Nzyeté 26

Ésàg pɔ́ Abimelɛg

1Atsɔ̌ cÿó la gwe tsɛ̀ɛ ngwòŋ. Mé ké těen ńgɔɔn gẅie à la gwe fʉ̀ʼ gie Ábalaham laa wó wɔ́. Á gwɔ́ púʼu, Ésàg gʉa mbʉ̀a Abimelɛg, fùɔ pʉ̀a Filisi á Ngelaa. 2Ńkúu wó, Cʉ̀apʉ̀a kẅɛɛ mvfò Ésàg ńgɔɔn ngie: «Pɔ́ɔn légʉa Egíbtò, néŋe tsɛ̀ɛ ngwòŋ gẅie n ge laʼte gú. 3Náʼa ńtsẅé tsɛ̀ɛ wɛ̌ ngwòŋ, n ge néŋ mbʉ́lè na gù, pɔ̀gɔ zɔ cʉ́ʼʉ ńgwɔ́. Ńtí páʼ n ge gÿo ná mɔɔn mejʉʼ tsetsáʼ ntsèm, á mbwó gù, mbɔɔ mbwó ngẅɛ̀ ɔ̀; púʼu, n dɔgɔ ńgÿo ngie ammó gie n da kaʼa mbwó tá gù Ábalaham pumte. 4N ge gÿo gÿo ngẅɛ̀ jù gyɔ́ɔn páʼ mecÿɔ́ʼsaŋ pie ée lefaŋ. N ge gÿo ná wɔɔn ngwòŋ mbwó ngẅɛ̀ jù. N ge láʼ fó pɔ́ na ngẅɛ̀ jù, é néŋ mbʉ́lè na mengwòŋ ntsèm ndùmo ssé tsetsáʼ. 5Ńtí páʼ Ábalaham ka júʼ ncwò wɔ́ɔn, ńgiŋ páʼ n ne ńkwoŋo, ńgiŋ páʼ n zǎb púʼu, ńgiŋe na mentÿɔgɔ́ mɔ́ɔn, ńgiŋ páʼ membʉ̌ mɔ́ɔn ne ńzɛ́te.» 6Ésàg cʉ́ʼ ńnéŋe pɔ́ Ngelaa. 7Mbàŋa ye jʉʼó la ne ńgyá Lɛpékà, ńzɛ́te Ésàg ngie wɛ̂ aa wɔ̌ mbwó gù? Á tsɔ́ʼɔ ngie, aa fɛ̌ we wemanzwě: Ńtí nue à la ne ḿbɔ́gɔ légɔɔn ngie aa nzwě we, pɔ́ zẅé yé, mélàʼmie Lɛpékà la sí tɛʼ. 8Ésàg la ké ńtsẅé pɔ́ wó tà tsɔ́ lyɛ̌ʼ gÿo ńgwɔ́, Abimelɛg, fùɔ pʉ̀a Filisi fó na tɔ̀gɔnkyɛʼ, ńgyá páʼ Ésàg ne ńjÿɔgte nzwě we Lɛpékà. 9Abimelɛg tóŋo Ésàg, ńgɔɔn né yé ngie: «Aa páʼa ńgwɔ́ pɔ́ nzwě gù! Ńtí kɔ́ ɔ̀ ka gɔɔn ngie aa fɛ̌ gù wemanzwě?» Ésàg tsɔ́ʼ ngie: «N ka gwaa gɔɔn púʼu, ḿbɔ́gɔ mé lézẅé wɔ́ɔn, ńtíi yé.» 10Abimelɛg zɛ́te yé ngie: «Yɔɔn aa kwaʼ kɔ́ gie ɔ̀ ka gÿo na peg páʼɔɔn? Á ka cʉ́ʼʉ méjʉʼ, atsɔ̌ nyìŋ na pʉ̀a láʼ yɔ́ɔn, à nuŋe yé. Ɔ̀ lɔg ńnéŋe wég tsɛ̀ɛ mefʉa.» 11Á cʉa púʼu, Abimelɛg záb lepʉ̌ mbwó pʉ̀a láʼ yé ntsèm ngie: «Mé ge zẅé nyìŋ gẅie à kibé mámbàŋa wɔɔn kà pɔ́ nzwě we wɔ́ɔ.»

