ. 10Ɔ̀ gʉa ńná né yé, à pfɛ́, ńnéŋ mbʉ́lè na gù tá ńkwé.»

11Yakwɔ̂b tsɔ́ʼɔ mbwó má we Lɛpékà ngie: «Mbùm fɛ̌ wɔ̀ɔn Ezagẅi gẅiin menoŋ, eyɔ̀ɔn piŋ ńtege tege. 12Tá wɔ̀ɔn lɔɔn ńtó, ḿmwoonte wɔ́ɔn, mbà à ge gɔɔn ngie e fʉté yé; é le gíŋe ńgwɔ́ mbʉ́lè wɔ́, mbà e cʉ̌ʼ ńgwɔ́ pɔ́ ndòon gie n kǎa.» 13Tá má we tsɔ́ʼ ngie: «Míŋ wɔ̀ɔn, e lɔɔn ńgwɔ́ ndòon, é sẅɛ́ʼ pɔ́ twó mèŋ. Á zɔɔn ńgwɔ́ pɔ́ lêkɔ́ wɔ́ɔ, ɔ̀ gÿo pɔ́ mmó gie n tsẅǐi. Gʉa faʼ pɔ́ púɔ mvfó ńná né mèŋ.»

14Á gʉa éfaʼ ńdɔg ńtó, ńná né má we, á lɔg ńdɔ́ɔn mmó léjÿó mbòŋo gie tá pa Yakwɔ̂b kwoŋ. 15Ńgʉa na menzsǒ mvfò míŋ we Ezagẅi mie é laa ndá, ḿbí mie é pú ḿboŋ, ḿmaʼa na Yakwɔ̂b gẅie aa nzèm múɔ. 16Ńdɔg ngùb púɔ mvfó, ḿbwoon mbwó Yakwɔ̂b tà mbɔɔ lóŋ we gẅie à tege tege. 17Ńdeen ńké ńnáa mmó léjÿó mbòŋo ya pɔ́ mbelég gie à tǔɔ, á mbwó míŋ we Yakwɔ̂b. 18Á gʉa né lejʉ́ŋ tá we, ńgɔɔn né yé ngie: «Tɔ̌ɔnmé!» Tá we gɔɔn ngie: «Mèŋ wɔɔn! Táʼ, míŋ wɔ̀ɔn, shwóŋo wɔ́ɔn nyìŋ gẅie ɔɔ yé.» 19Yakwɔ̂b tsɔ́ʼɔ mbwó tá we ngie: «Mèŋ n gee Ezagẅi múɔ letwó gù. N gÿǒ páʼ ɔ̀ ně ńtsẅi né mèŋ la. Shúshu, lu ssé ńnéŋe néŋe, ḿpfɛ́ tsɔ̌ na mbab mbàʼ yɔɔn, tá ńnéŋ mbʉ́lè na mèŋ.» 20Tá we Ésàg zɛ́te yé ngie: «Míŋ wɔ̀ɔn, ɔ̀ gÿǒ lêkɔ́ ńdwo ńtéme nɔ̀ɔn pwóon páʼɔɔn?» Á tsɔ́ʼ ngie: «Cʉ̀apʉ̀a Ssé jù gÿǒ, peg yé pumte.»

21Ésàg gɔɔn né Yakwɔ̂b ngie: «Míŋ wɔ̀ɔn, shúshu tó né lejʉ́ŋ mèŋ, n náʼa ḿmwoonte gú, ńjúʼ tà ɔ̀ zɔɔn ńgwɔ́ kwàʼ míŋ wɔ́ɔn Ezagẅi wɔ́ɔ.» 22Ńgɔɔn púʼu, Yakwɔ̂b tsóte nnɛ́ né lejʉ́ŋ tá we Ésàg. Á mwoonte yé, ńgɔɔn ngie: «Engyè, ée ngyè Yakwɔ̂b, táʼ, mbwó, é gwɔ́ mé Ezagẅi.» 23À la te zsé ngie aa Yakwɔ̂b wɔ́. Á nue mbwó mé la gwɔ́ pɔ́ menoŋ menoŋ páʼ me fɛ̌ we Ezagẅi. Ńgwaa néŋ mbʉ́lè na yé, 24ḿvɔg ńzɛ́te yé ngie: «Ɔɔ kwàʼ míŋ wɔ̀ɔn Ezagẅi lá?» Yakwɔ̂b tsɔ́ʼ ngie: «Aa kwàʼ wɔ́ɔn!»

