Nzyeté 24

Anò lɔ́ɔnndá Ésàg pɔ́ Lɛpékà

1Ábalaham la gwaa gwɔ́, mbà à zẅǐŋ tɛʼ, mbà Cʉ̀apʉ̀a la piŋ ńnéŋmbʉ́lè na yé, ńnáa yé shúm ntsèm. 2Ábalaham gɔɔn né ngàŋafàʼ we gẅie á tsẅě mbwó yé tɛʼ, ńgwɔ́ gẅie yé zɔ pǔ ńdíe shúm Ábalaham ntsèm, ngie: «Shúshu, zába pwó jú nzèm ntɔ́ɔn wɔ́ɔn. 3Ńkʉa mvfò mèŋ na lezíŋ Cʉ̀apʉ̀a, e Ssé gie e piʼ lefaŋ pɔ́ tsetsáʼ ngie, ɔ̀ těen ńdáʼa ńgee tsetsɛ̀ɛ púɔ panzwě Kánàhan pie peg lâ pɔ̌ tsẅé, éfaʼa nzwě míŋ wɔ̀ɔn mɔ́. 4Ɔ̀ ge piŋe lesaʼá peg, á tsɛ̀ɛ ngwòŋ wég, éfaʼa nzwě míŋ wɔ̀ɔn Ésàg.» 5Angàŋafàʼ tsɔ́ʼɔ mbwó yé ngie: «Páʼ ngwɔ́ n tóo wó, manzwě lʉʼʉ lécʉ́me nzèm mèŋ, peg yé tó lé wɔɔn ngwòŋ. Á lɔɔn ńtó ńgwɔ́ púʼu, n dɔgɔ míŋ gù Ésàg, ḿbiŋ nzèm né láʼ pi ŋwɛ́ keen?» 6Ábalaham tsɔ́ʼ ngie: «Ngǎŋ, te fʉʼʉ lélɔgɔ míŋ wɔ̀ɔn ḿbiŋe wó! 7Cʉ̀apʉ̀a, e Ssé gie ée tÿǒ, á yé gẅie à la fó ndá tá wɔ̀ɔn, á tsɛ̀ɛ ngwòŋ gẅie eség lesaʼá ée wó, ńkẅile wɔ́ɔn, á yé gẅie à la gɔɔn nò né mèŋ tà ńkʉa ngie à ge ná ngwòŋ wɔɔn mbwó ngẅɛ̀ yɔ̀ɔn; kwaʼ yé máŋwɛ́ ge gÿo túmo mántúm, à gʉa ńtsege gù wó, légwɔ́ gie ɔ̀ ge ké lɔgɔ nzwě míŋ wɔ̀ɔn éfó pɔ́ wó. 8Manzwě lɔɔn te zẅíŋe lécʉ́me nzèm gù wɔ́, mbà ɔ̀ kě kaa gwe lepʉ̌ kʉ̀a gie pɔ̀gɔ gwaa lɔɔn wɔ́. Táʼ, ngwɔ́ pi míŋ wɔ̀ɔn le wó piŋ.» 9Angàŋafàʼ zába pwó yé nzèm ntɔ́ɔn táfàʼ we Ábalaham, ńzẅíŋ, ḿbiŋ ńkʉa. 10Angàŋafàʼ gʉa tsetsɛ̀ɛ mekamɛɛ táfàʼ we, ńkẅile legém. Ńdíe shúm mbòŋo sie táfàʼ we la gẅiin ntsèm, ḿbí, ńdɔg ńcʉ́me mánzsè Mezopotamia, á tÿǒsoŋo Nahɔɔ#24:10 Ńdíe shúm mbòŋo sie táfàʼ we la gẅiin ntsèm: etsɔ̌ ntí lekyàgte á pú ńjÿó shúm táfàʼ we. Nahɔɔ áa jʉʼɔɔn, ngwɔ́ sɔɔn lezíŋ lɔgɔ ńgwɔ́ lezíŋ tÿǒsoŋ (páʼ mé gyá tsɛ̀ɛ meŋwàʼne pʉ̀a Asili), páʼ ńgwɔ́ é lɔgɔ ńgwɔ́ lezíŋ fɛ̌ Ábalaham (nkàŋ 15; 11:27). É lɔɔn ńdɔgɔ ńgwɔ́ lezíŋ fɛ̌ Ábalaham mbà lezíŋ tÿǒsoŋ Nahɔɔ lɔgɔ ńgwɔ́ lé Halaŋ (Nzy 11:31)..