12Ésàg pye shúm léjÿó tsɛ̀ɛ wɔɔn ngwòŋ. Ḿbiŋ ńtó fʉ̀ʼʉ lelàg shúm na yɛ̌ ngùʼ, ńdag shúm, é tɔ́g mbyè ngʉ̀a nkÿo. Ńtí nue Cʉ̀apʉ̀a la néŋ mbʉ́lè na yé. 13Á ne ńgáʼa, eshúm sé ne ńkẅiʼi ńgyɔ́ɔn tà á pú ńcʉ́ʼʉ ngàŋa mmó tɛʼ. 14À la gẅiin menùɔ menjʉ̀njÿò, ńgẅiin menùɔ mvfó, tà mbɔɔ menùɔ mefòŋ. Ḿbiŋ ńgẅiin ngàŋafàʼ tà é gyɔ́ɔn.

Ésàg pɔ́ Abimelɛg gwǎa kʉ̀a

Epʉ̀a Filisi la gyá ńkwɔ́ʼɔ lóŋ. 15Ńdɔgɔ tsetsáʼ ḿbú ffo mentse ntǔŋ mie megàŋafàʼ tá we Ábalaham la túŋ fʉ̀ʼ gie à lɔ̌ɔn ńtsẅé wó. 16Ńgÿo púʼu, Abimelɛg gɔɔn né Ésàg ngie: «Ɔ̀ pǔ ńgáʼ tà ńcʉa wég. Fó láʼ peg ńgʉa.»

17Ésàg fó jʉʼó ńgʉa ńkwɛ́ mentàb mé tsɛ̀ɛ fúʼu Ngelaa, ńcʉ́ʼʉ ńtsẅé pɔ́ wó. 18Ésàg fwɔʼ mentse ntǔŋ mie mé la túŋ fʉ̀ʼ gie tá we Ábalaham la nyé ńgwɔ́ wó. Mbà Ábalaham la kwé, epʉ̀a Filisi cʉ́ʼ ffo. Éfwɔʼ púʼu, ńké ńgíŋe ńtóŋ pɔ́ né mezíŋ mie tá we Ábalaham la ná.

19Á gÿo ńgwɔ́ tsɔ́ lyɛ̌ʼ, megàŋafàʼ Ésàg gíŋe ne ńtúŋo tsɔ́ ntse ntǔŋ tsɛ̀ɛ fúʼ, ńtúŋ tà ńkẅɛɛ na lesaʼá ntse sie é té júm. 20Táʼ, epʉ̀a Ngelaa pie ée papféle menɔ̀ɔn, faʼte papféle menɔ̀ɔn pe Ésàg lé ntsaŋ. Ńgɔɔn ngie: «Ntse wɔɔn gwɔ́ pɔ́ wég.» Ésàg leen ńná lezíŋ wɔɔn ntse ntǔŋ ŋwɛ́ lê Esɛg, ńdɔgɔ ńgɔɔn ngie «zòŋ.» Ńtí páʼ pâ pɔ̌ la zoŋ. 21Pɔ́ gíŋe ńtúŋ tsɔ́ ntse ntǔŋ wendyɛ̀ʼɛ, ndʉʼʉ́ndʉʼʉ́ gíŋe ńké ńkẅɛɛ mǒ kẅɛ. Ésàg ná lezíŋ wɛ̌ ntse ntǔŋ lê Sídnà. Ńdɔgɔ ńgɔɔn ngie: «Ndʉʼʉ́ndʉʼʉ́.» 22Pɔ́ fó jʉʼó ńgʉa, ńgíŋe ńtúŋ tsɔ́ ntse ntǔŋ. Táʼ, acÿɔ́g té kẅɛɛ na wɔɔn wɔ́. Ésàg ná lezíŋ lê «Leyobɔd» ńdɔgɔ ńgɔɔn ngie: «lezyéen», ńtí páʼ à la ne ńgɔɔn ngie: «Cʉ̀apʉ̀a peʼé wég fʉ̀ʼɔɔn, tà à lɔɔn ngwɔ́ peg zyé mboŋó tsɛ̀ɛ wɔɔn ngwòŋ.»