25Ésàg gíŋe ńgɔɔn ngie: «Náa mmó léjÿó né mèŋ, ńzsé ngie m pfɛ̌ɛ nɔ̀ɔn gẅie míŋ wɔ̀ɔn těm, tá néŋ mbʉ́lè na gù.» Yakwɔ̂b náa mmó léjÿó né yé, á pfɛ́; ńgíŋe ńdɔg melùʼ ńtó, ńná né yé, á nú. 26Tá we Ésàg leen ńké ńgɔɔn né yé ngie: «Tsetsɔ́ʼ, tsóte nnɛ́, ńtó tà ḿbéle na mèŋ!» 27Á tsóte nnɛ́, ḿbéle na yé. Ésàg neme gyě menzsǒ mé, ńgwaa néŋ mbʉ́lè na yé, ńne ńgɔɔn ngie: «Oon, agyě míŋ wɔ̀ɔn, áa páʼ gyě nkáʼ gẅie Cʉ̀apʉ̀a la néŋ mbʉ́lè wó!»

28«Á zɛ́te ngie Ssé ná mbʉ̀ŋ#27:28 Mé kíme mbʉ̀ŋ jʉʼɔɔn páʼɔɔn, á gwɔ́ tsɛ̀ɛ ŋwàʼne pʉ̀a Ébɛ̀, ńgwɔ́ mmʉ̀ʼ. Ńtí nue áa tsɛ̀ɛ ngwòŋ Ésàlayɛ, ammʉʼ gyɔ́ɔn tà ngwɔ́ á gÿo eshúm sáʼ. né gù,

ńná shúm sie é sáʼa ndùmo ssé tsetsáʼ,

ńná ngesáŋ ntsíŋ, mbɔɔ melùʼ tà e gyɔ́ɔn.

29Ńzɛ́te ngie epʉ̀a meláʼa meláʼ e faʼa mbwó gù,

mengwòŋo mengwòŋ ŋwɔ́ʼ nnɛ́ mvfò gú.

Ɔ̀ ge gwɔ́ táfàʼ mefɛ̌ pú.

Egubé má gù ŋwɔ́ʼ nnɛ́ mvfò gù,

ndòon twó nyìŋ gẅie à ge néŋ ndòon twó gù,

mbʉ́lè gwɔ́ né nyìŋ gẅie à ge néŋ mbʉ́lè na gù.»

30Ésàg la néŋ mbʉ́lè na Yakwɔ̂b tà ńtsẅé jʉʼ, Yakwɔ̂b kẅɛ. Ńdeen gwaa fó lejʉ́ŋ tá we Ésàg gʉa, Ezagẅi fɛ̌ Yakwɔ̂b fó tsẅɛɛ pwóon ńtó. 31Ńgíŋe ńdɔ́ɔn yé mmó mbòŋo gie tá we kwoŋ, ńdɔg ńgʉa ńná né yé, ńgɔɔn né yé ngie: «Tá wɔ̀ɔn, lu ssé, ḿpfɛ́ tsɔ̌ na mbab pwóon yɔɔn gie mèŋ míŋ gù n dɔ̌g ńkwɔ́ʼɔ pwóon, tá ńnéŋ mbʉ́lè na mèŋ.» 32Tá we Ésàg zɛ́te yé ngie: «Ɔɔ wɔ̌?» Á tsɔ́ʼ ngie: «Mèŋ n gee Ezagẅi, múɔ letwó gù!»