11Ńgʉa tà á gwaa gwɔ́ ncwònzém, á fʉ̀ʼ gie panzwě kẅɛ́te ńtúʼu ntse, á nyé pɔ́ te kúu tÿǒsoŋo Nahɔɔ, ńgÿo mekamɛɛ kẅíʼte ssé lézẅɛte, á ngʉ̀ŋe ntse ntǔŋ. 12Á sẅíŋte Ssé ńgɔɔn ngie: «Cʉ̀apʉ̀a, e Ssé Ábalaham táfàʼ wɔ̀ɔn, tsétsɔʼ, gÿo anò gie n ně ńkẅɛɛ ndá mǒ lyɛ̌ʼɔɔn, á giŋ mboŋó. Lɔgɔ pòŋontʉ́m jú, ńgÿo nò mbòŋo na táfàʼ wɔ̀ɔn Ábalaham! 13Wɔ́ɔn wɔɔn ńtyé ngʉ̀ŋe ntse ntǔŋ, epʉ̀a pie é tsẅé tÿǒsoŋ, egubé yɔ́b yepanzwě ge tóo jʉʼɔɔn, é túʼ ntse. 14N ge gɔɔn né tàʼ múɔ manzwě, á tsetsɛ̀ɛ pɔ́b ngie à tʉ́ŋe ntse wé tsɛ̀ɛ yé tÿóon, ńná n nú. Ńgwɔ́ gie à lɔɔn ńtsɔ́ʼ ngie: “Núu! N ge gíŋe túʼ we mekamɛɛ pú, é ná”, mbà wɛ̌ ŋwɛ́ lɔgɔ ńgwɔ́ gẅie ɔ̀ la tsɔ́ʼ páʼ à ge gwɔ́ nzwě Ésàg, ngàŋafàʼ gù. À cʉa púʼu, n zsé ngie ɔ̀ lɔgɔ́ pòŋontʉ́m jú, ńgÿo nò mbòŋo na táfàʼ wɔ̀ɔn Ábalaham!» 15Angàŋafàʼ Ábalaham la nyé pɔ́ te gɔɔn tà ńcʉ́me, Lɛpékà leen ńkẅɛɛ jʉʼó lé tÿóon ntse lekẅí yé. Lɛpékà ŋwɛ́ laa míŋ Mbɛtuwɛ. Mbetuwɛ gwɔ́ nyìŋ mbàŋa, má we gwɔ́ Mileka ńgwɔ́ nzwě Nahɔɔ gẅie aa fɛ̌ Ábalaham. 16Múɔ manzwě ŋwɛ́ la sí tɛʼ, ńnyé pɔ́ te zsě mámbàŋa, mbà pɔ́ tsɔ̌ mámbàŋa zɔ̌ɔn laa tsɔ́ nò shwóŋo. Á cwóŋ ńtúʼ ntse, tà tÿóon yé lúe, á lɔg ńkwɔ́ʼ né kwóŋ.