23Pɔ́ la fó wó, ńgʉa né Mbɛɛshÿeba. 24Letsẅɛ́ʼ gÿo ńgwɔ́, Cʉ̀apʉ̀a kẅɛɛ mvfò yé ńgɔɔn né yé ngie: «Mèŋ n gee Ssé tá gù Ábalaham, te pɔ́g, mélàʼmie pɔ̀gɔ zɔ gwɔ̌. N ge gÿo cÿɔʼɔ gú, é gÿo engẅɛ̀ jù zyéen, ńtí Ábalaham ngàŋafàʼ wɔ̀ɔn.» 25Ésàg kwɛ́ɛ jʉʼʉ lenuŋé pwɔʼ jʉʼó, ńguʼte Ssé ńtóŋo yé lê Cʉ̀apʉ̀a. Ńkwɛ́ ntàb ye jʉʼó, ngàŋafàʼ yé túŋ tsɔ́ ntse ntǔŋ jʉʼó.

26Abimelɛg fó Ngelaa, ńtóo légyá Ésàg, ńgwaa tó, pɔ́ shǔ we Aguzad né Pikɔɔ tándá mekáŋa twó pé gwɔ́.

27Ésàg zɛ́te wɔ́b ngie: «Pi tóo éfaʼa wɔ́ɔn mélàʼakɔ́? Tá mbà pi ka pʉ̀a wɔ́ɔn, éfó láʼ pi ńjwoŋo wɔ́ɔn.» 28Á tsɔ́ʼ ngie: «Peg ne ńcwoŋo ńgyá páʼ Cʉ̀apʉ̀a aa né gù. Áa mmó gie á gÿǒ, peg gɔɔn ngie: Shúshu, á ne ńzɛ́te ngie pege tem ńkwaŋa nò tsetsɛ̀ɛ pege. Pege gwa kʉ̀a. 29Ngie ɔ̀ te gÿo tsɔ́ nò tepòŋ na peg wɔ́, páʼ peg yég ka gíŋe te gÿo tsɔ́ nò tepòŋ na gù wɔ́. Peg ka gÿo pɔ́ nò mbòŋo na gù, ńnyé gú ɔ́ gʉa né mbʉ́lè. Peg ne ńgyá fʉ̀ʼɔɔn ngie Cʉ̀apʉ̀a la néŋ mbʉ́lè na gù.» 30Ésàg gÿo Línɔ̀ɔn ńtíi wɔ́b, pɔ́ pfɛ́ɛ mmó, ḿbiŋ ńnú. 31Á gÿo ńgwɔ́ tsɛ̀ɛ mbaʼámbaʼ Ésàg pɔ́ Abimelɛg gwa kʉ̀a. Ésàg leʼe wɔ́b pâ pɔ̌ fege lé mbʉ́lè.

32Alyɛ̌ʼ ŋwɛ́, ngàŋafàʼ Ésàg tó shwóŋo yé nò na ntse ntǔŋ gẅie pɔ́ ka túŋ ńgɔɔn ngie: «Peg ka gyá ntse!» 33Ésàg ná lezíŋ ntse ntǔŋ ŋwɛ́ lê Shʉba (ńdɔgɔ ńgɔɔn ngie kʉ̀a). Áa mmó gie á gÿo lezíŋ yɔɔn tÿǒsoŋ ée lê Mbɛɛshÿeba tà ńkú lyɛ̌ʼɔɔn (ńdɔgɔ ńgɔɔn ngie ntse ntǔŋ kʉ̀a).

Anò lɔ́ɔnndá Ezagẅi

34Ezagẅi la gẅiin ngùʼ móm lekùɔ, ńzɔ́ʼ púɔ láʼa Hɛ́d mépʉ́a: Jẅindid míŋ Mbɛli pɔ́ Mbasemad míŋ Eloŋ. 35Pɔɔn panzwě ŋwɛ́ la pú ńnéŋe Ésàg pɔ́ Lɛpékà tsɛ̀ɛ ngʉ̀ngʉ̀.

Currently Selected:

Nzyeté 26: nnh

Highlight

Copy

Compare