Nzyeté 25

Ábalaham kwě

1Ábalaham la gÿo ńgíŋe ńzɔ́ʼɔ tsɔ̌ manzwě, lezíŋ sé gwɔ́ lê Ketula. 2Pɔ́ yé la zyé púɔ mbàŋa: wɔɔn laa Zimelaŋ, wɔɔn gwɔ́ Yɔshÿaŋ, wɔɔn gwɔ́ Mendaŋ, wɔɔn gwɔ́ Mandyaŋ, wɔɔn gwɔ́ Yishÿembag, ńgÿo Shúwà 3Yɔshÿaŋ la zyé Samba pɔ́ Ndendaŋ. Penkʉ́ Ndendaŋ tó ńgwɔ́ pʉ̀a Ashuu, ńgwɔ́ pʉ̀a Letushʉ mbɔɔ pʉ̀a Legumi. 4Mandyaŋ kú ńzyé Efa, ńzyé Efɛ̂ɛ, ńzyé Anɔg, ńzyé Ambinda, ńgÿo Ɛ́ɛndà. Pɔ́ metsèm lɔgɔ ḿbú ńgwɔ́ zyé Ketula, nzwě Ábalaham.

5Ábalaham la pú ńná shúm sé ntsèm né Ésàg. 6Ńgʉa na gubé memágàb pé, mbà à la nyé ntʉ̀ntʉ̀, ńnáa yɔ́b mmó, ḿbiŋ ńgÿo pɔ́ fó lejʉ́ŋ míŋ we Ésàg, ńgʉa né tàa shÿó sǎʼnèm. 7Ábalaham la gwaa kwé, mbà à gẅǐin ngùʼ ntsɔ̀b tʉ̂a lé móm sɔɔnmbʉ́a nzèm nkÿo. 8Ńgwaa kwé púʼu, mbà à zyě ńgyá njÿó, ńké ńgwɔ́ pɔ́ tsɛ̀ɛ lekág. 9Ésàg pɔ́ Esemayɛ̂ɛ pie ée gubé Ábalaham la túŋo yé, á mvwɔ̀ʼ Mágpèla á ngʉ̀ŋe Mamlé, á tsɛ̀ɛ nkáʼ gẅie é la zɔɔn ńgwɔ́ nkáʼ Efeloŋ gẅie à laa míŋ Tsowa, ńkẅɛɛ na ngẅɛ̀ pʉ̀a Hɛ́d. 10É laa nkáʼ gẅie Ábalaham la júu mbwó pʉ̀a Hɛ́d.

Mé la túŋo Ábalaham pɔ́ nzwě we Sǎlà pɔ́ wó. 11Ábalaham la kwé, é Ssé néŋ mbʉ́lè na míŋ we Ésàg gẅie à lɔ̌ɔn ńtsẅé ngʉ̀ŋe ntse ntǔŋ Lahayi-Loyi.

12Agaa laa múɔ ngwòŋ Egíbtò, ńgwɔ́ ngàŋafàʼ Sǎlà. Ngẅɛ̀ Esemayɛ̂ɛ míŋ Ábalaham gẅie pɔ́ Agaa la zyé, eyɔɔn: 13Mezíŋ gubé Esemayɛ̂ɛ léfó na múɔ letwó we, ńgʉa ńkúu na ntsẅɛ́ ndá wé emɔɔn: múɔ letwó we, à laa Nembayɔd, ḿbɔ́ɔnte Kéndàa, ḿbɔ́ɔnte Admbɛɛ, ḿbɔ́ɔnte Mibsam, 14ḿbɔ́ɔnte Meshÿema, ḿbɔ́ɔnte Ndúmà, ḿbɔ́ɔnte Masa, 15ḿbɔ́ɔnte Andad, ḿbɔ́ɔnte Témà, ḿbɔ́ɔnte Yetûu, ḿbɔ́ɔnte Nafíshÿè ńgÿo Kedma, 16Pɔɔn lɔgɔ ńgwɔ́ gubé Esemayɛ̂ɛ ntsɔ̀b pʉ́a. Wɛ̌ nyìŋ wɔ́ɔ na pɔ́b, à laa fùɔ na yé láʼ, lezíŋ wɛ̌ nyìŋ wɔ́ɔ, é gwɔ́ lezíŋ yé láʼ. Wɛ̌ nyìŋ wɔ́ɔ gíŋe ńná sé lezíŋ na yé jʉʼʉ mentàb. 17Esemayɛ̂ɛ la gwaa kwé, mbà à gẅǐin ngùʼ ntsɔ̀b sɔɔnmbʉ́a lé móm ntá nzèm nkÿo. 18Epʉ̀a Esemayɛ̂ɛ lɔ́ɔn ńtsẅé léfó Avila ńgʉa gʉa ńkúu Shûu gẅie á ngʉ̀ŋe Egíbtò lé shÿó Asili. Epʉ̀a Esemayɛ̂ɛ la néŋe na shÿó gẅie é líe we mefɛ̌ pɔ́b.