17Angàŋafàʼ Ábalaham kÿote ńzáʼa yé, ńgɔɔn né yé ngie: «Shúshu, náa wɔ́ɔn méjʉʼʉ ntse tsɛ̀ɛ tÿóon jú yɛ̂ n nú!» 18Á tsɔ́ʼ ngie: «Andè, kɔ! Núu!» Ńgɔɔn púʼu, ńdeen ńdwo sẅíʼi ntse lekẅí yé tsɛ̀ɛ tÿóon, ńtʉ́ŋe, ńná, á nú. 19Ńná ntse né yé tà ńtsẅé jʉʼ, ńgɔɔn ngie: «N ge gíŋe túʼ tsɔ́, é náa mbwó menɔ̀ɔn pú, tà pɔ́ cwoŋo ńnú.» 20Á gɔɔn púʼu, ńdwo sele ntse tsɛ̀ɛ tÿóon ńnéŋe tsɛ̀ɛ ngwʉ̌ŋ ntse menɔ̀ɔn, ńgíŋe ńkÿote ńgʉa ntse ńtúʼ tsɔ́, ńnéŋe tsɛ̀ɛ ngwʉ̌ŋ ntse menɔ̀ɔn, pɔ́ púʼu tà mekamɛɛ ntsèm pú ńnú ntse. 21Andÿò wa ne ńdíe páʼ à gÿo, ńké te nò gɔɔn, ḿbiŋ ńne sele ńzɛ́te ntʉ́m yé ngie tà Cʉ̀apʉ̀a te páʼɔɔn ńne ńgÿo, ammó gie e sẅiŋté yé mǒ ne ḿbumte wɔ́ɔ?

22Mekamɛɛ la pú ńnú ntse tà ńtsẅé jʉʼ, mámbàŋa wa píi mékwáŋ gẅie mé la lɔgɔ tʉ̌ ngɔ̂ɔ gie á gẅiin fʉ̀ʼ tsemé pàga nkáb ńnyɛte, ńnáa mbwó múɔ manzwě, ḿbiŋ éshÿɔ́g mekwáŋ mémbʉ́a mie é gẅiin fʉ̀ʼ mepàg nkáb legém na mbwó mé. 23Ńdeen ńké ńzɛ́te yé ngie: «Múɔngùɔ, ɔɔ míŋ wɔ̌? Shúshu shwóŋo wɔ́ɔn. À lɔɔn ńgwɔ́, n gyá jʉʼ mbʉ̀a pi, tà peg láʼa wó?» 24Á tsɔ́ʼ ngie: «N gee míŋ Mbetuwɛ, ńdɔgɔ ńgwɔ́ míŋ míŋ Mileka pɔ́ Nahɔɔ.» 25Ńgíŋe ńgɔɔn ngie: «Áa mbʉ̀a peg, ajʉʼʉ lelaʼá gwɔ́ wó, eshúm léjÿó menɔ̀ɔn gwɔ́ wó, tá ńgyɔ́ɔn, tà mbɔɔ legǐ gẅie mé la saŋ.»

26Á gɔɔn púʼu, mámbàŋa wa ŋwɔ́ʼ nnɛ́ mvfò Cʉ̀apʉ̀a, tà zǐ yé kíbe ssé, ńdɔg síe yé. 27Ńgɔɔn ngie: «E sǐe Cʉ̀apʉ̀a, é Ssé táfàʼ wɔ̀ɔn Ábalaham, á yé Ssé gie e gẅiin mekùʼ, ḿbiŋ ńgẅiin pyennɛ́, á nzèm táfàʼ wɔ̀ɔn. À ka lɔgɔ wɔ́ɔn ńgiŋ, tà ńtsege wɔ́ɔn mbʉ̀a fɛ̌ táfàʼ wɔ̀ɔn.» 28Múɔngùɔ wa leen ńkÿote, ńgʉa ḿbíte, éshwóŋo má we. 29Á laa púʼu, Lɛpékà gẅiin tsɔ̌ fɛ̌ we wembàŋa, lezíŋ sé gwɔ́ lê Lambaŋ. Lambaŋ ŋwɛ́ júʼ, ésẅɛte, ńkẅɛ ńgʉa ńzáʼa mámbàŋa ŋwɛ́ ngʉ̀ŋe ntse. 30À la gwɔ́ tà ńgyá mékwáŋ lâ mekwáŋ na mbwó fɛ̌ we Lɛpékà, ḿbiŋ ńjúʼ páʼ à la ne ńgɔɔn ngie: «Wɔɔn páʼ ndÿò wɔɔn gɔ̌ɔn né mèŋ.» Ńdeen ńké ńkẅɛ́te mámbàŋa ŋwɛ́ gẅie à la tyé lejʉ́ŋ mekamɛɛ á ngʉ̀ŋe ntse. 31Ńgɔɔn né yé ngie: «Gù gẅie mbʉ́lè Cʉ̀apʉ̀a ée na gù, tóo! Ɔ̀ tyé pǐ mélàʼakɔ́? N nyɛté jʉʼ gie ɔ̀ ge láʼa wó, tà mbɔɔ jʉʼ ye mekamɛɛ.»

