Nzyeté 21

Mé zyě Ésàg

1 Cʉ̀apʉ̀a la gÿo nò mbòŋo na Sǎlà, páʼ à la kaʼ. 2Sǎlà la gwaa shwoŋ, mbà Ábalaham gwɔ̌ ndÿò tɛʼ. À la gÿo ńzyé múɔ mbàŋa kwàʼ fʉ̀ʼ gie e Ssé la gɔɔn. 3Ábalaham tsẅi lezíŋ wɔɔn múɔ gẅie Sǎlà zyě lê Ésàg. 4Múɔ gÿo lyɛ̌ʼ lefɔ̌ɔn, Ábalaham púʼu yé páʼ Ssé la gɔɔn né yé púʼu. 5Mé la gwaa zyé Ésàg mbà Ábalaham gẅǐin ngùʼ nkÿo. 6Sǎlà gɔɔn ngie: «E Ssé gÿǒ n kág. Awɛ̌ nyìŋ wɔ́ɔ ge láʼa júʼu yɔɔn nò, é kága, é tíi wɔ́ɔn.» 7Ńgíŋe ńgɔɔn ngie: «Awɔ̌ nyìŋ laa páʼɔɔn ńgɔɔn né Ábalaham ngie Sǎlà ge láʼa lyɛ̌ʼ ńnóŋ gubé? Táʼ, awɔɔn gẅie à kéen ńzẅiŋ, tá peg yé zyé tàʼ múɔ mbàŋa lɔɔn!»

Mé jwoŋó Agaa pɔ́ Esemayɛ̂ɛ

8Múɔ la gúʼ, tà mé tɔʼɔ yé lepʉ́. Alyɛ̌ʼ ŋwɛ́ gie mé tɔʼɔ́ Ésàg lepʉ́, Ábalaham gÿo máamáa línɔ̀ɔn.

9Á gÿo ńgwɔ́ tsɔ́ lyɛ̌ʼ, Sǎlà gyá Esemayɛ̂ɛ, á múɔ gẅie Agaa nyìŋ Egíbtò pɔ́ Ábalaham la zyé, é ne ńgÿo megʉa#21:9 ne ńgÿo megʉa: áa tsɛ̀ɛ ŋwàʼne gie pʉ̀a Ngelékiya la ŋweʼe tà á náʼa tsẅé mé ŋweʼe le né nyaŋte Ésàg., 10á gɔɔn né Ábalaham ngie: «Jwoŋo ngàŋafàʼ wɔɔn ŋwɛ́ pɔ́ míŋ wé, ńtí nue à lɔɔn ngwɔ́ míŋ ngàŋafàʼ wɔɔn ŋwɛ́, pɔ́ míŋ wɔ̀ɔn Ésàg le tem ńjÿó ndá jú wɔ́.»

11Ábalaham júʼu shwóŋè ŋwɛ́, á pú ḿbÿɔ́gɔ yé, ńtí páʼ Esemayɛ̂ɛ la gíŋe ńgwɔ́ yé pɔ́ míŋ we. 12Táʼ, Cʉ̀apʉ̀a gɔɔn né Ábalaham ngie: «Ḿbɔ́ɔn nò gie Sǎlà gɔ̌ɔn na múɔ pɔ́ ngàŋafàʼ gù légege gú. Tÿɔ́gɔ kwò na nò gie Sǎlà ge shwóŋo gú. Á nue penkʉ́ pie Ésàg ge láʼ zyé, epɛ̌ ŋwɛ́ zɔ̌ lɔgɔ ńgwɔ́ ngẅɛ̀ jù gie n da kaʼ. 13Ńgʉa na míŋ ngàŋafàʼ gù, mbà mèŋ n ge gÿo gÿo à nuŋe tàʼ ngwòŋ, mélàʼmie à gǐŋ ńgwɔ́ pɔ́ zyé gù.»

14Ábalaham mʉ́ mbaʼámbaʼ, ḿbí mbelég, ńkaa ntse tsɛ̀ɛ ntúʼ ngùb, ńnáa mbwó Agaa, ńgwaa jwoŋo yé, pɔ́ múɔ gwɔ́. Á gʉa, ńzye légwaa ḿbúu kwòŋotsẅɛ á Mbɛɛshÿeba. 15Ntse la gwɔ́ tà ḿmaga tsɛ̀ɛ ntúʼ ngùb, á gwáʼa múɔ tsìŋe tsɔ̌ métÿǒ, 16ńgʉa ńnéŋe yé jʉʼ, tà lefǒ yɛ̌ jʉʼ ńgʉa ńkúu jʉʼ gie múɔ néŋe wó, é gwɔ́ ntyě lemaʼá kyɛ́d. Ńtí páʼ à la ne ńgɔɔn ngie: «N te ne ńkwoŋo légyá páʼ míŋ wɔ̀ɔn kwé wɔ́.» Ayɛ̌ zɔ̌ la gÿo, á gʉa ńnéŋe jʉʼʉ ndyɛ̀ʼɛ, ńdʉa. 17E Ssé júʼ ngyè múɔ mbàŋa, mántúm Ssé fó tÿǒ lefaŋ, ńtóŋo Agaa, ńgɔɔn né yé ngie: «Agaa! Akɔ́ zɔ̌ gÿǒ gú? Te pɔ́g! Á nue e Ssé jǔʼ ngyè múɔ á jʉʼ gie aa wó lɛ̂. 18Lu ssé, ńkaa múɔ, ńgẅiin yé mboŋó. Ńtí nue n ge gÿo gÿo, à nuŋe tàʼ máa ngwòŋ.» 19E Ssé gÿo púʼu, ńnyɛ́ʼ nÿɔ́g mé, á gyá ntse ntǔŋ, ńdɔg ntúʼ ngùb ńtúʼ tà é lúe, ńná múɔ nú.