YAKWƆ̂B

(25–36)

Ezagẅi pɔ́ Yakwɔ̂b

19Ngẅɛ̀ Ésàg míŋ Ábalaham eyɔɔn: Ábalaham la zyé Ésàg. 20Ésàg gÿo ńgẅiin ngùʼ móm lekùɔ, ńzɔ́ʼɔ Lɛpékà gẅie aa fɛ̌ Lambaŋ, ńgwɔ́ míŋ Mbetuwɛ, Mbetuwɛ gwɔ́ nyìŋ pʉ̀a Alam ńnéŋe kwòŋo pʉ̀a Alam. 21Ésàg sẅíŋte Cʉ̀apʉ̀a ntí nzwě we gẅie à laa nkǐŋ. Cʉ̀apʉ̀a júʼu sẅíŋtè yé, anzwě we Lɛpékà shwoŋ. 22Egubé la ne ńtúu mennɛ́ mɔ́b, á lepfòm yé, á gɔɔn ngie: «Ńtí kɔ́ n júʼu páʼɔɔn.» Ńgʉa ńzɛ́te Cʉ̀apʉ̀a. 23Cʉ̀apʉ̀a gɔɔn ngie:

«Mengwòŋ mémbʉ́a ée lepfòm gù,

Epʉ̀a meláʼ mémbʉ́a ge gÿo kẅɛɛ lepfòm gù, éfege.

Atsɔ̌ tàʼ ge gÿo tʉ é cʉa wetsɔ̌,

mvfò múɔ ge gÿo faʼa mbwó nzèm.»

24Afʉ̀ʼʉ lezyé la gÿo ńgwɔ́ tà ńkuʼ, á zyé mefág. 25Mvfò múɔ kẅɛ, ńdÿéen páŋ, embùm ye gwɔ́ menoŋ menoŋ páʼ ngùb múɔ njʉ̀njÿò la. Á tsẅi lezíŋ sé lê Ezagẅi. 26Mbɔ́ɔntè gwaa kẅɛ, mbà pwó yé kɔʼɔ́ ńkíbe ntsìŋekwò Ezagẅi, mé tsẅi lezíŋ sé lê Yakwɔ̂b#25:26 Áa na shwóŋè Ébɛ̀ lezíŋ Yakwɔ̂b lɔgɔ ńgɔɔn ngie ntsìŋe kwò.. Ésàg la gwaa zyé yɔɔn gubé, mbà á gẅǐin ngùʼ móm ntɔgɔ́.

27Epúɔ mbàŋa ŋwɛ́ gúʼ. Ezagẅi gÿo ńgwɔ́ máa njwòŋopwóon, ńgwá ńgwɔ́ yé pɔ́ tsẅɛ. Tá ńgʉa na Yakwɔ̂b, á gwɔ́ nyìŋ ńdáŋte láŋte, ńzɔ́gɔ yé pɔ́ tsɛ̀ɛ mentàb. 28Ésàg lɔ̌ɔn ńkwoŋo Ezagẅi tɛʼ ńtí mbab mbàʼ gie à lɔ̌ɔn ńdɔgɔ éfóo pwóon, ńtóo, á pfɛ́ɛ. Tá ńgʉa na Lɛpékà, á kwoŋ pɔ́ Yakwɔ̂b.

29Á táa ńgwɔ́ tsɔ́ lyɛ̌ʼ, Yakwɔ̂b ne ńdɔ́ɔn nnáʼ, Ezagẅi gwaa kwɔ́ʼɔ pwóon mbà à pǔ ńkʉ́a. 30Ńgɔɔn né Yakwɔ̂b ngie: «Shúshu, nyé wɔ́ɔn n núu tsɔ̌ pàŋ nnáʼ yɛ̂, ńtí nue n gee páʼɔɔn ńne ńkʉ́a tɛʼ.» Áa mmó gie á la gÿo mé tsẅi tsɔ́ lezíŋ sé lê Éndɔ̀m, ńdɔgɔ ńgɔɔn ngie pàŋ nnáʼ#25:30 Áa na shwóŋè Ébɛ̀ lezíŋ Éndɔ̀m lɔgɔ ńgɔɔn ngie pàŋ nnáʼ.. 31Yakwɔ̂b gɔɔn ngie: «Zɔɔn ḿvɔg ésẅiŋe jʉʼʉ mvfò múɔ né mèŋ lyɛ̌ʼɔɔn!» 32Ezagẅi tsɔ́ʼ ngie: «Nzyè ne ńzẅé wɔ́ɔn, legwɔ̌ mvfò múɔ zɔɔn ńne ńkẅéte wɔ́ɔn na kɔ́?» 33Ńdeen ńtsɔ́ʼ púʼu, Yakwɔ̂b gɔɔn ngie: «Zɔɔn ḿvɔg ńkʉa mvfò mèŋ lyɛ̌ʼɔɔn.» Ezagẅi kʉa mvfò yé. Púʼu ésẅiŋe jʉʼʉ mvfò múɔ gie áa yé á mbwó Yakwɔ̂b. 34Yakwɔ̂b leen ńná mbelég pɔ́ nnáʼ mbwó Ezagẅi, á pfɛ́ ḿbiŋ ńnú, ńdeen ńdu ssé ńgʉa. Wɔɔn leen ńgwɔ́ páʼ Ezagẅi la gwága nò mvfò múɔ púʼu.

Currently Selected:

Nzyeté 25: nnh

Highlight

Copy

Compare