32Mámbàŋa wa kúu ndá. Lambaŋ tsẅi, mé kyɛ́ʼ mepìʼ na mekamɛɛ. Ńnáa legǐ saŋ tà mbɔɔ shúm léjÿó, mekamɛɛ pfɛ́. Ḿbiŋ ńná ntse mbwó ndÿò ŋwɛ́ pâ pʉ̀a pé lɔg sɔg mekwò. 33Afʉ̀ʼ kuʼ, mé tÿɔ́g shúm léjÿó mvfò yé. Táʼ, á gɔɔn ngie: «À lɔɔn ngwɔ́ ń de pfɛ́ɛ mmó té gwɔ́ gie e shwóŋo nò gie n giŋe mǒ wɔ́.» Lambaŋ tsɔ́ʼ ngie: «Gɔɔn!» 34Á leen ńké ńgɔɔn ngie: «N gee páʼɔɔn ńgwɔ́ ngàŋafàʼ Ábalaham, 35Cʉ̀apʉ̀a la shÿéenshÿěen ńnéŋ mbʉ́lè na táfàʼ wɔ̀ɔn, ńdɔgɔ yé ńgÿo ngàŋa mmó. À ka ná menjʉ̀njÿò né yé, ńná mvfó, ńná mefòŋ, ńná nkáb, mbɔɔ tʉ̌ ngɔ̂ɔ, ńná megàŋafàʼ pembàŋa mbɔɔ pepanzwě, ńná mekamɛɛ lâ menzikáasè. 36Tà mbɔɔ páʼ Sǎlà nzwě táfàʼ wɔ̀ɔn la cʉ́ʼ ńgwɔ́ pɔ́ nzẅìŋe manzwě, pɔ́ yé la ké ńzyé tàʼ múɔ mbàŋa, táfàʼ wɔ̀ɔn ka pǔ ńná shúm sé ntsèm, á mbwó míŋ wé ŋwɛ́. 37Táfàʼ wɔ̀ɔn ka tsẅi ngie, n kʉa ńgɔɔn ngie, n těen ńdáʼa faʼa nzwě míŋ we, á tsetsɛ̀ɛ púɔngùɔ Kánàhan á tsɛ̀ɛ ngwòŋ gẅie à tsẅé wó wɔ́. 38Ngie: “N ké ńgʉa pɔ́ tsɛ̀ɛ lesaʼá ség, á tsɛ̀ɛ ngẅɛ̀ ndá yeg, ńdúɔ nzwě míŋ wɔɔn.” 39Táfàʼ wɔ̀ɔn ka gɔɔn púʼu, n tsɔ́ʼ ngie: Manzwě lɔɔn ńtó ńdʉʼʉ lécʉ́me nzèm mèŋ lá? 40Á tsɔ́ʼ yé ngie, Cʉ̀apʉ̀a gẅie yé Ábalaham júʼu ncwò wé, à ge túmo cÿɔ́ʼ we, peg yé gwɔ́; à ge gÿo, anò gie n giŋe mǒ, à pumte. N ge lúɔ nzwě míŋ we, á tsɛ̀ɛ ngẅɛ̀ yɔb, á lesaʼá pɔ́b. 41N dɔɔn ńké ńgʉa tsɛ̀ɛ ngẅɛ̀ ndá yɔb, tá mé té zẅíŋe lénáa múɔngùɔ né mèŋ wɔ́, mbà n kě kaa gwe lepʉ̌ kʉ̀a gie peg yé gwǎ wɔ́. 42N ně ńtó tà ńkúu ngʉ̀ŋe ntse lyɛ̌ʼɔɔn, ńgɔɔn ngie: Cʉ̀apʉ̀a, e Ssé táfàʼ wɔ̀ɔn Ábalaham, gÿo anò gie n ně kẅɛ ndá mǒ, à pumte. 43Afʉ̀ʼɔɔn gie n tyé ngʉ̀ŋe ntse lɔɔn, múɔngùɔ gẅie à ge kẅɛ létúʼ ntse, tà n gɔɔn né yé ngie shúshu, lɔgɔ tÿóon jú ńná ntse n nú. 44À lɔɔn ńtsɔ́ʼɔ mbwó mèŋ ngie, kɔ nú, n ge túʼ mbɔɔ we mekamɛɛ pú, mbà wɛ̌ ŋwɛ́ lɔgɔ ńgwɔ́ manzwě gẅie Cʉ̀apʉ̀a zǎb páʼ à ge náa mbwó míŋ táfàʼ wɔ̀ɔn. 45E sẅíŋte Ssé tà ńnyé pɔ́ te cʉ́me, Lɛpékà kẅɛ né tÿóon ntse lekẅí yé, ńcwóŋ ńtúʼ ntse, n gɔɔn né yé ngie: shúshu ná ntse n nú! 46Á gwóon ńdwo sẅíʼi tÿóon ntse lekẅí yé, ńgɔɔn ngie: Núu! N ge gíŋe túʼ we mekamɛɛ pú. Á ná púʼu, n nú, á gíŋe ńgÿo mekamɛɛ pɔ́ɔn nú yɔ́b. 47N zɛté yé ngie: Ɔɔ míŋ wɔ̌? Á tsɔ́ʼ ngie: N gee míŋ Mbetuwɛ, ńgwɔ́ míŋ míŋ Nahɔɔ pɔ́ Mileka. Á tsɔ́ʼ púʼu, mèŋ shÿɔ́gɔ mékwáŋ mezẅé yé, ḿbiŋ shÿɔ́g mekwáŋ na mbwó mé. 48N ŋwɔ́ʼ nnɛ́ tà zǐ yɔ́ɔn kíbe ssé, ńdɔg síe Cʉ̀apʉ̀a, é Ssé táfàʼ wɔ̀ɔn Ábalaham gẅie à lɔ̌g mekùʼ, ńtsege wɔ́ɔn, légwɔ́ gie e faʼa míŋ fɛ̌ táfàʼ wɔ̀ɔn, à gwɔ́ nzwě míŋ táfàʼ wɔ̀ɔn. 49Afʉ̀ʼɔɔn la, à lɔɔn ńgwɔ́ gie, pi ge lɔgɔ pyennɛ́ pɔ́ pòŋontʉ́m, é pÿɛɛ shwóŋè táfàʼ wɔ̀ɔn, pi shwóŋo wɔ́ɔn. Ńgwɔ́ gie á té púʼu wɔ́, pi shwóŋo wɔ́ɔn, n zsé páʼ n ge gÿo.»