20Múɔ la ne ńgúʼu, e Ssé ne ńgwɔ́ né yé. À la gÿo ńgʉa ńnéŋe kwòŋotsẅɛ, ńcʉ́ʼʉ mmàʼ kyɛ́d. 21À la tsẅé kwòŋotsẅɛ Palaŋ, ńzɔ́ʼɔ múɔ Egíbtò gẅie má wé la lúɔ ńná né yé.

Ábalaham pɔ́ Abimelɛg gwǎ kʉ̀a

22Á laa fʉʼó ŋwɛ́, Abimelɛg pɔ́ Pikɔɔ gẅie à laa fùɔ mekáŋatwó Abimelɛg, gʉa ńgɔɔn né Ábalaham ngie: «E Ssé ée né gú na kɔ̀ɔkɔ́ɔ gie ɔ̀ gÿo. 23Afʉ̀ʼɔɔn la, lɔg lezíŋ Ssé, ńkʉa kwàʼ jʉʼɔɔn, ngie ɔ̀ těen ńdáʼa fʉte wɔ́ɔn mɔ́, é ké le fʉ̀te penkʉ́ pɔ́ɔn mɔ́, tà mbɔɔ ngẅɛ̀ yɔɔn. Ndʉŋndʉŋ páʼ n ka lɔgɔ pyennɛ́ ńgÿo nò mbòŋo na gù la, gíŋe ńgÿo jú púʼu na mèŋ tà mbɔɔ na wɔɔn ngwòŋ gẅie ɔɔ wó ńgwɔ́ kÿoláʼ lɔɔn.» 24Ábalaham gɔɔn ngie: «N kʉ̌a.»

25Ábalaham gʉa ńkaga Abimelɛg ńtí páʼ megàŋafàʼ Abimelɛg ka lɔg tʉ̀, ńjÿó ntse ntǔŋ. 26Abimelɛg gɔɔn né yé ngie: «N te ne ńzsé nyìŋ gẅie à ka fʉʼ yɛ̂ ntí nò wɔ́. Ɔ̀ zɔ̌ɔn ké laa gÿo tà mèŋ zsé wɔ́; ńjúʼu pɛ́ʼɛ̀ lyɛ̌ʼɔɔn.» 27Á gɔɔn púʼu, Ábalaham líe menjʉ̀njÿò, ńdíe mvfó pɔ́ mefòŋ, ńnáa mbwó Abimelɛg, pɔ́ yé mépʉ́a leen ńké ńgwa kʉ̀a. 28Ábalaham fag menjʉ̀njÿò sɔɔnmbʉ́a, 29Abimelɛg zɛ́te yé ngie: «Ńtí kɔ́ ɔ̀ fag mɔɔn menjʉ̀njÿò sɔɔnmbʉ́a?» 30Ábalaham tsɔ́ʼ ngie: «N náa mɔɔn menjʉ̀njÿò sɔɔnmbʉ́a né gù lélɔg ńkẅé ntáŋ ngie kwàʼ mèŋ zɔ la túŋ wɔɔn ntse.» 31Áa mmó gie á la gÿo mé tóŋo yɔɔn jʉʼ lê Mbɛɛshÿeba#21:31 Áa na shwóŋè Ébɛ̀, ngwɔ́ mé júʼ yɔɔn ndù na shÿó sépʉ́a; áa na menkàŋ 28–31: lezíŋ Mbɛɛshÿeba ngwɔ́ mé kyagte ngie: «ntse ntǔŋ menjʉ̀njÿò sɔɔnmbʉ́a» kà «ntse ntǔŋ kʉ̀a» wɔ́ɔ., ńtí nue áa jʉʼ gie pɔ́ la gwaa gwa kʉa, ńtyé wó.

32Pɔ́ la gwɔ́ tà ńgwa kʉ̀a á Mbɛɛshÿeba púʼu, Abimelɛg pɔ́ Pikɔɔ tándá mekáŋa twó Abimelɛg cʉ́me mánzsè ḿbiŋ nzèm lé ngwòŋ pʉ̀a Filisi. 33Ábalaham pye tsɔ́ tÿǒ, á Mbɛɛshÿeba, lezíŋ yɛ̌ tÿǒ gwɔ́ lê Tamalísè. É sẅíŋte Cʉ̀apʉ̀a, ńtóŋo yé lê Ssé temì. 34Ábalaham la tsẅé tsɛ̀ɛ ngwòŋ pʉ̀a Filisi tɛʼ.

Currently Selected:

Nzyeté 21: nnh

Highlight

Copy

Compare