33Ésàg júʼ púʼu, mbùm yé pú ńkÿo, á zɛ́te yé ngie: «Nyìŋ gẅie à gʉ̌a pwóon tà ńdɔg mbab ńtó ńná né mèŋ, aa wɔ̌? Ɔ̀ tóo pɛ́ʼɛ̀ mbà mèŋ m bǔ ḿpfɛ́ tà ńnéŋ mbʉ́lè na ngàŋ, mbʉ́lè ŋwɛ́ ge gwɔ́ né yé!» 34Ezagẅi la júʼu shwóŋè tá we, lóŋ we pú ffó, ngyè tetʉ́ʉ kẅɛɛ lepfòm yé. Á gɔɔn né tà we ngie: «Tá wɔ̀ɔn, néŋ mbʉ́lè na mèŋ yɔ́ɔn!» 35Táʼ, tà we tsɔ́ʼ ngie: «Afɛ̌ gù tǒ, éfʉte wɔ́ɔn, ńkẅé mbʉ́lè jù.» 36Ezagẅi gɔɔn ngie: «Áa páʼɔɔn ńtíi pɔ́ páʼ lezíŋ sé ée lê Yakwɔ̂b tá á jʉʉ wɔ́ɔn ngʉ̀a mbʉ́a lá? À la zɔɔn ńkẅé jʉʼʉ mvfò múɔ gie á laa yɔ́ɔn. À giŋé ńkẅé mbʉ́lè yɔ̀ɔn.» Ezagẅi gíŋe ńzɛ́te tá we ngie: «Atsɔ̌ méjʉʼʉ mbʉ́lè te gíŋe ńgwɔ́ wó gẅie ngwɔ́ ɔ̀ ná né mèŋ wɔ́ lá?» 37Ésàg gɔɔn né Ezagẅi ngie: «Mèŋ n gÿǒ páʼ yé zɔ ge cʉ́ʼʉ sáʼa gú. M bǔ ńná mefɛ̌ pé ntsèm á mbwó yé páʼ megàŋafàʼ pé. Ḿbiŋ ńgÿo páʼ à ge gẅiin ngesáŋ ntsíŋ mbɔɔ melùʼ fʉ̀ʼ ntsèm. N ké ńgíŋe ńgÿo lêkɔ́ né gùu, míŋ wɔ̀ɔn?» 38Ezagẅi zɛ́te tá we ngie: «Tá wɔ̀ɔn, ɔ̀ kɔʼɔ́ páʼɔɔn ńgẅiin pɔ́ ndàʼ yɛ̌ mbʉ́lè ŋwɛ́ lá? Ná yɔ̀ɔn mbʉ́lè yɔ́ɔn!» Ezagẅi zɛ́te púʼu, ńzye lélʉa. 39Á cʉa púʼu, tá we Ésàg gɔɔn né yé ngie: «Ɔ̀ ge láʼa tsẅé tàa ngʉ̀a shʉ̀shʉ̀a, á jʉʼ gie shúm njʉ̀ʼ jʉ̌ʼ té poŋo wó wɔ́. Á jʉʼ gie mbʉ̀ŋ te wó lú.

40Ɔ̀ ge láʼa lɔgɔ nně ncù jù, é lÿɔ́ʼɔ, tá gwɔ́ wó.

É piŋe júʼu ncwò fɛ̌ gù.

Táʼ, ɔ̀ ge láʼ gwá pú tà gwaa cʉ́ʼʉ ndù nnɛ́,

é záʼa kɔ̌ʼ

gie fɛ̌ gù la jÿɔ́gɔ lóŋ gù.»

Yakwɔ̂b aa mbʉ̀a Lambaŋ fɛ̌ má we

41Á gwɔ́ púʼu, Ezagẅi zye lépʉa Yakwɔ̂b ńtí mbʉ́lè gie tá we ka ná né Yakwɔ̂b. Ńdeen ńkwaŋte ngie: «Tá wɔ̀ɔn cʉʼʉ́ ńgee pɔ́ ńkwé, à ge kwé, n zẅé fɛ̌ wɔ̀ɔn Yakwɔ̂b.» 42Mé júʼ, ńgʉa shwóŋo Lɛpékà nò gie Ezagẅi gẅie aa mvfò míŋ we gɔ̌ɔn. Lɛpékà tsẅi, mé tóŋo Yakwɔ̂b, á míŋ we wekʉ́, á gɔɔn né yé ngie: «Pɔ́ɔn twó jú. Afɛ̌ gú Ezagẅi ne ńkwaa lézẅé gù, ńdɔg ńtÿó mmó gie ɔ̀ ka gÿo na yé. 43Afʉ̀ʼɔɔn la, míŋ wɔ̀ɔn, júʼ ncwò wɔ́ɔn. Lu ssé, ńkÿo ńgʉa ńdyeen mbʉ̀a fɛ̌ wɔ̀ɔn Lambaŋ gẅie à tsẅé Alaŋ! 44Ɔ̀ ge náʼa tsẅé wó, tà lóŋ fɛ̌ gù pʉ́le. 45Lóŋ fɛ̌ gù lɔɔn ńgÿo ńnáʼa ḿbʉ́le, tà á lege mmó gie ɔ̀ ka gÿo na yé, mbà mèŋ ge gÿo ɔ̀ piŋ nzèm. N te ne ńkwoŋo lépú ḿbyé gẅí mépʉ́a tàʼa lyɛ̌ʼ wɔ́.»

46Lɛpékà gɔɔn né Ésàg ngie: «M bÿága páʼɔɔn ńtí púɔngùɔ Hɛ́d, Yakwɔ̂b lɔɔn ńgwɔ́ páʼɔɔn ńzɔ́ʼɔ múɔ manzwě gẅie à kẅɛɛ láʼ yɔɔn páʼ pɛ̂, mbà mèŋ n kaa zsé mmó gie n da tóo ngwòŋ ńgÿǒ wɔ́.»

Currently Selected:

Nzyeté 27: nnh

Highlight

Copy

Compare