50Lambaŋ pɔ́ Mbetuwɛ tsɔ́ʼ ngie: «Yɔɔn nò gie Cʉ̀apʉ̀a zɔ taŋté, atsɔ́ nò gie ngwɔ́ peg gíŋe ńgɔɔn mǒ, á lélʉʼ, kà lézẅíŋ wɔ́ɔ, á té wó wɔ́. 51Lɛpékà wɛ̂, ńtyé fó gù, pi yé gʉa, ńzsé ngie à cʉʼʉ́ nzwě míŋ táfàʼ gù, páʼ Cʉ̀apʉ̀a la kaʼ.» 52Angàŋafàʼ Ábalaham la gwɔ́ tá ńjúʼ páʼ à gɔ̌ɔn páʼɔɔn, ńŋwɔ́ʼ nnɛ́, tà zǐ yé kíbe ssé, ńdɔg ńguʼte Cʉ̀apʉ̀a. 53Angàŋafàʼ Ábalaham gʉa na pìʼ yé, ńkẅile shúm sie mé la lɔg nkáb pɔ́ tʉ̌ ngɔ̂ɔ ńnyɛte, ńkẅile mbɔɔ menzsǒ, ḿbú ńnáa mbwó Lɛpékà. Ńná shúm sie é cÿɔ́g nkáb mbwó fɛ̌ Lɛpékà pɔ́ má we. 54Ńná tà ńtsẅé jʉʼ, pâ pʉ̀a pé pie pâ pɔ̌ la tó, púte ḿpfɛ́ɛ mmó, ḿbiŋ ńnú, ńdáʼa wó. Angàŋafàʼ Ábalaham gÿo ńdu ssé mbaʼámbaʼ, ńgɔɔn ngie: «Shúshu, pi nyé wɔ́ɔn ḿbiŋ, ńtsɛ́ɛ táfàʼ wɔ̀ɔn.»

55Afɛ̌ Lɛpékà pɔ́ má we gɔɔn ngie: «Peg lâ Lɛpékà ge náʼa gíŋe néŋe mbɔɔ na lyɛ̌ʼ legém, tá ɔ̀ gʉa.» 56Ngàŋafàʼ Ábalaham tsɔ́ʼɔ mbwó pɔ́b ngie: «Ndyɛ̀ʼ pi láte wɔ́ɔn, á nue Cʉ̀apʉ̀a gÿǒ anò gie n ka tóo shwóŋo, á pumte. Pi nyé wɔ́ɔn, m biŋ né mbʉ̀a táfàʼ wɔ̀ɔn.» 57Pɔ́ tsɔ́ʼ ngie: «Pege tóŋo múɔngùɔ ḿbíge yé.» 58Pɔ́ tóŋo Lɛpékà ńzɛ́te yé ngie: «Ɔ̀ zẅǐŋ páʼ pi ndÿò wɔɔn ge gʉa?» Á tsɔ́ʼ ngie: «Oon, n zẅǐŋ!» 59Pɔ́ gwóon ńnyé Lɛpékà pɔ́ mátsáb we, ńgÿo ngàŋafàʼ Ábalaham pâ pʉ̀a pé é gʉa. 60Pɔ́ gwaa cÿɔʼɔ Lɛpékà, ńne ńgɔɔn ngie:

«Gù fɛ̌ weg, ɔ̀ ge láʼ gwɔ́ mángʉanjʉʼ pʉ̀a mentsáʼ mentsáʼ,

ngẅɛ̀ jù ge láʼ jÿó metÿǒsoŋ megàŋmbù pɔ́b.»

61Lɛpékà pâ pé megàŋafàʼ pepanzwě kwɔ́ʼɔ na mekamɛɛ, ńcʉ́me nzèm ngàŋafàʼ Ábalaham, pâ pɔ̌ pú ńgʉa.

62Á la gwaa gwɔ́ mbà Ésàg ka fó jʉʼʉ ntse ntǔŋ Lahayi-Loyi, ńgʉa tà ńcʉ́ʼ ńnéŋe pɔ́ Nengɛb. 63Atsɔ̌ ncwònzém gwɔ́, Ésàg kẅɛ ńnáʼa ne ńgiŋte tsẅɛ, ḿmaʼa lejÿɔ́g, ńgyá páʼ mekamɛɛ tóo. 64Lɛpékà gẅie à la néŋe ndùm kamɛɛ, gyá Ésàg, ńkyɛ́ ńtyé ssé. 65Ńzɛ́te ngàŋafàʼ Ábalaham ngie: «Andÿò wɔɔn gẅie aa tsẅɛ, ńtóo lézáʼa wégè lɔɔn, aa wɔ̌?» Á tsɔ́ʼ ngie: «Aa táfàʼ wɔ̀ɔn Ésàg.» Lɛpékà gwóon shu nkùɔ. 66Angàŋafàʼ pú ńdaʼte mbwó Ésàg páʼ legìŋ ka tɔ́g púʼu. 67Ésàg gyá Lɛpékà, anò yé poŋo yé, á lɔgɔ yé ńgÿo nzwě we, ńdɔgɔ yé ńgee tsɛ̀ɛ ntàb mpfó má we Sǎlà. Wɔɔn aa páʼ á la cʉate púʼu, tá Ésàg láŋte lélʉa páʼ má we la kwé.

Currently Selected:

Nzyeté 24: nnh

Highlight

Copy

Compare